الأربعاء، 21 أكتوبر، 2009

عبط التاريخ





أى طرف منتصر فى أى حرب دايما كان هو اللى بيتسمع وبيتاخد عنه بالتفصيل احداث الحرب دى وبيبقى مصدر لكل كبيرة وصغيرة حصلت او محصلتش وطبعا مساحة الفشر المتاحة للطرف ده بتكون غير محدودة بالمرة ان شاءالله يارب لو قال ريان يافجل.......
تعالوا نروح بعيد شوية لحاااااااااااد حرب طروادة واللى حصل فيها وطبعا لما نيجى نتكلم عنها مش هنخرج عن الياذة هوميروس وامرنا لله بقى نستحمل كل اللى قاله اكبر فشار وحشاش فى تاريخ الانسانية كلها وواضع اسس الفشر اللى ماشى عليها لغاية دللوقتى اى اديب بيكتب عن اى حرب ومش معنى ان بلده انتصرت فى حرب من الحروب على الطرواديين انه يزيد كمان على كده انه بالاضافة لشعب طروادة الغلبان اللى صاحبنا شرده فيه طابوور طوووويل من الالهة هما كمان اتهزموا على ايدين ابطاله الخرافيبين بالرغم من المتعة والخيال اللى فى الياذة هوميروس الا انه سرح بينا لبعيييييييد جدا بداية من كعب اخيل والتنين ابو سبع رؤؤس ولحااااااااااااااااد مجتمع الالهة الفشلة بتوعه اللى كانوا بيديروا الحرب على حد تصويره من ورا الكواليس

اذا كان الفشر والاستهبال هو سمة اليونانيين فى وصف حروبهم وبطولاتهم ومعاركعهم اللى خاضوها وانتصروا فيها فالصفات دى برضه عند الفراعنة بس زيادة عليها شوية حاجات زى الدفن والردم على الخسرانين (بس على بعضهم ماحنا من يومنا مبنشرطش غير على بعض)
أظن مسح عصر كامل باحداثه كلها من تاريخ امة ميقدرش يعمله غير فرعون ابن فرعون ابن اخت فرعوناية والمار على التاريخ المصرى القديم ممكن يلاحظ فجوة كبيرة جدا مكتوب عليها عصر الظلام تقريبا منعرفش عنها حاجة وطبعا العصر ده اطمث على ايدين الحكام الارستقراطيين اللى جم بعد فترة حكم الثوار ومكنش طبعا يرضيهم انهم يقعدوا على كراسى العالم الللوكال اللى كانوا قبليهم دول عشان هما من عامة الشعب فقاموا رادمين على الفترة دى بطيييييين وحاولوا يمسحوها خالص ويرجعوا مصر تانى لحكم الشوكة والسكينةوطبعا العرق دساس وواصل لغاية دللوقتى وواضح جدا ان مفيش مسؤول كبير فى البلد بييجى وبيكمل على شغل اللى قبله وبيهدمه ويرجع م الصفر تانى عشان اصحاب العقول فى راحة ورحنا ولا حجينا احنا فراعنة فى الاصل برضه

