السبت، 21 نوفمبر، 2009

التطبيع العربى العربى

كاريكتير من جريدة القدس العربى


زى طريقين طريق رايح وطريق جاى نقدر دللوقتى نرسم منحنى هندسى لعلاقة العرب ببعضهم ومشاحناتهم فى العلن وعلاقتهم باسرائيل وكسب ودها فى الخفاء ولا استثنى اي دولة من التمثيل بدرجة او باخرى فى هذا المنحنى الحقيقى اللى مبقاش يقبل اى تشكيك اطلاقا واللى ميشوفش من الغربال يبقى اعمى...قومية عربية وتجارة بينية وسوق عربية مشتركة كلام من يوم ماسمعته انا وجيلى وهو فارغ من المعنى ولكن كانت هناك شكليات توحى بعكسه ودللوقتى الشكليات دى هى كمان بدات تنتهى تدريجيا بين الدول العربية وبعضها ويمكن اللى اكتر من كده كمان ان بعض الدول بدات فى الانقسام على نفسها وبدات تاكل فى بعضها من جوه والمشهد اجارك الله بقى غريب جدا وتحس ان كل دولتين تحصل مشكلة بينهم انهم زى مايكونوا اتنين ستات فى منطقة ميتة رجالتهم غابوا عنهم وبداوا يتخانقوا مع بعضهم مستخدمين كل الوسائل فى اهانة بعضهم فى حين ان فيه طفلة لقيطة بتتفرج عيهم من قريب وابتسامة الفرح والانتصار على وشها اللى لامم دبان المنطقة كلها...مصطلحات زيها زى اللى فاتت بالظبط تضليل وشكليات وكلام ف الهوا وضحك ع الدقون وزى ماتقول قول بقى سواء هتقول احنا بنرفض التطبيع مع الكيان الصهيونى المزروع بينا غصبا او هتقول بكره اسرائيل او اى كلام من الشكليات اللى مالية كلام اى مسئول يطلع علينا بطلعته البهية ويتكلم ...مسئولينا يقولوا واحنا نتحمس ونردد وراهم والبضايع الاسرائيلية تطلعلنا لسانها فى قلب اى منطقة استثمارية نروحها ...كل فرد فى العيلة ان جاز تسميتنا كعرب عيلة واحد بيطلق للسانه العنان فى قذف مثيرات الحماسة من رفضه للتطبيع وكرهه للعدو الصهيونى وبيجرى ء عشان يعمل عكس كلامه بالظبط ونمو التبادل التجارى الاسرائيلى العربى يشهد بكده واتفاقيات تجارية تانية تشهد بكده

اشياء تافهة جدا قد تثير ثائرة كل شعب من الشعوب العربية على الاخر وتتفاقم المشكلة لابعد حد ويزيد من تفاقمها وتورمها اصرار كل طرف على انه يبص للمشكلة بعين واحدة واصبحنا من الان نحتاج- وللاسف ليس على سبيل الترف الفكرى -لدعوات تطبيع بينى

