السبت، 27 يونيو 2009

حالة غياب



نازل كلامى ع الورق مجروح
مخلوق جديد
يتولد...
ويعانى...
يبكى...
يصرخ...
يعيش حلاوة روح
يضحك عشان تدمع عنيه تانى
بين السطور باين وجع
ريحة ضفاير
وكلام ودع
بيقول لابد من الفراق
ياحلم باير
وامتى كان يعنى اللقا؟!
من يوم نزولك للحياة مدبوح
(حالة غياب)
استنى فرح وزقزقة
يقابلنى نوح
ياقلب ثاير
اكتم همومك
منتاش لوحدك
غيرك هيرفض شكوتك
بوحك دا لحدك
فاياك تبوح
اياك تبوح
اياك تبوح
موت بحكاياتك وبأنينك
واكتب على قبرك
(مذنب ياناس بالحب
عمره ماتاب)
ياغنوة يامحبوسة ف ضلوعى
يالحن نازف فى الغياب
عاشق خياله مغرقه
بيحب حدوتة ف كتاب
داير يدور ف الزمن
عشمان يلاقى سندريللا
نسجت خيوطها فوق مشاعره
واختفت
فبنالها كون من الانتظار


هناك 70 تعليقًا:

ديالا يقول...

حلوه اوي

وباذن الله هيكون محظوظ ويلاقي سندريلا

في زمن مبقاش فيه سندريلا من اساسه

بوست تحفه

ديالا يقول...

ايه ده هو انا طلعت اول تعليق

مبروك ليا اول تعليق

Lyssandra يقول...

مش ممكن بجد
جميل جميل جميل
تصفيق حاااااد

..

حسيتها أوي الكلمات دي
بتكتب بسلاسه :)

..

سعيدة بمروري هنا
تحياتي ودمت بكل خير

Lyssa

7annen يقول...

بيحب حدوتة ف كتاب
داير يدور ف الزمن
عشمان يلاقى سندريللا
نسجت خيوطها فوق مشاعره
واختفت
فبنالها كون من الانتظار

انت كلماتك جميله بس تفتكر ان فى سندريلا دلوقتى؟؟؟

حنين

marwa يقول...

بتعرف تدخل احاسيسك مع بعض كانها حاجة واحدة

مبسوطة قوي بكلامك اللي بتكتبه

ربنا يوفقك الى الأفضل دايما

تحياتي

بنجاواتى يقول...

كلمات جميلة ومؤثرة جدا ما شاء الله

ودى عجبتنى اوى اوى

استنى فرح وزقزقة
يقابلنى نوح
ياقلب ثاير
اكتم همومك
منتاش لوحدك
غيرك هيرفض شكوتك
بوحك دا لحدك
فاياك تبوح

تحياتى

(Joudy) يقول...

حلوة بجد حقيقى جميلة بس كلامها ليه مش فيها أمل بس حقيقى برغم كده هى بجد حلوة وأهو يوم كده ويوم كده وأهى الدنيا بتمشى


دمت بكل الخير والسعادة

E73 يقول...

حالة شجن
حالة شحوب
حالة أنين

الله يكون في عونك

كلمات جميلة لكن تحمل الام وجراح

ماما أمولة يقول...

ماشاء الله أنت طلعت فنان وفنان قدير مش أي كلام

كلماتك رائعة في كل شيء

تسلم يارب

سعدت بزيارتك

والعواف عليك

شمس النهار يقول...

مساء الخير
اول مره ازور المدونه اللطيفه اوي دي ولولا انشغالي بموضوع السفر ده كنت قريتها كلها
شكرا علي زيارتك لمدونتي
ويابختي ليه بس ده انا مسافره تحت تهديد السلاح الاخوي

ان شاء الله لماارجع مش هسيب المدونه دي خالص
همه بيقولوا انك مدرس وانت بتقول ايه؟؟

حلم بيعافر يقول...

ديالا
مبروك ياختى
قال يعنى علقتى فى الواشنطن بوست
دى مدونة على قد حلها
لله يامحسنين
هههههههه
منورة

حلم بيعافر يقول...

lyssa
مجاملة فوق راسى
منورانى

حلم بيعافر يقول...

