الجمعة، 4 ديسمبر، 2009

ابجديات الرفض



بكل بجاحة ووش مكشوف ممكن اجزم ان مفيش اى متعة جنسية بتعود على المتحرشين وشىء طبيعى ان المتعة الجنسية دى شىء مش بيتحقق غير بعد تحقق حاجة اسمها الخصوصية يعنى بالبلدى العبيط كده لازم الموضوع يبقى متدارى الا اذا كان بقى فيه مرض نفسى عند المتحرش ودى حاجة تانية وموضوع تانى لان ده لو موجود فعلا يبقى المجتمع كله مريض نفسيا ويافرحتك يادكتور احمد عكاشة!!!....طيب تبقى كده المتعة الجنسية هى سبب مستبعد من اسباب وقوع عملية التحرش فى الشارع المصرى وانتشارها طوووول السنة طالما فيه تجمع كبير بس احنا بنركز عليها فى العيد بس يمكن عشان فيه حاجات تانية بتشغلنا والرغى فيها من وقت للتانى واحنا اجدع ناس يخترعوا ويفبركوا ويندمجوا فى التظاهر بحل تفاهات اصروا على انها مشاكل ولازم تقتطع وقتهم كاملا

لو قسمنا الناس اللى بتقوم بعملية التحرش دى دللوقتى هنلاقى غالبيتهم شباب لم يحصل على قدر كاف من التعليم ونسبة مش قليلة من الاطفال اللى متعدوش سن ال18 والنسبة دى بدات تكتر جامد والقاسم المشترك بين الشريحتين دول هو زى ماقلت وبكرر تانى لسه مقدروش يكونوا شخصية سوية ومعتدلة بسبب قدر التعليم اللى تلقوه وان كانت الشريحة التانية عندها اسباب تانية ممكن نقول انها محركهم تجاه عملية التحرش زى التقليد لفعل الشريحة الاولى دى على اعتبار ان دى حاجة زى السيجارة من وجهة نظرهم بتثبت رجولة اللى بيعملها

طبعا فيه ناس تانية غير الشريحتين اللى انا قلتهم دول بس انا ركزت على النسب الاعلى من خلال مشاهداتى ومتابعتى للموضوع اللى بيتكرر دايما وحاجة تانية مقدرش اغفلها وهى وجود متحرشات بالذكور....ايووووه فيه متحرشات ومتنساش عزيزى المواطن ياللى حظك ساقك لهنا وبتقرالى ان احنا مجتمع منحل ذكورا واناثا وبص حواليك وانت تأمن على كلامى

ضمير اى امة هو المبدع او المبتكر او الفنان والفن دايما وابدا بيكون وجدان الشعوب وبيرتقى بمشاعرهم وباحاسيسهم وبتصرفاتهم وبكل مايصدر عنهم لشىء من التحضر والتمدن ...طيب لما نجم الجيل عافاه الله واعزه لمن نجموه يغنى ويقول(خليها تاكلك )وحاجات تانية مفيش داعى اذكرها ولما نجم تانى نصبه نفس الجيل يقول فى احد افلامه (-a7a-؟!!!)...مفيش خلاف على ان ابجديات كل شعب بتتغير من وقت للتانى حسب ظروف العيشة واللى متنيلين عايشينتها بس برضه فيه مصفاة بتنتقى وبتختار وبترسخ وتثبت اللى يفيد وتستبعد اللى يضر وياذىو حااااليا المصفاة دى مخرومة وبتعدى اى حاجة ومبقاش فيه حاجة اسمها ضمير امة واو بقى بقى فيه حاجة غير اللى نعرفها ويااما بقى نرجع من اول وجديد ونعيد ترتيب دماغنا- ونمسك المصطلحات اللى متستفة فيها وننفضها لان الزمن عمل فيها عمايله -يااما نرضى بالواقع ومنشتكيش بقى ونرضى بتامر حسنى (-خليها تاكلك-) كنجم جيل ونرضى بمصطفى كامل(-عليا الحرام من دينى) كمثقف بيمثلنا وبيوجهنا ونرضى بهيثم شاكر(-بلا قومية بلاخرة-)كرمز وطنى بنلتف حواليه وبنغنى معاه ارمى حمولك عليا واوعى حد يقولى انى بنتقى امثلة وحشة لان دول اللى موجودين ع الساحة ونادرا مابتلاقى حد تانى واخر مرة شفت فيها حد محترم وبيقدم فكر ورؤى محترمة جه يتككلم فى برنامج من برامج التوك شو اللى موجودة كان وسيم السيسى وكرم حجى ومبقيتش مصدق وكنت عايز ادخل جوه الشاشة واخدهم وامشى ماهى حاجة متتعقلش ازااااى الناس اللى مستنية خناقة شوشو ومرتضيللى يجيلهم ناس تصدع دماغهم بعلم زى المصريات ولا اى حاجة تانية وحقيقة واقعة بقى ومش كلام مصاطب ان ده اصلا اتجاه الدولة ومش عارف هما اصابهم الغباء وازاى يقصدوا تسطيح النناس بالطريقة الفجة دى والمخرج عايز كده والجمهور اتهبل وفاتح بؤه وعينيه مبترمشش

