الأحد، 12 يوليو، 2009

عمر ومنار




اغتت حاجة عند طالب كلية تربية هى حصة التربية العملى بسبب حاجات كتيرة قوى اولها ان الطلبة مبيبقوش اساسا محتاجين لحصتهم الاساسية مش حتى الاحتياطية اللى بيدخلها طالب كلية التربية تانى حاجة ان العيال بقوا عفاريت وحاجة فوق الخيال فى كل حاجة ثالت حاجة ان الطالب بيتصدم بطريقة تدريس متخلفة بيمليها عليه الموجه المشرف على التربية العملى فى المدرسة وبيصطدم طالب كلية التربية بفرق شااااااااااسع جدا بين طرق التدريس اللى محشورة بين الورق فى الكتاب وطرق التدريس المحشورة فى عقول ناس بيشرفوا عليه وافكارهم تقريبا اللى عفا عليها الزمن والغريبة ان الافكار دى كانت لا تقبل المناقشة اطلاقا

انا بقى كنت بكره اليوم بتاع التربية العملى دى لله فى لله كده لانى بضطر اعمل فيها حاجات مش لطيفة اولها انى كنت بدخل الفصل الاقى العيال عاملين دوشة فاقوم بالصلاة ع النبى كده مدور فيهم الضرب بس برجع اصالحهم بعد شوية واخرجهم حوش المدرسة يلعبوا كورة وبقيت اروح احكملهم كمان واهى حاجة تنفعهم بلا وجع قلب وبعدين هو لسه فيه حد بيتعلم؟ وبعد الماتش يبدا كده بشوية الاقى الموجه جاى يشوف الحصة بتاعتى يلاقى كل الفصل فى الملعب واول مالعيال يشوفوه يفطسوا على نفسهم من الضحك وبصراحة عندهم حق لانهم شافوا نكتة ممكن تضحكك لحااااااااااااااااااااااااد ماتدمع بجد احنا فيه عندنا فى مصر ياجماعة شوية عقول كده فيها شوية حاجات من زمان قوى ومقفول عليها بالترباس ورافضة حتى انها تتطور ولا تبص لايه اللى جد (طبعا الناس دول هما الخير والبركة بس لو يلينوا دماغهم شوية ويعترفوا ان الدنيا اتغيرت) يللا ماعلينا.....

فى يوم من الايام قررت اقعد شوية مع العيال فى الفصل شوية كده اهو اشوفهم بيفكروا ازاى وطبعا اول مادخلت قعدوا زى الجزم احتراما لذكرى الخرطوم الاحمر التخين بتاع الحصة اللى قبلها(ومحدش يقوللى اسلوبك متخلف عشان والله جربنا اساليب كتير غير الضرب ومانفع غيرهلان اصلا قيمة المدرسة نزلت جامد فى عين الطالب اللى هو من ركائز العملية التعليمية)المهم قعدت كده وقلت احنا مش هنشرح حاجة النهاردة ياولاد طبعا ارتسمت البسمة على شوش العيال كلهم واستبشروا خير وفضلوا كده بينهم وبين بعض يقسموها بينهم فرقتين على اساس انى هخرجهم يلعبوا لكن انا غدرت بيهم المهم العيال دول غاظونى بصراحة دول قسموها فرقتين من غير ولا نفس اتفقوا بالعيون كده وانا عمال اراقب ووالله معجب بالطريقة وبقدرتهم ع الاتفاق كده بسرعة
المهم كدرتهم طبعا لما قلت مافيش العاب ياسنة اولى النهاردة احنا النهاردة هنقعد مع بعض شوية ونتكلم شوية مع بعض كده زى الاخوات
مش انا اخوكوا ياسنة اولى؟
فى نفس واحد طبعا يااستاذ-من ورا قلوبهم بالتاكيد-وقومت قايلهم حد فيكوا عنده موهبة؟بيكتب حاجة؟بيالف حاجة ؟بيرسم؟ها؟..............
الواد مصطفى حب يدبس عمر صاحبه اللى قاعد جنبه فى التختة فقال عمر بيرسم يااستاذ وبسرعة عمر حط وشه فى الارض وانا طلبت منه انه يقف وسالته ها ياعمر......انت بترسم بجد فالواد وشه احمر وبسرعة وف نفس واحد برضه الفصل كله قال اصله بيرسم على منار يااستاذ...............-الله يخربيت سنينكوا فى سرى طبعا-والواد عمر واقف اخرس طبعا فقومت مصطفى عشان يتكفل بسرد الحكاية من اولها لاخرها وطبعا زى ماحنا عارفين عمر طلع بيحب منار اللى هى فى تانية ابتدائى وبيتبادلوا الهدايا وبيخرجوا بعد المدرس شوية قبل مايروحوا البيت وبيتقابلوا بين الدروس بس خدوا بالكوا من الصاعقة دى بقى ....عمر طلع قرطاس وممسكش ايد منار خالص
كل الكلام ده بيتحكى وانا مستنى سى عمر يكدب اللى بيتقال لقيته نطق كلمة الافلام العربى المشهورة(والله غرضى شريف...)

