التهويد فكرة ومبدأ وعقيدة...

بداية من محاولات هرتزل لايجاد مكان يلم فيه اليهود من بقاع العالم المشردين فيها ومرورا وباقتراحات هربرت صمويل البريطانى الصهيونى ووعد بلفورد ومذابح دير ياسين وصبرا وشاتيلا وغزة والمجازر اليومية اللى بتتم فى كل حتة فى فلسطين كانت الفكرة اللى اتبلورت فى تهويد كل ماهو فلسطينى ويمت للعروبة بأى صلة من قريب او من بعيد ...الفكرة انتقلت لفرق الهجاناة والجيش الصهيونى وقادته فى صورة اكثر تعقيدا وثباتا فى النفوس المظلمة القذرة وكانت فى صورة مبدأ يقضى بابادة الفلسطينيين شيوخا ورجالا ونساءا او ترحيلهم بالقوة وأخيرا أصبح التهويد عقيدة بيغرسها الحاخامات اليهود فى نفوس الاطفال والطلاب الاسرائيلين فى المدارس والجامعات ومنهج ماشى عليه المجتمع الصهيونى داخل وخارج اسرائيل بمباركة أو عجز الغرب الضلالى والشرق الجبان الضلالى هو كمان.

ابادة ومجازر ومذابح وتزييف وتبديل حقائق وصلت حتى لتغيير اسم الحشرات والصاق اسماء جديدة لها تنتمى للدولة العبرية اللقيطةعملية منظمة ومثيرة للسخرية أحيانا ومثيرة للغيظ والاشمئزاز طول الوقت والاغرب انها تقابل بشىء عظيم من اللامبالاة من الجانب العربى بل وفى بعض المواضع عند كتاب عرب تكون مثارا للاعجاب والتغنى بتسلسلها وطريقة اتمامها والدقة المتناهية فيها ...للاسف الشديد هذا هو موقف بعض الكتاب والمثقفين العرب ويتعدى الامر لاكثر من ذلك عندما ندعمها شكلا وموضوعا وبكل ما أوتينا من قوة

ثقافيا الضربة موجعة جدا والضارب من معسكرنا او محسوب علينا...كلامى على الدكتور جابر عصفور ومشروعه لترجمة الادب الاسرائيلى-ان جاز تسيميته ادبا-ووقوفه معارضا لكل من قلل من اهمية المشروع أو حاول اقناعه بترك المشروع المشبوه وكأنها حرب ضروس يشنها من أجل شىء مهم...بدلا من احتضان الثقافة والتراث الفلسطينى يأتى الفذ العبقرى بمشروع زى ده بحجة اعرف عدوك طب مافيه مراكز متخصصة لدراسة ومعرفة عدونا ايه دخل اللى هيحصل ده بقى فى معرفة العدو مبقاش فاضل ناحية مطبعناش فيها مع اسرائيل غير الناحية الثقافية والشعبيةوبعدين عدو ايه اللى لسه هنعرفه؟!!!وبعدين هما الصهاينة ناقصين منافذ يفرضوا منها وجهة نظرهم ع العالم؟!!مش كفاية السينما الامريكية ووسائل الاعلام الرهيبة اللى فارضين سيطرتهم عليها؟!!
حتى حائط الصد الاخير اللى كنا بنحتمى فيه بدأ يتلقى الضربات وبايدينا احنا مش ايدين حد غريب ...يمكن عشقى الشديد لفلسطين ولتراثها الشعبى والثقافى هو اللى يخلينى اقول كده واكره مشروع زى ده بس بجد حتى لو اى حد بص بعين العقل للموضوع هيلاقيه مفيش منه فايدة ومش هنشوف جديد ولا حاجة لما نترجم الادب الاسرائيلى مش من باب ان احنا بكده هنبقى عرضه لغزو فكرى من اليهود وان كن ده صحيح بس فعلا الموضوع ميستاهلش التعب اللى هيحصل عشان يتم

شعبيا فى مصر والوطن العربى بدأت مساحات فارغة تظهر على الساحة الفنية والثقافية فى كل بلد من البلدان العربية بدليل مثلا عندنا فى مصر ظهور فرق من الشباب بتعيد احياء التراث وبتغنى لسيد درويش وللشيخ امام مثلا وبتلاقى اقبال جماهيرى كبير جدا فى الشارع ...اذن احنا عندنا مكان فاضى ممكن نستقبل فيه شىء جديد ومفيد لنا فبلاش المكان ده نملاه باللى يضرنا زى مادكتور جابر عايز يعمل ...المكان ده بقول وبككرر مليون مرة ممكن نسقبل من خلالة الثقافة الفلسطينية بكل روافدها ونبقى كده احتضنا بعض وقوينا بعض ووقنا حتى ولو موقف شرفى من عملية التهويد البشعة اللى بتتم فكريا قبل ماتتم ع الارض ويمكن الناس بتاخد بالها اكتر من عمليات معينة بتحصل ع الارض زى حكاية الحفريات اللى بجوار المسجد الاقصى ومبيخدوش بالهم من التهويد الفكرى اللى بيتم وبيكون اكثر خطورة بمراحل من العمليات اللى بتتم على الاثار والمقدسات لأن التهويد الفكرى ده مش عملية موجهة للفلسطينيين بس .