من الادبيات القديمة فى وصف الحروب ومن عمايل الفراعنة فى بعضعهم ومن السيف اصدق انباءا من الكتب ومن الشعراء الكتاااار اللى كانوا بيتمسحوا فى بلاط كل حاكم شوية عشان يمجدوا فيه وف انجازاته وعشان فلوسه كمان لالة اعلامية ضخمة قلبت الموازين القديمة كلها وغيرت شكل الحكاية تماما
مبقاش شرط ان اللى منتصر بقى هو اللى بيتسمع وبيتاخد عنه تفاصيل الحدث ومبقاش شرط كمان ان اى حرب تنتهى بهزيمة جيش ومبقاش شرط كمان ان الجيش اللى مهزوم هو اللى يتقال عليه مهزوم ومبقاش فيه امل ان اى حرب تنتهى اصلا
اعتقد دللوقتى القوة بقى ليها معايير تانية مختلفة تماما عن زمان ومهما كانت اى بلد مربية عضلاتها وفرحانة بيهم بس خرسة ومش بتتكلم فهى هفية وملطشة لجميع خلق الله
انجح حد استخدم الالة الرهيبة دى هما الصهاينة واستخدموها فى حاجات كتيرة قوى واحنا لسه محلك سر او يمكن بنستخدمها فى محاربة بعض زى اجدانا زمان ماكانوا برضه بيستخدموا كل جديد ضد بعض ..المهم لما اتسمع تصريح لحد زى واين رونى نجم منتخب انجلترا قال فيه ان الفلسطينيين ارهابيين وميستحقوش يعيشوا وان حصار وتجويع الكبار والصغار فيهم مش عيب يبقى فيه حاجة غلط ..يبقى فيه طرف معتدى ومجرم وجزار بس نقل صورة كويسة عنه ايا كان بقى مكيجها جملها مش قضيتنا ..قضيتنا هى فى الطرف المعتدى عليه المشلول العاجز حتى عن الدفاع عن حقه وعن توصيل الصورة الصح للنزاع وهينقل صورة صح ازاى اذا كان ليل نهار بيجهز لاخوه مصيبة وكارثة
حاجة تانية الصهاينة عملوها او فرضوها على الساحة وخلوها شىء مقدس ممنوع الاقتراب منه او المساس به ..طبعا بتكلم عن الهولوكوست اللى محدش يقدر يشكك ولا يعترض عليه رغم ضعف السند التاريخى له واللى هينطق طبعا هيتحلكم زى الصحفى الفرنسى او هيصدر ضد بلده عقوبة من مجلس الامن لو كان بيتكلم بلسان بلده
الكارثة بقى هتشوفوها من خلال الحكاية دى اللى يمكن تعرفوها لانها اتحكت كتير مؤخرا (فى احدى مدارس اوربا فى فصل 24 تلميذ كلهم اوربيين بينهم ولد مصرى بس ..المدرس وجهلهم سؤال من خلال ورقة اسئلة فى احد الاختبارات كان السؤال اختيار من متعدد وكان بيقول مين انتصر فى حرب اكتوبر 73(مصر ولا اسرائيل)والولد المصرى جاوب اللى يعرفه وقال مصر واخد صفر على السؤال ده وبقية الفصل جاوب باسرائيل واخد درجة السؤال..,.رجع الولد لابوه فى البيت وحكاله ع اللى حصل فراح ابوه معاه المدرسة وقابل المدرس وساله وكان رد المدرس بسيط جد ورد بسؤال وهو هاتلى دليل على ان مصر انتصرت وانا اصحح درجة ابنك)
كارثة ولا مش كارثة؟
احنا فى غيبوبة ولا مش فى غيبوبة؟
الصهاينة غسلوا مخ العالم كله ولا لاء؟
فى ذكرى انتصارات اكتوبر المجيد الحكاية بتاعة الولد ده بتحصل والدنيا بتصدق اللى بيتقال لانه بيتقال من طرف واحد والطرف التانى نايم على نفسه ومش دريان بايه اللى بيحصل لييييييييييييييييييييييييييييييييييه؟
لان الطرف اللى نايم على روحه اختزل تاريخه كله فى شخص واحد
لان الطرف اللى نايم على روحه اختزل نضاله كله فى اغنية اخترناك اخترناك
لان الطرف اللى نايم على روحه داير نقار فى بعضه ومش مهم عنده يبص حواليه
لان الطرف اللى نايم على روحه مبيعلمش اولاده تاريخهم يبقى ازاى حد تانى يعترفله بتاريخ ولا يحترمه؟!!!
من حقى انى اعرف تاريخى ومن حقى انى يكونلى قدوة غير تامر حسنى ومحمد ابوتريكة
من حق الجندى المصرى انه يتعرف ايه اللى عمله ولو ياخد جزء بس من وقت الفضائيات ومعلهش هياخد من وقت البورنو اللى عليها شوية بس معلهش دجه تاريخنا لازم احنا نعرفه الاول عشان نقدر نوصله لبره
وياريت ياريت ياريت يبقى فيه حد بيسال هنبص لبكرة ازاى ونبطل سؤال شوية عن الفاكهة اللى اولها زى اخرها عشان انا بقالى يومين واخد بالى من كذا قناة فضائية كل شغلها هو السؤال ده

انا غيبت كتير ومبروحش لحد كمان بس والله غصب عنى مرة النت ومرة الكمبيوتر انا خلاااص ماشى فى الشارع بدون على نفسى

هناك 49 تعليقًا:

الشعب لابد له من حكومه تشكمه يقول...