اتفقنا ان فيه ابجديات جديدة عدت م المصفاة-طالما انا قلت كده يبقى اتفقنا متتعبونيش معاكم-ومن ضمن الابجديات الجديدة دى ابجديات الرفض....وبديهى جدا ان اللرافض بيستخدم ابجديته اللى بيمتلكها حسب موقعه وحسب سلطته واللى يقدر يعمله بحيث يكون من وجه نظره انعه مؤلم ورادع للى بيرفض فعله يعنى مثلا ابن اختى الصغير لما ميعجبوش حاجة منى بيشد شعرى لانه فهم انى بتضايق من الحكاية دى وعارف ان له مساحة مش بطالة فى قلبى فبيشد وقلبه جامد و كان ممكن يعيط بس او يعمل اى حاجة تانية لو سلطته ووضعه ميسمحلوش انه يشد فى شعرى وهى دى ابجدية الرفض بتاعته والابجدية دى بتختلف من شخص لشخص فمثلا ممكن تكون الابجدية دى عبارة عن كلمات سبارتكوس الاخيرة وممكن تكون فى احمد العربى واللى يفهم يفهم واللى ميفهمش بيكفر ويقول زنديق ويهدر دمه

نسيب ابجديات رفض ابن اختى وأمل دنقل ومحمود درويش ونيجى لابجديات رفض المواطن المصرى اللى ظروفه معروفة ومكشوفة قدام الكل...الشاب المحدود الدخل المحدود النصيب فى التعليم لما يجى يعترض فى او يبدى غضبه على مجتمعه فى وسط حشد من الناس ياترى ممكن يعمل ايه غير اللجوء لصدر او مؤخرة فتاة؟... اى فتاة مهما كان شكلها ولابسة ايه ان شالله يارب لو كانت لابسة خيمة متعرفش وشها من ضهرها فالعملية مش عملية شهوة او شبق جنسى قد ماهى عملية رفض ونبذ وغل من مجتمع باكمله...الشاب المصرى المحدود الدخل والمسطح والمهمش لما حفنة اللاعبين اللى متسلط عليهم الضوء يحققوا مكسب تلاقيه من غير مايشعر طالع يرقص فى الشوارع لحاد الصبح زى السكران اللى مش عارف بيعمل ايه غير انه ارتاح لما كسر عربية ولا محل فى وسط احتفالاته المزعومة والمروج لها من كل الجهات الللى تهمها عملية التسطيح السابق ذكره....وفى فترة زمنية مش بعيدة كان لما المجتمع بيرفض حاجة ممكن يعمل مظاهرة او وقفة احتجاجية مش يتحرش ببعضه او حتى انقلاب عسكرى بس كان بيبقى مجتمع العالم بينظرله نظرة محترمة مش نظرة انحلال وقلة ادب

