الثلاثاء، 3 نوفمبر، 2009

الماشطة والوش العكر

صورة لحادثة القطر اللى فاتت اخر واحدة ماهما كتيييير(من اليوم السابع)

ندوات ومؤتمرات وماتشات كورة واحداث تانية كتيرة مابين رحيل شخصيات عامة ومشهورة ورحيل بالجملة لناس محدش يعرفهم بسبب جاموسة او بسبب عامل ترحيلة اتنسبت لمهنته مسؤلية معظم البلاوى اللى حصلت من يجى 30 سنة

ناخد رجلينا كده ومشوار صغير لحااااااااااااد الرياض وندوة احمد زويل الاخيرة هناك اللى كان بيتكلم فيها عن حاجات كتيرة من ضمنها تطوير التعليم وكعادة العالم الجليل دايما لما يجى يتكلم عن مشكلة زى دى ويطرح حلول ليها فاول حاجة بتيجى على لسانه دايما وحفظناها هى حرية الابداع والابتكار ومش عارف ليه دايما بييجى عند الاحوال السياسية ويحود بعيد وميتعرضلهاش او لو اتعرضلها يبقى فى كلمتين ع المتغطى صحيح انه عالم كبير له مجاله واختصاصه ومش مطلوب منه الكلام فى حاجات تانية بس هو اللى اتكلم وبدا وحمل نفسه مسؤلية واحنا كمان حملناه امانة الكلام عننا وباسمنا فلازم يبقى قدها ولما يجى يتكلم عن مشكلة عندنا لازم ميضحكش علينا وعلى نفسه ويحاول يبنى الهرم من فوق من اخر طوبة لان يادكتور مفيش حاجة امها حرية ابداع وابتكار بتتوفر غير لما بتتوفر قبلها حاجات تانية زى الامان والتقدير واظن دول مستحيل يبقوا موجودين فى ظل اى نظام عربى موجود دللوقتى فياريت اللى يجامل او يتحرج او يخاف من حاجة ميتكلمش باسمنا او ع الاقل ميصدعش دماغنا نصايح عمال على بطال وياريت ياريت اللى يشيل فوق كتافه حاجة يبقى قدها

كتير من الناس بيموتوا محدش بينزل دمعة واحد عليهم والبعض بيموت فى جنازة عسكرية وكام عسكرى ماسك طبلة والبعض زى الدكتور مصطفى محمود ربنا يرحمه اللى مات وساب وراه اعماله اللى بتخدم ناس الحكومة دايساهم بالجزمة القديمة وساب وراه برضه افكاره وكلامه اللى لا زال بيفتح مجالات للحوار والنقاش ربنا يرحمك يا دكتور...

كمان رحل فى الاسبوع ده امين هويدى اللى فى عهده اتعملت اشهر العمليات فى تاريخ المخابرات والبحرية المصرية (الحفار وايلات)

فى بدايات الولاية التانية لجورج بوش من حوالى 4 سنين ارسلت الادارة الامريكية مبعوثة للشرق الالوسط والدول العربية مش فاكر اسمها بالظبط وكانت مهمة المبعوثة دى هى تحسين صورة الولايات المتحدة فى المنطقة باى شكل سواء بالضحك ع الدقون او بالاعانات او بغيره المهم اجتمعت الصحف القومية فى مصر على عنوان واحد وكان العنوان متاخد من مثل شعبى بيقول(وايش تعمل الماشطة فى الوش العكر)طبعا عكر من كتر بلاويه وعمايله السودة اللى اثرها فى كل مكان وعلى عينك ياتاجر....نفس اللى كانت هعمله المبعوثة الامريكية دى بتعمله الصحوف اللى المفروض اسمها صحف قومية للحزب الوطنى قبل واثناء المؤتمر السنوى ليهم وعمالين يجتهدوا ويمدحوا ويعددوا مزايا وكان العمى ضربهم كلهم ومبقوش شايفين ايه اللى بيحصل والهم اللى يبكى هما رؤساء تحرير الصحف دى ويحضرنى دللوقتى مقال لاسامة سرايا بيدعو فيه للالتفاف حول الحزب الوطنى والسير وراءه..بامارة ايه ؟!!!..العيش ابو رمل وطين؟ولا قطارات الصعيد؟ولا جودة التعليم؟ولا مستوى الصحة؟ولا بامارة المسنين اللى فوق ال77 سنة اللى بيروحوا يقفوا على مكتب المعاشات من 8 ل8 وبيروحوا ماخدوش حاجة؟ولا بامارة سمعة ودور مصر فى المنطقة؟ولا.....................