حنين
الاقى والا ماالاقيش
اهى احلام
منورانى

حلم بيعافر يقول...

مروة
شكرا لمرورك ورايك
منورانى

حلم بيعافر يقول...

بنجاواتى
اول زيارة وياريت تدوم
منور يامعلم

حلم بيعافر يقول...

جودى
انا بكتب اللى جوايا وخلاص
منورانى ويارب دايما معانا

حلم بيعافر يقول...

e73
يابنتى طب اقولك يا ايه؟
اسمك ايه طيب؟
المهم
منورانى
ورايك فوق راسى

حلم بيعافر يقول...

شمس النهار
مش معقول واحدة رايحة امريكا بتكلمنى
هيييييييييييييييهه
هييييييييييييييييه
هييييييييييييييييه
ابقى هاتيلى حاجة معاكى بقى
انا برضى بقليلى
يعنى خمس ست بدل كفاية قوى متتعبيش نفسك يعنى

حلم بيعافر يقول...

ماما امولة
مش معقول
حضرتك منورانى والله
والله يعافيكى

mostafa rayan يقول...

سلام عليكم
على فكرة انت او انتى بتكتب او - بتكتبى - شعر حلو
علشان كدة انا عايز اخد قصيدة منك وانزلها فى مجلة ميكانو ممكن ترسلها على ايميل المدونة

kmt يقول...

السلام عليكم ورحمة الله وبركاته
الاول كده
زيارتك نورت البلوج هيا مش مجاملة بس لان دبلوماسية ردك عجبتني

ثانيا
انا بحس الشعر فبنقضه بإحساس لان علميفي الشعر سواء فصحى او عامية تقريبا كده مافيش

هوا انا قريتها مرتين
الجزء ده
(حالة غياب)
استنى فرح وزقزقة
يقابلنى نوح
ياقلب ثاير
اكتم همومك
منتاش لوحدك
غيرك هيرفض شكوتك
بوحك دا لحدك
فاياك تبوح
اياك تبوح
اياك تبوح
موت بحكاياتك وبأنينك
واكتب على قبرك
(مذنب ياناس بالحب
عمره ماتاب)

اللي وقفني
ليه استنى
ما اصنع انا الفرحه ازاي مش عارفة لكن اذا استنيت يعني مين اللي هايجبها فبدل ما استنى اشغل نفسي بإني اعمل لنفسي انا الفرحة
ولما يقابلك النوح طبطبعليه وامسح دموعه وقوله يالا تعالى ما انت اللي بنوحك دوقتني طعم الفرحه ( الضد يظهر الضد )

اذا غيري رفض شكوتي
فربي ورب غيري سامعها لو في محلها هايكون في عوني ولو افترا ........

الحب عمره ما كان ذنب ولا خطية

تحياتي
الى اللقاء

شباك موارب يقول...

ايه ده
انتى كاتبها بجد؟؟؟؟
لو انت كاتبها فعلا فاسمحلي اقولك
انها تجنن وجميله اوي
حاسها تنفع تتر مسلسل؟؟؟؟
او يغنيها احمد سعد؟؟؟؟

شكرا ليك
منار فايد

emadiab يقول...

ياغنوة يامحبوسة ف ضلوعى
يالحن نازف فى الغياب
عاشق خياله مغرقه
بيحب حدوتة ف كتاب
داير يدور ف الزمن
عشمان يلاقى سندريللا
نسجت خيوطها فوق مشاعره
واختفت
فبنالها كون من الانتظار

الجزء ده جامد قوى كتبته و كأنك بتحفر فى قلبى

حاول تفتكرنى يقول...

لا شك أننا أمام إبداع

كل شىء هنا متجانس

الحروف

الصورة

الاحساس

تحياتي

حلم بيعافر يقول...

مصطفى ريان
انا واحد مش واحدة
منور يا معلم
بخصوص المجلة فربنا يسهل
عندك ايميلى فى ملفى الشخصى

حلم بيعافر يقول...

كيمت
وعليكم السلام ورحمة الله وبركاته
ربنا يخليكى ومنورة
ورايك يحترم

حلم بيعافر يقول...