اخيرا احنا بجدياتنا اتغيرت ومن ضمنها ابجديات الرفض وكل واحد بيرفض حسب مستواه الفكرى والثقافى زى مابيشوف الدنيا حسب مستواه الفكرى والثقافى برضه ورد الفعل من المشاهد اللى ع البر وبيتفرج ع الحكاية من بعيد بيتغير مابين تقدير للرفض ده او استنكار ليه



زمان كانوا بيغنوا وبيقولوا-واثق الخطوة يمشى ملكا
دللوقتى بيغنوا وبيقولوا-اه يانى يانى يانى مش هعمل كده تانى
زمان كنا بنحارب مع بعض وبنتهزم وبننتصر
دللوقتى بنحارب فى بعض والطرفين مهزومين
زمان الناس فى الخرطوم شالت العربية بتاعة عبدالناصر من ع الارض وهو راكب فيها
دللوقتى اى رئيس عربى بيظهر ع الشاشة فى نشرة اخبار بيتف عليه وبيشتم


هناك 54 تعليقًا:

فتاه من الصعيد يقول...

اتفق معاك

في ايام النكسه سنه 67 ظهرت اغاني تافهه وافلام عبيطه وحققت ايرادات كبيره

في زمن الانتكاسات المجتمع بتنتابه ظواهر الانحلال والكفر بالمباديء

تحياتي

خواطر شابة يقول...

موضوعك جاي على الجرح
مانعانيه هو نتيجة جيل كامل ضائع ليس له هدف حكوماتنا الرشيدة اضاعت ماضيه وحاضره وتهدد مستقبله لاتعليم جيد لاصحة لا تأمين صحي لاوظائف لازواج لامستقبل ولابعاد اي شبح للثورة او المطالبة بالتغيير تختلق له اعداء وهميين لالهائه ليظل يحارب طواحين الهواء.

Mr.Hazem يقول...

للأسف هادي سياسة اجنبية غربية تقوم بترسيخها في مجتمعاتنا العربية من خلال حكوماتنا الرشيدة
وحتى من خلال افلامنا ومسلسلاتنا العربية التي من خلالها يقوم الشباب بتقليدهم , فلماذا لا تلعب الحكومه دوراً في رقاباتها على المسلسلات التي تعرض
اضف الى ذلك المسلسلات الهابطة التي تُنقل الينا من الدول الاجنبية , زي المسلسل الهابط نور ولميس ومش عارف ايه

بجد نحن ينطبق علينا مقولة " تقليد أعمى "
نقلدهم دون ان نعرف تبعات هذا التقليد
من خلال هذه المسلسلات وغيرو يصبح الشباب منفتحين زيادة عن اللزوم وبالتالي بيصبح موضوع التحرش وغيرو اشي عادي وطبيعي ليش ! ؟
لأنه هو اصلا تعود على مشاهدة مسلسلات وافلام يُعرض بها امور كارثية .
وأنا برئيي ان موضوع التحرش لا يأتي بأي متعه للشاب نهااااااائياً , فهذا ما هو الا نقص موجود لدى الشاب ..
ولا شك ان وجود فراغ لدى الشباب خصوصاً الخريجين وعدم حصولهم على وظائف يجعلهم يندفعون للشارع ليبحثوا عن شيئ يسد فراغهم ...
موضوعك رائع
اتمنالك التوفيق

amirelhob يقول...

موضوعك حلو اوى يمكن البعض هيلوم عليك عشان الكلمات وكدا لكن مش مهم المهم انك وصلت رساله ليها معنى وقولت الحقيقه بدون اى خوف ومن قلبى بتمنلك كل خير وسعاده وصحه وتوفيق وفرح وابتسامه تدوم يا رب طو ل العمر

الشعب لابد له من حكومه تشكمه يقول...

مهما كان مفيش مبرر للتحرش..
انت لو شفت الصور اللى كانت فى الدستور كلهم شوية عياااال صغيره..

متقوليش حال البلد,دا حال البيت اللى معرفش يربى..بلا قلة ادب شوية عيال عاوزين يتربوا والله..

دا نقص دين وتربيه,ومش هلوم غير بيوتهم وبسسسسسسسسسسسسس.

