الأربعاء، 5 أغسطس 2009

هو مين اللى نونو؟!!!





روان بنت اختى بنت مفعوصة كده يدووووب 3 سنين ومجننانا كلنا ,البت بقالنا شهرين عمالين نفهم فيها ونقولها ان الواد النونو اللى فى اللفة ده يبقى اخوها مش ابنها وهى مش راضية تصدق وراسها والف سيف انه ابنها لاء وايه كمان؟!...بتفضل تصوت وتصرخ لما حد يجى جنبه ولا يشيله وتفضل تقول ابنى... ابنى.... ابنى....هههههههههههههه بيبقى شكلها يموت م الضحك وهى بتعمل كده واهى عيلة صغيرة ولسه مش فاهمة يعنى شوية وهتكبر وعقلها هيكبر معاها كمان ....الدور والباقى بقى على الكبار اللى فى مناصب(اكبر منهم وواسعة عليهم) اللى بيعملوا نفس تصرف روان وبيتكلموا كلام الواحد بيفطس على نفسه من الضحك لما يسمعهم.

اكبر حاجة ممكن تضحكك فى مصر دللوقتى هى كلمة واحدة (المحظورة)تيجى تفتح قنوات التلفزيون المصرية(بتاعة الحكومة طبعا)وتلاقى مذيع كبير وبتحترمه يجى يتكلم عن جماعة منتشرة فى الشارع والمنتمين ليها زى الرز ويقولك الجماعة المحظورة..تيجى تمسك اى جرنال حكومى وتقرا تلاقى كلمة المحظورة..طبعا الكلام ده بينطبق على كل حد بييجى يتكلم فى مؤسسة حكومية ..بقت حاجة كده زى المسلم بيها او هى مسلم بيها بالنسبة للجماعة اياهم (اللهم اكفنا شرهم)...طب ايه اللى يضحك طيب ولا ايه المطلوب؟..مفيش بس الكلام ده بالظبط هو اللى روان بنت اختى بتعمله مع اخوها ومسمياه ابنها مع انه اخوها

جماعة منتشرة فى الشارع زى الرز وبيقولوا عليها محظورة.بالذمة الاخوان المسلمين جماعة محظورة؟!

طب انا ايه اللى فكرنى اصلا بالموضوع ده دلوقتى بالذااااات؟
اقولكم انا بقى..اصل انا امبارح قابلت الواد كريم اللى كمان قاعد معايا فى الاوضة ايام المدينة الجامعية....والحاج كيمو ده كان اخوانجى (محظور طبعا ههههههههههه)..المهم كانت جت فترة كده كل مانفتح الجزيرة ولا اى قناة اخبار نلاقى خبر شبه ثابت وهو(اعتقال عدد من الاخوان المسلمين فى مصر-كل يوم فى محافظة شكل-)فكل لما اشوف الخبر ده اجرى ع الاوضة بتاعتنا واتصدم واصعق والاقى الواد كريم لسه موجود وقاعد على قلبى فى الاوضة وبينى وبينكوا انا كان نفسى ياخدوه اصل السرير بتاعه كان جنب الشباك وانا كنت متغاظ منه قوى هههههههههههه وطبعا كيمو كان بيزعل من كلمة المحظورة قوى وبتحز فى نفسه قوى (عالم قلبهم اسوووووووود) وعايشين فى رعب لدرجة انى كنت رايحله فى مرة البيت فالناس فى الشارع افتكرونى من بتوع امن الدولة.

المهم سيبنا من الكلام ده ياجماعة عشان انا النهارده حصلى موقف وحش قوى-ربنا مايوريكوا- وعانيت منه بجد ...قال ايه وخير اللهم اجعله خير واحنا مرزوعين فى الشغل ولسه نص ساعة عن ميعاد الريست اللى بناكل ونصلى فيه جه الامن بتاع المصنع وقالنا الريست اتاجل سااعة عشان خاطر زيارة السيد رئيس الوزراء للمنطقة كلها....يعنى الراجل ده انا كنت بحترمه عشان خاطر طوله بس يقوم يجى بسلامته يعكنن علينا كده؟!...انا من هنا ياجماعة باسجل جوعى واعتراضى

