السبت، 26 سبتمبر، 2009

عن القفا يدور حديثا...



القفا...شىء عرييييييييييييض بيوصله اكتر من طريق...فى مصر بالذات دونا عن بقية بلاد الارض اللى نعرفها واللى منعرفهاش القفا ده عبارة عن كتاب ضخم ولا اجدعها موسوعة تاريخية فى اى مكان او اى زمان.

لو حبيت تستعرض مع نفسك تاريخ وكستك وخيبتك فى الشغل هتلاقى نفسك فى الاخر وصلت للقفا واضربت عليا كتير قوى..محدش يتكسف ..انت مش مصرى؟!!..يبقى متكسفش من حاجة...طبعا اللى بيرفضوا ينضربوا على قفاهم قليلين جدا وفى الطريق للانقراض نهائيا
يعنى لو مديرك فى الشغل مثلا كلفك بشغل فوق شغلك هترفض ولا هتسكت؟...هتسكت طبعا (ياموكوووووس)وهتاخد الشغل الزيادة اللى من غير مقابل على امل ان المدير يشيلهالك وياخد عنك فكرة كويسة (طبعا انت بتفكر بالطريقة دى عشان تدارى كسوفك وتدارى عجزك عن قولة كلمة لاء..)وبين وبين نفسك انت عارف ومتاكد انك اخدت على قفاااااك وهنروح بعيد ليه ماسيادتك لسه واخد جزاءات قد كده ..ومتقلب فى اوفر تايم قد كده..ياعم انت ايه اصلا اللى مخليك لسه قاعد فى الشغلانة دى؟!!!!

التطور الطبيعى للعلاقة بين الذكر والانثى هى الوصول لمرحلة الضرب ع القفا (الطرف اللى بيتضرب عارفينه طبعا وده شىء طبيعى)اللى مش طبيعى بقى جه السنة وجاب معاه العيد والمدارس ومصاريف الدروس والهدوم و.................يعنى باختصار هتاخد على قفاك من كل حدب وصوب(يعنى من كل اتجاه متتعبونيش معاكو بقى)

فى العصر الحديث لتاريخ المحروسة بنلاقى حاجة غريبة جداوهى الاعتزاز والتمسك الشديد باسلوب الضرب على القفا واستبعاد اساليب اخرى كانت سائدة فى عصور اخرى من قاموس الحياة اللى احنا عايشينها زى الضرب بالقبقاب اوالضرب بالجزم يعنى مثلا اول رئيس جمهورية لمصر(بسمع عنه بس والله انا اصلا عندى23سنة ومشفتش غير واحد بس)لما صحابه فى مجلس الثورة جم يخلعوه مضربهوش بالقبقاب ولا بالجزم ولا رموه من فوق القلعة ولا حاجة من الكلام القديم ده خالص وجم بكل ود واحترام وضربوه على قفاه فى الخباثة ولا كان حاجة حصلت(خلاصة ماسبق\استبدال الضرب بالقبقاب بالضرب على القفا والابتعاد عن طريقة الضرب بالجزم لانها طريقة انجليزية مدسوسة على تراثنا وقد سبق واتسخدمها السير اليكس فيرجسون مع المدعو ديفيد بيكهام)

بالنسبة بقى لايام الفراعنة فانا ملاحظ اضطهاد شديد لاسلوب الضرب ع القفا والغاء الوزارة والاجهزة المنفذة لهذا الاسلوب(وزارة الداخلية وجهاز امن الدولة)والانيل والامر ان كل التماثيل بتاعة الفراعنة جاية بوشها ومشفتش تمثال يوحد ربنا جاى بقفاه ابدا بس الله اعلم يمكن هما كانوا بيستخدموا الاسلوب ده بس ع السكت ومن غير ماحد ياخد باله وبيخدعونا اصل الفراعنة دول كانوا خداعين وغدارين وقلبهم قاسى قوى قوى قوى
فى الادب المصرىوبالخص فى الرواية المصرية هنلاقى ان اشهر حد وصف القفا وتغزل فيه هو اديب نوبل نجيب محفوظ وطبعا روياته تعج بالفتوات واولاد البلد اللى بيتمتعوا بقفا عريييييييض وجاااااااااامد جدا ليتناسب مع ظروف الحياة ومتاعبها وانا عن نفسى لسه فاكر قفا كل فتوة على حدة زى ماكون شفته بعينى.

