الأحد، 23 أغسطس، 2009

الراجل ده هيجننى هيجنننننننننننى......

فى حواره مع التلفزيون الامريكى ساله المحاور الامريكى عن نيته للترشح لفترة رئاسية جديدة فرد وقال انها مش فى دماغه دللوقتى(يعنى منفاش الفكرة) وان اللى بيهمه هو استكمال تنفيذ برنامجه الانتخابى(على اساس انه نفذ منه كتيييييييييير قوى وعايز يكمل)....يدينا ويديلك طولة العمر ياسيادة جناب حضرة الريس بس انا فيه سؤال كده صغير واقف فى زوووووورى ونفسى يوصله(هو اييييييييه انت مزهقتش ننا ولا اييييييييييييييييييييييييييييييييييييييييييييييييييييه؟!!!!!!!!)



الراجل ده هيجننى بجد مش اغنية والله وبصراحة مش عارف بيشتغل ايه....ومحدش يقوللى ده وزير خارجية مصر عشان ميعصبنيش واحنا فى رمضان شهر مبارك يعنى ومش عايز اتعصب فيه ....م الااااااااااااخر الراجل ده معملش حاجة تدل على انه وزير خارجية ومش معنى انه مسك ايد تسيبى ليفنى وهى بتقع يبقى وزير خارجية ولا معنى ظهوره فى المؤتمرات الصحفية ولا قعاده فى كام اجتماع كده سد خانة انه وزير خارجية بجد....كل المشاكل والازمات اللى مرت عليه لغاية دللوقتى وهو قاعد على كرسى وزير الخارجية كان بيتفرج عليها كانه ضيف بالظبط زيه زى مدربين الكورة فى الزمالك فى اخر خمس سنين مش شاطرين غير فى الكلام والانعرة وخلاص وهما مبيعملوش حاجة ولا ليهم اى لازمة ونفتكر كده مع بعض من اول العدوان على غزة ولحااااااااااااااااااااد اختطاف الصيادين المصريين على سواحل الصومال....هاااااا.....اعصروا دماغكوا شوية مش معقولة الصيام عمل فيكوا كل ده....بالذمة فيه ازمة عدت والراجل ده تدخل تدخل دل على انه وزير خارجية دولة من المفروض انها كبيرة فى المنطقة اللى هى فيها؟


الاحتفالات برمضااااااااااان تختلف من بلد لبلد ومن ثقافة للتانية يعنى فى مصر الاحتفالات برمضان عن طريق الاكل والحلويات وملى وتفريغ البطوووووووون والصلاة والالتزام الدينى لمدة شهر وفى فلسطين والعراق وماشابه بتكون الاحتفالات بعد كام رمضان عدى على الاحتلال

نجحت الصين فى غزو العالم الاسلامى واختراقه فى تراثه واكبر دليل على كده الفوانيس اللى عاملة زى الحلل بالظبط لدرجة ان والله الواحد بيبقى حاسس انه لو فتح فانوس من اللى ماليين الشوارع دول هيلاقى فيهم محشى ولا صينية بطاطس

تواصلت موجة الاتجار بالدين الاسلامى فى مصر وزادت بصراحة عن اى حد وعن اى معقول (رن رنة تخش الجنة)

واصل التلفزيون المصرى وغالبية الفضائيات العربية موجة الهيافة والسفالة والعبط وتكرار اخطائهم فى رمضان ده برضه وكأنهم مبيتعلموش اى حاجة نهائى بس الشىء الغريب واللى يفرس ويخلى الواحد يطق هو نسبة المشاهدة العالية للمحطات دى وكأن الناس هما كمان خلااااااص لسعوا وبقوا اللى يباتوا فيه يصبحوا فيه ومش مكفيهم ملل العيشة فبيكملوه بملل الفضائياااااااات

رمضااااااااااان كرييييييييييييييييييم وكل سنة وكل الدنيا بخييييييييير وسلام
وخدوا الحتة دى بمناسبة رمضان

أول ما قال جبريل
عند النبى(اقرأ)
واتوالى بالتنزيل
فجر الهدى شقشق
وحراء شهيد ع النور
يااهل الضلال والزور...
مين من ياسين اصدق؟
معجزته(بسم الله)..(واجنحوا للسلم)..
محجزته كانت حلم..
والحلم اهو اتحقق

هناك 33 تعليقًا:

ليس فقيرا من يحب يقول...