اتخيل -اذا تمت عملية الترجمة دى-طالب جامعى بيقرأ فى رواية لاحد الكتاب الصهاينة ومقتنع ومتبنى لقضايا اليهود ومثار ومتعاطف جدا مع هولوكوستهم ومعاناتهم اليومية ضد الهمج الغوغائيين اللى بنسميهم الفلسطينين!!!...ده بالنسبة لطالب جامعى بيقرأ رواية أمال بقى لو الغزو الفكرى اللى احنا بنمهدله ده وصل للمواطن البسيط الغلبان اللى على قده ؟!!!....غريبة جدا والله احنا بنعمل تصرفات تخلى الواحد يتجنن هو احنا عارفين تاريخنا وبلادنا صح عشان نروح نترجم وننقل عن العدو؟!!!....خلاص الذاكرة نسيتت المذابح والحروب والمر اللى شربناه من اليهود؟!!!...خلاص بقوا على قلبنا زى العسل وحكوميا وسياسيا معاهم وسمنة على عسل وثقافيا كمان؟!!!...

ابجديات الرفض

بكل بجاحة ووش مكشوف ممكن اجزم ان مفيش اى متعة جنسية بتعود على المتحرشين وشىء طبيعى ان المتعة الجنسية دى شىء مش بيتحقق غير بعد تحقق حاجة اسمها الخصوصية يعنى بالبلدى العبيط كده لازم الموضوع يبقى متدارى الا اذا كان بقى فيه مرض نفسى عند المتحرش ودى حاجة تانية وموضوع تانى لان ده لو موجود فعلا يبقى المجتمع كله مريض نفسيا ويافرحتك يادكتور احمد عكاشة!!!....طيب تبقى كده المتعة الجنسية هى سبب مستبعد من اسباب وقوع عملية التحرش فى الشارع المصرى وانتشارها طوووول السنة طالما فيه تجمع كبير بس احنا بنركز عليها فى العيد بس يمكن عشان فيه حاجات تانية بتشغلنا والرغى فيها من وقت للتانى واحنا اجدع ناس يخترعوا ويفبركوا ويندمجوا فى التظاهر بحل تفاهات اصروا على انها مشاكل ولازم تقتطع وقتهم كاملا

لو قسمنا الناس اللى بتقوم بعملية التحرش دى دللوقتى هنلاقى غالبيتهم شباب لم يحصل على قدر كاف من التعليم ونسبة مش قليلة من الاطفال اللى متعدوش سن ال18 والنسبة دى بدات تكتر جامد والقاسم المشترك بين الشريحتين دول هو زى ماقلت وبكرر تانى لسه مقدروش يكونوا شخصية سوية ومعتدلة بسبب قدر التعليم اللى تلقوه وان كانت الشريحة التانية عندها اسباب تانية ممكن نقول انها محركهم تجاه عملية التحرش زى التقليد لفعل الشريحة الاولى دى على اعتبار ان دى حاجة زى السيجارة من وجهة نظرهم بتثبت رجولة اللى بيعملها

طبعا فيه ناس تانية غير الشريحتين اللى انا قلتهم دول بس انا ركزت على النسب الاعلى من خلال مشاهداتى ومتابعتى للموضوع اللى بيتكرر دايما وحاجة تانية مقدرش اغفلها وهى وجود متحرشات بالذكور....ايووووه فيه متحرشات ومتنساش عزيزى المواطن ياللى حظك ساقك لهنا وبتقرالى ان احنا مجتمع منحل ذكورا واناثا وبص حواليك وانت تأمن على كلامى

