الأربعاء، 20 يناير 2010

الدنيا مصالح

حقيقة أدركها الاسطى سيد السواق اللى بيسمع العنب العنب وبياكل سندوتشات الفول بتاعة ام كريم اللى مليانة طماطم حمضانة وأدركها كمان حازم ابونضارة بتاع بيتهوفن وبحيرة البجع اللى مصدعنى بالكلاسيكيات فى الشغل.اجتمع الناس على اختلاف اديانهم وثقافاتهم ومستوياتهم الفكرية على ان الدنيا مصالح وبدت الحقيقة دى كانها كتاب مقدس لكل الناس محدش بيغيرها وكل واحد حافظها على طريقته الخاصة فمثلا الاسطى سيد كتبها على العربية بتاعته وحازم كلاسيكيات بلاقيها بتنط من تحت النضارة كل ماينطق بكلمة.

تبيع امك ولا تبيع صاحبك؟
.........................

فى اوقات كتيرة جدا ممكن البنى أدم يتفرس ويموت من الغيظ وهو بيتابع مشكلة معينة فارضة نفسها ع الساحة وطافية على كل ماهو غيرها وقد يكون حلها بسيط جدا ولكنها لا تحل ولا توجد نية لحلها لان اغلب اطراف الصراع فى المشكلة دى دى بيكونوا مستفيدين على حساب طرف معين فالبتالى بيبقى الوضع على ماهو عليه لانه بيحقق مكاسب للى فى ايديهم الحل ...طب يحلوها ليه؟!!!

على سبيل المثال الحصار الاسرائيلى الامريكى المصرى الحمساوى الفتحاوى الاوربى لشعب غزة يحمل على مرارته للغزاويين مصالح لكل المحاصرين اللى ايديهم كلهم مغسولة فى دم اهالى غزة سواء حماس ولا فتح ولا النظام المصرى ولا اوربا وامريكا فلا يخفى على احد كم الاموال التى دخلت جيوب قادة حماس خلال هذا الحصار ولايخفى على احد تاييد النظام المصرى حتى ولو فى الخفاء لحصار منطقة تسيطر عليها حماس ولايخفى على احد تاييد فتح للقضاء نهائيا على حماس حتى ولو كان الثمن هو تحويل غزة لكومة من التراب ولا يخفى على احد تاييد الاوربيين الاعمى لاسرائيل للتخلص من عقدة الذنب تجاه اليهود ولايخفى على احد هوس امريكا بالقضاء على كل ماهو اسلامى ويملك السلاح حتى ولو كان هذا السلاح لعب اطفال وقد تزيد مصلحة طرف باخراج طرف مستفيد اخر من دائرة المنتفعين بالحصار بتغيير او باحكام الحصار باى شكل .


أمريكا الهة الحرية فى العصر الحديث مبتريحش نفسها ابدا وتهمهما جميع الشعوب على وحه الارض ودايما تلاقيها حاشرة نفسها فى حتت مالهاش لازمة بداعى حقوق الانسان والحريات امريكا اللى بتنتقد اى خرق لانسانية البشر والمخلص الاول للشعوب وللغلابة بتساند وبتدعم انظمة اقل ماتوصف به انها مستبدة ومجرمة وخارقة لاى عرف لان الدنيا مصالح وامريكا يهمها بقاء انظمة الحكم الفاسدة دى بالرغم من استبدادها وظلمها وقمعها لشعوبها لان بديلها مش هيسمع الكلام وهيتعبها ويلخبط مصالحها.

الشو بتاع جالاوى وقافلته اللى اتعمل ولبسته مصر واعلامها الرسمى فى الفترة الاخيرة طبعا لم يخلو من الترويج لوجود ضمائر مازالت تعمل ولم يصبها العطب داخل اوربا ومجالسها التشريعية كان مؤثر جدا ومجدى جدا ولبس الاعلام المصرى ووزارة الخارجية العمة وهما اخدوا مصلحتهم.

الدنيا مصالح وفى الدنيا الانسان بيغير مبادئه اكتر من مرة بتغير الظروف حواليه وبتغير ظروفه هو شخصيا ورحم الله كل من كان قدوة ومصدر فخر لنا قبل ارتطامه بالمنصب والكرسى وبعتبة الباب العالى لكن فى وسط كل ده فيه طرف مبيدورش على مصلحته ولا معتبر اصلا انها مصلحته ومكتفى بانه يعيش طول عمره مطحون منهوب مغلوب على امره وبدا يغطى عجزه وكسله بغطاء دينى بيسميه الرضا واصبحت المشاركة فى صنع مسقبله شىء تافه ومفيش له وقت فى الجدول المزحوم باهتمامات كبيرة تانية والغريبة ان الاهتمامات دى تحت بند النيا مصالح برضه!!!