7annen يقول...

انت وصلت رسالتك بس محدش هيسمع
البلد انعدمت من الاخلاق

مي يقول...

الموضوع اكتر من هايل وفيه نقاط كتيرة مهمة جداااااااا وتتكتب فيها بوستات للصبح
الشعب كله مكبووووووووووووت
ودى اصلها سياسة مدارية يحبوا يعموا الناس زى الجاموسة اللى بتدور فى الساقية والناس استسلمت
بقى فعلا شباب ضايع ومستهتر عايز كله عالجاهز حتى الجنس يقولك مااحنا مش لاقيين نتزوج يبقى يلالالالالا
لامبالاه رهيبة وطبعا الناس العالية كده مستريحة من وجع دماغ الشباب يلالالالا خليهم فى التوهان ده ماهو من مصلحتهم
مننكرش ان فى قلة قليلة واعى بس مش كفاية
على فكرة مش عارفة اقول غير الموضوع بجد هااايل احييك عليه تميزك اكثرمن رائع

عرقسوس يقول...

مساء الفل

وانا باقرا موضوعك حسيت إني قاعد على مسمار !!

وكل ما أنزل سطر المسمار يغرس فيا أكتر !!

زي ما تكون حروفك شواكيش بتدق عليه
!!

بإختصار انت اتحرشت بيا

موضوع هايل بجد

في إنتظار تشريفك لينا في مدونتنا " شيش وإزاز" - تحت التوضيب - بس من غير مسامير وانبي

سلام يا عمي

أميرة علي كوكب مهجور يقول...

دي ناس من الاخر صايعه لا تربت ولا تعرف ربنا وكمان تافهين ودماغهم فاضيه

اللى موش عارف يتغير يقول...

ازيك يامحمد
بقالى فترة مشغول ومبعلقش عند حد
بس الواضح انك عامل موضوعات جامدة
ماشاء الله

Foxology يقول...

مع احترامى الكامل لرأيك عن أبجديات الرفض انا احب اعدلها الى ابجديات الأخلاق اللى تقريبا اتنسفت نسف وده زى ما قولت انه زى ما يكون توجه عاااام والمخرج عاوز كدة وعلى رأى محمود عبدالعزيز : ادينى فى الهايف وانا احبك يا أفننس

تحياتى :)

ameen يقول...

فعلا والله معاكى حق ف كلمه قلتيها

احنا بنعانى من انحلال اخلاقى فظيع فى مجتمعنا


طبعا بالنسبه لى انا فى الريف لسه الامر ما وصلش للدرجه اللى بتتكلمى عنها

لكن طبعا بالنسبه لقبل كده
يعتبر قيه انحلال برضو !!

(Joudy) يقول...

الحقية إن أبجديات الرفض اللى وصلنا لها صعبة بشكل كبير لأنه تخطى لحقوق ناس ممكن تكون هى كمان مقهورة من الدنيا سواء بنت أو ولد بقت سياسة خاطئة فى التعبير ولو المجتمع رضخ لها يبقى خلاص بقى على كل أخلقنا ومبادئنا السلام

وربنا يستر

اقصوصه يقول...

الله يهدي شبابنا :(

ليس فقيرا من يحب يقول...

بعيدا عن الكلام الكبير اللى انت كاتبه

التحرش دا صياعه بعيد عنك ملهاش

دعوة بظروف بلد ولا تعليم ولا نيله

وياما ناس فى اسود الظروف ومشافتش

التعليم بعنيها وقمه الاحترام والعكس

ناس كل شيىء متاح ليها وواصله لاعلى

المناصب وزباله

واديك شفت مدرس الثانوى ولا الدكتور

ولا ولا

واللى مستخبى انيل

تحيه كبيرة اد كده اهه لحضرتك

donya يقول...

مساء الخير
وجهة نظر برضه
لكن مهما كان التحرش ابابه اكتر من كده كمان
ومن ضمن الاسباب من وجهة نظري انها كمان موضه وبجملت الموضات الغريبه اللي طلعت زي البنات اللي اتحجبوا من فوق ومن تحت لا
علي راي عادل امام من فوق مأنتمه مع الاخ محمود ومن تحت مأنتمه مع عمرو دياب

تحياتي

صفــــــاء يقول...

