الاثنين، 14 ديسمبر، 2009

الجالية الزملكاوية فى مصر...



بصة سيد معوض لاعب الاهلى لحازم امام لاعب الزمالك لما عمل معاه فاول ووقعه ع الارض هى بالظبط بصة باشا اقطاعى لفلاح حقير بيشتغل عنده بالاجرة هو وبقية عيلته طول السنة ويدووووب فى الاخر بيللبسوا بالعافية وياكلوا اى حاجة ويتغطوا بشوالين من اللى بيعبوا فيهم القطن وكان ناقص ان حد يناول سيد معوض كرباج عشان يقوم يضرب بيه المجرم الفاجر اللى وقعه ع الارض عشان المشهد يكمل زى ماهو فى الافلام الابيض والاسود القديمة.

شىء غريب جدا تناولنا لقضايا شبه بعضها بالمللى بمكاييل كتيرة قوى وبطرق تخلى الاقرع يشد فى شعره ويتجنن كمان...النادى الاهلى-الطاهر اللى هيفضل طول عمره طاهر واللهم لا اعتراض يعنى-بيتعامل معاملة خاصة جدا من كل اللى حواليه وكأنه مؤسسة أفرادها كائنات فضائية يجب التاعمل معاها بخوف دايما أو كأنه كيان مقدس ميصحش انتقاده أو المساس بيه لأانه كما يشاع وصدقنا هو مصر واللى يرش مصر بالمية ارشه بالنار والزفت والصق بيه صفة العمالة والتامر من غير مناقشة طبعا الكيان المقدس القى بظلاله على افراده واسبغ عليهم صفة القداسة لدرجة ان لما حد يجى يتعرض للاعب من فريق النادى فى ماتش كورة عادى يبقى لاعب الاهلى له الحق انه يقوم ويشتم ويشوح ويضرب ويقل ادبه على زميله وعلى الحكم وعلى الدنيا كلها وهو عارف انه محمى ومدرع بغباء وجهل وعبط منظومة ملوثة بالنفاق والجبن والغباء وطبعا مفيش اوضح من تصرفات -خالدى الذكر- محمد بركات واحمد حسن وفلافيو وزملائهم الافاضل المحترمين فى حين ان لو حد تانى عمل نفس حركاتهم بيكون مصيره العقاب والوقف والسب والشتيمة على الفضائيات المصرية كلها ليه بقى اصل انتوا غلابة ومش فاهمين حاجة لأان لاعيبة الاهلى دول مصريين وهما مصر ومن غيرهم البلد هتقع وتولع بزيت وسخ ومش هيقوملها لاقومة اقتصادية ولاسياسية ولا فى اى مجال تانى وبقية الناس طبعا جواسيس عملاء خونة وميمنعش كمان انهم بهايم ومبيفهموش والحقيقة الكاملة لازم نرضعها من افواه عواجيز الاهلى على صفحات الجرايد وشاشات التلفزيون ولازم ناخد الاخلاق والقيم والنقاء والطهر من افراد المؤسسة المقدسة.

وطبعا لايمنع اطلاقا تحليل ماهو حرام اذا قام به قديس او معصوم من قديسى الكيان الطاهر الملون بلون النقاء والحب والعطاء اللى هو اللون الاحمر اللى الاهلى اضاف اليه الكثير من المعانى باختياره لون رسمى للفرق الرياضية بالنادى الطاهر...

أبوتريكة-... .... ...-عندما يمثل ويرتكب افعال عيال صغيرة وحرامية وينجح فى الحصول على ضربة جزاء زور فهو لاعب ذكى جدا وتسبب فى فوز فريقه حتى ولو كانت الطريقة غير مشروعه فهو تسبب فى الوصول للهدف الاسمى والاغلى والاعز على قلوب المصريين وهو فوز النادى الاهلى وقد فعلها مرارام وتكرارا وحصل على ماليس من حقه وفرح به وطار جماهير الاهلى من الفرح وتورمت ايديهم من التصفيق للضلال وللضلالى وحيث أن السارق هنأ بما كسب لا مانع أن تلصق صفة التمثيل والصبيانية لاخرين يعانون الامرين زى الله يرحمه جمال حمزة أو ربنا يهديه فلايصح للفاسق الذى ادخل التحايل والنصب والفرح بالحرام الى البيوت الا الدعاء بالهداية.