ضمير اى امة هو المبدع او المبتكر او الفنان والفن دايما وابدا بيكون وجدان الشعوب وبيرتقى بمشاعرهم وباحاسيسهم وبتصرفاتهم وبكل مايصدر عنهم لشىء من التحضر والتمدن ...طيب لما نجم الجيل عافاه الله واعزه لمن نجموه يغنى ويقول(خليها تاكلك )وحاجات تانية مفيش داعى اذكرها ولما نجم تانى نصبه نفس الجيل يقول فى احد افلامه (-a7a-؟!!!)...مفيش خلاف على ان ابجديات كل شعب بتتغير من وقت للتانى حسب ظروف العيشة واللى متنيلين عايشينتها بس برضه فيه مصفاة بتنتقى وبتختار وبترسخ وتثبت اللى يفيد وتستبعد اللى يضر وياذىو حااااليا المصفاة دى مخرومة وبتعدى اى حاجة ومبقاش فيه حاجة اسمها ضمير امة واو بقى بقى فيه حاجة غير اللى نعرفها ويااما بقى نرجع من اول وجديد ونعيد ترتيب دماغنا- ونمسك المصطلحات اللى متستفة فيها وننفضها لان الزمن عمل فيها عمايله -يااما نرضى بالواقع ومنشتكيش بقى ونرضى بتامر حسنى (-خليها تاكلك-) كنجم جيل ونرضى بمصطفى كامل(-عليا الحرام من دينى) كمثقف بيمثلنا وبيوجهنا ونرضى بهيثم شاكر(-بلا قومية بلاخرة-)كرمز وطنى بنلتف حواليه وبنغنى معاه ارمى حمولك عليا واوعى حد يقولى انى بنتقى امثلة وحشة لان دول اللى موجودين ع الساحة ونادرا مابتلاقى حد تانى واخر مرة شفت فيها حد محترم وبيقدم فكر ورؤى محترمة جه يتككلم فى برنامج من برامج التوك شو اللى موجودة كان وسيم السيسى وكرم حجى ومبقيتش مصدق وكنت عايز ادخل جوه الشاشة واخدهم وامشى ماهى حاجة متتعقلش ازااااى الناس اللى مستنية خناقة شوشو ومرتضيللى يجيلهم ناس تصدع دماغهم بعلم زى المصريات ولا اى حاجة تانية وحقيقة واقعة بقى ومش كلام مصاطب ان ده اصلا اتجاه الدولة ومش عارف هما اصابهم الغباء وازاى يقصدوا تسطيح النناس بالطريقة الفجة دى والمخرج عايز كده والجمهور اتهبل وفاتح بؤه وعينيه مبترمشش

اتفقنا ان فيه ابجديات جديدة عدت م المصفاة-طالما انا قلت كده يبقى اتفقنا متتعبونيش معاكم-ومن ضمن الابجديات الجديدة دى ابجديات الرفض....وبديهى جدا ان اللرافض بيستخدم ابجديته اللى بيمتلكها حسب موقعه وحسب سلطته واللى يقدر يعمله بحيث يكون من وجه نظره انعه مؤلم ورادع للى بيرفض فعله يعنى مثلا ابن اختى الصغير لما ميعجبوش حاجة منى بيشد شعرى لانه فهم انى بتضايق من الحكاية دى وعارف ان له مساحة مش بطالة فى قلبى فبيشد وقلبه جامد و كان ممكن يعيط بس او يعمل اى حاجة تانية لو سلطته ووضعه ميسمحلوش انه يشد فى شعرى وهى دى ابجدية الرفض بتاعته والابجدية دى بتختلف من شخص لشخص فمثلا ممكن تكون الابجدية دى عبارة عن كلمات سبارتكوس الاخيرة وممكن تكون فى احمد العربى واللى يفهم يفهم واللى ميفهمش بيكفر ويقول زنديق ويهدر دمه

نسيب ابجديات رفض ابن اختى وأمل دنقل ومحمود درويش ونيجى لابجديات رفض المواطن المصرى اللى ظروفه معروفة ومكشوفة قدام الكل...الشاب المحدود الدخل المحدود النصيب فى التعليم لما يجى يعترض فى او يبدى غضبه على مجتمعه فى وسط حشد من الناس ياترى ممكن يعمل ايه غير اللجوء لصدر او مؤخرة فتاة؟... اى فتاة مهما كان شكلها ولابسة ايه ان شالله يارب لو كانت لابسة خيمة متعرفش وشها من ضهرها فالعملية مش عملية شهوة او شبق جنسى قد ماهى عملية رفض ونبذ وغل من مجتمع باكمله...الشاب المصرى المحدود الدخل والمسطح والمهمش لما حفنة اللاعبين اللى متسلط عليهم الضوء يحققوا مكسب تلاقيه من غير مايشعر طالع يرقص فى الشوارع لحاد الصبح زى السكران اللى مش عارف بيعمل ايه غير انه ارتاح لما كسر عربية ولا محل فى وسط احتفالاته المزعومة والمروج لها من كل الجهات الللى تهمها عملية التسطيح السابق ذكره....وفى فترة زمنية مش بعيدة كان لما المجتمع بيرفض حاجة ممكن يعمل مظاهرة او وقفة احتجاجية مش يتحرش ببعضه او حتى انقلاب عسكرى بس كان بيبقى مجتمع العالم بينظرله نظرة محترمة مش نظرة انحلال وقلة ادب