تابعت مؤتمر الحزب الوطنى من بعيد لبعيد واكتر حاجة لفتت انتباهى هى بدلة احمد عز والله البدلة بس لان المؤتمر مكانش فيه حاجة جديدة على الاطلاق من اول كلمة رئيس الجمهورية اللى حفظناها وبيقولها فى كل مناسبة لغاية امناء واعضاء الحزب اللى بيقوموا يقروا اسئلتهم من الورق وبرضه مبيعرفوش يقروا صح

حاجة تقرف بجد بلد زى ماتكون على حافة الحياة ومش عايزة تعيش واللى بيحكمها نظام ريحته طلعت وعفن ومعظم رجالته(مع الاعتذار للرجالة الحقيقين لان والله دول ماهما رجالة ابدا) مشوهين سمعة وعلما واخلاقا والناحية التانية شوية احزاب مفككة عمالة تاكل فى نفسها على الفضائيات كل يوم ورضينا ولا رفضنا مفيش حد هيغير او عنده القدرة انه يغير غير الاخوان المسلمين عشان بس حاجة واحدة وهى وجودهم فى الشارع غصب عنا هو ده اقرب حاجة ممكنة فى حالة طبعا لو كونوا حزب زى بقية خلق الله وده مش هيحصل طبعا او لو حصل فمش هيكون قريب

مقصات
منصور (احمد السقا فى فيم الجزيرة)/غاضبون من الانتقائية فى عرض كل ماهو سلبى
احمد عز/تروح مدرستك وتيجى تشرح افيون يوم الجمعة ويوميتك ماشية
ابراهيم عيسى/مش الحكام اجانب؟..خلااص المصرى هيكسب...العيب مش فى المصرى العيب فى الحكام
رشيد محممد رشيد(وزير الصناعة والتجارة)/هو الموتور ده كده..تكاركله يشتغل..تكبسله....يعطل!!!!!
اسامة سرايا/والنبى يابنى عمرى ماشفته بيزرع مخدرات هو بيزرع افيون بس
السيد ابو العربى/عاش جمال مفجر الثورة
احمد ابو الغيط/انا نزلت البحر لقيت يافطة مكتوب عليها كده اليونان وكده ايطاليا وكده بورسعيد
محمد صبحى(رجل غنى فقير جدا)/ضخينا فى السكك الحديدية 8 مليار جنيه
يوسف بطرس غالى/الارض هاخدها هاخدها باى تمن والناس اللى فى الوادى البرانى ياما يسيبوها يا اما تتهد عليهم..ايه فيه حاجة؟!!!




هناك 47 تعليقًا:

قلم رصاص يقول...

اووووووول تعليق عندك يامحمد

ابسط ياعم

دخلت التاريخ ببلاش

افتكر الجمايل دي

ههههههههههههههههه

قلم رصاص يقول...

مهما الماشطة تعمل

هتفضل برضه ماشطه

والوش العكر مش هيتصلح ابدا

موضوعك جميل سير على الطريق

بس خد بالك من العربيات انت عارف بقى

وزارة النقل من غير وزير ومحدش هيبقى

مسئول لو جرالك اي خدش ولا حاجة

ههههههههههههههههه

دمت على خير

sweet angel يقول...

هههههههههه
وايش تعمل الماشطه في الوش العكر ؟؟؟؟

donya يقول...

مساء الخير
كنت بقرا البوست ووالبوست ماشي زي الفل
لاقيت الدنيا تاهت مني كده ومش فهمه حاجه قلت دي النظاره مسحتها وحطيتها تاني
لاقيت ان الموضوع اكبر من النظاره

عامل كده زي ماقال محمد صبحي في مسرحية انتهي الدرس ياغبي
ايه اللي دخل الاكس في التكس

وبعدين قلت ماهي دي حياتنا السياسيه الان والاجتماعيه

الاكس في التكس والفله في المنافله
والفيل في المنديل

تسلم ايدك بوست جبار

*تحياتي

ريمان يقول...

هنقول ايه بس


ربنا يصلح حال البلدى بقى



تحياتى ليك


البوست طويل على فكره بالراحه بس علينا


هههههههههههههه


تحياتى لقلمك

سعيده بمرورى فى مدونتك

د/عرفه يقول...

يا عم الواد ناقص نكد

بلاش تحسرنا زيادة على حالنا


المشكلة ان الاوضاعع بتشير ان اللى جاى أسوء كمان


ربنا يصلح حال أمتنا

Sonnet يقول...

(كتير من الناس بيموتوا محدش بينزل دمعة واحد عليهم والبعض بيموت فى جنازة عسكرية)
أنا متأثرة بهذه المشاعر
قيمة الفرد بما قدمه بين حياته و مماته
كما قال د مصطفى محمود
بينما بعد الموت لا قيمة له
الولايات المتحدة و الأمم المتحدة و كل المسميات عبارة عن تمثيل و بزنس كبير و إحنا بنروح في الرجلين.
علشان كده لازم نكون أقوى فيعملوا لنا حساب. و علشان كده لازم نكون براجمات أكثر منهم بما لا يتعارض مع مبادئنا. نسمع و نخلينا مع الكذاب موزع الابتسامات أوبامالحد باب الدار

Sonnet يقول...