الطامة الكبرى اللى هتودينا فى ستين داهية كلنا واللى المفروض تسبب الرعب لكل ذى عقل فى العالم العربى هى مجموعة الكوادر الحاكمة باسم الانظمة العربية على اختلاف اشكالها ولو رسمنا كده شكل هرمى بيمثل هيكل اى نظام عربى هنلاقى راسه رئيس الدولة مثلا وتحتيه شوية قيادات كبار وتحتيهم الرجالة بتوع النظام اللى بيمشوا الدولة اهما بقى الرجالة دول اللى جايبلنا المصايب كلها لانهم بصراحة محدودى الرؤية والتفكير عشان النظام او راسه نفسه عايزهم كده عايزهم عساكر فى رقعة شطرنج يشيل ويحط اللى بمزاجه عشان محدش يغلس عليه ويقوله لاء..اعتقد ان بلاد يزوى فيها المثقفينواهل الخبرة والتخصص (وده باين جدا اعلاميا) ويركنوا على الرفوف ويحكم مجموعة من انصاف المتعلمين واللى سهل جدا يتسببوا فى خراب مالطة ومحدش هيلحقا على فكرة لان الكوادر اللى بتكلم عنها حاكمة فعلا بقبضات حديدية على معظم البلاد فى عالمنا العربى وهى شخصيات من السهل جدا التاثير عليها من اى قوة خارجية يعنى المجال مفتوح ع البحرى لكل من يريد التخريب ومثال بسيط جدا للمشكلة الموجودة دللوقتى اللى هى مشكلة اعتداءجماهير الجزائر على جماهير مصر عقب انتهاء مباراة السودان الاخيرة...المتامل للمسالة دى ممكن يستتنج ماهو فى غاية الخطورة ومالايتحمل السكوت عليه ده لو بص لسبب اللى حصل ولو بص لعملية شحن الجمهور ده على ده تمت ازاى...يقال ان جريدة الشروق الجزائرية دى تابعة للمؤسسة العسكرية فى الجزائر ولما جريدة تابعة لمؤسسة عسكرية تنشر اخبار كاذبة عن قتلى وجرحى فى القاهرة بعد ماتش كورة تبقى كارثة تبين كلامى اللى قلته ف الاول ده وهو ان الكوادر الحكمة فى معظم البلدان العربية جهلة ويمكن التاثير عليهم من اى طرف يريد بث سمومه فى جسد متهالك اصلا اللى هو جسد امتنا العربية وعلى الجانب الاخر اللى هو جانب مصر طبعا فيه ناس غذت العملية هى كمان وراحت عملت مبادرات وكاننا فى حالة حرب وكانهم انبياء السلام اللى بعتهم ربنا عشان يخلونا من ويلات الحرب دى وطبعا الانبيا دول برضه من كوادر المنظومة الحاكمة فى مصر
مفيش حد يستطيع دللوقتى نفى صفة البربرية والهمجية عن جمهور الجزائر ولكن مين اللى وصلهم وشحنهم للدرجة المخيفة دى اللى تخليهم عايزين يقتلوا ويدبحوا فى منافس ليهم المفروض انه بينافسهم فى منافسة رياضية؟...هما هما اللى بيمشوا البلد كقيادات للمنظومة الحاكمة هناك هما هما اللى بيظهروا فى تلفزيونهم وبيكتبوا فى جرايدهم وبينقلوا اخبار تستحى من نقلها جريدة مبتدئة هما هما اللى هيودونا فى ستين داهية لو لم تنتبه الشعوب العربية كلها للكلام ده
خلاص ازمة وحصلت وبتطلب دللوقتى مننا كشعب وحكومة ونظام اتخاذ موقف صارم لوقفها وبالفعل اتخذنا الموقف ده على الجانب المصرى الاكثر تضررا فى هذه الازمة ومين عارف ممكن حاجة زى دى تحصل تانى ونبقى احنا الجانب الملوووم ومحدش يقدر يقول على الاطلاق ان خلاص حاجة زى دى مش هتتكرر تانى لان اسباب الازمة موجوين فى اماكنم وبسم الله ماشاء الله بيستفحلوا يوم عن التانى هنا او هناك...شعبيا المفروض ان احنا خلاص عرفنا علتنا ودائنا فين على الاقل فى المرحلة دى وياريت نغير بقى وياريت منبقاش عجينة لينة كده تانى لاى حد يجى يشكل فيها ويعملها قنبلة وتفرقع فينا ف الاخر

هناك 38 تعليقًا:

donya يقول...

مساء الخير
طبعا اغنية ماجه الرومي ابحث عني اسعدتني جدا علشان انا بحبها جدا جدا الاغنيه دي بالذات

البوست عنوانه فعلا مضحك مبكي جدا
التطبيع العربي العربي
وصلنا لكده هي بقت كده
طيب
اما البوست نفسه كالعاده جميل

تحياتي

يساري نوبي يقول...

ياعم ارحمنا هو انت كل يوم تغير شكل المدونه بتاعتك
التغير الجاي برا الوزاره علطول
و الله كلامك كله حكم
بصراحه الشعب العربي كله عايز عملية اباده لانه فعلا زودها اوي فراعنه و امازيغ و فينيقين و وهابين و بتنجان مقلي و مشوي
المشكله ان كلهم فاشلين اصلا و مافيش حد فيهم فالح

الشجرة الأم يقول...

على الشيء المهم لم تثور الشعوب العربية مع الأسف .. وبني دراكولا يتغلغلون في أنحاء الأمة الأمة الإسلامية العربية.

كل عام والأمة الإسلامية لعربية بخير.

Foxology يقول...

عندك حق .. النظم العربية الحاكمة هى اللى وصلتنا لكدة بالأضافة الى الآلة الأكثر افسادا وتضليلا .. الأعـــلام


تحياتى

ameen يقول...