تنقية جداول الانتخابات ولجانها خاوية على عروشها وتحس كانها خاصة بدولة بنجلادجيش بس على اراضى مصرية والكل مجتمع وملتف حوالين حسن شحاته ودولا حبيبى ويحيى الكومى وكأن الهوا اللى بتنفسه فيه حشيش سطل البلد كلها ووجهها للغرق فى دوامات معينة وقد يكون من فوائد الحشيش ده انه لو مش موجود كنا اتشلينا من زمان...افتك من الحشيش فيه حاجحات تانية موجودة عندنا وبتصيب بسطل اشد من سطل الحشيش انا عن نفسى شفت ناس فى انتخابات مجلس الشعب اللى فاتت سابوا دايرتهم وراحوا صوتوا فى دايرة فى بورسعيد مع انهم مش عايشين هناك ولا ليهم اى مصلحة هناك اللهم الا ان المرشح اللى صوتوله اصله من بلدهم ويبقى قريبهم وطبعا بقدرة قادر اسمائهم كانت فى دايرتين فى وقت واحد وزى مالناس اتسطلت جداول الانتخابات كانت متضامنة معاهم وشاربة من نفس نوع الحشيش.

يابنى انا عارف مصلحتك اكتر منك هو انت لسه روحت ولا جيت عشان تعرف قدى؟!!!...ده كلام كل اب لابنه ودى اول خطوة لنسخ الفرد بالكربون داخل الاسرة كما يريد الاب وده برضه كلام الحاكم لشعبه عندنا فى بلادنا العربية. اولويات الفرد فى الحياة بتحدد قدره وموقعه بين الناس واولويات الشعوب بتحدد مستواه المعيشى ووضعه بين شعوب العالم ومينفعش تبقى الاولوية لسندوتش فول او لرغيف عيش على حساب مستقبل جيل باكمله وزى مابنلعن الجيل اللى قبلنا هيجى جيل بعدنا ويلعننا احنا الاتنين لان الدنيا مصالح واحنا مصالحنا كانت حقيرة اوى ومفيش حد العصبية والاكل والجنس بتبقى اولوياته ووربنا بيكرمه...قوم يابنى انت وهو شوفوا مصالحكم بقى.

تبيع امك ولا تبيع صاحبك؟
انصحك تدور على مشترى للاتنين

هناك 22 تعليقًا:

مصري جدا يقول...

الدنيا مصالح..........حكومية

ظل السماء يقول...

السلامُ عليكُم

نورت المُدونة :)

فعلاً الدُنيا مصالح و الناس أصبحت عبارة عن:Objcets بس! بنتعامل مع بعض على حسب الموضوع اللي إحنا بدنا اياه و بنخطط لُه و على حسب الوقت المُناسب (إلنا) و نسبة الربح اللي هنحصل عليها... مش ضروري ربح مادي دايماً, يمكن يكون معنوي في أغلب الأحيان بس كُله إسمو بحثاً عن الربح.. و الدُنيا مصالح يا باشا!!!

"تبيع أُمك و الا صاحبك?"
لأ مش راح ابيع اي حد عشان البيع (مش من مصلحتي)!!!
أنا اشتري بس عشان هكسب كيتييييير معنوياً و مادياً كمان
كُلنا مصالح!

وحتى الناس اللي بتقوللك: أنا راضي بنصيبي من الدُنيا و ما بدي أي شيء بتكون فعلاً زي ما انت قُلت "تحت بند الدُنيا مصالح برضو"! عشان مصلحتُهم إنهُم مش يرضوا.. لأ, مصلحتهُم يسكتوا.. عشان يا إما أومورهُم ماشية من الناس اللي فوق!! أوووو, إنُهُم فعلاً راضيين بقدر ربنا و مُسللمين ليه و دول قُليلييييين أوي في الدُنيا دي!

عجبني كتيييير ترتيب الأفكار و النقاط اللي في البوست و الكلام جاي مُتسلسللللل و حلو :)
تسلم إيدك يا أُستاذ تميمي :)

سلامي..

Mr.Hazem يقول...