طيب بقى..اختم انا التدوينة دى بقصيدة كده حبيت انكم تشاركونى قرائتها لصلاح الغزالى من ديوانه بكت سندريللا وقالت نهى اسمها (الحلم تحت اقدام العسكر)كتبها سنة 1973 لما كان محبوووووووس
أمانيها لها الحسرة
وقهر العاشق المرجوم بالأوحال والنظرة
ووارى دمعها الاقمار فى ليل رأت غدره
فلم تسق الخدود الورد من أحزانها الثرة
ولا أرخت على صدر رحيم هدبها مرة
ومازالت شفاه الدهشة البكماء مفترة

وأرض الحزن مخضرة


وكان الليل خلابا
وكانت تذرع الشطين مكسوين أعشابا
خطى طرزن ثوب الصمت حتى باح وانسابا
وايقاعا له النجمات قد رقصن أهدابا
وأنشبن السنا فى الليل كالفودين ان شابا

ففاضت فى المدى المخضر أزهارا وأعشابا

وكان الليل جلبابا

تخفى طيه الخنجر

تزيا بالشفاه الناب..والألغام لا تظهر...
وبعض الخوف وارى نفسه فى جبة الأزهر
وفض البرقع الوادى...وجاست زمرة العسكر
ولما بعثرت منها حلى قطع المنظر
وغاص الدود فى التفاح....والصلصال فى المرمر

وغاص النجم أو ابحر

وتخفى عنكم الدمعة

لأن الكل أغضى حين شقت صرخة سمعه
راها الكل فى الليل الذى لم تستطع ردعه
فما خفت لايقاف التردى فى الدجى شمعة

راها الناس من احداقها بواباتها السبعة
راها مسجد السلطان..والمسجون فى القلعة

وكانت حلوة الطلعة


وكم أحببتها لكن...

وكم سهمت اعجابى اليها عبر شباك
فلما حاول الافلات من بركانى الساكن
وأجرى نجمى الملهوف يطوى أفقها الداكن
تفحمنا...لأنى درت وحدى دون أفلاك
واتيكم..كلا رسغى فى قيد وأشواك

بأدمى مدمع باك

لهذا لا تلومونى

اذا ماصحت فى الميدان فى صدق كمجنون
أسب النخوة الصماء فى الغادين من دونى
أكوات الأمانى كلها سدت؟!أجيبونى..
لأنسى هذه المأساة-والمأساة تدعونى-
ببيت من رفات الشاعر المومياء موزون

وأبقى نصف مسجون

أنا لا أعرف الباقى

واستفتى ضمير الرمل..والأقداح أوراقى
ولكن ثم همس الضوء يبنى بعد اخفاقى\
برغم العسكر الماضين فى كبر لازهاقى
تحرك أيها الانسان فى أعماق أعماقى
خطاهم وقعها العربيد مرهون باطراقى
وباسترخاء أحداقى

معلهش المرة التانية سامحونى فى تشكيل القصيدة

التعليقات فوق ياجماعة ..حد ينزلها بقى..الله ..هو انا هتحايل عليكو ولا ايه؟! ياباااااااااااااااى!!!

هناك 39 تعليقًا:

7annen يقول...

اوووووووووول تعليق

احجز

7annen يقول...

وبما ان حلم بيعافر دا عزيز علينا

يبقى العب فى البلوج شويه

7annen يقول...

بقول احتل البلوج كدا كام يوم

7annen يقول...

انا هعمل زى روان هى تحتل اخوها وانا احتل المدونه

ههههههههههههههههههههههه

7annen يقول...

متهيالى لسه بدرى يعنى لسه هنحكى اقوله كل سنه وانت طيب وربنا يبلغنا رمضان

7annen يقول...

وندعى بقى ان ربنا ينولك كل الى فى بالك يارب

7annen يقول...

وبعد كدا اقولك ان البوست جاااااااااامد


مووووووووت

والكلمات جميله اوى

وتسلم ايدك وكفايه كدا لحسن اضرب

ههههههههههههههههههه


حنين

ليس فقيرا من يحب يقول...

احجز بقى تانى تعليق

ليس فقيرا من يحب يقول...

