الخميس، 10 ديسمبر 2009

التهويد فكرة ومبدأ وعقيدة...



بداية من محاولات هرتزل لايجاد مكان يلم فيه اليهود من بقاع العالم المشردين فيها ومرورا وباقتراحات هربرت صمويل البريطانى الصهيونى ووعد بلفورد ومذابح دير ياسين وصبرا وشاتيلا وغزة والمجازر اليومية اللى بتتم فى كل حتة فى فلسطين كانت الفكرة اللى اتبلورت فى تهويد كل ماهو فلسطينى ويمت للعروبة بأى صلة من قريب او من بعيد ...الفكرة انتقلت لفرق الهجاناة والجيش الصهيونى وقادته فى صورة اكثر تعقيدا وثباتا فى النفوس المظلمة القذرة وكانت فى صورة مبدأ يقضى بابادة الفلسطينيين شيوخا ورجالا ونساءا او ترحيلهم بالقوة وأخيرا أصبح التهويد عقيدة بيغرسها الحاخامات اليهود فى نفوس الاطفال والطلاب الاسرائيلين فى المدارس والجامعات ومنهج ماشى عليه المجتمع الصهيونى داخل وخارج اسرائيل بمباركة أو عجز الغرب الضلالى والشرق الجبان الضلالى هو كمان.

ابادة ومجازر ومذابح وتزييف وتبديل حقائق وصلت حتى لتغيير اسم الحشرات والصاق اسماء جديدة لها تنتمى للدولة العبرية اللقيطةعملية منظمة ومثيرة للسخرية أحيانا ومثيرة للغيظ والاشمئزاز طول الوقت والاغرب انها تقابل بشىء عظيم من اللامبالاة من الجانب العربى بل وفى بعض المواضع عند كتاب عرب تكون مثارا للاعجاب والتغنى بتسلسلها وطريقة اتمامها والدقة المتناهية فيها ...للاسف الشديد هذا هو موقف بعض الكتاب والمثقفين العرب ويتعدى الامر لاكثر من ذلك عندما ندعمها شكلا وموضوعا وبكل ما أوتينا من قوة

ثقافيا الضربة موجعة جدا والضارب من معسكرنا او محسوب علينا...كلامى على الدكتور جابر عصفور ومشروعه لترجمة الادب الاسرائيلى-ان جاز تسيميته ادبا-ووقوفه معارضا لكل من قلل من اهمية المشروع أو حاول اقناعه بترك المشروع المشبوه وكأنها حرب ضروس يشنها من أجل شىء مهم...بدلا من احتضان الثقافة والتراث الفلسطينى يأتى الفذ العبقرى بمشروع زى ده بحجة اعرف عدوك طب مافيه مراكز متخصصة لدراسة ومعرفة عدونا ايه دخل اللى هيحصل ده بقى فى معرفة العدو مبقاش فاضل ناحية مطبعناش فيها مع اسرائيل غير الناحية الثقافية والشعبيةوبعدين عدو ايه اللى لسه هنعرفه؟!!!وبعدين هما الصهاينة ناقصين منافذ يفرضوا منها وجهة نظرهم ع العالم؟!!مش كفاية السينما الامريكية ووسائل الاعلام الرهيبة اللى فارضين سيطرتهم عليها؟!!
حتى حائط الصد الاخير اللى كنا بنحتمى فيه بدأ يتلقى الضربات وبايدينا احنا مش ايدين حد غريب ...يمكن عشقى الشديد لفلسطين ولتراثها الشعبى والثقافى هو اللى يخلينى اقول كده واكره مشروع زى ده بس بجد حتى لو اى حد بص بعين العقل للموضوع هيلاقيه مفيش منه فايدة ومش هنشوف جديد ولا حاجة لما نترجم الادب الاسرائيلى مش من باب ان احنا بكده هنبقى عرضه لغزو فكرى من اليهود وان كن ده صحيح بس فعلا الموضوع ميستاهلش التعب اللى هيحصل عشان يتم