بصراحه كله مصالح بمصالح
تلاقي دولة معينة بتدعم دولة معينة دائماً بالمال والمعونات يعني هو هادا محبة بالدولة هادي ,, ؟
لا طبعاً مصالح بمصالح
وغير هيك اصلا بقت الان الدول العظمى تتدخل بشئون الدول الداخلية بحجة مكافحة الارهاب , ولكن من خلف الستار تجدها مصالح بمصالح ..
الحكومة اوقات الانتخابات بتظهر للشعب انه هو همها الاساسي وانه الحكومه بتبحث عن مصلحته , وبعد الانتخابات طبعاً كلنا نشتاق للمرشحين لنشوفهم مرة تانية
مصالح بمصالح

فتاه من الصعيد يقول...

انا موش معترضه ان كل واحد يشوف مصلحته ... بس موش على حساب غيره

انت حر ما لم تضر

كلامك جميل ويمس اوضاع اجتماعيه وسياسيه غلط كتير

تحياتي

donya يقول...

مساء الخير

ايه البوست ده
جاااامد

انا راجعه من الاجازه
علي كل ده

طارت الانتخه بتاعت الاجازه

انت حللت صح

لكن في نقطه عايزه اقولها لو سمحت لي

اليهود شطار
ليه بقه ياام العريف دنيا

علشان عملوا من الحبه قبه ولفوا علي العالم يعرضوا قضيتهم ويصوتوا ويولولو
ولما العالم حس نحيتهم بالذني عملوا كل حاجه وحشيه بمساندت الناس دول

عملنا احنا ايه
حماس وفتح فرجوا علينا العالم
ودبحوا في بعض
وخانوا القضيه قبل مايخونوا نفسهم

مش هقول غير حسبي الله ونعم الوكيل

باي

قلم رصاص يقول...

الدنيا مصالح .. ولست معترض .. ولكن حريتك في تحديد مصلحتك تبدأ وتنتهي بإحترامك لحرية غيرك

بوست جميييييييييييل جدا يامحمد

وقولي انت غايب فين يابني المدة دي كلها

المهم تكون بخير

في حفظ الله

youssif يقول...

هو تعريف لذيذ ,,,

الدنيا مصالح و احنا اتعلمنا مندورش علي مصلحتنا ابدا ...

و حصرنا مصلحتنا في الأكل و الجواز ...

في النهاية شعب 80 مليون نسمة ...

اكيد هو إللي عمل و بيعمل و حيعمل في نفسه اكثر من كدة

راجية الرحمه يقول...

تبيع امك ولا تبيع صاحبك؟
انصحك تدور على مشترى للاتنين


طيب وهو فى مشترى ده
اقصد يعنى طبعا حتى لو لقيت المشترى مينفعش ابيع دى حتى تبقى قله اصل


والله فعلا اللى خارب البلد دى هى المصالح
كلمه قالها جمال عبد الناصر من ملك قوته ملك قراره

أحمد الصعيدي يقول...

السلام عليكم ورحمة الله

أشكر لك أخي العزيز حضورك ولا أرانا الله مكروها في عزيز لديكم

صفــــــاء يقول...

طيب هنستنى شويه قبل ما ندور على مشترى

النسخ الكربونيه هى حال شعب كامل
الأفراد مستنسخين من بعض
والحكام والسادة برضه مستنسخين لكن من طينه تانيه

ريمان يقول...

فعلا الدنيا مصالح


تحياتى لصراحتك

حلم بيعافر يقول...

مصرى جدا

مصالح حكومية مصالح بتنجانية

اهى مصالح وخلاص

نورت يا معلم

حلم بيعافر يقول...

طبعا نورتى المدونة

شكرا يااستاذة رنا

حلم بيعافر يقول...

حازم

فعلا بقت حاجة بايخة اوى

نورت يامعلم

حلم بيعافر يقول...

فتاة من الصعيد

انا حر اذا لم يعترض المتضرر

نورتى

حلم بيعافر يقول...

دنيا

يااااااابختك نفسى اقعدلى اسبوعين تلاتة مانتخخخخخخخخخ

نورتى

حلم بيعافر يقول...

قلم رصاص

ومين اللى هيحترم ده؟

الزمن اتغير يا هندزة

نورت

حلم بيعافر يقول...

يوسف

اى خدمة انا بعرف الحاجت بلذاة اهوه

يكون يتمر ومتغيبش كتير

نورت

حلم بيعافر يقول...

راجية الرحمة


الزمن اتغير


نورتى

حلم بيعافر يقول...

احمد الصعيدى

لاشكر على واجب ياريس

نورت

حلم بيعافر يقول...

صفاء

النسخ مستمر لحين اشعار اخر

نورتى

حلم بيعافر يقول...

ريمان

اااااه يانى ياصريح


نورتينى