الحلو بقى فى الموضوع كله الاعلام الرياضى ده اذا جازت عليهم صفات الاعلاميين لان كلهم دللوقتى شوية لاعيبه معتزلة واخدين شاشات الفضائيات من غير وقت بدعوى ان ده اللى ماشى وبدعوى ان الجمهور عايز كده وفعلا اغلب الجمهور عايز كده وربنا يهنى سعيد بسعيدة أصل سعيدة دللوقتى بقت عايزة اللى يضحك عليها ويتسطعبطها وبما ان الغبة موجودة عند سعيدة وبقوة فهى انقادت للتعصب الشديد والاعمى وفرحت بالزور والظلم وفتحت بؤها وبرقت ومحدش بقى قادر يفوقها من العبط اللى بتتعاطاه يوميا .

المصرى عمره ماكان بيرضى بالزور حتى لو كان لصالحه وحتى لو كان فى الرياضة ومحدش كان بيقبل على نفسه الحرام ...دللوقتى الموضوع اتقلب وجنون الكورة دخل حاجات كتيرة اوى فى بعض ووغير قيم كتيرة اوى والرياضة اللى المفروض تجمع بقت تفرق بسبب الظلم والتعصب...بنظرة سريعة على ماتشات الزمالك والاهلى -اخر 5سنين-هنلاحظ ان الاهلى متفوق فنيا ومستقر اكتر ومؤهل للفوز وكان بيفوز على الزمالك غالبا بس كان فوز بيشوبه شىء من الظلم ودايما دايما فى معظم الماتشات كنت تلاقى جون زور للاهلى زى مثلا محمد شوقى مايزق عبدالمنصف ع الارض وحسن مصطفى يجى يجيب جون او جون تسلل زى جون القديس فى عبدالمنصف برضه او التغاضى عن ضربات جزاء زى بتاعة جمال حمزة اللى امير عبدالحميد شاله ورزعه ع الارض والحكم طنش وغيرها كتيييير واحنا فى وضع حصر لكن انا عايز اوصل حاجة بسيطة وهى ان اللى بيكسب عايز يكسب ويمسح اللى قدامه مش عايز يكسب بس حتى لو كان الكلام ده هيتم بالزور والظلم وخصوصا فى ظل مساندة معظم اللى حواليك وتشجيعهم ليك وانت ظالم.

أنا زملكاوى -والله العظيم زملكاوى-ولسه عايش اهوه وعادى اتعودت ع الهزيمة والغلب فى السنين الاخيرة وبطلب حاجة أظن انها مش بعيدة اوى ...أنا عايز لما اتغلب محسش بالظلم ومحتاج احس انى فى لعبة نضيفة وعادلة مشضرورى اتغلب واتظلم كمان ومش ضرورى احس بالقهر ومش ضرورى اكتشف ان الزمالك لما تيجى تلعب وتنافس الاهلى تطلع فريق اجنبى ومش من مصر وبلاش اعد واحصر الزمالك اتسرق قد ايه وكام مرة بس هاستشهد بماتش الزمالك والمصر فى كاس مصر لما حسام حسن كان بيلعب فى المصرى وسيدمتولى كان رئيس النادى والماتش كان فى بورسعيد وانتهى الشوط الاول بالتعادل1-1وسيدمتولى نزل للحكم فى اوضة خلع الملابس واتهجم عليه وهدده والحكم لغى الماتش فى التقرير بتاعه وكمله فى الملعب لضرورة امنية وكتب فى التقرير كده وحسب الماتش 2-0للزمالك واللى حصل بقى كان عكس تقرير الخحكم واتحسب الماتش بنتيجته اللى كانت 2-1للمصرى فى الشوط التانى اللى اتلعب عشان الدواعى الامنية ومش كده بس ...لاء لازم الطين يزيد بلة ولاز نتظلم كمان فى ماتش العودة لما المصرى جاب جون من كورة واقعة من ايد عبدالوحد السيد المغمى عليه واتحسبت جون وطلعنا من الكاس...شوفوا كم الظلم والافتراء؟!!وياريت الظلم والافتراء يقف على لجان المسابقات واتحاد الكورة بس لاء ده وصل للجماهير لما جابت مشجع زملطكاوى وصبت عليه جاز وولعت فيه ولا لما ضربوا ناشىء فى الزمالك بالمطواة فى رجله ومستعد احكى للصبح فى مواقف محدش سمع عنها ولايعرفها لان اللى قام بيها جماهير الاهلى وضد جماهير الزمالك!!!...ده غير تصرفات اللعبين برضه وطبععا محدش سمع عن لاعب الزمالك اللى اغمى عليه فى ماتش اليد مع الاهلى بسبب تدخل عنيف من لاعب الاهلى اللى زميله فى الكورة بيبرق لحازم امام عشان عمل معاه فاول.

انا زملكاوى وعايز لما يبقى ليا حق اخده ومظلمش عشان كده بقت الحكاية شكلها بايخ اوى طبعا اقصد مشكلة احمد عيد عبدالملك ولعبه فى مباراة الزمالك بدون وجه حق.