هههههههههههههههههههههههههههههههههههههههه كنت ماشى حلو لحد اخر جمله قلبت معايا كوميدى:)
بس عندك حق انا اهو معرفش فى حرب اكتوبر غير اول طلعه جويه فتحت باب الحريه للارض وللاوطان واديها كمان وكمان(يالهوى دنا حافظه الاغنيه هههههه)
معرفش باه البحريه والصاغقه والمشاه دول عملوا ايه كانوا بيتفسحوا تقريبا.

منور

حاول تفتكرنى يقول...

صراحة مقال عبقري

استدرجتنا بتشويق كالعادة لتفجر قنبلتك الموقوتة

فعلا

ليس عدلا ان يختزل تاريخ أمة لم تغيرها هزائم على مداره ، فى التهويل لشخص واحد لكسب التأييد الكامل له فى الداخل

اعلامنا مسئول مسئولية كااملة عن تهميش تاريخ مصر ، الذى لم يستطيع اي معتدي على مر التاريخ ان يغير منها ابدا

علي فكرة
يعجبني جدا خيال هوميروس، بس مكنتش اعرف انه حشاش

تحياتي

قلم رصاص يقول...

فعلا يامحمد
عندك حق يابن خالتي

بس خد بالك من نقطة ، الاعلام كوسيلة لنقل الصورة سواء الصحيحة او المزيفه ده ملك لليهود عبر العالم .. ومهما انت اساسا حاولت حتى اخر نفس انك تنافسهم او توصل صوتك مش هتقدر .. وحتى لو قدرت .. هما عندهم الأليات اللي بتغير مسار اللعبة في اي وقت .. لأنهم يمكلون اكثر مننا في الجزئية دي .. والاعلام من اهم اسلحتهم لإقامة الحكومة العالمية لبني صهيون .. دي نقطة

النقطة التانية ، انك كإعلام مصري وعربي مبيحاولش من الأساس انه يوصل صوته بشكل قويم وصحيح للخارج .. يعني خربانه خربانه .

احنا قاعدتنا الاعلامية ضعيفه .. ومع ضعفها ده هي موجهه بالأساس لمواجهة بعضنا البعض زي ما انت قلت


تارخينا مظلوم مننا .. انجازاتنا مهضومة ومخروب عليها مننا .. حرب زي اكتوبر .. الدراسات العسكرية المتخصصة في اكبر معاهد العالم الغربي نفسه أرخت عنها مالم نؤرخه نحن لانصاف ماحدث من جانبنا .. ومع ذلك

اصبر شوية كمان

هاااااااااااااانت

انا متاكد بعون الله ان فيه تغيير الفترة الجاية .. او على الاقل قبل مانموت

وبعدين انت بتدون على نفسك ليه؟!

اتغطى كويس وانت تبقى كويس

ههههههههههههههههه

سلام

أحمـــــــــــــد أبو العلا يقول...

طب نصدق الأول ان الاعلام سلاح وبعد كده نفكر نستخدمه ازاي؟
نصدق الأول اننا محتاجين شجاعه عشان ندور صح في تاريخنا ونعرف الفراعنه بنوا ايه وهدوا ايه؟
نصدق الأول اننا في حرب كلام واعلام واخبار واننا مش موجودين في الحرب ديه ونايمين في العسل؟
نصدق الأول اننا فعلا انتصرنا واننا من حقنا نفتخر بالانتصار ده, بس نفتخر بيه صح مش نفتخر بيه باغاني عبيطه وأفلام هبله؟
نصدق اننا نقدر وندور هنقدر ازاي؟

(Joudy) يقول...