شفتوا بقى المفاعيص بتوع الاعدادى والابتدائى بقوا بيفكروا فى ايه؟وشفتوا قد ايه المدرسة بقت عندهم مكان لايه؟وشفتوا فرستى وغيظى قد ايه؟(-سامع واحد اخواجنى فى اخر القاعدة بيقولى الحكومة هى السبب ههههههههههههه)-طبعا مش الحكومة انما المؤسسة اللى قبل المدرسة اللى هى البيت مسئولة مسئولية كاملة عن كل ده اول حاجة بتخرج طفل مبيتقبلش اى اسلوب غير الضرب للتفاهم والتعامل طبعا وبتبقى الحكاية دى نتيجة حاجات ممكن تكون بسيطة ومبناخدش بالنا منها زى مثلا الفرحة الشديدة لما الطفل يشتم حد والفرحة دى بتعتبر تدعيم للسلوك السىء ده فبيزيد لحد مابيوصل الطفل للتعامل بالاسلوب ده اللى هو الضرب والشتيمة وطبعا مسئولة كمان عن الفراغ العاطفى اللى الطفل بيعيشه نتيجة غياب ابوه وامه عنه لفترة كبيرة فبيلجأ لسد الفراغ ده بعلاقات عمر حد مايتخلها ابد ابد ابد
طب بزمتك انت عمرك تخيلت ان عمر يحب منار وهما لسه فى ابتدائى واعدادى ويجيبوا لبعض هدايا ويحتفلوا بالفالنتين داى؟

هناك 56 تعليقًا:

العيسوى الصغير يقول...

يعنى هو فى اولى اعدادى وهى فى تانية ابتدائى

هو ماشى ممكن بغض النظر يعنى هنمشيها

اما اللى فى تانية ابتدائى

عرفت الحب منين ولا فاهمه الحب ازى

ولا فى دمغها الحب دا ايه
عيرة عن ايه ؟

غريبة بجد

واحدة مجنونة يقول...

السلام عليكم
طبعا عندك حق تتفرس و تقول كل اللي نفسك فيه
دول جيل الانترنت و الكمبيوتر و تتوقع منهم اي شيء
انا صاحبتي مدرسة برضه في فصل اولى ابتدائي عندها الب بيحب زميلته و جه في مرة و قعد جمبها و باسها عادي جدا و لما سألوه ليه عملت كده قالهم عادي بيعملوا كده في التليفزيون
و الله المدارس بقى فيها حاجات غريبة
ربنا يعين المدرسين
بوست لذيذ فعلا
تقبل تحياتي

سماء يقول...