انا زملكاوى وبقولكم اتعلموا اللعب النضيف واتعلموا تكسبوا بشرف.

الرياضة مكسب وخسارة وبتعلم الروح الحلوة بس فى مصر مش كده فى مصر الرياضة قهر للاقلية ومعاملة بميت وش ...اتعلموا تكسبوا بشرف ومتفرحوش بالزور...وشوف ان فيه حد غيرك موجود عشان تبقى اسمها رياضة ...انا عارف ان الحق بيزعل وان كلامى هيضايق ناس كتير بس اللى يتضايق يتفلق ماحنا بقى لنا 5سنين مفلوقين.

هناك 18 تعليقًا:

قلم رصاص يقول...


هههههههههههههههههههه

ربنا يكون في عونكم يامحمد
هتلاقوها منين ولامنين ..انا باقول يمكن الشكعه بتاعة النهاردة دي جت لك بعد ماخييييييييييييرا كسبتولكوا ماتش السنة دي ^_^

يااخي بلا خيبه ..اتكلم في حاجة ليها لازمة ولافايدة..انت يابني مفيش وراك الا الموضوع ده ..كل فترة تقعد تفكرنا بيه؟!

ياعم ملعون ابو الكورة اللي موصلاك لكده
أهلي وزمالك وكلام فارغ ..اعقلها انت وغيرك ..مش هتاخدوا من الكلام ده حاجة غير القرف ..

وبعدين نصيحة تانية يابن خالتي
حاول تبقي تقلل البوست شوية ..الناس بتزهق تقرا كل الكلام ده ..لخص الموضوع شوية ..فخير الكلام ماقل ودل..مبقولكش اكتب سطرين لألألأ ..بس خليك وسط يعني..!

واشكرك على البوست

وربنا يهد الأهلي والزمالك عشان ترتاح

سلام

youssif يقول...

ههههههههههههههههههههههههههه

يخرب عقلك ...

انا زملكاوي اه ...
و لما تشتم الحكومة و الريس انا في ظهرك و معاك اه ...

لكن لما تهاجم الأهلي اسمحلي انسحب ... علي كمية الطوفان و الهجوم إللي بتشوفه و إللي كان حيخليك تعتزل التدوين قبل كدة ...

الزمالك علي طول بيتظلم اه ...

بس عايز الحق ...

بص للأندية التانية بقا ...

حتلاقيهم بيتظلموا ظلم الأبل ...

اكثر من الزمالك الزمالك واخد واضعه شوية بين بقية الفرق ...

شوف الأسماعيلي ... شوف الأتحاد ... شوف و شوف و شوف و حوادث كثيييييييييير ...

و مع ذلك تصدق ان في لسة اهلاوية مقتنعين فعلا مش بيستهبلوا انهم مظلومين و ان الدنيا كلها متكالبة عليهم ...

اه والله

الشعب لابد له من حكومه تشكمه يقول...

#""#بصة سيد معوض لاعب الاهلى لحازم امام لاعب الزمالك لما عمل معاه فاول ووقعه ع الارض هى بالظبط بصة باشا اقطاعى لفلاح حقير بيشتغل عنده بالاجرة هو وبقية عيلته طول السنة ويدووووب فى الاخر بيللبسوا بالعافية وياكلوا اى حاجة ويتغطوا بشوالين من اللى بيعبوا فيهم القطن وكان ناقص ان حد يناول سيد معوض كرباج عشان يقوم يضرب بيه المجرم الفاجر اللى وقعه ع الارض عشان المشهد يكمل زى ماهو فى الافلام الابيض والاسود القديمة.##


ايه مسلسل الوسيه ده هههههههههههههه بس ضحكت مووووت,,
ياعينى صوعبت عليا,, الزملكاويه خلاص بينهاروا بس عادى انا سمعت انكو ممكن تتعالجوا..

ياحرااام مظلومين ومضطهدين,,والناس كلها واخده منكو موقف:)

سيبك انت شوفت ماتش العيد:) والاعيبه تعاااااااااايط وانا ااااااااااضحك,

متزعلش خلاص ,اهو كسبتو 3 اخر مره اوعى تتأثر عادى هتكسبوا بنى عبيد متقلقش,خلى انت بس عندك امل.

بيبو وبشير,بيبو وبشير,بيبو والجووون:))

بالمناسبه بيقولك واحد زملكاوى عينه احمرت من كتر العياط,فقعها وقلها حتى انتى كمان عليا:))

ياعينى الاهلى عقدكو:) ياحييييينى

حلم بيعافر يقول...