شباك موارب
معنى انى منزلها من غير ماكتب تحتها حاجة يبقى انا اللى كاتبها
المهم
منورانى ياستى
بس اشمعنه يعنى احمد سعد؟

حلم بيعافر يقول...

عماد دياب
سلامة قلبك ياعمدة
منورنى يامعلم

حلم بيعافر يقول...

حاول تفتكرنى
لو فيه ابداع حاصل فاللى بيعدى عليا ويقول رايه شريك فى الابداع ده
وله نصيب من الشكر لازم ياخده
ومنورنى يامعلم

e_emy يقول...

اللـــــــــــــه

تحفة تحفة بجد

ربنا يزيدك (:

mahasen saber يقول...

حلوه قوى فكرتنى باسلوب جاهين الله يرحمه

حلم بيعافر يقول...

ايمى
ربنا يكرمك
ومنورانى

حلم بيعافر يقول...

محاسن صابر
جاهين فوق داغى من فوق وشرف ليا انك تقولى كده
بس انا محمد التميمى
نورتى

hooda_tayana يقول...

بجد رائع ياتميمى

حلم بيعافر يقول...

حوووودة حبيبى
منور ياراجل
الصعايدة وصلوااااااااا

MaNoOoSh يقول...

الكلام حلو قوي وموزون قوي قوي

بسطني جدا وعشت في حالة الفراق اللي في الكلام

حلم بيعافر يقول...

منووووووووووش
منورة وربنا يبعدك عن حالة الفراق اللى ف الكلام

جحا المصرى يقول...

رغم الحزن
لكن الكلمات روعة بجد

mohamed ghalia يقول...

الكلمات روعة بجد
تسلم ايدك

قلب ارهقته الاحلام يقول...

ياغنوة يامحبوسة ف ضلوعى
يالحن نازف فى الغياب
عاشق خياله مغرقه
بيحب حدوتة ف كتاب
داير يدور ف الزمن
عشمان يلاقى سندريللا
نسجت خيوطها فوق مشاعره
واختفت
فبنالها كون من الانتظار

جميييييلة بجد

تسلم ايديك :)

حسيت ان انا متخيلاك زي الشاطر حسن ^^

وانت بتلف وبتدور علي حبيبتك

بجد جميلة اوي

تحياتي ,,,,,

Beram ElMasry يقول...

شدوا حلكم ياجماعةولو نضحي بالف الف مصر غالية مش رخيصة
اشكر تكرمك بالزيارة والتعليق ويسعدني مداومة الزيارة وان تجعلني صديق
وخالص تحياتي

حلم بيعافر يقول...

جحا المصرى
الرائع هو مرورك
نورتنى

حلم بيعافر يقول...

محمد غاليا
منور وتسلم

حلم بيعافر يقول...

قلب ارهقته الاحلام
شكرا على رايكم ومنورانى

أنــا يقول...

تصفيق حار..
بجد امتعتني :):)
اسلوبك جلو اوي واحساسك احلى ..
المدونه دي خلاص بقت بتاعتي.. هاغتبر البيت بيتي " دا بعد اذنك" وهازورك هنا دايما
تحياتي لابداعك:)

حلم بيعافر يقول...

ا\بيرم
ده شىء يسعدنى يافندم
ومنورنى

حلم بيعافر يقول...

انا
ماشى البيت بيتك
بس هتيجى جنب الاكل اللى فى التلاجة هنخسر بعض من اولها
انا بقولك م الاول اهوه
والمدونة نورت
يااااااااااااااااه!!!
انا اتحولت من كتر النور

ندا منير يقول...

عجبنى كلامك جدا واسلوب كتابتك

فعلا شعر اكتر من رائع

وجه جديد د.أحمد عثمان يقول...

أجمل ما في الحلم
انه بيعافر

سعدت للغاية بزيارتي لمدونتك
و أكيد ان شاء الله
يستمر التواصل

تحياتي

MY FATE يقول...

جميييييل جدااا بجد
قليل لما الواحد يلاقى حد بيحب فى الزمن ده
وقليل لما تلاقي حد بيعرف يعبر بأسلوب سلس زي ده
ما شاء الله
وحلوة قوي الجملة دي "افرد جناحك وطير مع الاحلام"
:)
سلاااام

لاسع افندى يقول...