أفضل تسميتك حلم لن يستسلم
مع تحياتي

فتاه من الصعيد يقول...

ههههههههههه

عجبتني المقصات دي

مرهقه من نقل المدونه .... وموش عارفه اعلق

بس ايش تعمل الماشطه فعلا في وش الحزب ده

تحياتي

يساري نوبي يقول...

صباح الجنان ياريس
ايه الدوشه اللي انت عاملها دي و ايه اللغبطه دي و ايش جاب منصور بتاع الافيون لاحمد بيه عز بتاع الحديد دا ع الاقل منصور كان بيدافع عن اهل بلده قدام الحكومه
اصطباحطك فل ياكبير.....شكلك هاتتشد قريب خليك ع الطريق

(Joudy) يقول...

ربنا يصلح الأحوال ويكون فرجه قريب ونشوف مصر بشكل أفضل

دمت بكل الخير والسعادة

ليس فقيرا من يحب يقول...

خلصت فيهم كل الكلام

Mr.Hazem يقول...

بداية سعيد جداً بتواجدك عندي
واكثر سعادة بانضمامي لقائمة اصدقائك

موضوعك اعجبني ولكن لا حول ولا قوة الا بالله
ربنا يكون بعونكم

ارق تحية

حلم بيعافر يقول...

قلم رصاص

ايا كان مين فينا اللى دخل التاريخ

فالتاريخ نفسه اتشرف بدوخل واحد فينا فيه

هههههههههههههههههه

ايه رايك فى الدبلوماسية دى؟

حلم بيعافر يقول...

قلم رصاص تانى

شوفت انا مديك اهتمام ازاى وبرد على تعليقينك الاتنين اهوه

ومتخافش لقوا وزير نقل جديد بس ماسموش منصور عشان منصور متفرغ للافيون

ههههههههههههههههههههه

نفسى اشوفك

ان شاء الله يجمعنا لقاء قريب جدا

حلم بيعافر يقول...

سويت انجل

المثل بيضحك لابس حقيقة مؤلم جدا

نورتينى

حلم بيعافر يقول...

دنيا

هى جت ع البوست اللى ملخبط


طب بزمتك عمرك شفتى حادثة تتنسب مسئوليتها لجاموسة؟


نورتى

حلم بيعافر يقول...

ريمان

لبوست طويل رغم انى بالى قصير ف الكتابة

بس الموضوع خطير

نورتينى

حلم بيعافر يقول...

د-عرفة

الجاى اسوا لو فضلنا ساكتين


يادكتوووووووور لازم نعالج المرض اللى فى مجتمعنا ده


نورتنى

حلم بيعافر يقول...

سونيت

متفق معاكى جدا

ومع دكتورنا الراحل جسدا مصطفى محمود


منورة

حلم بيعافر يقول...

سونيت تانى


الاسم له دلالة فى نفسى انا قاصدها


شكرا لاهتمامك يا دكتورة


نورتينى

حلم بيعافر يقول...

فتاة من الصعيد

كنت عايز اجى اشيل معاكى

هههههههههههههههه

ربنا يوفقك هنا ولاهناك خلاص احنا متابعينك

ومش هنقدر نستغنى عنك


منورانى

حلم بيعافر يقول...

يسارى نوبى

مسااااااااااااااء الجنان يا زعيم


لو اتشديت مش هدارى على حد

ويانعيش كلنا يانموت مع بعض


ومتجيش بقى ساعة الجد وتهرب


هههههههههههههههه

انا معايا سى دى

حلم بيعافر يقول...

جودى

ربنا يسمع منك


نورتى

حلم بيعافر يقول...

رانيا

والله وحشتينا

والكلام لسه مخلصش

منورانى

حلم بيعافر يقول...

حازم

انا الاسعد ولى الشرف بتواجدى عندك


منورنى

بيطرية ومش بإيدى يقول...

ان ان ااااااااااان
هو احنا هنبتديها من الاول حقد
طب احقد على حاجة عدلة
هتحقد على ايه يا حسرة
على الضفادع المقرفة
ولا المواد اللى متعرفش تذاكرها من انهى ناحية من وشها ولا من قفاها
والله انا كان حلم حياتى اطلع مدرسة
فى اى حاجة المهم انى ادخل مدرسة واعلم اجيال
التدريس ده اكتر مهنة انا بحترمها جدا


نورتنى بتعليقك
الموشكل انى مش لاقية وقت اكتب فيه بص موضوع كبير كبير كبير
هابقى احكى عليه عندى فى المدونة

بجد منورنى ومشرفنى

سلمى يقول...