اخيرا احنا بجدياتنا اتغيرت ومن ضمنها ابجديات الرفض وكل واحد بيرفض حسب مستواه الفكرى والثقافى زى مابيشوف الدنيا حسب مستواه الفكرى والثقافى برضه ورد الفعل من المشاهد اللى ع البر وبيتفرج ع الحكاية من بعيد بيتغير مابين تقدير للرفض ده او استنكار ليه



زمان كانوا بيغنوا وبيقولوا-واثق الخطوة يمشى ملكا
دللوقتى بيغنوا وبيقولوا-اه يانى يانى يانى مش هعمل كده تانى
زمان كنا بنحارب مع بعض وبنتهزم وبننتصر
دللوقتى بنحارب فى بعض والطرفين مهزومين
زمان الناس فى الخرطوم شالت العربية بتاعة عبدالناصر من ع الارض وهو راكب فيها
دللوقتى اى رئيس عربى بيظهر ع الشاشة فى نشرة اخبار بيتف عليه وبيشتم

(لبيك يافرعون)

العيد بقى له كام سنة كده بيجى ويسيب وراه ذكريات مؤلمة واوقات لازم الواحد ينفجر عشان يقدر يكمل حياته


العيد قعيد الهم والافكار
واسير كسير النفس
وعاليه قصايد ردح
ويا النفاق والمدح
ويا حِِكاوى الدبح
بين ناس فى نفس الكار
فى الكعبة ميت حجاج(بفتح ال-ح-)
ومكة حفرت قبر
للى جايين بالفتح
العيد قعيد الصبر
تلميذ بليد خايب
قاعد ف اخر الفصل
يتهجى فرح بعيد
مطعون بهم تقيل
العيد قعيد وعليل
مصبوغ بلون الذل
بيمد ايد للعون
ناطق هتاغه المر
(لبيك يافرعون)
خايف يموت تانى
او يترمى مسجون
العيد مكانش جبان
وطلته كانت
وسط الهموم ثاير
طب ليه صبح ملعون؟!
من فوق وشوشنا..
بيلم ضحكتنا
ويسم سكتنا
ويصرخ...
(ياناس مرغم)
..............
بخل السنين
طارح امل مبتور
وضحكة هلكانة
مش قادرة تتماسك
وسط العته والزور
بتفر هربانة
وشيخ عجوز
بيلاحقها
وبيحتمى فيها.....

الحشيش بتاع العيد اتمسك..

بداية كده كل سنة وانتم طيبين
زمااااااااااااااااان مش زمان اوى يعنى كانت مظاهر العيد مختلفة جدا عن دللوقتى يعنى مثلا يحصل تجمعات للاهل والاصحاب وكله يبارك ويهنى بعضه ونقعد ناكل فى الكحك ونتفرج ع الدكتور اللى جايبينه فى القناة الاولى يحذر من كتر اكل الحاجت دى ويقول بتجيب سمنة ومش عارف ايه والكلااااااااام ده ونفضل ناكل برضه مبيهمناش ويفوت شهرين وشوية عيبد الاضحى يدخل ونتجمع برضه بس فى العيد ده بقى بناكل لحمة ايوه والله العظيم لحمة من ام 45 جنيه ونفس الدكتور يقول محدش يكتر من اكل اللحمة برضه بس هيقول لمين دى هى اصلا مبتدخلش البيوت غير فى عيد الاضحى
دللوقتى فيه حاجة مهمة اوى اتضافت لمظاهر العيد وطبعا من غير مقدمات هى الحشييييييييييش ايوه من حق كل واحد حسب الحقوق اللى كفلهالنا الدستور انه يحشش براحته بس الشرطة مش فاهمة كده بقى وكل ما افتح اى حتة اشوف الاخبار الاقيهم ماسكينلى بتاع 10 كيلو حشيش وماسكين كام تاجر بانجو ومش عارف كام كيلو هيبروين ليه معرفش وطبعا بما اننا مقصد وهدف كلل مؤامرات المنطقة فهنضيف اللى حصل ده كمؤامرة من مؤامرات كتيرة بتحاك ضدنا وبتستهدف مزاجنا ومش بعيد كمان شوية الشعب يطالب الشرطة بمرتباتهم اللى بيقبضوها من ضرايبنا ودم قلبنا اصل الحكاية بقت استغفال لايطاق يعنى نقبضكوا وتقلوا مزاجنا؟!!!!بس معلهش محدش يقهر نفسه والمحافظات اللى حشيشها اتمسك احنا هنقوم معاهم بالواجب واى حد يحتاج مننا حاجة فاحنا جاهزين لان شرف المهنة فوق اى اعتبار
نداااااء من شباب البلد اللى زى الورد الابيض الى القيادة العليا فى مصر(يااما توفرولنا بيئة نضيفة بعيد عن اى انحطاط فى الفكر والحياة بشكل عام يااما توفرولنا الحشيش عشان ننسى وبعدين ما تطلعوا الدكتور بتاع اللحمة يحذر من الحشيش شوية اشمعنه الكحك واللحمة يعنى؟!!مفيش حد اجدع من حد )