ههههههههههههه ياعينى انت اتبهدلت بس بينى وبينك ليهم حق يعملوا كده وأكتر ما احنا انتصرنا من 36 سنة ياااااه عمر طويل واقتصرنا باننا نفتكره فى حفلة من 9إلى 11 مثلا ولا حتى12 اربع ولا 3 ولا حتى ساعتين وخلصت الحكاية يبقى هنفتكر ايه اه درس بنندرسه فى حصة تاريخ وانتهى حاجة بجد تحزن

وبالنسبة بقى للإعلام فبالفعل أنا شوفت الحكاية دى منتهى التفاهة حتى كمان الغباء
أقربها واحد بتقولك مدينة أسورها خضراء وبوتها حمراء وسكنها سود ومفتحها من حديد ولجل الذكاء اللى يقولك تونس واللى يقول بلد تانية وغيره ثالثة وهى البطيخة فعلا هو ده عقلنا واحنا أثبتنا إننا عايمين فى مية البطيخ

دمت بكل الخير والسعادة

مي يقول...

بجد مقال هااايل تسلم ايديك ايوة كده وغبت رجعت هايل
بجد وحشتنااااااااااااا ماليش دعوة
البوست هايل وتحليلك لعبط التاريخ رائع وفعلا الترايخ عبيط جدا ومن زمان اوى بس تفتكر هو لسة عبيط لوحده؟ معتقدش اعتقد اننا العبط كله
احنا العبط اللى متمسكين بحاجة واحدة ال ضربة جوية ياسلالالالالام فين انور السادات اللى هو البطل الرئيسى اللى اخد القرار بسياسته المحنكة وتواضعة عشان يساير السلام
فين الشهداء حتى اللى فشلنا اننا نخلد ذكراهم ادام اوروبا ومدرسينها
انا ساعات بقول لو قامت حرب مين هيحارب
شباب اكترهم قبل ما هيحارب هيعمل شعره سبايكى وهياخد القدوة تمورة ولا عمورة
وياترى بدل الجيش بنطلونات ساقطة
ده لعيه كبيرة اوى علينا من الغرب ومننا
لاننا بنصدق الكدبة وبنعيشها زى كدبة الضربة الجوية هو بالطيران يعنى ولا محلسة ولا ايه

ده انت هتخلينى اتكلم لغاية بكرة بس الموضوع حلو اوى بجد
وبين كلامك كلام اكتر

متتاخرش تانى بقى ههههههههههه
على فكرة بخصوص تعليقك عندى انا طلعت اسكندرانية نيهاااااااااا
بس لو عايزنى اهاجر للمنصورة مفيش مانع مادام انت منها يا باشا

تسلم ايديك متميز كالعادة

فتاه من الصعيد يقول...

طبعا اختزلناها في شخصيه واحده ....... وربنا يسهل وماننساهاش لو اللي مسك البلد ماحاربش فيها

احنا عدونا من اكثر الشعوب اللي زورت التاريخ ... وللاسف احنا موش عارفين حتى تاريخنا

تحياتي

أحسن تـستاهـل يقول...

بص.. هو انا عايزة أعلق على حاجة تانية خالص غير الكلام

انا عايزة اعلق ع الصور.. انا بحترم الصور اوي واللي بيختارها صح

بجد في منتهى الجمال والتعبير والوضوح
:)

مها ميهوووو

مواطن مصري يقول...

اتفق معاكي في شخصنة الانتصار و لكن الي ينكر نصر اكتوبر دة المفروض يتحاكم زي بتوع المحرقة اليهودية المشكلة في ناس من العرب بيقولو ان احنا انهزمنا مع اننا انتصرنا و هما كانو بيتفرجو او شاركو مع اسرائيل من تحت ل تحت او وقف يشجع انما محاربش بمعنى الكلمة زينا

Sonnet يقول...

فعلا هناك معايير مختلفة للانتصار و للتأريخ

donya يقول...