السلام عليكم
عندك حق يا فندم فى كل حاجه قولتها
لكن مفيش فى ايدنا حاجه
تحياتى

micheal يقول...

بوست دسم جدا
الدكتور زويل طلعنا عين اللي خلفوه لما يحب يعمل مشروع جامعة العلوم والتكنولوجيا فبالتالي الراجل جالته مشاعر برودة ناحية النظام والبلد وبالتالي لا أتوقع يجيب سيرتهم بالكويس أو الوحش
ده طبعا مش أول ولا اخر قطار حيتحرق
عااااااادي يعني
أمريكا ينطبق عليها فعلا مثل الماشطة والوش عكر
مؤتمر الحزن الوثني..يا راجل هو فيه حد يتفرج ع الحاجات القبيحة دي برضه
:)
كفاية كده
تحياتي

الشجرة الأم يقول...

اللهم اغفر لهم وارحمهم برحمتك يالله .. آمين

مازال الفساد كالسرطان الخبيث في جسد الأمة الإسلامية العربية نسأل الله أن يقتصه من جذوره آمين.

تأثير الفراشة يقول...

السلام عليكم و رحمة الله و بركاته

أشكر زيارتك لمدونتى و بإذن الله يدوم التواصل

أول زيارة لى فى مدونة حضرتك و وجدت بوست دسم و قوى جدا ، مش عارفة أقولك إيه على كل اللى ذكرته ، غير

"إن الله لا يغير ما بقوم حتى يغيروا ما بأنفسهم" صدق الله العظيم

ربنا يستر

بعد إذن حضرتك هاضيف مدونتك عندى فى رول المدونات ، و يبقى التواصل بإذن الله

دمت بخير

صفاء يقول...

دة انت طلعت غلك فى حاجات كتير مرة واحدة
النظام ريحته طلعت فدة من زمان لحد ما اتعودنا على الريحه ومناخيرنا خدت عليهاوخلاص مبقيناش نقرف
عارف بقى البدله ... هى البدل بجد اللى بتلفت انتباهى .. والكرفتات بصراحه .. غير كدة ميسواش

بوست جامد
تحياتى لك

المجاهد الصغير يقول...

حسبنا الله ونعم الوكيل
اللهم انصر الاسلام والمسلمين وارفع رايه الحق والدين
جزاكم الله خيرا

نهر الحب يقول...

والله المشهد دا بقى متكرر
كل سنة او اقل كمان
عادى يعنى مهو دم المصريين مفيش اكتر ولا ارخص منه
ولا حول ولا قوة الا بالله

حاول تفتكرنى يقول...

كالعادة ، ندخل موضوعاتك لنتنقل بين كرنفالا من الافكار

عجبني جدا رايك فى عدم إمكانية حرية الإبداع دون توفير مستلزماتها

ربما لن نستطيع مجاراه افكارك ، فانها كثيرة ، عمية ، مدوية ، فيكفينا التمتع بأرائك

تحياتي

7annen يقول...

البوست طويل اوى

بس بصراحه الموضوع يستاهل

ربنا يصلح الحال

ويصلح حالك انت كمان وتفتكر باسوردك

ههههههههههههههههه

حلم بيعافر يقول...

بيطرية ومش باديكى

ماهو شوية قرف ف الاول كده

وبعدين متلاحقيش بقى ع الفلووووووس

يابختك

هههههههههههه


منورانى

حلم بيعافر يقول...

سلمى

امال مين اللى فى اديه ياسلمى؟!!!

اعتقد ان احنا صحاب الشان


ولا ايه؟


منورة

حلم بيعافر يقول...

micheal
معاك حق

حاجات قديمة فعلا وريحتها باينة

نورتنى

حلم بيعافر يقول...

الشجرة الام

طب ادعيلنا احنا كمان

ماحنا عايشين فى بلاء احنا كمان

منورانى

حلم بيعافر يقول...

تاثير الفراشة
ده شىء يسعدنى


منورانى

حلم بيعافر يقول...

صفاء

عندى حق ولا لاء؟


منورانى

حلم بيعافر يقول...

المجاهد الصغير


يارب

نورت

حلم بيعافر يقول...

المجاهد الصغير


يارب

نورت

حلم بيعافر يقول...

نهر الحب


مشهد لازم يتغير


نورتى

حلم بيعافر يقول...

حاول تفتكرنى

ربنا يخليك

ده كلام كبير عليا

منورنى دايما

حلم بيعافر يقول...

حنين

افتكرته


هيبييييييييييييييه

نورتى