اياااااااااااااام البراءة ...فى الثانوية العامةعلى ايامى كانت قامت هوجة مظاهرات جامدة بسبب انتفاضة فلسطين وفى الهوجة دى صاحبى ابوالسعود جانى خبره وانا قاعد لا بى ولا على فى الفصل وسمعت صوت بينادى وبيقولا(الحق ابوالسعود اتقفش..)مصدقتش نفسى د ابوالسعود مكنش له لا فى الطور ولا فى الطحين بس هى كده الدنيا جرته فى طريق غير اللى كان بيحلم بيه...المهم بعد ماتمسك واترمى فى البوكس رجعلنا بقفا تانى خالص غير بتاعه الاصلى وكان احمر شوية ووارم شويتين تلاتة بس عرفته من صوته ومن ساعتها ضميته لفئة من الشعب المصرى قفاها اصبح مرتع لامناء الشرطة وعساكر الامن المركزىوكان الفئة دى قفاها دفتر حضور وانصراف تابع لوزارة الداخلية.

لو انت زملكاوى او استغفر الله استغفر الله مش حزب وطنى ورحت تحضر اجتماع للحزب بتاعك هتعرف يعنى ايه الضرب ع القفا...

هناك 47 تعليقًا:

اللى موش عارف يتغير يقول...

اه يا قفا
ازيك يا محمد وكل سنة وانتم بخير
وكل الطرق تؤدى الى القفا على فكرة
فكرتنى باللى كان بيقول لمحمود عبدالعزيز عمرك شوفت حد غنى للقفا عشان كده ده التجديد
انت برده عملت كده عمرك شوفت حد اتكلم عن القفا
سلامى للجميع

(Joudy) يقول...

هههههههههه كل ده شايله فى قلبك وساكت بس على فكرة الناس كانت بتاخد وراضية وساكته بتقلب عليهم المواجع ليه هو انت والدنيا عليهم

يالا مش مشكلة هى جت على الحكاية دى قفا قفا مش فارقة

دمت بكل الخير والسعادة

with you يقول...

السلام عليكم ورحمة الله وبركاته

تحياتي لك أخي الكريم

اسلوبك فعلا من أفضل الأساليب التي قابلتها.

وفعلا موضوع القفا دا موضوع خطير ولكن لا تكن ممن يأخذون ويصمتون خذ وعليك برد الجميل الصاع صاعين.

كما الاحظ في كلماتك أنك تضرب البعض علي قفاه " يارب يكون عنده شوية من الأحمر "

تحياتي أخي في الله

زيارة مثمرة لي

محمد حياتنا

fL0weR-giRL يقول...

ههههههههههههههههههههه
ايه الموضوع الخطير داه
بس فعلا عندك حق اللي بيندربوا علي قفاهم كثيرون لايحصوا ولا يعدوا

** تقبل مروري **

^_^

أحمد الصعيدي يقول...

السلام عليكم

فاكر فيلم الفتوة لما فريد شوقي كان داخل السوق أول مرة ضربوخه علي قفاه تحية كاريوكا قالتله ايه

قالتله
صحتين علي بدنك يا تلح

وده كان أقوي قفا اضرب في مصر في الظاهر يعني
أما في الباطن
طبعا في مدون ورمت علي قفانا

والله يبارك لستاموني

فتاه من الصعيد يقول...

اخيرا خدت افراج من المفتي :D
بالنسبه للقفا فاحنا الشعب الوحيد اللي غناله ..... لعلمنا بأهميته في بلدنا دون غيرها من البلدان..... وعلى رأي اللي قال ..... ده بيستحمل كتير قوي

انت لغيت حمله استنضف وشجع الزمالك ليه؟!! :)))))))" هموت من الضحك "

فتاه من الصعيد يقول...

ده لينك لموضوع نازل في مدونه ..... تحميل كتاب واحد عقيد كاتبه علشان ماتنضربش على قفاك :D ..... اسم الكتاب كده والله

http://7anany.blogspot.com/2009/09/blog-post_26.html
عد الجمايل بقا

د/عرفه يقول...

ازيك يا محمد كل سنة وانت طيب

وبعدين هو الواحد ايه غير قفا يحافظ عليه

واللى يفرط فى قفاه زى اللى يفرط فى .....