ههههههههه

لما من دلوقتى بيحبو بعض وبيجيبوة هدايا وبيحتفلوا بالفلانتين داى

امال لما يكبروا هيعملوا اية الاطفال دلوقتى عايشين سن مش سنهم خالص وتحس انك مبتتكلمش مع طفل وتصرفاتهم مش تصرفات اطفال بقا كل تفكيرهم الاغانى والافلام اللى طالعة دا غير انك تحس بأنك ماشى جمب قاموس شتايم متحرك

حياة يقول...

الواحد على ايامه كان فى عمر وامل بيلعبوا مع بعض فى الكتاب بس يحبوا بعض دى ما شافنها ممكن عيب من الوزارة
ولا ايه

تحياتى

mohamed ghalia يقول...

والله فى زمانا مش تستغرب أى حاجة
ربنا يهدى الجميع
دمت بكل الود

7annen يقول...

ههههههههههههههه

بتضربهم شكلك مدرس صعب

احسن حاجه ان انا مش عندى تربيه عملى علشان انا كليه اداب

احسن حاجه عملوها هههههههههههههههه

وحب ايه اللى العيال الصغيره دى بتتكلم عنه

هما بيلعبوا

اذا كان دلوقتى الكبار مبيعرفوش يحبوا هيحبوا العيال الصغيره

حنين

د/عرفه يقول...

فى الاول حابب اشكرك على اهتمامك بالمدونة بتاعتى وسعيد جدا بزياراتك

وانا لسه بكتب من بره برضه
بالنسبة لموضوعك

اظن ان المدرس يقدر يجذب انتباه العيال الصغيرة بسهولة
ويقدر يزرع فيهم حاجات كتير اوى تفضل معاهم لغاية لما يكبروا

ليس فقيرا من يحب يقول...

السلام عليكم

عندك حق فى كل كلمه واسأل مجرب

كانت ايام ربنا اللى يعلم بيها

اكتر حاجه كانت تدايقنى لما مديره

المدرسه اللى فيها التربيه العملى

تيجى تهزئنا من غير سبب وقدام الولاد

والعيال يضحكوا علينا طب يابت الناس

الطيبين خليه بينك وبينا مافى فايده

يبقواالولاد هيسمعونا ازاى والنبى


اما بالنسبه لمنار وعمر فده شفنا منه كتير وجالى جوابات تشيب ولاد بعتينها لبنات فى الفصل والله العظيم ما تصدق الكلام الاباحى اللى مكتوب فيها
وكانوا فى اولى ابتدائى مش تانيه

طولت عليك بس فكرتنى بالذى مضى قلت ارغى شويه وخف ايدك على العيال شويه ياعم الضرب ممنوع هههههههههههههههه

تحياتى لحضرتك ولكل المدرسين

فى حفظ الله

حاول تفتكرنى يقول...

مصادر المعلومة عند الصغار تشعبت وتنوعت بشكل سرطاني عما كان من قبل ، فقديما كانت الاسرة والمدرسة وجماعة الرفاق اول مصادر التنشئة للكائن البيولوجي والان اصبحت الاف القنوات المتعددة الاغراض ومئات البرامج الغير هادفى إلى جمع عدد أكبر من المشاهدين لزوم جذب الاعلانات .

فتنوع المصدر وتنوع الهدف هو ما يصبغ خيال الصغار وافكارهم بالسلب أو بالايجاب

يبقى المدرس وشخصيته العامل الوحيد الباقى الذى يستطيع التغيير للأفضل ، لأن قوة تأثيره تساوي السلطة الأبوية تماما

ولو آمن المعلم بهذا فى إطار المنهج العلمي الذى اجمع عليه عشرات العلماء ، ودقة فى تنفيذه - التزاما بالتوجيه الفني ولو كان دقة قديمة - وشخصية المعلم المتميزة نستطيع أن نبدل الكثير من الأحوال حاليا ومستقبلا