مع كامل اعترافى انه مشكله خطيرة جدا

لكن التحرش مش وباء مثلا فى مصر

يعنى اللى بتخرج من بيتها مش بياكلوها مثلا ... ايوة هى ناتج مشاكل واحباطات كتير لكن برضه زى ما انت قولت بتكون فى شريحه ما

مقال كويس ومنطقى
تحياتى لك

قلم رصاص يقول...


عزيزي المواطن حلم مبيستسلمش

احييك على الموضوع

لكني اختلف معك في ناحيتين

الأولى .. استخدامك لبعض الألفاظ .. كنت أفضل متنزلقش اليها .. بس بسيطة تاخد بالك بعد كده عشان بجد انا مهما كان مبحبش حد يخرج منه لفظ كده ولا كده حتى لو احنا عارفين الالفاظ دي ودارجه بالنسبة لنا .. خصوصا لما يكون الحد ده شخص محترم زيك .. كفاية انك ابن خالتي هههههههههه

ثانيا التحرش أسبابه الرئيسية يامحمد هي البيت نفسه .. التربية بمعنى ادق .. دلوقتي الظروف السيئة اللي بتمر بيها البلد دي ماشيه على الجميع ..خصوصا مسألة افراغ الهويه وتهميش قيم المجتمع المسلم الأصيله سواء كانت بأصايع اجنبيه معاديه لنا او سواء كانت سببا مباشرا لاهمالنا نحن ..

هذه الظروف طالما بتنطبق علينا كلنا .. طب ليه كلنا كمصريين مش بنتحرش ببعض ؟!

رد بقى .. هنا الفرق يامحمد التربيه ثم التربيه ثم التربيه والأخلاق والقيم الاجتماعيه .. يعني باختصار السبب الأسره وليس مايجري في المجتمع من قصور في نواحي عده.

يعني متجيش تقولي أزمة البطالة والحقد الدفين من طبقات الشعب غى نجوم المجتمع هي السبب في التحرش .. الله طب ماهو معظم المتحرشين من فئات عمريه صغيره متعرفش أصلا يعني ايه شغل وحقد وكلام من ده..لسه موصلوش لمرحلة النضج الفكري والاستعداد العقلي للتفكير في مسائل زي كده ..

اذن يبقى السبب هو تربية الأسرة لأولادها!

واحييك مره تانية على البوست

مزيد من التميز

في امان الله

حلم بيعافر يقول...

فتاة من الصعيد

الانتكاسات هى سبب لهذه الاشياء

وليس العكس

ممكن فى جو الشعور بالاحباط والنكسة الظواهر دى تكتر وتنتشر اكتر من الاول معاكى فى الحتة دى

منورانى دايما

حلم بيعافر يقول...

خواطر شابة

الجوح هيتداوى بس احنا يكون عندنا استعداد لمداواته

منورانى

حلم بيعافر يقول...

حازم

لو كانت سياسة اجنبية

فاحنا اللى بننفذها

منورنى

حلم بيعافر يقول...

امير الحب

متشكر والالفاظ جت بقى وخلاثص

ماهى كانت لازم تتقال عشان اوضح حاجة كده

منور

حلم بيعافر يقول...

الشعب لابد له من حكومة تشكمه

مش ببرر والله

انا بحاول اقول الاسباب الحقيقية ورا الحكاية دى

والعيال الصغيرة انا قلت انها فئة من المتحرشين وبتكبر بس مش هى الفئة الرئيسية من المتحرشين

نورتى

حلم بيعافر يقول...

حنين

لا هنسمع الدنيا كلها والبركة فى الشباب

منورانى

حلم بيعافر يقول...

مى

يابتوع السياسة المتدارية

بتجيبى المصطلحات دى منين؟انت بتذاكرى من ورانا ولا ايه؟

نورتى

حلم بيعافر يقول...