قلم رصاص

ياجدع انت متغيرش الموضوع

انا كل الحكاية بقولكم اتعلموا تكسبووا بشرف ومتفرحوش بالظلم وانتهت الليلة كلها على كده وكل اللك والكلام بتاعى بيدور حوالين كده متقولش بقى خيبة وبتاع وبعدين انا مكتبتش عن الكورة هنا قبل كده تقريبا تبقى بقى موصلالنى لحد فين؟!!!!!!!!!!!!!!!!!!!!!!!!!!!
وربنا يهد الاهلى والزمالك زى مابتقول يااما يبقى فيه عدل اصل الظلم وحش يابن خالتى حتى لو كان فى دور طاولة ع القهوة
نورتنى

حلم بيعافر يقول...

youssif

اهلا اهلا بالناس اللى تبعنا ومقدرة موقفنا ومعانتنا المستمرة
وميبقاش عندك امل ن يجى للاهلاوية يوم ويغيرووا وجهة نظرهم او فكرتهم عن الكورة
وبعدين انا والله لابتكلم تعصبا للزمالك ولاحاجة انا عندى ملاحظات على حاجة تاعبانى وطبعى كده اعمل ايه محبش الظلم ياناس يبقى كفرت؟!!!!
نورت ياجو

حلم بيعافر يقول...

الشعب لابد له من حكومة تشكمه
ياساااااااااتر يارب ماتسيبونا نبعبع شوية!!!انا بزعل ع الظلم مش على خسارة فريق بشجعه وقلت فى البوست اتحنا اصلا اتعودنا ع الهزيمة بس لما نتغلب ياريت نتغلب بس مش نتغلب وتتمسح بينا الارض ظلم وافتراء عشان الاهلاوية يتبسطوا
بس
اتعلموا تكسبوا بشرف بقى تعبتونا والله
طول عمركواا بتفرحوا بجون اوفسيد وضربة جزاء تمثيل وبتحللوا حاجت محرمة على غيركوا
حسام حسن حسام حسن حسااااااااااام حسن يخرب عقلك يامجرم !!!عملت ايه فى الحضرى يابنى؟!!!
مرة واحد اهلاوى.....اخىىى ملكوش نكت اصلا
نورتى

اللى موش عارف يتغير يقول...

حتى الكلام بتوع الاهلى بيستخسره فينا
منهم لله الاهلاوية
مفترين
المصيبة ماهما تحكى
فى الفاضى
مصايبهم وكضلالهم كتر
وزااااااااااااااااااااااد
.

صفــــــاء يقول...

بصراحه الزمالك يستاهل فعلا ان الفريق كله ينضرب بالكرباج على القرف اللى هو وصل له دة
بصرف النظر طبعا عن ان الاهلى بقى من المعصومين

7annen يقول...

بتتكلم فى ايه
على فكره انا اهلاوووووويه جدا جدا
وبصراحه الزمالك يستاهل

ليس فقيرا من يحب يقول...

ياعينى عليكو يا زملكاويه

ههههههههههههههههههههههههه

معلش يا اخويا زيح من على قلبك

سامحنى على التقصير معاك

اسفون

وردشان smilyrose يقول...

السلام عليكم

كيفك يا محمد

يابنى كبر دماغك بقى

كورة ايه اللى هتعمل فيك كدا

وبعدين زملكاوى زملكاوى


محسسنى انها وصمة عار

من غير زعل اتعودت انى اشجع اللعبه

الجميله وربنا يهدى الجميع

حلم بيعافر يقول...

اللى موش عارف يتغير

شوفت ياعم؟!

نعمل ايه طيب؟!

لاكده عاجب ولا كده عاجب

منورنى ياحج

حلم بيعافر يقول...

صفاء

الفريق زفت وطين بس بيتظلم كتير اوى

وبعدين المصرى اللى على حق يقول للظلم لاء

ان شاءالله ظلم فى لعبة استغماية بين عيال صغيرين لان الظلم ظلم

منورة

حلم بيعافر يقول...

حنين

جاسوووووووووووووس

ههههه منورة بصرف النظر عن يستاهل ولا ميستاهلش الظلم وحش

منورة

حلم بيعافر يقول...

ليس فقيرا من يحب

الظلم وحش يارانيا ياختى ولو ماستملتونيش وانا بزيح الغلب ده مين هيستحملنى؟

هههه نورتينىومتبقيش تغيبى علينا كده

حلم بيعافر يقول...

وردشان

الحمدلله وربنا يخليكى
بس
والله المسالة ماهى كورة بس

منورة

Foxology يقول...

يا سيد الفاضل كلنا هذا الرجل الزملكاوى :)))

هانت اوى على فكرة اصبر انت واتفرج

تحياتى

حلم بيعافر يقول...

foxology

ههههههه ايه ياعم؟

مين الراجل ده؟

منور