تحفظ
عندما نتعامل نفسيا واجتماعيا ، مع إحدى السلوكيات الغير مرغوبة نستخدم الكثير من الأساليب المهنية والفنية لمحاربة هذا السلوك ، ومن أهم هذه الاساليب هو العقاب ، والعقاب له اشكال كثيرة ومتعددة وفعالة ليس من بينها الضرب ، فالضرب يجبر الطفل على الكذب ، والخوف ، كثير من الإزاحات النفسية الضارة


المعلم هو الحصن الأخير لنا ولاولادنا وللمجتمع بعدما سقطت كل حصون القيم تحت اقدام العولمة

وفقك الله

تحياتي

رؤية يقول...

والله انا عاوزة اقولك انى على وشك انى اخد الماجستير وعمر ما جالى هدية فى الفلانتين داى

طب انا احقد على منار دلوقتى ولا اعمل ايه؟!!
^_^

انا لو منك ما اتفرسش
بس احاول اتعامل مع الموقف بذكاء
وفكرة انك الاستاذ وهم الطلبة مهمة فى حالة السيطرة على الفصل لزوم الهدوء فقط
لكن غير كدا انت بالنسبة ليهم القدوة المفقودة فى بيوتهم

عموما اصبر على عمر اللى ما عرفش يمسك ايد منار لحد دلوقتى لان غرضه شريف،
والله الكلام دا بيدل على ان عقليات الاطفال انتهت من زمن امنحتب
مما يستتبع اهمية التوعية المبكرة بكل شىء

لذيذ البوست جدا
واستمتعت حقيقى بيه

ولحضرتك تاج عندى اتمنى تقبله


تحياتى

حلم بيعافر يقول...

العيسوى الصغير

هما العيال بيسموها حب وانا سميتها فى الاخر علاقات غريبة نتيجة حاجات معينة زى ماقلت فراغ عاططفى نتيجة اسلوب تربية غلط
وهى غيبة بجد انا معاك
بس لما تدخل مدارس وتشوف ايه اللى بيحصل هتصدق وهتشوف اللى اكتر من ده
منورنى يامعلم ويدوم التواصل

حلم بيعافر يقول...

واحدة مجنونة
الله يكون فى عون صاحبتك
لان اولى ابتدائى دول مصايب بجد
ههههههههههههههههه
وبعدين عادى يابنتى دا البوس علينا حق
منورانى

حلم بيعافر يقول...

سماء
ماهما الاطفال دول مرايا لينا ياسماء
يعنى اى حاجة بيبقوا واخدينها عننا
الطفل مثله الاعلى ابوه وزمان كان جنب ابوه المدرس بس دلوقتى خلاص للاسف مبقاش كده
ومنورانى

حلم بيعافر يقول...

حياة
الدنيا بتتغير ياحياة والتغيير ده للاسوء وللاحسن ولكل شكل ولون

منورانى

حلم بيعافر يقول...

محمد غاليا
هو الزمن كده المفروض احنا نواجه اى حاجة وحشة بقى
منورنى

حلم بيعافر يقول...

حنين

لا والله انا مش مدرس صعب بس الضرب بقى الطريقة الوحيدة للتعامل مع العيال(العفاريت) ومفيش مدرس بيلجأ للضرب غير بعد ما يزهأ خالص من العيال
وليه يابنتى الكبار مبيعرفوش يحبوات؟الدنيا لسه بخير
منورانى

حلم بيعافر يقول...

د\عرفة
يادكتور مدونتك جديرة بالمتابعة ولازم اروحها دايما
اما بالنسبة لردك ع الموضوع
(العيال الصغيرة)
ههههههههههههههه
متاكد ان لسه فيه حاجة اسمها العيال الصغيرة؟

حلم بيعافر يقول...

ليس فقيرا من يحب

الحمدلله
هيييييييييييييييييييييه
لقيت حد مجرب اهوه
ايوه كده حسسينى انى مش لوحدى
انت بالذات بقى منورانى ومنورانى ومنورانى

حلم بيعافر يقول...

