الأربعاء، 27 يناير، 2010

أنت قلبك قاسى أوى أوى...




الله يرحمه السادات قبل ماربنا يكرمه كان بيلطش فى كل اللى حواليه وكأنه ياكبدى كان عارف انه هيتكل قريب فبدأ يفترى عشان يخرج كل اللى جواه على قد مايقدر بحيث نفضل نفكتره على طوووول واوقات كانت الضحية بتاعته غلبانة وملهاش ذنب وأوقات كانت تستاهل كل اللى يجرالها وأوقات كان الرئيس السادات عصبى جدا وكان بيقول حاجات زى(أهو مرمى فى السجن زى الكلب).

أنا بكره اسرائيل وبحب حسنى مبارك وأى واحد لسه فى مكانه ولسه لازق فى الكرسى بتاعه واللى يموت أو يسيب مكانه بقى هو حر لأنى ماقلتلوش موت أو سيب مكانك وبحب الناس المفتريين أو زى ماتقولوا كده بتكيف بالحاجات اللى بيعملوها فى الناس الغلابة -اللى لسه ماتعلموش الافترى- سواء غرقوهم فى عبارة أو سمموهم بمبيدات مسرطنة أو صرفوا الكاكا بتاعتهم فى الميه اللى بيشربوا منها أو حتى ولعوا فيهم لأن ببساطة الافترى ده حاجة حلوة وجميلة جدا ياريت كلنا نجربها واهو طباخ السم بيدوقه برضه.

بس فيه سؤال بيطرح نفسه فى وسط تمنياتى بانى اكون مسئول محترم_أسف اقصد مسئول مفترى-وهو فى الحقيقة سؤال جرىء من شاب موالى ومهادن ومدعم لكل من هو فى سلطة-بضم السين بعيدا عن سلطة المطبخ-والسؤال هو (علل )-المسئول فى مصر بيبدأ يفترى بعد ما يتودك أو بعد فترة مش قليلة ع الكرسى بتاعه .
كل واحد يبص فى ورقته...

اللى كان يبص من خمس سنين على منتخب الكورة بتاع مصر كان هيلاقى انه فريق سهل جدا يتغلب وسهل جدا يخسر أى بطولة يدخل فيها قبل ما تبدأ وسهل جدا ييأس ويصاب بالاحباط لمجرد مرور شبح الكاميرون أو تونس أو اى فرقة فيها ريحة الكورة قدامه أو فى طريقه ودللوقتى سبحاااااااان الله هو اللى بقى يسبب الاحباط لكل الناس...عن نفسى هارجع الفضل الأول للجهاز الفنى اللى اخد الفريق وهو ملطشة للكل وخلاه يديهم فوق دماغهم كلهم_على فكرة ده كان حلمى وانا صغير _ وكله ضرب ضرب وكل مانقول حيهبط اهوه نلاقيه مبيهبطش.

أبوكريم -كريم مهم جد على فكرةا-الشهير بحسن شحاتة الرجل الاول فى منتخب مصر والعقل المدبر المتودك الفاهم الراسى المفترى اللى بقى له حوالى 5 سنين فى منصب المدير الفنى لمنتخب مصر الاول كان قبل ما يدرب المنتخب بيدرب فريق اسمه المقاولين وصعد بيه من الدرجة التانية وغلب الاهلى والزمالك والاسماعيلى وكان احمد حسام ميدو فى الوقت ده نجم كل اوربا بتتكلم عنه لكن (تلك الأيام نداولها) ومفيش مانع طالما ربنا ادى لحد انه يدوس ع الباقى برجليه حتى لو كان لسه طالع م الحمام مفيش مشكلة طالما الكرسى لازق يبقى من حقك يامعلم.