شعبيا فى مصر والوطن العربى بدأت مساحات فارغة تظهر على الساحة الفنية والثقافية فى كل بلد من البلدان العربية بدليل مثلا عندنا فى مصر ظهور فرق من الشباب بتعيد احياء التراث وبتغنى لسيد درويش وللشيخ امام مثلا وبتلاقى اقبال جماهيرى كبير جدا فى الشارع ...اذن احنا عندنا مكان فاضى ممكن نستقبل فيه شىء جديد ومفيد لنا فبلاش المكان ده نملاه باللى يضرنا زى مادكتور جابر عايز يعمل ...المكان ده بقول وبككرر مليون مرة ممكن نسقبل من خلالة الثقافة الفلسطينية بكل روافدها ونبقى كده احتضنا بعض وقوينا بعض ووقنا حتى ولو موقف شرفى من عملية التهويد البشعة اللى بتتم فكريا قبل ماتتم ع الارض ويمكن الناس بتاخد بالها اكتر من عمليات معينة بتحصل ع الارض زى حكاية الحفريات اللى بجوار المسجد الاقصى ومبيخدوش بالهم من التهويد الفكرى اللى بيتم وبيكون اكثر خطورة بمراحل من العمليات اللى بتتم على الاثار والمقدسات لأن التهويد الفكرى ده مش عملية موجهة للفلسطينيين بس .

اتخيل -اذا تمت عملية الترجمة دى-طالب جامعى بيقرأ فى رواية لاحد الكتاب الصهاينة ومقتنع ومتبنى لقضايا اليهود ومثار ومتعاطف جدا مع هولوكوستهم ومعاناتهم اليومية ضد الهمج الغوغائيين اللى بنسميهم الفلسطينين!!!...ده بالنسبة لطالب جامعى بيقرأ رواية أمال بقى لو الغزو الفكرى اللى احنا بنمهدله ده وصل للمواطن البسيط الغلبان اللى على قده ؟!!!....غريبة جدا والله احنا بنعمل تصرفات تخلى الواحد يتجنن هو احنا عارفين تاريخنا وبلادنا صح عشان نروح نترجم وننقل عن العدو؟!!!....خلاص الذاكرة نسيتت المذابح والحروب والمر اللى شربناه من اليهود؟!!!...خلاص بقوا على قلبنا زى العسل وحكوميا وسياسيا معاهم وسمنة على عسل وثقافيا كمان؟!!!...

هناك 30 تعليقًا:

الشجرة الأم يقول...

لقد كتب الله عز وجل على بني إسرائيل الزل والمسكنة .. لا وطن لهم ولا أرض تحتضنهم.. وهم سيبقون مشردين للأبد إن شاء الله .. آمين.

ameen يقول...

والله انا بتغاظ فعلا لما الاقى حد ناسى كل اللى حصل ده

والمفروض اننا يكون عندنا حميه اكتر من كده


احنا خلاص
معادش فيه دم !!

يعنى لو مش هيكون عنده دم خالص على الاقل لو نسى اللى حصل واللى بيحصل كل يوم

انو ما يبصش حتى على كتاباتهم

مش يقتنع بيها

ايا كان الشخص جامعى ولا حتى عامى

دا الناس الاميين

بيفهموا اليومين دول عن امثال اللى الفكر ده سيطر عليه


لا حول ولا قوه الا بالله

واحده من الناس يقول...

انا معاك اوى
وللاسف اسرائيل بتعرف كويس تختار مداخلها والحرب حاليا بيننا وبينها بقت حرب صامته
لانهم يختارون الاسلحه الثقيله بدون رصاص
لو نظرت حولنا لوجدت ان اغلب مانبيعه ونشتريه اصبح يمر عليه اسم اليهود حتى لو كان اسما مخفيا انما نحن نعلم جيدا ان لها يدا فيه
من بضعة شهور وموضوع ترجمة الادب الاسرائيلى والكل ما بين رافض وموافق وانا مثلى مثلك لا اعرف كيف اوقف ذلك..هل كلماتنا ف المدونات ستصنع فرقا؟
ان كانت ستصنع
اذن انا معك ارفض وبشده ان يحمل اشقائى الصغار وابناء اشقائى وابنائى فيما بعد كتابا يهوديا يقنعهم بان الحرب ضد اليهود خطأ
يقنعهم ان اليهود ماهم الا بشعبا مثلنا يناضل لنيل حريته ف الارض التى وعدهم الله بها
افعل مايمكنك فعله لاثارة حماسة الكثيرون لعلهم ينطقون مرة لايقاف تلك المهزله

Somaya Kamal El Din يقول...