السلام عليكم

شكلى كده اول تعليق

ليس فقيرا من يحب يقول...

ايون دا صحيح

دا انا اول تعليق

حاول تفتكرنى يقول...

كالعادة

موضوع متعدد الاتجاهات

صراحة فيه ناس كتير فى البلد مش عرافين شاغلين ايه بالضبط ، لو هنعد فعلا مش هنخلص

عاملين زي المماليك اللى كان بيلمهم ايبك فى فيلم وا اسلاماه

مش مهم هما ومين وبيعملوا ايه ، المهم يبقوا حاشية مؤدبة

تحياتي

شبه إنسانه .....( سهوره ) يقول...

السلام عليكم ورحمة الله وبركاته

كل سنة وانته طيب

ويعود علينا الايام بخير

وربنا يرزق خير رمضان

أما بالنسبة لموضوع البوست ده

فهو رائع بجد

وانا فعلا مش عارفه الراجل ده ناوى على ايه تانى

بس بصراحة محدش بيعرف قيمته امه الا لما يجرب مرات ابوه

وانا خايفه نجرب حد تانى يغرقنا

ربنا حامى البلد دى والله

عامة يا باشا كل سنة وانتى بخيررررر

تحياتى

سهوره

7annen يقول...

كل سنه وانت طيب

رمضان كريم

انت شكلك مش ناوى تجبها لبر

الريس يا سيدى الله يكرمه

بيحبنا

ماسك فينا بايده واسنانه

تقوله انت زهقت مننا

دا بدل ما نشكره

كتر خيره الراجل

:))

الحق استخبى انت اليومين دول

حنين

ليس فقيرا من يحب يقول...

وبعدين يا عمى انت

مش خايف على نفسك

طب خاف علينا واحنا داخلين

نعلق عندك

انا طبعا ومن هذا المنزنق بقولك

انا ولا اعرفك ولا عمرى شفت المدونه

دى انا مش عارفه اصلا تقريبا كده

حد سقانى حاجه اصفرة وخلانى علقت هنا

الصراحه كمان ان اللى كاتب التعليق

ده مش انا

ليس فقيرا من يحب يقول...

كل سنه وانت طيب يارب

رمضان كريم

وزيح من على قلبك واهو اللى نعرفه

احسن من اللى منعرفوش

ههههههههههههههههههههههههههههه

الموضوع جميل وعميق كالعاده

يارب توصل ولو جزئيه صغيرة من الرساله

فى حفظ الله

واحده من الناس يقول...

بص ياعم اولا لانك ف مصر فتوقع كل اللى انت سردته علينا
لان مصر بلد المعجزات
بلد تنابلة السلطان
بلد رمضانكو مسلسلات
وانسى الصلاه والصوم

انا النهارده شفت لقطه ف مسلسل خلتنى سالت ماما سؤال غبى وغريب قلتلها قوليلى هى بنات الليل اللى ف الكباريهات دى بتصوم رمضان زينا؟
طبعا ماما حدفتنى بفردة الشبشب ابو ورده على دماغى
بس انا ذنبى ايه مانا كل ما اشوف مسلسل يطب على دماغى سؤال غبى من دول

بالنسبه لريسنا حماه الله
ههههههههههههههه
فالراجل شايل مننا على قلبه ااااااااااااااد كده وساكت بتنكشه انت ليه
عجيبه والله

ثم هو عنده طولة بال رهيبه
ثم احمد ربك انه عايز يكمل معانا
لان لو جه غيره هيبدا من الصفر يعنى يبدا يشيل واحده واحده من تانى
قصدى يشيل همومنا
لاتفتكرنى بقول يشيل اللى ف جيوبنا ولا حاجه
لكن الريس عينه ماليانه

لذا فنحن فى اشد الحاجه لبقاء ريسنا معنا

ورمضان كريييييييييييم

youssif يقول...