حاول تبوح
يمكن تلاقى لروحك روح
اياك تسكت
خلى المك يروح

سراج يقول...

[يضحك عشان تدمع عنيه تانى].. هذه هي خلاصة الحياة.. " فكما أضحكك الدهر كذاك الدجهر يبكيك".. الحمد لله والشكر على كل حال.. لله لا يبكيلك عين
جميلة هي مدونتك.. وتستحق الوقوف عندها

ليكوريكا يقول...

ياحلم باير
وامتى كان يعنى اللقا؟!
من يوم نزولك للحياة مدبوح

-----------------------

جميله بجد .

ومازلتُ أتعلم يقول...

ماشاء الله على حضرتك بتكتب بسلاسة رائعة
بالتوفيق والتقدم المستمر بإذن الله

فى أمان الله....

قلم رصاص يقول...

حلوة ياواد يامحمد
والله وخطك طلع حلو على المدونة
ههههههههههههههه

لسه معرفتنيش ؟!
انطق بقى هههههههههههههه

مزيد من التوفيق

ومش هقولهالك تاني :

عديني عشان ورايا مشوار

جنّي يقول...

السلام عليكم

كلمات جميلة .. مشروع شاعر جميل بيعافر ولازم يوصل ان شاء الله ..

ربنا يوفقك

حلم بيعافر يقول...

ندا منير
ربنا يخليكى
ومنورانا دايما

حلم بيعافر يقول...

د-احمد عثمان
اجمل مافى اللم انه يتحقق


وان شاء الله يدوم التواصل
ونورتنا

حلم بيعافر يقول...

my fate
منورة ويدوم التواصل دايما

حلم بيعافر يقول...

لاسع افندى
ياريت الشكوى كانت بتجيب نتيجة


هى فضفضة وخلاص
منور

حلم بيعافر يقول...

سراج
خلاصة الحياة هى
الحمدلله

مفيش اكتر من كده
ومنورنى

حلم بيعافر يقول...

ليكوريكا

اختار اللى يعجبك ياعم

كفاية انك منورنا
احنا هنتبتر ولا لاايه؟!

حلم بيعافر يقول...

ومازلت اتعلم

مرور طيب


ياريت يدوم

حلم بيعافر يقول...

قلم رصاص


ابن خالتك وبيعافر وطالع عينه

خده معاك مشوار من بتوعك دول

وبعدين انت محسسنى انى جدار عازلك عن كل مشاوريك


ههههههههههههههههه
حرام عليك ياراجل
انا نفسى اعرف مشاوريك دى بقى

حلم بيعافر يقول...

جنى

منور
وربنا يكرمك ياعم

واحد من الناس يقول...

جاااااااااااامد جدا

بس ليه (إياك تبوح)

بالعكس ده لازم يبوح واللي يزعل يخبط دماغه في الحيط!!

بجد كلامك رائع جدا جدا

أنت بحق من الكبار

تقبل تحياتي ومروري

وجه جديد د.أحمد عثمان يقول...

الحلم لو اتحقق
ما يبقاش حلم
الحلم لو اتحقق يموت

حلم بيعافر يقول...

واحد من الناس

منورنى

مدش بيستحمل حد يشكيله الايام دى


ومنرنى


ودام الود موصول

حلم بيعافر يقول...

د-احمد عثمان

معرفش للحلم غير مشنقة واحدة

هى استحالته

الحلم اوقات لما مبيتتحققش بيكبر وبيخنق صاحبه

عبقرية الحلم بقى انه لما بيتحقق مبيموتش

لاء بيوسع مكان لحلم جديد

وسعيد بوجودك هنا تانى

ووجودك ورأيك اضافة جميلة

ويارب الود يفضل موصوول يادكتور

انت تسال والكمبيوتر يجيب يقول...

سعداءبالمرور هنا وندعوك للأشتراك فى برنامجنا الأذاعى من الأذاعه الرئيسيه لمصر اى أذاعة البرنامج العام ويذاع يومياالتاسعه وعشر دقائق صباحا عدا الجمعه.

التفاصيل فى
المدونه
http://netonradio.blogspot.com
الموقع
http://stop.to/cairo

تحاتنا وامنياتنا لك بالتوفيق