محدش بيقرا تاريخ دلوقتى

وحتى التاريخ دلوقتى بقى مش صح

والاعلام بقى بيعرض وجهة نظر تخلى اى حد يسمع لهم انه يتعاطف معاهم

كل واحد بيعرض اعلام يخدمه
ومحدش بقى فاهم حاجة

والعرب مبقوش عرب
كل واحد بيدور على مصلحته شعب وحكومة

واللى فاهم مش بيقدر يتكلم ولايقول

بس كل حاجة ولها نهاية واليهود عمرهم ما كان لهم وطن ولا لهم هوية ولا اى شىء اصلا

(Joudy) يقول...

كالمعتاد الاستسلام هى شريعة كبيرة فى حياتنا وبنرضخ لها بس فعلا هى ابتدت باعلان اسرائيل دولة وبدل ما نبين اننا وافقنا مضرين علشان يبقى فى أمل اننا نثبت وجودنا ونطالب بمقابل الموافقة دى ألا وهو قيام دولة فلسطينية على حق لها حقوقها كاملة فى ارض وجيش لا بنكملها ونثبت إن لهم هوية وثقافات وبندور علشان ندرسها حاجة بجد مش تغيظ بس لا تجيب شلل

Mr.Hazem يقول...

هل تعرف أنني الان اشعر بالفخر !
لا اعرف السر في ذلك ولكن لعل ما نشاهده كل يوم على القنوات والفضائيات العربية ها اوصلني الى حد التشاؤم
انا سعيد جداً لكلماتك التي تخرج من قلب يعشق الكرامة
كلمات طاهرة محبة للحرية
كلمات عشقت فلسطين والقدس فعشقته
كلمات ابدعت بها سيدي الكريم
اسأل الله لك التوفيق
وان تصل رسالتك لكل عربي وتلقى اذاناً صاغيه
لك ودي واحترامي

وردشان smilyrose يقول...

عندك حق ةالله طب اللى خلى الدكتور

المذكور انه يعمل مشروع زى دا

طب كان عمل شئ افضل يفيد الناس

بدل من ترجمة ادب من لا يعرفون اى

قيمة لاى شئ

كان تبنى مشروع يبينهم على حقيقتم

او يتبنى مشروع يحفز حكامنا المرضى

انه يتحركو ويقومون بشئ ايجابى

لكى يعرفوهم انا هناك عرب يحمون كرامتهم وبلادهم

وحسبى الله ونعم الوكيل

7annen يقول...

شعب طيب سهل الضحك عليه والله
واسرائي شعب ذليل ومع ذلك ليهم طرقهم الملتويه اللى بيدخلوا بيها
احفظنا يارب

مي يقول...

ياسلالالالالالالالالالالام هى قفلت معاه يعنى ملقاش غير دول
اصلا اليهود حرفوا كل حاجة وملهمش ادب اصلالالالالالالالالا كله حسب توقعهم
دى وصلت انهم قالوا ان الهرم بتاعهم
لايملكوا تاريخ ولا اخلاق
تحياتى لابداعك

مسدس صغير يقول...

طبعا التهويد ده فكرة تسبق تكوين الدولة
وهمه بينفذوها على أكمل وجه

ازيك يا حلم افندى
احييك على البوست الرائع
سلاماتى

El_Tahan يقول...

ربنا ينصر الفلسطنيين ويقدروا يمروا من هذه الكبوه ان شاء الله وربنا ياخد اليهود ولاد الكلب دول عشان نرتاح

قلم رصاص يقول...


إطمن ياحبيب هارتي
محدش من الشباب اللي انت خايف يقع في ايده أي كتاب يحمل بعضا من الأدب بتاع قلالاة الأدب الصهاينه ، محدش منهم هيقرا حاجة وانت عارف .. طب اما يبقوا يقروا تاريخ بلدهم اول ..بلاوكسه !

لكن انا اتفق معاك قلبا وقالبا في خطرة مسألة التهويد التي تتم على قدم وساق في أرض فلسطين .. دي فعلا أخطر من امتلاك اسرائيل السلاح النووي الذي تمتلكه بالفعل ..وواجعني اوي اننا نموت نفسنا بنفسنا ..يعني نحط لنفسنا السم الزعاف بايدنا نحن العرب ..

هما بدأو حربهم العسكرية وبعدها حفروا زورق صغير لسائل حروبهم الفكريه والتهويد يجري منها وقاعدين حاطين رجل على رجل يتفرجوا علىالنتائج المذهله اللي في صالحهم.