شدنى العنوان جداااااااا


بس فعلا
والله والله دول بيكرهونا اكتر من الاسرائيلين


مين اللى جاب سيره تطبيع

وقاعدين نشتموا ف الناس الغلابه المحترمين الاسرائيلين
ههههههههههههههههههههههههههههههههههههههههههههههههههههههههههههههههههههههههههههههههههه


والله دول العن منهم

بس الخبيث اللى عمل الحركه دى معروف!!

د. ياسر عمر عبد الفتاح يقول...

المشكلة إن التطبيع العربي الإسرائيلي بقى واقع معاش
والتطبيع العربي العربي بقى مفقود

نظرة عقلانية قل أن تجد لها مثيلاً وسط هجمات الغوغائية والهمجية (من الطرفين)

ربنا سبحانه وتعالى وحده القادر على إنهاء هذه الأزمة

حاول تفتكرنى يقول...

الصديق العزيز

هل تدري متي ظهرت فكرة السوق العربية المشتركة ـ وعقد أول اجتماع لصالحها على مستوي القمة ، عام 1946 من القرن السابق

بلاش دي

مع اقتناعي التام بالاتجاه الايجابي فى مقالك الإنف ، والاشادة باسلوبك فى السرد والتحليل ، وقدرتك على أيصال فكرك وفكرتك ، وكذلك بلاغتك فى استخدام اللغة ، مع اعترافي بكل هذا ، فتري ، هعل تعتقد انك اول من توصل لهذا الفكر ، وتمني هذا الاتجاه ، بالتاكيد لأ ، طيب سؤال اخر اكثر خباثة هل تعتقد ان ملايين الكلمات - التي نقتنع بها - مثل ما قدمت ستغير من الأمر شيء

لن يستطيع أحد التغير من القمة واذا بدأنا بالقاعدة- الحرافيش يعني -= سنحاج الهدم للبناء

تحياتي

راجية الرحمه يقول...

والله اولا واخير احنا عرب ومسلمين
والاعلام شحن النفوس بطريقه سيئه جدا
انا شايفه ان احنا لازم يبقى لينا واقفه مع حكومه الجزائر القله من الشعب الجزائرى

أحمد الصعيدي يقول...

التقطيع العربي العربي

سلم قلمك

السلام عليكم

مي يقول...

لا تطبيع عربى ولا اسرائيلى احنا لغاية امتى هنفضل نطاطى لامتىىىىى يابلد مانعمل لنفسنا كرامة بقى ولو لمرة بسسسسسسسس
المفروض نعمل مبدأالمصالح المتبادلة نفع اوك منفعش فى ستلالالالالالالالالالالالالاف داهية عربية ولا اجنبية محدش لسة بيقول احنا عرب اول ناس بيضربوا فينا العرب يمكن البلاد الاجنبية عارفين موقفهم مننا بس بيعاملونا باحترام وادب حتى لو تمثيل
خلالالاص زهقتنا بلاش سلبية بقى والمفروض نبص لنفسنا بقى

7annen يقول...

احنا غلبنا اسرائيل يارب
توب علينا يارب

فرسان على مر الزمان يقول...

لقد إستطاعت إسرائيل أن تفرقنا
بمساعدة أنظمة عربية لا يهمهم
مصلحة الوطن كل ما يهمهم هو
مص خيرات البلاد العربية
تحياتى
ويبقى التواصل
رابط المدونة
http://fairsan.blogspot.com/

د/عرفه يقول...

شوية اعلاميين متحمسين جهلة
تسببوا فى الازمة هنا وهناك



الشىء المضحك بس ملهوش علاقة اوى بالموضوع اوى واستفزنى شوية





علاء مبارك خرج مع الغندور فى لقاء مفاجىء غير متوقع عمل دعايا جامدة للعندور
غارت بقيت البرامج الحكومية من ده وقالت اشمعنا احنا ده احنا رجالة الحزب واعوانه وكل يوم بنطبل لكم
فخرج علاء فى البيت بيتك وخرج تانى مع عمرو اديب علشان محدش يزعل
هههههههههههههههه

جارة القمر يقول...

فعلا ليك حق بكل كلمة

أصبحنا على مفترق طرق

وانهار كل شئ له قيمة

فتاه من الصعيد يقول...

موش هنسلم موش هنبيع .... موش هوافق ع التطبيع .... مع الجزاير طبعا :D

الدنيا خربت وربنا يستر

تحياتي

Sonnet يقول...