اول زياره
وبوست صادم

فعلا الاعلام العربي مقصر طبعا
نايمين في العسل
وهمنا هيفاء ونانسي واخوتها
ومين اللي قتل سوزان تميم
ونعمل قنوات نزيع فيها افلام الغرب اللي بيغسلوا بيها عقول الشباب ويستعمروهم لحد ماالشباب اغلبه بقي هايف الا من رحم ربي
وقنوات نفضح ونشرشح لبعض فيها
وقنوات لكل من هب ودب وهرش في راسه وحب يفتي ويتطاول علي الفتوي وهو لا يدري ان من تطاول علي الفتوي تطاول علي النار

لكن نعمل قناه موجه للغرب مافيش
انا كنت عايشه بره
عمري ماشفت قناه واحده موجهه للعرب في الخارج مخصوص

اما موضوع مين انتصر اعتقد ان دي اشاعه اسرائيل هي اللي عملاها
الغرب كله ومن خلال حياتي هناك عارفين ان مصر هي اللي انتصرت
وعلشان كده تم السلام

يارب نفوق وننشط اعلاميا ونشرح للعالم قضيتنا

*تحياتي

الشجرة الأم يقول...

التاريخ يعيد نفسه ..هذه هي الخلاصة، وقريبا إن شاء الله سيعيد نفسه أيضا وستعود أمجانا كما كانت وأفضل

7annen يقول...

اخبارك ايه

التدوين نور من تانى

على فكره مش زعلانه خالص من ردك على اخر بوست

اى نقد بيجيلى مبزعلش بالعكس بيبسطنى

مش بحب اللى بيجامل لانه المجامله بضر مبتنفعش

بس سامحنى فى البوست دا انا كتبته فى وقت كنت حاسه بكل حاجه فيه

كان كل دا جوايا ومقدرش اقوله خرجته وطلع شكله كدا

ولان المدونه جزء منى كان لازم ينزل فيها

حتى لو كل اللى دخل قالى انه وحش

ميرسى ليك

نورت من تانى متغبش عننا بقى

حنين

بحب الحكومة يقول...

موضوع جميل قوى
بجد احنا فى مأساة
والمأساة الكبرى لسة مش دلوقت
دى بعد 20 او 30او40 سنة من دلوقت لما حد هييجى يتكلم على هذا العصر ويأرخه
عشان كدة ( كانت فكرة انشاء المدونات )
الناس اللى جاية بعدنا لازم يعرفوا الناس عايشة ازاى وايه اللى كان بيحصل لان كتب المدرسة بدأت فى بث التاريخ المعاصر على انه من افضل واجمل وابدع العصور
وعشان كدة لازم كل واحد يدون بطريقته عن هذا العصر
وانا بدون بالشعر وفى ناس بتدون سياسة وناس بتدون رياضة وناس تدون فن وهكذا
عشان الاجيال القادمة يعرفوا الحقيقة
تقبل مرورى

رابطة هويتي اسلامية يقول...

وكما وعدناكم بأن تستمر حملتنا وتأتي بكل جديد

ضيف حوارنا هذه الرسالة :::

الأستاذ معتز شاهين - باحث تربوي

صاحب مدونة إحنا وهما

وهي مدونة تهتم بالإستشارات التربوية

نتمني منكم المشاركة معنا في الحوار لمزيد من الإستفادة ولمزيد من الإفادة

مع تحياتنا

أسرة رابطة هويتي إسلامية

حلم بيعافر يقول...

العب لابد له من حكومة تشكمه
ماهو شر البلية مايضحك
وكملى غنى تلاقيكى حافظه اخترناك كمان
منورانا دايما

حلم بيعافر يقول...

حاول تفتكرنى
ربنا يخليك يا معلم
مرورك دايما عندى اضافة بجد
وانا كمان بيعجبنى خيال هوميروس بس ده ميمنعش انه حشاش ههههههههههه
ياراجل فيه حد يقول اللى هو يقوله ده وميبقاش حشاش؟!

حلم بيعافر يقول...

قلم رصاص
ياخبر ابييييييييييض اخيرا اجدع جيت؟!!
المهم
معاك ان كروت اللعبة كلها معاهم
بس احنا معانا برضه كروت ممكن نلعبيها
احنا بس نستغل الفرص يامعلم
ونهتم باللى عملنا وانجزناه شوية وميبقاش هم الحكومة والحزب الحاكم تامين الكرسى بس
منورنى يابن خالتى
وهتغطى كوييس ههههههههههههه
ماشى ياعم

حلم بيعافر يقول...