حاول تفتكرنى
كلامك صح يامعلم
بس فيه حاجة
الدقة القديمة دى المفروض تبقى واعية للى بيحص حواليها وتوجه اللى لسه زيى فى بداية الطريق وكده احبها واحترمها لكن بقى لو انغلق على نفسه ورفض يبصص لاى حاجة فده بصراحة مبقدرش اتعامل معاه
وبالنسبة للحصن الاخير لينا كناس الللى هو زى مانت قلت المدرس ففيه حاجات كتيرة جدا بتهد فى الحصن ده داخل ومخارج العملية التعليمية
ومنورنى

حلم بيعافر يقول...

رؤية
(حضرتى بيقول لحضرتك)
هههههههههههههههههههههه
بطلوا حقد بقى على منار البت ياعينى لسه صغيرة
على فكرة فيه مصايب وبلاوى زرقا وانا محكيتش غير حاجة كده صغيرة

والتاج مقبول ويشرفنى انه يجى منك

منورانا

م/محمود فوزى يقول...

السلام عليكم
انا معاك ان البيت عليه مسئوليه كبيره جدا فى الموضوعات دي

ولازم يكون فيه صداقه بين الاب والاب وبين الاولاد

للاسف فى اوقات كتير الاب بيتم التعامل معاه كأنه بنك وهو ممكن يستريح لكده وان كان برضه عليه من الهموم الكثير (الحكومه برضه هنا لها تاثير ههههههههه)
لكن ده لا يمنع ان عليه مسئوليه لايجب ان يهرب منها

الام هنا برضه عليه دور كبير لازم تتفاهم مع اولادها وتكون سر بنتها او ابنها مينفعش ان يكون زميل فى المدرسه هو سر الابن عن ابيه او امه
وحتى لو كانت بتشتغل وتعبانه نظرا لظروف البلد الاقتصاديه المعروفه (برضه هنا الحكومه تاني هههههههههههههه)
لكن برضه دي مسئوليه عليها

فيه كمان دور الاعلام وده دور مهم جدا فى تربيه الاطفال
للاسف نجد طبعا القنوات الارضيه زي ماحنا عارفين اما الفضائيه ففيها وفيها
وهنا نرجع تاني لدور البيت
مينفعش نلاقى الواد من صغره بيتفرج على قنوات اغانى معلش مش ولابد
(برضه فيه دور للحكومه فى وجود القنوات دي اصلا)

طيب فين باه المدرسه
طبعا ممكن يقول المدرسين ان العدد كبير (برضه هنا دور للحكومه ههههههههه)
لكن على الاقل يبقى فيه محاوله لفهم افكار التلاميذ وخاصه ابتدائى واعدادي
ومحاوله زرع الاخلاق بينهم وطبعا ناهيك (حلوه ناهيك دي) ناهيك عن انه يكون صديق واخ كبير

على الاقل انه بيحبب الطلبه فى مادته وده معروف ان لو المدرس كويس غالبا تلاقى الطلبه بيحبوا مادته

يبقى ناقص ايه يامعلم
المؤسسات الاجتماعيه (مساجد - كنائس - نوادي -غيره) ودي ممكن تكون لفريغ طاقه الطلبه فى اعمال مفيده ومن خلالها يكون تثقيفه (وهنا برضه دور للحكومه بترك المؤسسات تعمل بحريه اكبر)

يبقى كده نلاقى البيت - المدرسه - المجتمع

معلش انا خليتك للاخر
انت ايه اللى بتعمله ده
مدور فيهم الضرب
طيب مش كل مره وكمان بالخرطوم الاحمر (على الاقل يبقى ازرق ههههه)
احيانا التهديد بالضرب يكون اوقع فى الاطفال
وكمان مره بعد مره بيكون الامر افضل
هو طبعا كويس انك فكرت تتفاهم معاهم وكمان ممتاز انك تخليهم يلعبوا

معلش طولت عليك وتلاقى دماغك صدعت وعايز كوبايه شاي
معلش باه واحد رغاي تعمل ايه
طبعا لازم نقول
جزاكم الله خيرا على موضوعكم

قلم رصاص يقول...