عرقسوس

انت هتودينى فى داهية ياعم

الناس هتقول عليا ايه دللوقتى؟

ههههههههه

منور ياموعلم ومدونتك مش مفتوحة للقراء لسه

زى ماقلت لسه بتوضب

نورتنى ويدوم التواصل ان شاءالله

حلم بيعافر يقول...

اميرة على كوكب مهجور

ماشى يابنتى دماغهم فاضية متفق معاكى فى كده وانا قلت كده فى البوست

منورانى

حلم بيعافر يقول...

اللى موش عارف يتغير

يااهلا يااهلا

ازيك يا حج ايهاب منورنى

حلم بيعافر يقول...

foxology

ماقلنا المصفاة مخرومة وبتعدى اى حاجة

ركز معانا شوية يا معلم

منورنى

حلم بيعافر يقول...

ameen

انت الوحيد اللى بتكلمنى على انى واحدة

اعمل فيك ايه بس؟

والله اخلى عبدالرحمن يشد شعرك ويخليك اقرغ

منور

حلم بيعافر يقول...

جودى

ربنا يستر

ومنورة

حلم بيعافر يقول...

اقصوصة

يارب

نورتى

حلم بيعافر يقول...

ليس فقيرا من يحب

يارانيا احنا استثنينا المرضى النفسيين فى اول البوست

انا اتجهت للمشكلة اللى فى الشارع

منورانى

حلم بيعافر يقول...

دنيا

جايز تكون موضة والحكاية فيها شىء من التقليد بالنسبة لفئة الاطفال بس دى مش كل الاسباب

منورة

حلم بيعافر يقول...

صفاء

متفقين

منورة

حلم بيعافر يقول...

قلم رصاص

انا اتشرف بانك ابن خالتى وعديلى الحكاية بتاعة الالفاظ دى المرة دى او ابقى اضربنى على ضهرر ايدى لما تشوفنى

متنساش يا استاذ ان القيم الاجتماعية دى جزء كبير منها بيتكون بره البيت ومتغفلش دور المدرسة فى العملية التربوية

بص للمؤسستين دول وحالهم(الشارع والمدرسة)وبعدين رد

معاك انى اغفلت دور البيت عن غير قصد بس انت برضه متقلبش الاية وتقول معظم المتحرشين من فئات عمرية صغيرة لان معظمهم شباب-غير متعلم او دبلومات او تعليم اقل من المتوسط
الفئة العمرية الصغيرة دى بتقلد بتقلد بتقلد زى مابيقلدوا فى السجاير

منورنى وتانى مرة حاسب فى كلامك ومتطنش المدرسة ودورها فى تكوين وبناء الانسان لاحسن والله اجيبلك كل التربوين اللى فى البلوجر ونيجى نقطعكوووووووووا ههههه

mohamed ghalia يقول...

معاك حق لما يكون المفروض الى انهم نجوم الجيل بيعملوا كده ما احنا لازم نوصل للإنحطاط ده نتيجة طبيعية لسبب طبيعى

مصري جدا يقول...

صحيح

بيعملوا كدا لية؟

لن التمس اعذار

يستاهلوا الدبح

بس اكيد فية سبب

zikooooo يقول...

السلام عليكم

هو ليه بجد كل حاجه كده في النازل؟؟؟؟
مفيش حاجه في الطااالع ابدااااا؟؟؟؟؟
والاخلاق بتتنيل لا وايه تلاقي امراض نفسيه غريبه ومستوي الفكر بينحدر لتحت زي الشلال

يارب اهدي لينا انفسناااا واصلح شاننا كله

تسلم ايديك موضوع جميل
ربنا يزيدك

آيوشة يقول...