التطبيع العربى العربى+تحديث

كاريكتير من جريدة القدس العربى

زى طريقين طريق رايح وطريق جاى نقدر دللوقتى نرسم منحنى هندسى لعلاقة العرب ببعضهم ومشاحناتهم فى العلن وعلاقتهم باسرائيل وكسب ودها فى الخفاء ولا استثنى اي دولة من التمثيل بدرجة او باخرى فى هذا المنحنى الحقيقى اللى مبقاش يقبل اى تشكيك اطلاقا واللى ميشوفش من الغربال يبقى اعمى...قومية عربية وتجارة بينية وسوق عربية مشتركة كلام من يوم ماسمعته انا وجيلى وهو فارغ من المعنى ولكن كانت هناك شكليات توحى بعكسه ودللوقتى الشكليات دى هى كمان بدات تنتهى تدريجيا بين الدول العربية وبعضها ويمكن اللى اكتر من كده كمان ان بعض الدول بدات فى الانقسام على نفسها وبدات تاكل فى بعضها من جوه والمشهد اجارك الله بقى غريب جدا وتحس ان كل دولتين تحصل مشكلة بينهم انهم زى مايكونوا اتنين ستات فى منطقة ميتة رجالتهم غابوا عنهم وبداوا يتخانقوا مع بعضهم مستخدمين كل الوسائل فى اهانة بعضهم فى حين ان فيه طفلة لقيطة بتتفرج عيهم من قريب وابتسامة الفرح والانتصار على وشها اللى لامم دبان المنطقة كلها...مصطلحات زيها زى اللى فاتت بالظبط تضليل وشكليات وكلام ف الهوا وضحك ع الدقون وزى ماتقول قول بقى سواء هتقول احنا بنرفض التطبيع مع الكيان الصهيونى المزروع بينا غصبا او هتقول بكره اسرائيل او اى كلام من الشكليات اللى مالية كلام اى مسئول يطلع علينا بطلعته البهية ويتكلم ...مسئولينا يقولوا واحنا نتحمس ونردد وراهم والبضايع الاسرائيلية تطلعلنا لسانها فى قلب اى منطقة استثمارية نروحها ...كل فرد فى العيلة ان جاز تسميتنا كعرب عيلة واحد بيطلق للسانه العنان فى قذف مثيرات الحماسة من رفضه للتطبيع وكرهه للعدو الصهيونى وبيجرى ء عشان يعمل عكس كلامه بالظبط ونمو التبادل التجارى الاسرائيلى العربى يشهد بكده واتفاقيات تجارية تانية تشهد بكده

اشياء تافهة جدا قد تثير ثائرة كل شعب من الشعوب العربية على الاخر وتتفاقم المشكلة لابعد حد ويزيد من تفاقمها وتورمها اصرار كل طرف على انه يبص للمشكلة بعين واحدة واصبحنا من الان نحتاج- وللاسف ليس على سبيل الترف الفكرى -لدعوات تطبيع بينى