النهاردة ماتش مصر والجزائر فى امم افريقيا اللى متوقع ان مصر هتفوز بيه وهتاخد البطولة عافية وفردة وحظ واللى يراجع اجواننا كلها هيشوف انها اجوان غريبة وفيها 3 زووور وميقلش عن 5 حظ يعنى المخضرم المتمكن اللى ابو كريم هيشل مصر كلها بيه جايب جونين اوفسايد واحد فى نيجيريا وواحد فى موزمبيق والعميد الجديد جايب جون بظروفها وجون ماتعداش الخط من اساسه وجدو بيه اللى الكورة بتتباصى له من المدافعين فى الستة ياردة مقدرش اتكلم عليه طبعا ...م الاااااااااخر هنكسب الجزاير وكل المؤشرات بتقول كده احنا فريق حظنا حلو اوى بس لما نكسب معرفش حسن شحاتة هيعمل ايه لانه بدا فى طريق وحش ماشى فيه كل المسئولين فى مصر ولو هو ابن بلد صحيح يبطل عنجهية واستعباط وافترى على بعض اللاعبين واولهم وبالاسم احمد حسام ومش معنى انه كمدرب لمنتخب مصر وحقق بطولات والاعلام ساب اللى وراه واللى قدامه وسلط عليه الضوء يبقى من حقه يدور للناس كلها وشه ويعمل كاكا ده حتى عيب ومينفعش ويتنافى تماما مع اخلاق ولاد البلد بتوع روايات نجيب محفوظ.

ضمان الكرسى أو الخوف عليه خطر وفى الواقع الكرسى لعنة فى كل حالاته سواء ثابت أو مهزوز ومفيش حد فى الدنيا كلها كان بعد ما قعد على كرسى السلطة زى ما كان قبل ما يقعد عليه.الغريب فى بلدى هو السكوت ع الظلم والافترى وكأنه المظلوم المهضوم حقه اصبح راضى ومقتنع جدا بكل اللى هو فيه بصراحة ماشفتش أو سمعت أو قريت عن حاجة زى كده غير فى مصر بس ولو حصل وحد حب يتكلم ويفرغ شحنة الاحساس بالظلم والقهر اللى جواه بيفرغها بصورة زى الزفت او بشكل رخم زى البنت اللى كانت بتغنى (انت قلبك قاسى اوى اوى ...انت مش بتحب كده وكده).

هناك 18 تعليقًا:

د/عرفه يقول...

بالنسبة لكل المسئولين
طبعا لو كانت دامت لغيرك مكنتش وصلتلك

انا بعلقلك قبل ماتش الجزائر
بالنسبة لابو كريم
انا كنت فى قمة الحزن لما ساب ميدو فعلا كنت مضايق اوى

لكل برضه هو له الحق انه يختار اللى يقدر يسيطر عليه وينفذ اللى فى دماغه بغض النظر عن مستواه

وكلنا كنا منتظرين نحاسبه لكنه نجح وفاجىء الجميع


بالنسبة للاجوان عامل التوفيق والحظ وقف معانا ماشى بس برضه احنا مستوانا راقى وكسبنا الكاميرون رغم اننا كنا الاسوء لكنهم برضه مضيعوش فرص اكيدة
والكرة فيها كده
مكسب وخسارة وفيها توفيق

ويااااااااااارب نقدر نكسب الجزائر ربنا يستر
انا فعلا خايف

فتاه من الصعيد يقول...

ربنا يسهل ونكسب الجزاير

بالنسبه للسؤال ... اعتقد المسؤل بيلزق بعد فتره صغيره لاننا بنستورد افخر انواع الصمغ :)

بالنسبه لاحمد حسام ... طبعا كل الزمالكاويه زعلانين عليه :D

انا بقا موش عايزاه لا هو ولا متعب ولا زيدان في المنتخب ..... مالهمش لازمه

وعايزه جدو يروح الاهلي :)

تحياتي

صيدلانيه طالعه نازله يقول...

يا سيدى طول عمرنا مظلومين فى الكوره و بناخد على قفانا من الحكام
سيبنا مره نحس بالفرح و النصر حتى لو كان مشكوك فيه

بس حرام برضه جدو مفيش ماتش نزل فيه الا و غير النتيجه لصالحنا

و انا باضم صوتى لفتاه من الصعيد و باطلب من الاهلى انه يضمه لمنتخب الاهلى

ريمان يقول...