مش عارفة يمكن اتفق معاك فى بعض الكلام لكن مش كله يعنى معتقدش ان التحرش ولا الشباب اللى على الارصفة وفى الشوارع والجيش والاغانى الهابطة والافلام الاباحية والدنيا اللى بقيت زبالة دى مظاهر رفض المجتمع لحاله
دى تبقى قمة السلبية بقى لما نرفض بالشكل ده
اعتقد اننا وصلنا لمرحلة الواحد بقى مش عارفة مصلحته فين ولا يوصل لهدفه ازاى عايشين وبس
واكبر دليل ان الناس مش فى دماغها اصلا اللى بيحصل فى البلد
الانسان ربنا كرمه بالعقل يبقى ازاى بكل بساطة يلغيه ويتحول لحيوان ده حت الحيوانات بتعرف الخطر فين وبتدافع عن نفسها انما الانسان دلوقتى لا اهو عايش وخلاص لا فى رادع ولا واعظ

حلم بيعافر يقول...

محمد غالية

منور ياموعلم

حلم بيعافر يقول...

مصرى جدا

مش التماس اعذار

دى مجرد رؤية

منورنى

حلم بيعافر يقول...

zikooooo

شكرا ومنور

حلم بيعافر يقول...

من ابجديات الرفض
رؤية تانية لاسباب التحرش وتشجيع الكورة الجنونى
هو ده اللى انا قصدته ياريت قصدى يكون وصل
وضضياع الهدف والقيمة معاكى فيها
منورة

Angel يقول...


حلم بيعافر

صباح الخير

أنت اتكلمت في موضوع للأسف مش بيتفتح ألافي الأعياد وكمان قليل جداً
رغم أنه موضوع يستحق الاهتمام والوقوف من أجله
للأسف أرى بأن البيت هو اللبنة الأولى كما تعلمنا وتربين على هذا
ومن ثم المجتمع .. نفسي بقى نهتم فعلاً بالأمر ده مش كل شويه تحصل زوبعة في البرامج الفضائية وتنزل على مفيش
):

شكراً لرأيك وفتحك النقاش لموضوع مثل هذا

دمت بخير


Angel love

حلم بيعافر يقول...

angel

مداخلة تانية بتشوف ان اللبنة الاولىى فى المصيبة هى البيت والتربية

ماشى وجهة نظر بس منغفلش دور المؤسسات التانية

والفضائيات بتفتح المواضيع دى لمجرد عمل ضصجة وخلاص ومفيش حد عايز يحل بجد

نورتى

ريمان يقول...

اللى بيتحرشوا دول ما هم الا ناس ناقصين تربيه ودين ومرضى


الموضوع كله موضوع اخلاق

واحنا فى زمن انعدمت فيه الاخلاق الا من رحم ربى

الشجرة الأم يقول...

مسألة التحرش الجنسي أصبحت ظاهرة عالمية في فترة السبعينات والثمانينات .. لكن لم تكن لدينا بنفس الكثافة نظرا لشبه الإنغلاق الذي كنا نعيشه وخاصة في المجتمعات المحافظة.

والذي حدث في فترة التسعينيات أنه وضع حد لها لدى الغرب بوجود العقوبات الصارمة لكن هذا الأمر مع السف لم يطبق لدينا بشكل سليم فتجد من تحرش بها هي الملامة على قولة المثل الذي لدينا في الخليج العربي (أمسكوا غنمتكم تيسنا ما يجيكم).

لك مني كل الود والتقدير.

love_live يقول...

يقول رسول الله صلى الله عليه وسلم:
يُعن فى رأس الرجل بمخيط من الحديد خيرٌ من أن يمس إمرأه لاتحل له

حلم بيعافر يقول...

ريمان

احنا فى بلد بتعرى ابناءها يبقى الموضوع مش موضوع اخلاق وبس

وجهة نظرك تحترم ومنورانى

حلم بيعافر يقول...

الشجرة الام

كل الود والاحترام منى لكى ابضا

ومنورانى

حلم بيعافر يقول...

LOVE_LIVE

فمابالك بالتحرش بقى؟!!

منورة

مجرد حلم... صغنتوت يقول...

فعلا ناس مخها تعبان ومحتاجين تربية من اول وجديد
الغلط في تنشئتهم ولا في تفكيرهم بعد كده معرفش بس كله محصل بعضه في الاخر

حلم بيعافر يقول...

مجرد حلم صغنتوت

منورة ياصيدلانية ويدوم التواصل