الطامة الكبرى اللى هتودينا فى ستين داهية كلنا واللى المفروض تسبب الرعب لكل ذى عقل فى العالم العربى هى مجموعة الكوادر الحاكمة باسم الانظمة العربية على اختلاف اشكالها ولو رسمنا كده شكل هرمى بيمثل هيكل اى نظام عربى هنلاقى راسه رئيس الدولة مثلا وتحتيه شوية قيادات كبار وتحتيهم الرجالة بتوع النظام اللى بيمشوا الدولة اهما بقى الرجالة دول اللى جايبلنا المصايب كلها لانهم بصراحة محدودى الرؤية والتفكير عشان النظام او راسه نفسه عايزهم كده عايزهم عساكر فى رقعة شطرنج يشيل ويحط اللى بمزاجه عشان محدش يغلس عليه ويقوله لاء..اعتقد ان بلاد يزوى فيها المثقفينواهل الخبرة والتخصص (وده باين جدا اعلاميا) ويركنوا على الرفوف ويحكم مجموعة من انصاف المتعلمين واللى سهل جدا يتسببوا فى خراب مالطة ومحدش هيلحقا على فكرة لان الكوادر اللى بتكلم عنها حاكمة فعلا بقبضات حديدية على معظم البلاد فى عالمنا العربى وهى شخصيات من السهل جدا التاثير عليها من اى قوة خارجية يعنى المجال مفتوح ع البحرى لكل من يريد التخريب ومثال بسيط جدا للمشكلة الموجودة دللوقتى اللى هى مشكلة اعتداءجماهير الجزائر على جماهير مصر عقب انتهاء مباراة السودان الاخيرة...المتامل للمسالة دى ممكن يستتنج ماهو فى غاية الخطورة ومالايتحمل السكوت عليه ده لو بص لسبب اللى حصل ولو بص لعملية شحن الجمهور ده على ده تمت ازاى...يقال ان جريدة الشروق الجزائرية دى تابعة للمؤسسة العسكرية فى الجزائر ولما جريدة تابعة لمؤسسة عسكرية تنشر اخبار كاذبة عن قتلى وجرحى فى القاهرة بعد ماتش كورة تبقى كارثة تبين كلامى اللى قلته ف الاول ده وهو ان الكوادر الحكمة فى معظم البلدان العربية جهلة ويمكن التاثير عليهم من اى طرف يريد بث سمومه فى جسد متهالك اصلا اللى هو جسد امتنا العربية وعلى الجانب الاخر اللى هو جانب مصر طبعا فيه ناس غذت العملية هى كمان وراحت عملت مبادرات وكاننا فى حالة حرب وكانهم انبياء السلام اللى بعتهم ربنا عشان يخلونا من ويلات الحرب دى وطبعا الانبيا دول برضه من كوادر المنظومة الحاكمة فى مصر
مفيش حد يستطيع دللوقتى نفى صفة البربرية والهمجية عن جمهور الجزائر ولكن مين اللى وصلهم وشحنهم للدرجة المخيفة دى اللى تخليهم عايزين يقتلوا ويدبحوا فى منافس ليهم المفروض انه بينافسهم فى منافسة رياضية؟...هما هما اللى بيمشوا البلد كقيادات للمنظومة الحاكمة هناك هما هما اللى بيظهروا فى تلفزيونهم وبيكتبوا فى جرايدهم وبينقلوا اخبار تستحى من نقلها جريدة مبتدئة هما هما اللى هيودونا فى ستين داهية لو لم تنتبه الشعوب العربية كلها للكلام ده
خلاص ازمة وحصلت وبتطلب دللوقتى مننا كشعب وحكومة ونظام اتخاذ موقف صارم لوقفها وبالفعل اتخذنا الموقف ده على الجانب المصرى الاكثر تضررا فى هذه الازمة ومين عارف ممكن حاجة زى دى تحصل تانى ونبقى احنا الجانب الملوووم ومحدش يقدر يقول على الاطلاق ان خلاص حاجة زى دى مش هتتكرر تانى لان اسباب الازمة موجوين فى اماكنم وبسم الله ماشاء الله بيستفحلوا يوم عن التانى هنا او هناك...شعبيا المفروض ان احنا خلاص عرفنا علتنا ودائنا فين على الاقل فى المرحلة دى وياريت نغير بقى وياريت منبقاش عجينة لينة كده تانى لاى حد يجى يشكل فيها ويعملها قنبلة وتفرقع فينا ف الاخر

من باب التغيير(تبادل الثروة)...

ايمانا منى بوحدة هذا الشعب

وايمانا منى بدور الاختلاف

فى تفجير طاقات الشعوب

ومحو أى معوقات للتقدم

وقضاءا على الملل وأشباهه

اعلن اننى يمكننى التخلى عن

دورى كفرد عادى جدا وغلبان

لصالح أى ملياردير مصرى

(درءا لاى شبهات ملهاش لازمة)

يريد لعب دور اخر درءا للسأم

(عملية تبادلية طبعا)

انا مش انت انا غيرك....