انت لسه جي تفتكر التربية العملي بعد ماخلصت بعشرين سنة
ههههههههههههه

ايه يابن خالتي هو انت هتمعل فيها مدرس صحيح هههههههه


بس بقولك ايه : طالما هو عمر يبقى يعمل اللي هو عاوزه بس في حدود الأدب برضه

والراجل يعمل لك ايه اكتر من انه اعترف لك بغرضه الشريف

بطلوا أحقاااااااااد بقى
هههههههههههههههه

مغزى البوست وصل يامحمد

دمت في حفظ الله

وطبتم وطاب سعيكم وممشاكم

MaNoOoSh يقول...

هههههههههههههههههههههه

والله انا بحقد على العيال دي
ههههههههههههه

هم صحيح بيقلدوا تقليد أعمى
بس المفروض اهلهم يعلموهم الصح من الغلط علشان ميبقاش التلفزيون وزمايلهم هم مصدر معلوماتهم

ثورة يقول...

آآخ

انت كده دوست ع الجرح

انا بحاول أتخلص من اثار عملي كمدرسة لمدة سنة- والحمد لله نفدت بجلدي من شهر ونص وقدمت استقالتي

لسه العيال بيجولي ف الكوابيس
بس انا مكنتش بضرب

انا كنت بنضرب
:)

فيه طبيب نفسي قال : الأطفال مرآة منازلهم

و ده صحيح
مش قضية جيل هباب - زي ما معظم الناس بيقولوا

الهباب هو المجتمع، الجيل اللى ربى الجيل الهباب
فطلعت أجيال مهببه كلها بهباب

dina يقول...

ههههههههههه
بجد البوست زى العسل....و طول ما احنا المواهب عندنا متلخبطة كدا يبقى فى مشكلة..دا العيال فاكرة الرسم بيبقى على البنات و بس....عجبى
بوست رائع

GiGi world يقول...

بس هو السؤال ليه بيحب منار
انا رايي انه علشان مالقاش سلمى
تحياتى وياريت بلاش ضرب

(Joudy) يقول...

عمر ومنا وزعلان هو انا جانى شلل من شوية فى التربية العملى دى الجوبات كانت بتتسلم على عينا من الديسك ده للديسك التانى وكمان ايه لسه مفعيص ابتدائى سنة رابعة بس ولما مسكت واحد من الجوبات دى كان هيغمى عليا وقررت وقتها انى هنزل سنة أولى أى نعم ببقى هبوس ايديهم علشان أشرح بس أهون من اللى بيحصل وكأننا أكياس جوافة واقفة يالا الحمد لله انها خلصت على خير مع شوية ضغط ومرارة مفقوعة

دمت بكل الخير والسعادة

الكحيان يقول...

ههههههههههه الغريب أن الأستاذ نفسه مارس الأسلوب القديم أنا معك البيت عليه دور كبير لكن إعلام الدولة أفسد قيم البيت ودين البيت والتعليم فرغ العقول وأزهق الطلاب وانحط بقيمة المعلم لأن الدولة تتغيا منه الجهل فلا بد أن يكون الشعب جاهلا حتى لا يعرف رأسه من رجله ولا يعرف حقوقه ويحيا كالبهيمة ويعيش عالة عليها أما ما ذكرت من شأن عمر ومنار فأنا أعرف ما هو أسوأ منه فوالله الذي لا إله غيره أطفال بنات في الصف الثاني الابتدائي يذهبن يوميا إلى الحمامات ويتجردن ويتساحقن ويتلفظن بألفاظ أعتقد أنك لو سمعتها ستخر صعقا وتتعجب من أين اتينا بها شكرا لك على ما اثرت وما قلبت من مواجع .