م-احمد ابو العلا
نصدق الاول
وجهة نظر محترمة بتوصل لنفس اللى احنا عايزينه وبتكلم فيه
منور يا هندسة

حلم بيعافر يقول...

جودى
اه والله اتبهدلت كويس انك ملاحظة اهوه
منورة

حلم بيعافر يقول...

مى
اسكندرية تبعنا برضه
هههههههههههههههههههه
كويس ان التحليل ده عجبك
منورانا دايما وكويس انك اسكندرانية عشان عندنا حرايق وسحابة سودا
هههههههههههههههههههههه
نفدتى بجلدك

حلم بيعافر يقول...

فتاة من الصعيد
ازيك ومنورانا دايما
اهم حاجة نعرف المشكلة فين
دى اول واهم خطوة فى حل المشكلة

حلم بيعافر يقول...

احسن تستاهل
صور كلام كفاية مرورك
منورانا يامها

حلم بيعافر يقول...

مواطن مصرى
منورنى يامواطن انا واحد مش واحدة
فكرة المحاكمة دى هتتبنى على اساس ايه؟
اذا كان احنا نفسنا اهملنا الموضوع واتجهنا لتة تانية خالص

حلم بيعافر يقول...

sonnet
كلامك مظبوط

اول زيارة ومنورانا

حلم بيعافر يقول...

donya
اهلا بيكى منورانا

كلامك مظبوط جدا ورايك يحترم برضه
بس حضرتك كنت عايشة فين؟

فيه ناس كتيرة قوى بره مش عارفين الحقيقة لااننا نفسنا مش بنوصللها والصهاينة بيقولوا اللى على كيفهم واحنا مبنتكلمش

حلم بيعافر يقول...

الشجرة الام

ياريت يعيد نفسه

منورانى

حلم بيعافر يقول...

حنين
الله يسلمك
ومنورانى والله
انا اللى كننت مفتقدكوا والله
وولا يهمك حاجة
ومستنى الجديد بتاعك
منورانى تانى

حلم بيعافر يقول...

بحب الحكومة
الموضوع نور بوجودك يامعلم
وكلامك صح وبيضيف للموضوع
وكل واحد بيدون على طريقته زى ما بتقول
منور

حلم بيعافر يقول...

رابطة هويتى الاسلامية

ان شاءالله نشارك معاكم

موناليزا يقول...

أعتقد بان مايذاع عبر القنوات الفضائية وسيلة من وسائل الاستعمار العقلى لجميع الفئات

أحييك على الموضوع

يساري نوبي يقول...

كيف حالك ياولدي عامل ايه؟واحشني بقالي فتره ماجتش عندك للاسف رغم اني بحب مدونتك فعلا
للاسف اللي بيتقال دا حقيقي بس الموضوع مش غسيل مخ من الصهاينه دا احنا السبب انزل الشارع و شوف حال المصريين اللي عبروا وانتصروا مش قادرين يرفعوا راسهم ف الشارع يعني الانتصار العظيم دا اصبح لاقيمه له بعد ان باع مصر من باعها و ليس للصهاينه الملاعين شأن بهذا فنحن من باع وطننا و نصرنا
و تحياتي ليك علي مواضيعك المتميزه و طريقة عرضك ليها

م/ الحسيني لزومي يقول...

من اجل
وطن آمن مستقر...حياة افضل.
من اجل
محاربة الفساد....مقاومة التزوير
من اجل
ان تكون مقدرات هذا الوطن بأيدينا
شارك في الحملة الشعبيه للقيد بالجداول الانتخابية
ضع شعار الحملة علي مدونتك
عذرا علي عدم التعليق علي البوست

صفــــــاء يقول...

معروف عن المصرى بالتحديد من ايام الفراعنه ان الملك الحالى يمحو اى انجاز للملك الراحل
ومعروف عنه انه بعد فترة بينسى وبعد شويه كمان يقولك هو احنا مبقاش عندنا سيرة غير الحكايه دى ؟
مقال جميل
تحياتى لك

حلم بيعافر يقول...

موناليزا
لا يستعمر الا العقل الفارغ الخاوى
نورتينى

حلم بيعافر يقول...