هكذا تبدأ الوكسة والخيبة التقيلة استعدوا للاقلاع
فور خروج اى مولود مصرى م العتمة للدنيا تلاقى كل افراد الاسرة بيتخانقوا على اسمه وكل واحد طمعان ان الواد او البنت يتسموا على اسمه وتلاقى خناقات بين كبار وصغيرين وتلاقى بنات العيلة كلم يفضلوا يتخانقوا ويشدوا فى شعر بعض والولاد يطحنوا بعض ضرب عشان كل واحد يثبت احقيته بان المولود يتسمى على اسمه طبعا الواد بيتسمى ف الاخر على مزاج ابوه او امه فى اغلب الاحوال وبقية العيلة شوية شوية بتنسى الموضوع الا اذا بقى حد شد شعر حد بعنف شوية او حد ضرب حد بوكس وعلم فبتبقى ذكرى مؤلمة لبعض الوقت وبعدين بتتحول لطرفة تثير عواصف الضحك فى كل لمة عيلة
سيبنا من الاسم دى حكاية وعدت على خير وربنا امر بالستر وتعالوا لحاجة تانية تغيظ اكتر ...فى المرحلة الابتدائية فى مدرسة فى مصر فيه سؤالله اجابة واحدة او اتنين بالكتير قوى) (تحب تطلع ايه لما تكبر؟...الاجابة طبعا يااما دكتور يااما ظابط)..طبعا اجابة الولد او البنت الصغيرين بتبقى نابعة من اسلوب تربية فى البيت بيهدف لحاجة واحدة بس وهى تنشئة صورة كربونية من صورة اخرى يعتقد الاب او العيلة بانها انسب صورة لابنهم او بنتهم وطبعا هما اللى عارفين مصلحة عيالهم وطظ فى اى ميول لاى طفل صغير بعد كده طالما الاب والام اختاروا وحددوا بمزاجهم وكانهم بيربوا فى تمثال من الصلصال لا عنده مشاعر ولا بيحس ولا عنده اى مساحة من الحرية ممكن يتحرك فيها ويشغل عقله ودايما موجه زى عروسة ماريونت مهما كبر
نسيب شد الشعر ونسخ الاطفال الصغيرة بالكربون ونروح لحاجة اغرب شوية هى امتدا لعملية مسح الشخصية اللى بتمارسها العيلة على اطفالها وتحريكهم على هواهم هما بس على كبير شوية...ياترى لحاد امتى ممكن الابن يقبل الجملة دى؟(يابنى انا عارف مصلحتك اكتر منك...)...عن مشاهدات كتيرة الجملة دى بتترفض لما الابن يدخل مرحلة المراهقة وبتبدا طبعا المشاكل تبدا بين المراهق وبين ابوه وبعد شوية المشاكل دى بنتهى ياما برجوع المراهق للشرنقة بسبب احتياجاته المادية او باستقلاله شوية بشوية اذا قدر يستقل ماديا ...طيب انا بصراحة احترت ومعرفتش اقول ان بلدنا دللوقتى لسه موصلتش لمرحلة المراهقة بتاعتها ولسه معرفتش تتمرد وتقول لء للنظام الابوى اللى عباقرة النظام بيتكلموا عليه دللوقتى بس فى اعتقادى اننا على اعتابها
المفروض ان الانسان فى بدايات حياته يترك بعد تلقينه ثوابت مجتمعه وعقيدته يحدد هو هيختار ايه براحته ويحدد هيبنى نفسه ازاى بتفكيره الخالص ومحدش يتدخل الا ناصحا لا مسيطرا ولو اتمل كده مستحيل هتلاقى نعرات التعصث الاعمى اللى موجودة دللوقتى فى كل حاجة وبعدين لما تترك الحرية لكل فرد فى المجتمع لتشكيل وبناء شخصيته هو من نفسه هيرجع وهيختار جذوره لان الانسان بطبيعته بيحتاج ماينتمى اليه عشان يحس بالامان دى حاجة وعشان يلزمه مظلة يعيش تحتها حياته وفى اعتقادى ان ده لما مبيحصلش بتكون النتيجة فرد متعصب تعصب شديد ومش شليف غير نفسه بس
عادة مايولد الابداع من رحم الاختلاف لاء مش عادة ده دائما وابدا ربنا خلق الاختلاف فى كل شىء واللى يتامل يعرف ده كويس ومفيش مجتمع متدم دللوقتى الا وبيرسخ مبادىء مفادها ان الاختلاف شىء ضرورى والتشابه بيقتل اى محاولة لابتكار الجديد وبيضفى جو من الملل والرتابة على الحياة وع اللى فيها وديناميكية الحياة اصلا هى الاختلاف ده يروح وده يجى ويكمل ولو اللى بييجى متعصب اوى زى الانسان كده عمره ماكان هيوافق يكمل مكان اللى بيروح وربنا خلق الدنيا كده احنا بقى عايزين نحشر نفسنا فى اوضة واحدة ليه وبقية الشقة واسعة.