شباك موارب يقول...

انت مدرس يكون في عونك بجد
اصعب مراحل في مصر اصلا مراحل ابتدائي واعدادي
وصبيا ن كمان
مش عارفه اقولك اللي انت بتعمله معاهم صح ولا لا
بس انا طبعا ضد الضرب في المدارس
بس كان دخلنا مره في الكليه دكتور امراض نفسيه
وقالنا ان في دراسه اتعملت على اطفال مصر لقوا ان الضرب هو اسرع واكفئ وسيله للتعامل معهم
وكان رد الدكتور لما اعترضناه
احنا اتربيا كدا


تحيااااااااااااااتي

الازهرى يقول...

حكاية مين السبب دى مشكلة
لإن فى اسباب كتير
الاعلام وعجائبه
والاسرة وتفككها بدون طلاق ولكن بوجود كل فرد منها فى واد غير الاخرين
وعدم رعاية الابناء
وغياب الرقابة التعليمية سواء فى الحضانة او الابتدائى
وغياب الرقابة المنزلية على مواعيد عودى الاطفال
وغيرها

اما بالنسبة للضرب فانا متفق معاه جدا لكن فى حدود التعليم وليس الانتقام

تحياتى دوما

محمد الدخاخنى يقول...

عجباً! لم أتمالك نفسى من الضحك حينما قرأت تلك التدوينة ولكنى فى الوقت ذاته حزنت كثيراً لسماعى هذا..وشر البلية ما يضحك..أعتقد أنك فى موقف لا تحسد عليه فاجتهد بأن تزرع فى أدمغة هؤلاء الأطفال أفكار نيرة وسليمة ولا تكن كما فال أحدهم(قم للمعلم واكفه التلطيشا كاد المعلم أن يكون شويشا!)

تحياتى

بقايا إنسانه .... يقول...

أكيد ده الجزء التالت من فيلم عمر وسلمى بس بعد تغيرات بسيطة فى اسمى سلمى لمنار

حلو قوى اللى بيتقال ده

مش عارفه مين السبب

بس اكيد فى حد

بس مش الحكومة

لالالالالالالالالا

الحكومة أجدع من كده

تحياتى

سهوره

حـــلـــم كــــان يقول...

هههههههههههههههههههههههههههههه

مش قادره اقولك ضحكت اد ايه ساعات ماسنعت جمله بيرسم على منار ياستاذ

والبعدين انت متحمل زياده عن اللزوم على الود ليه ؟

مالواد قصده شريف الله

حلم بيعافر يقول...

م\محمد فوزى

ملكش دعوة بالحكومة

انا بقولك اهوه
امشى جنب الحيط (والحيطة اللى هتمشى جنبها دى الحكومة اللى عاملاها على فكرة)
هههههههههههه
نورت المدونة

حلم بيعافر يقول...

قلم رصاص

هفضل طول عمرى كده بحقد ع الناس
اعمل ايه بقى؟
ربنا يشفينى
ادعيلى
نورت

حلم بيعافر يقول...

منووووش
منورانا
شكلك بيقول انك نفسى ترجعى عيلة صغير تانى
ههههههههههههه
نورتى

حلم بيعافر يقول...

ثورة
ههههههههههههههههه
مين اللى كان بيضربك بالظبط؟
العيال؟
ههههههههههههههههه
لاء كويس انك نفدتى بجلدك والله
نورتينا

حلم بيعافر يقول...

دينا
منورة وتقريبا دى اول مرة تيجى هنا
يارب دايما معانا

حلم بيعافر يقول...

جى جى
مفيش حل غير الضرب
انسى
منورانا

حلم بيعافر يقول...