يلا ربنا يحمى قفا كل واحد مننا

sweet angel يقول...

السلام عليكم

بجد أسلوب حضرتك جميل
ومن أفضل الاساليب الي شوفتها في المدونات

سعيده جدا بمروري هنا
وان شاء الله يتم التواصل

تقبل مروري
تحياتي

7annen يقول...

كل دا فى القفا يا محمد

دا المفروض بقى نطبع مجلدات للقفا المصرى

ههههههههههههههههههههههه

ومش اى قفا طبعا المصرى اوى

هههههههههههههههههههه

حنين

ليس فقيرا من يحب يقول...

السلام عليكم

حمد الله على السلامه طولت الغيبه

ان شا الله تكون بخير

طبعا القفا ده انا مش عارفه اقولك

ايه بس لازم كل واحد فينا ياخويا لازم

يعزز قفاه شويه

وان لقفاك عليك حقا

فلازمن وحتمن ولا بد تحافظ على قفاك

بس

كل سنه وانت طيب يارب

وبعدين متأخر وكمان مفيش عيديه

دا ايه ده

مي يقول...

موضووووع جديد وجميل جدا القفا
تصور فعلا اد ايه اهمية القفا
ههههههههههههه بس ايه موضوع فى الجون وكل قفا ومساحته بقى
بس حلوة انك جبت التاريخ كله
احنا شعب عريق القفا وياترى صاحبك لسه عايش
تحياتى لموضوعاتك المتميزة

3mr wa2el يقول...

اة يا قفا اة يا قفا

احلى حاجة ف الاقسام الشرطة الضرب بالقفة

تحس كدة امين الشرطة بيحس براحة لما يضرب بالقف
ششوفتها ف مرة انا ف تحقيق نيابة

كان قف اية زباطي هههههههههههههههههههههه

ربنا ما يكتبة الا على اولاجد السوء بس

الشعب لابد له من حكومه تشكمه يقول...

على رأى اللى قال كل الطرق تؤدى الى روما قصدلى الى القفا..تصدق شايل كتير فعلا

akeed يقول...

عندك حق القفا دايما بيتحمل كتير و فى انتظار انه يتحرر

ليس فقيرا من يحب يقول...

السلام عليكم

حمد الله على السلامه

ايه الغيبه الطويله دى

طبعا بعد قراءه البوست الجامد ده

لا املك الا انى انصح كل واحد يخلى باله

من قفاه ويحميه وخصوصا من التسقيف

هههههههههههههههههههه

كل سنه وانت طيب

أحسن تـستاهـل يقول...

يا نهار!!!!
انت جبت المعلومات دي منين
يـامـه

ده تاريخ بلد يا ابني بسم الله الرحمن الرحيم !!!

مها ميهوووو

mohamed ghalia يقول...

ياما بيستحمل فعلا

GiGi world يقول...

اه
بجد مش عارفه اقول ايه
وايه اخره كده
تحياتى على البوست الرائع بس حزين قوى على واقعنا وعلى ماوصلنا ليه

micheal يقول...

فعلا الريس ستاموني صدق لما قال القفا مهم جدا فرد عليه كمزاجانجي
معاك حق هو دايماالقفا كده مظلوم مع أنه بيشيل كتير عن صاحبه في الزمن ده
:))
الحمد لله يوم ما مديري في الشغل غلط فيا مسكتش وسبت المكان إحتجاجا ع الإهانة رغم مدى حاجتي للشغل ونجاحي في الوظيفة دي دونا عن أي وظيفة أخرى إشتغلتها
الحمد لله برضه أنا لا جزب وثني ولا زملكاوي
كان الله في عون أشقائنا الزملكاوية
تحياتي

حلم بيعافر يقول...

اللى موش عارف يتغير

كل سنة وانت طيب يا بوب

واحشنى

حلم بيعافر يقول...

جودى

ياما شايل

ههههههههههههه

كل شسنة وانت طيبة

حلم بيعافر يقول...

with you

ربنا يكرمك

المدونة نورت

حلم بيعافر يقول...

flower-girl

اى خدمة

عدى علينا الاخطر لسه جاى ورا

ههههههههههههه

حلم بيعافر يقول...

احمد الصعيدى

كل سنة وانت طيب وفاكر القفا بتاع فريد شوقى

ههههههههههههههه

ده ميتنسيش وقصدك وصل

منور

حلم بيعافر يقول...