السلام عليكم

كده تفتن عليا مكنش العشم

دا احنا خوات فى التدريس

تودينى فى حديد ماشى قال وانا اللى

قلت لعمى فاشكول الواد ده جدع

ويعتمد عليه وهيخفى الفيل فى المنديل

من غير لاحس ولا خبر

ههههههههههههههههههههههههههههههههه

كل سنه وانت طيب بمناسبه النصف من

شعبان

البوست النهارده جميل جدا وروان

كمان زى العسل وهاوصيها متدلكش

فتفوته شوكلاته جزاء ما اقترفته

وخلى بالك عم فاشكول حطك فى البلاك لست

يعنى خاف على عمرك يابنى

ماما أمولة يقول...

جميلة الكلمات

وروحك اجمل في الكتابة

ربنا يصلح حالك

المشخبطاتى يقول...

يعنى انت سجلت إعتراضك وجوعك بس ولا عملتو موقف..
سلملى على روان.

بنجاواتى يقول...

السلام عليكم

انا شايف ان الاعلام الحكومى والمؤسسات الحكومية كلها مش قادرة توقف انتشار وقوة الاخوان فى الشارع المصرى وفى الجامعات لذلك بتقوم بدور ليس من مهامها ابدا وهو انها بتنفر الناس من الجماعة بالكلام مش اكتر

فى حين انهم مش من دورهم الكلام ..قصدى ان الكلام ده يقولوا اى حد لكن هما المفروض ياخدوا الاجراءات المناسبة
يعنى لو محظورة فعلا يتعاملوا معاها على انها كده ...لكن هما زى اللى رقصوا ع السلم

تحياتى

fL0weR-giRL يقول...

السلام عليكم
************
والله ضحكتني علي روان بنت اختك لان وانا صغييره حصلي موقف مشابه ليه كانوا دايما ماما وبابا بيحكو لألي بس كان موقف فزيع ان انا اول ما اتودت اخويا بردوا كان نفس عمر روان واول مااتودت كان مصمم ان هما يسموني احمد وبابا يقولوا دي بنت بردوا راسه والف سيف ان هما يسموني احمد

حلو الشعر ال انت عرضه علينا لقرأته

**تقبل مروري **

د. ياسر عمر عبد الفتاح يقول...

بص
أجمل حاجة روان ,, والقصيدة
أنا عمال أتخيل منظرها وهيه بتجري وتقول ابني ,, وأضحك


لكن القصيدة دي جميلة جداً جداً جداً
هوه صاحبها كان محظور؟

أحمد الصعيدي يقول...

أسعدكم الله بروان أجمل العيشة عشة الاطفال وأجمل الاطفال البنات الصغيرة لها قبول واسع عن البنين

أما القصيدة فقد أعجبتني كثيرا

اسعد ك الله

سماء يقول...

هههههههه

ابنى ابنى

عسل اوى روان خلتنى اضحك

واختيارك للقصيدة جميل

العنوان الجديد للمدونة بتاعتى

http://skystarslive.blogspot.com/

دمت بخير

مي يقول...

ابنى ابنى
ههههههههه روان دى عسل اوى بوسيهالى
ربنا يخليها ليكوا وتفرحوا بيها هى والبيبى
القصيدة جميلة بجد تسلم ايديك
تحياتى ليك

ليس فقيرا من يحب يقول...

مبروووووووووووووووووووووووك

على اللوك الجديد

حاول تفتكرنى يقول...

الاعلام الحكومي الرسمي فاقد للأهلية والمصداقية منذ سنوات طويلة ، خاصة فى الوقت الراهن ، تشمل ذلك البرامج الحوارية الجريئة التي تناقش وتحلل

كمان ان الغلبية العظمي من الشعب المصري ليس لهم انتماءا لتيار بعينة أو ما يقال عنه ( الشارع ) ولكن كل ما يعارض الحكومة مقبول فى نظر الشارع حتى لو لم يطلع الفرد على منهج المعترض

اهمال الجهات الحكومية وعدم احترامهم للمواطن سبب رءيسي للوقوف فى طابور الكراهية الأبدي لها

اختيارك للكلمات محبب ، وللقصائد عبقري

وفقك الله
تحياتي

marwa يقول...

مبروك ع اللوك الجديد
كلامك حلو قوي وأسلوبك مرح وبسيط
ويدخل القلب بسرعة
ربنا يسهل لك أمورك
دمت خفيف الظل دوما

فتاه من الصعيد يقول...