ربنا يستر و مش يتخانقوا في الحج و ينسوا نفسهم
http://shayunbiqalbi.blogspot.com/2009/11/blog-post_18.html

حلم بيعافر يقول...

دنيا

مساااااء الفل والياسمين

ايووووون ماجدة هانم الرومى وربنا يسعدك اكتر واكتر

شكرا على الكلام الجميل ويدوم التواصل ان شاء الله

نورتينى

حلم بيعافر يقول...

يسارى نوبى

شكلك هتشد

يخربيتك انا عربى يالا هههه

ايه الحقد ده؟

منور برضه

حلم بيعافر يقول...

الشجرة الام

هناك ثورة ومتقلقيش

نورتى

حلم بيعافر يقول...

foxology

هى الالة دى

عليك نور

ونورت

حلم بيعافر يقول...

ameen


شر البلية مايضحك

نورت

حلم بيعافر يقول...

د-ياسر

انت اول حد يقول فيه غوغائيية من الطرفين

وانا معاك فى كده يادكتور

نورت

حلم بيعافر يقول...

حاول تفتكرنى

والله بقول كده بس يمكن التعبير خاننى شوية ومعاك مش انا اول حد يقول الحكاية دى بس هقولها تانى وتالت ورابع لحاد ماوصل للى انا عايزه

وانا ببدا عن نفسى بالتغيير من اوسع قاعدة

عن نفسى كلامى اللى بقوله هنا بعمله يعنى حاجة زى لجان القيد الانتخابى روحت وصلحت وعدلت فى اسماء عيلتى واسماء اللى اعرفهم واخدت صحابى وعرفت ده وده

وانتخابات وكله واى نشاط بعمله بحاول اشرك معايا اكبر عدد اعرفه

يعنى عمليا والله انا ببدا من تحت وياريت كل واحد يعمل زيى ههههههههه اى خدمة بسمع كلامك اهوه وببدا من الحرافيش

نورتنى طبعا وباستنى تعليقك دايما

حلم بيعافر يقول...

راجية الرحمة

حصلت وقفة جامدة على فكرة

نورتينى

حلم بيعافر يقول...

احمد الصعيدى

واللى بعد التقطيع د ايه؟

نورتنى

حلم بيعافر يقول...

مى

هههههههه ايه الشر ده؟

ياساتر دانتو قلوبكو سودة اوى

ههههههه نورتى

حلم بيعافر يقول...

حنين

ايه ده؟ غلبناهم امتى؟ههههه

نورتى

حلم بيعافر يقول...

فرسان على مر الزمان

نورت ورايك يحترم

حلم بيعافر يقول...

دكتور عرفة

الراجل مزعلش حد يا دككتور

هههههههه ده عدل

نورتنى

حلم بيعافر يقول...

جارة القمر

مفترق طرررق بس ياريت نفهم

نورتينى

حلم بيعافر يقول...

فتاة من الصعيد


هههههههههه ايه؟انت فى فيلم ولا ايه؟

نورتينى

حلم بيعافر يقول...

sonnet

منورانى يادكتورة

وينسوا نفسهم فى الحج ليييييه؟

هى ناقصة؟

نورتينى

حاول تفتكرنى يقول...

الاخ العزيز

كلامك صح

ابدأ بنفسك ومن حولك لو فعلنا كلنا ذلك سيكون الجيل القادم جيل مهيئا لما يعتقد

أنا معك

تحياتي

حلم بيعافر يقول...

حاول تفتكرنى

مرتين فى بوست واحد؟

دايه النور ده

ياسيدى احنا مع الفكرة الكويسة

دخل الشتا يقول...

أحييك على مدونتك الجميلة وفكرك الواعد .. قرأت الكثير وأعجبنى أسلوبك وروحك فى الكتابة .. تحياتى .

حلم بيعافر يقول...

دخل الشتا

المدونة نورت

ويدوم التواصل

مسدس صغير يقول...

كل سنة وانت طيب
عيد سعيد عليك وعلى الاسرة الكريمة يا محمد باشا
وفعلا حشيش فايدة فيك
ههههههههه

حلم بيعافر يقول...

مسدس صغنن

وانت طيب يابوصلاااااااااح

منورنى وملكش دعوة بالحششيش

احنا ناقصين الحكومة؟

هيجوا المحامين يكملوا المصادرة بقى