فتاة من الصعيد

اه اخدت افراج

كل سنة وانت طيبة

بتشمتى فينا

مااااااااشى

كلها 12679543سنة والزمالك حاله يتصلح وهنولع فيكو


ههههههههههههههههه

متزوديش علينا بقى وتفكرينا

على فكرة عارف الكتاب وشكرا على اللينك وهنزله واقراه

نورتى كعادتك

حلم بيعافر يقول...

دكتوووور عرفة

كل سنة وانت طيب ومنور

حلم بيعافر يقول...

sweet angel

زيارتك شرفتنا وان شاءالله يدوم التواصل

كل سنة وانت طيبة

حلم بيعافر يقول...

حنين

ايدى على كتفك

يلاا الفى اللى تقدرى عليه

هههههههههههههه

كل سنة وانت طيبة ومنورة

حلم بيعافر يقول...

ليس فقيرا من يحب

ازيك

والغيبة طالت بس رجعت على قلبكوا اهوه

ومفيش عيدية

وشغل افتراء بقى

هههههههههههههههههه

هلاقيها منك ولا من ولا اخواتى

هو ايه نجيبلكوا عيديات منين بس؟

ههههههههههههههههههه

حلم بيعافر يقول...

مى

جبتى من الاخر

كل قفا وساحته

والله فيكى الخير صاحبى لسه عايش

ههههههههههههه

منورة دايما

حلم بيعافر يقول...

عمر وائل

جاسوووووووووووس

انت بتدخل اقسام وكده؟

ياعم انا مش صاحب المدونة دى
ههههههههههههههه

منور يا بيه

حلم بيعافر يقول...

الشعب لابد له من حكومه تشكمه

كل الطرق تؤدى الى .......ربنا يستر من الجاى

كل سنة وانت طيبة

منورة

حلم بيعافر يقول...

akeek

منور وكل سنة وانت طيب

حلم بيعافر يقول...

ليس فقيرا من يحب

اسمعوا كلامها ياولاد

طنط رانيا مش بتقول حاجة غلط

هههههههههههههه

ايه ده هو انت قريتى البوست؟

حلم بيعافر يقول...

احسن تستاهل

شفتى بقى

ابقى تعالى كل شوية اعرفى تاريخ بلدك

ههههههههههههه


كل سنة وانت طيبة ومنورة

حلم بيعافر يقول...

محمد غالية

عندك حق يا معلم

منور وكل سنة وانت طيب

حلم بيعافر يقول...

جى جى

منورة وكل سنة وانت طيبة

حلم بيعافر يقول...

micheal

هيييييييييييه جريت رجلك لهنا

تابعنا هنا بقى وخلاص

منورنى وكل سنة وانت طيب

norahaty يقول...

حررررررررام عليك
على الصبح صاحية
كلى امل وعمر
وفتحية كمان
الاقى الموضوع
ده ف وشــــى
:(:(:(:(:0
الله يســامحك
ومالكش دعوة
بالزمالك مش
علشان انا منهم
لألألألأوالف لألألألألأ
بس علشان اصحابه
موجوعين بالزيادة
ومش ناقصين بعدين
يتلموا عليك ويحصل
......انت عارف بقى:)

حلم بيعافر يقول...

norahaty
هههههههههههههه
طب مايتلموا
ايه يعنى؟
حتى يبقى اتلم المتعوس على خايب الرجا
مانا زملكاوى انا كمان
هههههههههههههههه
متخافيش يعنى كلنا

معتز شاهين - باحث تربوي يقول...

عادي ما هو تجار المخدرات في الشوارع والطاهرين في السجون
زمن العجايب زمن مبارك

ويبقى التواصل

micheal يقول...

بوست جديد بقى

حلم بيعافر يقول...

ا\معتز
زمن مبارك زى ماقلت
منورنى

حلم بيعافر يقول...

michel
امرك يا معلم

بقايا انسانه يقول...

للاسف كل واحد بقا يستغل منصبه

حتى لوكان دا على حساب كرامة البني ادمين

واللي مكنهم نظام غبي في دوله كان يجدر بها


تكون محترمه شويه عن كدا


هتقول ايه بس


ربنا كبييييير

حلم بيعافر يقول...

بقايا انسانة
شرفتى ونورتى
ومتخافيش الكرامة هترجع هترجع