يسارى نوبى
الحمدلله
ربنا يكرمك وواحشنا يا معلم
اللى يبيع ماضيه حتى لو كان محنة مش انتصار يبقى ميستاهلش يكونله مستقبل
منورنى ومتغبش علينا تانى

حلم بيعافر يقول...

م/الحسينى لزومى
لما نشوف حكايتها ايه

حلم بيعافر يقول...

صفاء
الحايات احنا اللى بنعملعها واحنا اللى بنحبس نفسنا جواها
منورانى

معتز شاهين - باحث تربوي يقول...

والله عنوان معبر عن الواقع
لكن للأسف في وشوش كتيرررررة عكرة عندنا
تفتكر ليها حل

ويبقى التواصل

حلم بيعافر يقول...

ا-معتز
منورنى يافندم والله
بس يظهر انك علقت على البوست الاولانى هنا
هههههههههههههه
يللا مفيش مشكلة المهم انك جيت وخلاص
ويبقى التواصل ان شاء الله

donya يقول...
أزال المؤلف هذا التعليق.
م/ الحسيني لزومي يقول...

الي حلم بيعافر

هذا قدرنا انا في انتخابات 2005 وجدت حرف ناقص من اسمي والقاضي عاكسني جدا علي ما وافق يخلليني اصوت لان الاسم غير مطابق..رحت رايح 2006 وعملت طلب تعديل للاسم وفي انتخابات الشوري رحت اصوت لقيت اسمي اتشال خالص في 2007 رحت مستهبل ورايح قايلهم انا لم يسبق لي استخرج بطاقه (معتمدا علي ان اسمي غير موجود في الكشوف) ورحت كاتب استماره جديده استلمتها العام الماض وانا اعيش في مركز وليس في قريه العمليه محتاجه شوية صبر وتحمل .
لاحياة مع الياس ولا ياس مع الحياة.
اما بخصوص الانقلاب العسكري نعم هايحوش لصوص كبار ويجي مكانهم لصوص صغيرين سرعان ما يبقوا حتان
رجاء دوام التواصل
آمل ان تضع شعار الحمله علي مدونتك

أحمد الصعيدي يقول...

http://shagarellemoun.blogspot.com/2009/11/blog-post_08.html

حلم بيعافر يقول...

م-الحسينى لزومى
كلاااااااااااااام سيادتك علم وينفذ
منورنى

حلم بيعافر يقول...

احمد الصعيدى
خير اللهم اجعله خير
البوست ده فيه ايه؟
هههههههههههههههه
احنا فى يومين لبش خلى بالك

واحد من العمال يقول...

السلام عليكم
طول عمر حكامنا المصريين اللى يحكم منهم يمسح تاريخ من سبقه ويبدأ التاريخ وينتهى تحت أقدام كل حاكم يحكم
بس التاريخ الحقيقى لن بكتب الأن وعندما يكتب لن يذكر إلا الحقائق المره والنتائج والأرقام المجرده والخيبه اللى بالويبه
دا ناقص شويه ويقولوا انه لم يكن هناك رئيس حكم مصر اسمه أنور السادات وأنتصر على الأسرائيليين وحرر الأرض
أوربما يوصف كحاكم قديم للنوبه

وتقبل تحيتى ومرورى

حلم بيعافر يقول...

واحد من العمال

وده قصدى بالظبط من البوست ده

منورنى فى اول زياراتك ليا

ويدوم التواصل ان شاء الله

بسنت صلاح الدين يقول...

اول زياره للمدونه و بجد اسلوبك اكتر من رائع و عجبتنى اوى المقصات ، لخصت حياتنا و اوضاعنا المشوهه بإسلوب ساخر ممتع و مكنتش عارفه اضحك من روحك المرحه ولا ابكى على حال البلد
تقبل خالص تحياتى

حلم بيعافر يقول...

بسنت صلاح الدين

يابسنت يابسنت يابنت الحلال التعليقات فوق البوست مش تحته

هههههههههههههههه

يللا معلهش نورتيا فى مكان بس خدى بالك المرة الجاية وعلقى ف المكان الصوح يانساء العالم يامتحدين