جودى
الظاهر انى مش بس اللى مفقوع
هههههههههههههههه
الحمدلله انى مكنتش بدخل لابتدائى
منورة

حلم بيعافر يقول...

الكحيان
مش عارف اقولك انت بتبالغ ولا ايه
ربنا يهدينا
منور

حلم بيعافر يقول...

شباك موارب
فعلا الدكتور بيتكلم صح والله
هما العيال اتربوا كده
لما البيت يغير اسلوب التربية يبقى المعاملة هتتغير
منورة يامنار
هههههههههههههههه

حلم بيعافر يقول...

الازهرى
اسبابك دى منطقية يامعلم
ومنورنا

حلم بيعافر يقول...

محمد الخاخنى
هو هم يبكى وهم يضحك
منور يادخاخنى

حلم بيعافر يقول...

بقايا انسانة
لاء يابنتى ده مش عمر وسلمى
والحكومة لاجدعة ولا حاجة
نهههههههههههههههه
دى اندل حكومة حد شافها
منورة

حلم بيعافر يقول...

حلم كان
تصدقى انى غلطان والواد فعلا كان غرضه شريف؟
شوية شوية ويجى يقول انا ممكن اصلح غلطتى
هههههههههههههههه
زمان غريييييييييب
منورة

أحمد الصعيدي يقول...

ههههههههه

بس عيال زي العسل ربنا يرشدهم للطريق الصحيح

السلام عليكم ورحمة الله

انسانة يقول...

موضوعك بيأيد نظريتى وهى ان الطفولة انقرضت
واحب اقولك ان انا كمان اتخرجت واشتغلت ومجاليش هدية فالنتين الا مرة واحدة وكانت من ماما ، وجت معاها صدفة كمان

marwa يقول...

هههههههههههههههههه
بوستك حلو قوي قوي
واستمتعت بيه كقصة لكن كواقع """" أكيد لأ
ربنا يجازي أصحاب الأفلام الهابطة اللي خربت تربية شباب المستقبل وياريت كل ام وأب يراعوا ربنا في أولادهم وكل مدرس يعامل ربنا ويراعي ضميره في الأمانة اللي معاه
تسلم ايدك يا حلم

حلم بيعافر يقول...

احمد الصعيدى

نورتنى يامعلم

حلم بيعافر يقول...

انسانة

انا مقصدش ان الطفولة انقرضت

انا بقول فيه حاجات اتغيرت
مقلتش الطفوة انقرضت

وعموما كل واحد له الحق يفسر زى ماهو عايز ونورتينا ياانسانة

حلم بيعافر يقول...

مروة

والله يابنتى ماهو مجرد قصة

فيه من الواقع كتير قوى

نورتينى

مذكرات زوجة يقول...

البوست رائع ومسرود بطريقة مميزة جدا

العيال كبرت

مذكرات زوجة يقول...

شكرا لزيارتك المدونة بتاعتى والتعليق فيها رغم انها لسة جديدة جدا وعلى قدها

حلم بيعافر يقول...

مذكرات زوجة

منورانى واللى على قده بكره يبقى قد الدنيا

غير معرف يقول...

hhhhhhhhhhhhhhhhhhhhh
wallahi post 7elw kteeeer ya ostaz m7amad:D
bs 3aref?
ana marra darabt wad, 3ashan 5ater za3al wad tani kont bastaltefo:D
ah wallahi darabto jamed awyyyyy...
w kont fel saff el talet el ebteda2i:D
bas eeeh, el wad elli darabto, kont aslan 7a2da 3aliiih, leeh ba2a? 3ashan howa kan el awal fel awlad, wana el oola fel banat:D w kont batnafes ma3a, 3ayza akoon el oola 3ala el fasl kollo
hhhhhhhhhhh
wallahi kanet ayam 7elwa kteeeer, 5od balak, mish e7na fe falastine sa7ee7?
bas aho, ben3eeesh w ben7eb zay koll el nas ya basha:D :D :D

RANA...