على فكره انا بضحك مووووت لما بسمع كلمه المحظوره دي

المهم ربنا يصلح حال الاعلام الحكومي ..... شكله بقا حش قوي

احييك على اختيارك للكلمات
تقبل مروري

حلم بيعافر يقول...

من المدونة المحتلة احييكم

هههههههههههههههه

ايه كل ده ياحنين؟

بطلى لعب شوية

كده هتتعبى يابنتى

هههههههههههههه

منورة والله

حلم بيعافر يقول...

ليس فقيرا من يحب

رانيا يابنتى والنبى اتوسطيلى عند فشكول تانى

وقوليله انى هعقل واحط الفيل فى المنديل

هههههههههههههههههه

وشنبو فى المصيدة

ايه الافلام الابيض واسود دى؟هههههههههه

هو انت مدرسة ايه يابنتى؟

اصل انا مدرس كيميا وبحب اعاير الناس

انت منورة على فكرة والبيت بيتك خدى راجتك

حلم بيعافر يقول...

ماما امولة

يانهار ابيييييض!!!

منورانى

حلم بيعافر يقول...

المشخبطاتى

ايوه ياعم عملنا موقف امال ايه؟

انا عن نفسى فضلت مشتغلش وقعدت ف مكانى لحاد ماطلعت الرست بتاعى

وروان بتقولك الله يسلمك

منورنى

حلم بيعافر يقول...

بنجاواتى

ياعمنا البلد دى زى مابيقول ابراهيم عيسى كده وكده مش بجد وحقيقى يعنى

منووووووووووور

حلم بيعافر يقول...

flower-girl

هههههههههههههه

هو انت طلعتى كده؟

هههههههههههههههههه

ذكرياتك بقى تلاقيها فظييييييييييعة

ههههههههههههههههه

منورانى

حلم بيعافر يقول...

د-ياسر

منور يادكتور وصاحب القصيدة محظور فعلا هههههههههههههههههههههههه

ماهو اخوانجى واتحبس قبل كده وطفش م البلد

منووووووووووورب

حلم بيعافر يقول...

احمد الصعيدى

احم احم

يعنى اختيارى كويس

ههههههههههههه

شكرا ياعم منورنى دايما

حلم بيعافر يقول...

سماء

منورة وكده كده كنا هنجيب العنوان الجديد ده

مصادرنا الخاصة بقى

هههههههههههههههه

منورانى

حلم بيعافر يقول...

مى

ربنا يخليكى وتنورينا دايما بقى

منورة المدونة

حلم بيعافر يقول...

ليس فقيرا من يحب

يللا بقى عمالين نجيبلكوا شكل حلو

عدى الجمايل

هههههههههههههههه

شكرا يارانيا ع المتابعة الدايمة دى ومنورانى دايما وبستنى ردك ومرورك والله

حلم بيعافر يقول...

حاول تفتكرنى

رايك يحترم يا معلم

والقصيدة شكلها عجبتك قوى

يللا بقى ادعيلى

ههههههههههههههههههه
منور المدونة وصاحب المدونة

حلم بيعافر يقول...

مروة

الله يبارك فيكى

وشكرا ياستى ع الكلام الكبير ده

ومنورانا دايما

حلم بيعافر يقول...

فتاة من الصعيد

يارب يصلح الحال زى مابتقولى

منورة

(Joudy) يقول...

تصدق انا خيفة بكره نسمع عنك خلف الأسوار ههههههههههه شكلك كده ناويها وكمان عامل كوارس بسبب الجوع ما تقلقش ليك ساندوتش عندى

دمت بكل الخير والسعادة

وجه جديد د.أحمد عثمان يقول...

لا فيه فارق كبيييييييير
بين روان و الحكومة بصحفها

روان بتقول ابني و هي مقتنعه تماما بكده
يعني بتتكلم بصدق

الحكومة بقى بتقول كلام هي نفسها مش مقتنعة بيه
بتضحك على نفسها


روان تكسب

تدوينة جميلة
ايها الحلم الأبي

حلم بيعافر يقول...

جودى

انا برضه كان رايى فيكى انك كريمة وقلبك كبير

هو السندوتش بايه؟
هههههههههههههه

منورانى

حلم بيعافر يقول...

د-احمد عثمان

منورنى يادكتووووووووووووور