ههههههههههههههه


اسلوبك ضحكنى بجد


والله ما انا عارفه اقول ايه

بالنسبه للكرسى بقى

اللى بيقعد عليه ما بيصدق واول حاجه بيفكر فيها انه يفترى

ويفترى للابد


مش بعد مده معينه ولا حاجه هو افترى على طوووووووووول

7annen يقول...

بما انى عود من تانى بعد الامتحانات

مبروووووووك لمصر

مجرد حلم... صغنتوت يقول...

اللي بيلزق في الكرسي بس بيعمل اللي عليه يا رب يفضل لازق فيه على طول
يعني مثلا حسن شحاته... ربنا يحميه يا رب.. انجازه ما شاء الله محدش يقدر يتكلم عنه.. واحد زي ده يا ريت يفضل ماسك المنتخب على طول
يعني هم سابو كل المناصب اللي في البلد ومسكو في حسن شحاته انه كده طول والمفروض يمشي؟؟ حاجة غريبة والله

بجد ألف مبروووووووووك لمصر وعقبال النهائي يا رب يا رب
تسلم ايدك على البوست الجامد :)

ليس فقيرا من يحب يقول...

يا سلام عليك

ما تسيب الناس فى حالها يا جدع

مالك انت ومال اللى لزقوا بغرا على الكراسى

حاجه عجيبه

مبرووووووووووووووووووووووووووووك

كسبنا الجزاير 4 لصفر كبييييييييير

قلم رصاص يقول...

ايه الحقد داااااا
مليتوا البلددددد

الكرسي ياعزيزي أصبح محمول .. يعني المسئول من دول هيفضل ملازمه طول حياته طالما عنده شبكة كويسه وقوية .. طبعا انا باقصد شبكة علاقات تضمن له الاحتفاظ بالكرسي ..

متفهمنيش صح ههههههه

والافترا فعلا جميييييييل جدا

انت عرفتها دي لوحدك؟
ما انت شاطر اهه

والف مبرووووووووك للفراعنه

وحسن مزهزه معاه

وبعدين انت زعلان انه مخادش ميدو
اهو زملكاوي شبهك ابعت له لووووووومه وعرفه انه كده غلط
ههههههههههههه

سلام

حلم بيعافر يقول...

دكتور عرفة

ابقى اسمع الكلام يا دكتووووووور

قلنا هنكسب كتير وكسبنا زى ماقلنا

وهناخد البطولة يوم الاحد

نورتنى

حلم بيعافر يقول...

فتاة من الصعيد

هههههههه ادينا كسبنا


وجدو هيروح المنتخب متخافيش

ههههههه قصدى الاهلى

نورتى

حلم بيعافر يقول...

صيدلانية طالعة نازلة

يعنى الموضوع تخليص حق ولا ايه؟

ههههههه وجدو هيروح متخافيش


نورتينى

حلم بيعافر يقول...

ريمان

الافترى ده شىء جميل

جربى انت بس


نورتينى

حلم بيعافر يقول...

حنين


عود حمييييييد

حمدالله ع السلامة ونورتينى

حلم بيعافر يقول...

مجرد حلم

ياستى ربنا يحميه ماقلناش حاجة

نورتى

حلم بيعافر يقول...

ليس فقيرا من يحب

ههههههههه والله سايبهم هما اللى مش راضيين يسيبونى

نورتينى

حلم بيعافر يقول...

قلم رصاص


يامفترى ههههههههههه

اصلى جربته

نورت يابن خالتى

غير معرف يقول...

اسلوب رخم ومستفز وبتفكرنى ببرامج التوك شو اللى مش عجبها العجب وبتنقد لمجرد النقد....

حلم بيعافر يقول...

غير معروف

انت حر فى رايك

بس مقولتش انا انتقدت اي لمجرد النقد؟