الراجل بيعلمنا التحمل و الصبر عارف ان الشعب المصري مدلع و مش صبور فبركز علي النقطة دي ... و مش حيكمل البرنامج إلا لما يعلم الشعب المصري كله الأدب ... لو وصلت انهم يحنطوه علي كرسي الحكم ...

مصري جدا يقول...

هههههههههههههههههههههههههههههههه

ويسيب اليغمة دي ويروح فين


ههههههههههههههههههههه

البوست دة هيفرقع
جايبة الاتنين الفئريين دول مع بعض

رمضان كريم

لية الأرف دة بس في رمضان

شمس النهار يقول...

ازيك
فعلا الناس فاهمه رمضان اكل مع انه شهر صوم واحساس بالجوع والفقراء

والغريب في الموضوع حكاية المسلسلات دي تحس ان في تطرف
ناس افتكرت انها مسلمه فجأه وبيتباهوا انهم بيصلوا في جوامع بتصلي التراويح في ساعه واتنين وتلاته
وناس قاعده امام الشاشه ليل نهار

اما الصين الغريب ان لما الدينمارك عملت عملتها وسبوا الرسول الكريم
قمنا وبصراحهعملنا الواجب
طيب اشمعنا الصين دول من اول تاريخ الاسلام وهمه بيدبحوا في المسلمين
ليه مانقاطعش منتجاتهم اللي هي اصلا مش جيده
كل سنه وانت طيب وبخير وصحه وسعاده

(green eyes) يقول...

والله معاك حق مش عارفة الناس دي هتروح من ربنا فين !!!
كل سنة وانت طيب ورمضان كريم

(green eyes) يقول...

نسيت اسجل اعجابي باسم البلوج بتاعك
في حاجه كمان ياريت تغير لون العنوان بتاع كل بوست علشان يظهر
تقبل مروري

فتاه من الصعيد يقول...

اولا كل سنه وانت طيب

ثانيا انت بتنكر خير الناس ليه

لسه لما يكمل الراجل الخطه بتاعته ...... وهي تنظيف جيوب الشعب كله...... لان لسه في خمستاشر واحد لسه ما شحتوش

بالنسبه لوزير الخارجيه ...... فبرضه انت ناكر للجميل ..... نسيت لما اعلن الحرب على حزب الله بعد اكتشاف الخليه المهلبيه بتاعتهم في مصر ..... اهو الراجل استجرأ وقال بقين حلوين ساعتها

كل سنه وانت طيب

سمسمه يقول...

الف سلامه عليك من الجنان
يااااااااسيدى رمضان كريم
البلد دى اللى يفكر فيها يتعب قوى

وومن يقول...

كل سنة وانت طيب يا حلم

حلمك علينا شوية تطلعنا من موضوع تدخلنا في موضوع

الراجل دة مش هايجننك بس دة هايجننا كلنا الحمد لله بقينا مسخة بسببة

التليفزيون والفضائيات بقي بتستهبل بتستهبل بتستهبل وأحنا السبب
طب تعرف انا واخواتي قرننا اننا مش هانتقرج علي المسلسلات السنة دي ومرتاحين علي الآخر والحمد لله ومريحين دماغنا وقدامنا 11 شهر لما المسلسلات دي تتعاد نبقي نتفرج براحتنا

kmt يقول...

السلام عليكم ورحمة الله وبركاته

أول ما قال جبريل
عند النبى(اقرأ)
واتوالى بالتنزيل
فجر الهدى شقشق
وحراء شهيد ع النور
يااهل الضلال والزور...
مين من ياسين اصدق؟
معجزته(بسم الله)..(واجنحوا للسلم)..
محجزته كانت حلم..
والحلم اهو اتحقق

:)

كل شهر وانت طيب

تحياتي
الى اللقاء

الشعب لابد له من حكومه تشكمه يقول...

