الجمعة، 12 يونيو 2009

تساهيل

وف يوم مالوش عنوان
الشمس طلعت كشرة
وادارى نورها كمان
نسى ان بينا عشرة
مشى الامل مكسور
واخد على خاطره
الشمس نسيتنا
ونسينا برضه النور
محكوم علينا بالانتظار...
-----------------
سمرا ونحيلة وكعوبها متشققة
اكلت وشربت فضلة الاسياد
ضحكتها مالية الفم
والغنوة هى الغنوة
امتى الخلاص بقى؟؟؟
-----------------
وردة ودبلت قبل الاوان باوان
وخانوها مين قطفوها
وعظموا مين خان
جفت دموعها بعد الجمال مانشرى
وخلاص.....
معتش يفرق معاها نحل..او دبان
-----------------
اتخلفى واتزيفى اكتر واكتر
واطفى ولادك وانطفى وامليها عسكر
ايه الحكاية وايه بيجرى؟
الزيف عفى والنور مكسر؟
مخنوق يانيل
علقم ومر
وان بدلوك ميه بسكر!!!
-----------------
سايرة وماشية دى الحياة تساهيل
وملوك تورث كل جيل ورا جيل
ومعادلة ناقصة واغرب مافيها 3 مجاهيل
المصرى..والقهر..ونهر النيل
----------------
ياللى الاغانى بتشتهيكى
وانت غريبة بتشتهى ذل وسكوت
ياللى الاغانى بتشتهيكى وتشتهى من جوف عيالك
كل نبرة صوت
ياللى الاغانى بتشتهيكى...
اخضر ربيعك والهوى عمال ينادى
ليه تحكمى بالموت علينا واحنا بنرفض ننسحب ونموت؟!!!
--------------------
ياللى انت منى وياللى انا منك
قوام نسيتى ان انا ابنك؟
حيران ف امرك
بددى الحيرة
سايق عليكى الزمن
ليعقلك سنك
-------------------
على فين ياطير وانت غريب عن نفسك؟
مبتنتهيش رحلتك...
ولا كانشى ليك عنوان
كل اما ترسى ف قلب طيب
يتخلق سجان
على فين ياطير؟!!!
-----------------------

هناك 16 تعليقًا:

د/عرفه يقول...

عجبنى كلامك يا محمد
وخصوصا
-----------------
سايرة وماشية دى الحياة تساهيل
وملوك تورث كل جيل ورا جيل
ومعادلة ناقصة واغرب مافيها 3 مجاهيل
المصرى..والقهر..ونهر النيل


تسلم

محمد التميمى عبدالحق يقول...

منورنى دايما يادكتور عرفة
يارب كده معانا دايما يارب

اللى موش عارف يتغير يقول...

واضح انك محمد

مبروك عالمدونة

محمد التميمى عبدالحق يقول...

ياااااااااااااااه
فينك يا عم
منورنى

يساري نوبي يقول...

حلو اوي ياريس علي فكره
تسلم دماغك ياكبير

محمد التميمى عبدالحق يقول...

نوبى
منورنا يا يسارى ودايما معانا كده برايك

GiGi worled يقول...

الله جميله جدا
بس فى حاجه بس بلاش تقول الشمس كشره
الشمس ياعزيزيى زي ماحضتك عارف لاتغضب لموت احد ولالحزن احد
ربنا يعزك
لكن حقيقى قصيده مؤلمه وحقيقيه
ربناي باركلك ويعزك يارب
تحياتى وشرفنى جاد مرورك عندى ياحلم بيعافر زينا كلنا
امتى بقه هيتحقق

MaNoOoSh يقول...

القصيدة حقيقي جميلة جدا
ونغمها رائع

ومعانيها حقيقية قوووووووووووي



تسلم ايدك على الطلام الجميل ده

sha3rsabil يقول...

شاعر ممتاز
أتمنى لم مستقبلا باهرا

غضبان يقول...

جى جى
نورتينى
مش لازم اكون قاصد المعنى اللفظى للكلام

غضبان يقول...

مانوش
المدونة نورت
اول ززيارة
ياريت تدوم

غضبان يقول...

شاعر سبيل
مشرفنا بوجودك
يارب معانا دايما

ميرام يقول...

شدني قوي عنوان مدونتك لما قرأته في أحد الردود
(حلم بيعافر)
!
بعد كده ( حلم لسه ما استسلمش )
(:
حسيت قوي انك شخص مناضل .. طموح ..
أو ان الحلم يستحق (المعافرة) بشدة ..
أو يمكن الاتنين
مالا جدال عليه .. اني بسجل اعجابي


نيجي بقى للنص ...
تعبيراتك شدتني جدا ..
تشبيهات جميلة ومعنى حلو بجد .. وسلاسة ممتعه...
بس حسيت ان الوزن خانك في كذا مقطع ..


انتظر جديدك
تقبل مروري
(:

حلم بيعافر يقول...

ميرام
اول زيارة ليكى هنا
منورانا
شكرا على كلامك الجميل
بس تقدرى تقولى ان الحلم يستاهل المعافرة بشدة
رايك فى النص يحترم
وياريت تبقى معانا دايما وتقولى رايك

E73 يقول...

تحفة سلمت يداك

هي الصورة غامقة قوي كدة؟!

حلم بيعافر يقول...

E73
هى الصورة بجد كده
يارب تتغير
منورة