عزيزى المواطن انا غيرك ...انا مش ابنك اللى ممكن تنسخه بكربونة...انا غيرك فطبيعى لما تقول حاجة مشى مطلوب منى اقولك امين واعترافك بوجودى ككائن مستقل عنك هو اعتراف بوجودك انت كمان
عزيزى المواطن بيقولوا عليك غلبان ووكمان بيقولوا عليك انك مادة سهلة التشكيل بيقولوا عليك انك عاطفى قوى وياما انضحك عليك بالكلام الحلو وتاريخك بيشهد بكده عزيزى المواطن ياللى بيقولوا عليك مادة سهلة التشكيل ياريت متكونش كده وياريت تاخد بالك من الشخصيات اللزجة الجهلة اللى ملوا البلد اعلاميا وحكوميا وفى السلطة كمان خد بالك لانهم بيحاولوا يدخلوا دماغك اشياء قذرة بتثبط من عزيمتك اللى هى مش ناقصة اصلا...وخلى بالك وحياة اغلى حاجة عندك من الحاجات المهمة وخلى بالك من مشاكلك ومتطنش وافرح بس ادى كل حاجة مقامها(لست اخفى حماسا وتشجيعا للمنتخب المصرى لكرة القدم ولكن لكل مقام مقال ولكل شىء حجمه الطبيعى دون تضخيم بلا معنى)
عزيزى جناب سيادة حضرة المواطن اشمعنه انا يعنى مبتسمعش كلامى ياخى؟!!!...بالذمة فيه حد بيحترمك كده زيى؟!!!مش بقولك حاسب من الشخصيات اللزجة ؟!!!يااخى ماتسمع الكلام بقى ...انت ازاى تفضل قاعد طول اليوم قدام ستوديوهات التحليل بتاعة الكورة؟!!ايا كان اللى بيقدمها ياخى...ازاى؟!!!ومع كده والله معظم مقدمينها شخصيات لزجة من اياها اللى لسه محذرك منها ..دول بيعملوا كده عشان يكلفتوك ويلهوك عن بلاوى سودة
عزيزى المواطن خلى بالك فيه حاجة اسمها هدف قومى كلنا بنلتف حواليه وكلنا ممكن ندفع من دمنا عشانه انا عن نفسى ممكن اموت فى سبيله واللى جنبى ممكن يحمينى بروحه من اى شر حتى لو كان مختلف معايا فى العقيدة خلى بالك مليون مرة الكورة او وصول فريق كورة لبطولة او فوزه بيها مش هدف قومى خلى بالك شعورك بالنتماء اللى بيظهر ده شعور لحظى الشعور الحقيقى لما نتجع على نجاح وتقدم بجد خلى بالك اننا مش رايقيين اوى ومش متقدمين اوى خلى بالك احنا من دول العالم التالت وخلى بالك البرازيل نفسها مبتعملش عمايلنا دى او كانت بتعمل وعقلت وخلى بالك متخسرش رفيق كفاح عشان حجة المفروض انها متكونش فى مقدمة اولوياتك
عزيزى المواطن فاكر لما صبيت جردل جاز على ولد عنده 17 سنة وولعت فيه عشان بيشجع فريق غير اللى انت بتشجعه؟فاكر لما ضربت لاعب كورة بالمطواة فى رجله عشان من فريق تانى ؟!!!انت ازاى تعمل كده؟!!!كله من الشخصيات اللزجة اللى عمالة تشحن فيك وتصورلك ان كل الدنيا المفروض تبقى زيك وتفكر زيك كل ده عشان فهموك انك عندك الحقيقة المطلقة واى حد غيرك شيطان
عزيزى المواطن بطل بقى اللى انت بتعمله ده واعرف انك مش عايش لوحك فى الدنيا واعرف ان فيه حد غيرك ياراااجل دول كمان بيحاولوا يعملولك رموز هايفة تاخدها مثل اعلى وعمالين يلقبوهم بالقاب عجيبة اوى ايش الساحر وايشى القديس وايشى وايشى طب بذمتك ياعزيزى انت تعرف محمد الرفاعى؟ولا عبدالمنعم رياض؟ عزيزى المواطن فوق بقى عشان كده عيب انت بتدى امور تافهة اكتر من حجمها بكتير وبعدين يااخى انت بتستكتر على غيرك انه يبقى عنده اللى بيحبه وبيشجعه؟!!!وتفضل تعمل عمايل مالهاش لازمة خالص؟!!!(همسة فى اذنك -لديك تاريخ يثبت انك لست بهذا السفه)
ينفع عشان مطش كورة نبقى مسخة ومسخرة ونبقى مادة سخرية فى الصحافة الصهيونية
عزيزى المسلم
عزيزى العربى
عزيزى المصرى
افهم بقى عشان احنا كنا متقدمين قوى لما كنا بنشغل مخنا وبنفهم ولما بطلنا نشغله اتاخرنا اوى وبقينا حاجة تكسف اوى