اليهود النهاردة يامحمد معادوش بيبذلوا جهد زي الاول عشان يوصلوا لنا
هما عملوا الاساس وسابوا الباقي علينا
احنا دلوقتي اللي بنسعى للناس دول .. وجتنا ستين خيبه ..ياريت بنسعى لهم بهدف احتوائهم ولكننننننن بدون اي هدف ..
وفي الااااااااخر هما الحصان الرابح

هما الحصان الرابح لولا تدخل ربنا وانقاذه لينا في الوقت المناسب

انما هما بيشتغلوا واحنا نايمين

في امان الله

أميرة الاحزان يقول...

احييك على اختيار مواضيعك
وبعدين هما دول العرب الي مابيعملوش حاجه غير انهم يتكلموا ويقولوا شعارات وبس
وبعد كده افعالهم كلها غير كلامهم خالص
فين العرب وفين الي بيحصل في فلسطين من قديم الازل
ايه الي عملوه علشان يرجعوها غير الكلام الي بيقعدوا يقولوه وبس من غير افعال
تحياتى لك

Foxology يقول...

هى جت على الترجمة ؟؟؟ شوف السيفون فى حمام بيتك مصونع فين :))


تحياتى

mimi يقول...

محدش بينسي اللي حصل ، بس الأيام بتشغل الواحد عن التفكير في اللي بيحصل

بوست جميل بجد
تحياتي

حلم بيعافر يقول...

هما مشردين ومشردينا معاهم

نورتينى

حلم بيعافر يقول...

ameen

والله متعرفش الكرسى بيصيب بلعنات شكلها عامل ازاى

جابر عصفور ده كان قبل ما يمسك اى مناصب انسان لاغبار عليه

منورنى

حلم بيعافر يقول...

واحة من الناس

هما بيختاروا مداخلهم واحنا اللى بننفذ

طيب يبقى العيب فين؟

الكلام فى المدونات بيفرق وبيجيب فايدة وانا هنا طلبت طلب الشعب نفسه يقددر ينفذه من نفسه وهو احتضان الثقافة الفلسطينية ورفض المسالة بتاعة الترجمة

مش عملية صعبة بس تفرق كتير جدا

نورتينى

حلم بيعافر يقول...

سمية كمال الدين

اهلا بيكى ومنورة فى اول زيااراتك هنا

ويدوم التواصل ان شاء الله

واحنا لازم نعمل اعلام قوى يخدمنا زيهم

حلم بيعافر يقول...

جودى

زى ماقلتى احنا اللى بنثبتلهم هوية وتاريخ

للاسف

منورة

حلم بيعافر يقول...

حازم

تشعر بالفخر عندما تعمل ونعمل على تحقيق مانكتبه وننادى به

نورتنى

حلم بيعافر يقول...

وردشان

زى ماقلتى ترجمة عن من لا يعرفون شيئا عن القبح والتقبيح

منورة

حلم بيعافر يقول...

حنين

لن يحفظنا الله بالدعاء فقط

منورة

حلم بيعافر يقول...

مى

الهرم بتاعهم؟

هههههههه ليه يعنى؟

منورة

حلم بيعافر يقول...

مسدس صغير

ازيك يابوصلاح ومنورنى

حلم بيعافر يقول...

el-tahan

يارب

منور

حلم بيعافر يقول...

قلم رصاص

لاء ياخويا هيقروا الادب يختلف عن التاريخ فى انتشاره وخصوصا الرواية بين طلبة الجامعات وبعدين الحكاية دى لو اتعملت هتبقى عاملة زى النار فى الهشيم مش لان ثقافتنا هشة لاء لاننا كشباب مسطحين بفعل فاعل

منور يابن خالتى

حلم بيعافر يقول...

اميرة الاحزان

شكرا

ولازم يبقى فيه وقفة ودور والا نبقى اتاخرنا جدا

منورة

حلم بيعافر يقول...

foxology

لاء الترجمة اخطر
الغزو الفكرى اشد واصعب
ولمعلوماتك او بلاش اقول انزل انت اى منطقة صناعية فى مصر وشوف تطبيعنا مع اسرائيل وصل لفين

منور

حلم بيعافر يقول...

ميمى

وهو اللى حصل وبيحصل يقدر حد ينساه؟

منورة