اسسسسسسسسكت همووووووووووت وكنت انزل بوست عن الموضوع ده بس قلت احنا فى رمضان وبلاش انم على حد هههههههههههههه بس شوفت لما قاله عملت ايه فى ال28 سنه اللى فاتو شوفت الاجابه؟؟؟؟؟؟؟:)))
بالنسبه للتانى دا مسلى جدااااااااا والله بيضحكنى موووووووت تقريبا هو قطع كل علاقتنا مع الدول العربيه بتصريحاته:))

حلم بيعافر يقول...

ليس فقيرا من يحب

يلاا يا ستى مبروك عليكى اول تعليق ههههههههههههه دخلتى التاريخ من اوسع ابوابه

كل سنة وانت طيبة يا رانيا

حلم بيعافر يقول...

حاول تفتكرنى

حاشية مؤدبة وبتسمع الكلام كله يا استاذنا

منور وكل سنة وانت طيب

حلم بيعافر يقول...

سهورة

امه مين ومرات ابوه مين؟
هههههههههههههههههههه

ياامثالك يا سهورة

منورانا والله
كل سننة وانت طيبة

حلم بيعافر يقول...

حنين

مش انت اللى محرضانى اكتب البوست ده برضه؟

هو انت كل مرة تيجى ساعة الجد وتخلعى؟

على فكرة دى مش اخلاق المعلمة خالص

ههههههههههههههههههههه

منورة ياحنين

كل سنة وانت طيبة

حلم بيعافر يقول...

ليس فقيرا من يحب

وبعدين يا رانيا ؟

مش كفاية حنين اتهربيت وتنصلت من مسئولياتها تجاه البوست ده؟

تيجى انت كمان وعايزة تخلعى؟

صحيح زعيمة اى كلام

هههههههههههههههههههههههههه

متخافوش انتو معايا معايا ويانعيش عيشة زى الفل يا يموت الكل
هههههههههههههههههههههههههه
كل سنة وانت طيبة

حلم بيعافر يقول...

واحدة من الناس

اسئلتك غريبة قوى

هههههههههههههههههههههههه

كل سنة وانت طيبة

حلم بيعافر يقول...

يوسف

هيعلمنا الادب زياادة عن كده؟


منور يا جو

كل سنة وانت طيب

حلم بيعافر يقول...

مصرى جدا

من غير شتيمة ياعمنا

كل سنمة وانت طيب

حلم بيعافر يقول...

شمس النهار

الله يسلمك والف حمدالله ع السلامة


كل سنة وانت طيبة

حلم بيعافر يقول...

green eyes

منورة والله ونغير لون العنوان عشان خاطر العيون الخضراء مفيش مشكلة


كل سنة وانت طيبة

حلم بيعافر يقول...

فتاة من الصعيد

ابقى كداب لو قلتلك انى سمعت من ابو الغيط ده كلمة حلوة

اللهم انى صايم بلاش اشتم

منورة

وكل سنة وانت طيبة

حلم بيعافر يقول...

سمسمة


منورة ومش هفكر تانى

كل سنة وانت طيبة

حلم بيعافر يقول...

وومن

هههههههههههههههه هو انتوا لازم تتفرجوا عليها يعنةى؟

لو مكنش فى رمضان يبقى لما تتعاد؟

هههههههههههههههههههه

والله امركوا غريب جدا

كل سنة وانتوا طيبين

حلم بيعافر يقول...

kmt

وانت طيبة وبالف صحة وسلامة

منورانا

حلم بيعافر يقول...

الشعب لابد له من حكومة تشكمه


وزير خارجية مسلى؟!!

مفيش واحد بطعم الجبنة؟1

هههههههههههههههههه

رمضان كريم

كل سنة وانت طيبة