السبت، 30 يناير 2010

بيدى لا بيد جدو...



بكرة ان شاء الله مصر هتكسب وهتاخد كاس الامم الافريقية لسابع مرة فى تاريخها وسيناريو الماتش هيبقى زى سيناريوهات ماتشات الزمالك ايام محمود محمود ومحمد صديق وعبدالمنصف يعنى لو احنا لو ماجيبناش جون فى اول نص ساعة هنلاقى مدافعين غانا بيلفوا ويحطوا الجون فى نفسهم ماهو اصله كده كده جاى جاى يبقى بايديهم لا بيد جدو أو أحمد حسن.

الله يرحمك يا محمد ياعبدالوهاب لو كنت لسه موجود كان زمانك الباك الشمال زى ماعماد متعب لسه مهاجم منتخب مصر الاول اصل ابوكريم دماغة ناشفة اوى ولما بيصمم على حد مبيغروش الا اذا مات او اتعور او اتنقور عليه وقال عليه بيهرج تصدق يا عبدالوهاب ان ابوتريكة واحمد حسن وعماد متعب كانوا متكسحين فى ام درمان وبرضه ابو كريم اصر عليهم ونزلهم على حساب الناس الجاهزة والسليمة؟!

بما انى ليا جد من اصل تونسى فبارشا بارشا زيدان رجله طرشة ورغم كل حاجة احنا كنا الافضل فى البطولة حتى لو الحظ وقف معانا بطريقة غريبة وتثير استفسارات كتيرة اولها ابطال افريقيا الشداد الجامدين اللى واخدين البطولة 3 مرات ورا بعض واحتفظوا بالكاس للابد مبيحترفوش بره لييييييييييه؟!.....ولا الحكاية دى ممكن تبوظ الخلطة؟

عقب انتهاء المباراة وفى الفترة اللى قبل تسليم الكاس هيقول احمد حسن الكلمتين بتوعه اللى هما هيبقوا بعصبية واللى هيرد فيهم على كل المشككين واللى حيهدى من خلالهم الكاس للشعب المصرى ولحسنى مبارك راعى الرياضة والرياضيين وشوشو هيجيب اللعيبة اللى تبعه فى المنتخب وياخدهم شوية ع الهوا فى البرنامج بتاعه مع ضحكته الصفرة وطبعا علاء صادق واستوديوهاته والعربى المكسر بتاعه وقراءته اللى تفطس من الضحك لبعض عنواين الصحف الرياضية العالمية هيبقوا حاضريييييييين وموجودين وباقى العباقرة طبعا مش هيفوتوا الفرصة وبلاعاتهم_اسف برامجهم-مش هتتسد.

الاحتفالات هتملى الشوارع بالشكل الهيستيرى المعهود عند كل فوز للاهلى او لمنتخب مصر وهنشوف اللى بنشوفه كل مرة وشوية ونفوق على كيلو السكر ابو خمسة جنيه والميه اللى بتجيب ..........تجيب اللى تجيبه بقى انا مالى ؟!وتحية للزعيم العايش محمد حسنى مبارك راعى الشباب واللى جابوهم.

هناك 22 تعليقًا:

بنجاواتى يقول...

انت لسه فاكر محمود محمود اللى بيدلعوه بشعبان محمود؟؟؟؟ يا قلبك البلاك هههههه

ان شاء الله نكسب غانا وبرجلين لعيبتنا الكبار ههههههههههه ونفرح شوية وخلاص يعنى هنعمل ايه ...هنموت نفسنا يعنى

يا رب أحمد حسن وهو بيقول الكلمتين بتوعه يكون لابس التى شرت رقم 172 هههههه

تحياتى

د. ياسر عمر عبد الفتاح يقول...

أنا معاك في كل ده
بس يارب يحصل بس وناخد الكاس


فيه نقطة بختلف معاك فيها بشدة شديدة
علاء صادق العربي بتاعه مش مكسر
علاء صادق العربي بتاعه أقوى من أقوى مذيع تاني .. ودي يمكن أحد مميزاته القليلة
كمان هوه بيتكلم أكثر من لغة بجانب إنه طبيب بشري

صيدلانيه طالعه نازله يقول...

بس نكسب و بعدين اللى عايز يتعصب و اللى عايز يتشنج و اللى عايز يهدى براحته

اه و اللى عايز ساعات الماظ و مظاريف فلوس الله يباركله يا معلم

مي يقول...

هههههههه
ناخد الكاس وعادى بقى خلى قلبك ابيض احنا بقينا مستسلمين ومتنحين السكر والماية وحاجات كتير فوق بعضها هتفضل زى ماهى
طب ليه بقى منفرحش لو لحظات فكرتنى هو كله ضرب ضرب مفيش شتيمة
بس تعالى هنا جد من اصل تونسى يابختك هههههههههههه

تحياتى يا ابو دماغ عالية(؛

فتاه من الصعيد يقول...

مصر موش هتكسب بكره ... انا عندي احساس بكده

واللي رايحين الناس هتتأكد ان وشهم فقري ع البلد

تحياتي

7annen يقول...

هههههههههههه
ادعى وقول ياااااااااااارب

قلم رصاص يقول...

ذكرت ان كل الدنيا بتكسب الا الزمالك
وشكلك عقلت وعرفت اللي فيها
ههههههههههههههههه

بإذن الله مصر هتكسب وهنعود بكأس مصر للأمم الإفريقية للأبددددددددددد

انا معاك فعلا في ان حسن شحاته مدرب بيتمسك بعناصر معينه حتى لو مكسحه من وجهة نظرنا كجمهور .. بس خليك جنتل مان واعرف انه هو المدير الفني ويعرف ظروفه وظروفه لاعيبته وجهازه الفني اكتر مني ومنك

سلام

صفــــــاء يقول...

خلينا فى الماتش طيب
وانسى كيلو السكر ابو 5 جنيه
احسن بصراحه الواحد مش متفائل وخصوصا بعد ما سافر ولادة الجوز يشوفو الماتش
بعد الماتش بقى نخلينا فى كيلو اللحمه اللى وصل 50 جنيه

م/ الحسيني لزومي يقول...

الكره افيون الشعوب...شعار الانظمة المستبده

قلم رصاص يقول...

لا بقىىىىىىىىىىى انا جي أقولك ياحبيبي:

برجل جدو ................!

تنكرررررررررررر؟

ألف مبرووووووك لمصر

حاول تفتكرنى يقول...

بعيدا عن الكورة

جدا وحشتني مدونتك

ولماضتك

تحياتي

حلم بيعافر يقول...

بنجاواتى

هما دول يتنسوا؟!

هههههههههه ياراجل دول هرونا اجوان فى نفسهم

كسبنا اهوه ياعم واحمد حسن قال اللى انت عايزه

اى خدمة

نورتنى

حلم بيعافر يقول...

دكتور ياسر

لاااااااء يادكتور ياسر

هو كده فعلا

ركز انت شوية بس

نورتنى

حلم بيعافر يقول...

صيدلانية

كسبنا اهوه

عشان تعرفى بس انى مكشوف عنى الغطا

والناس اللى بتملى كرشها من الحاجات دى هتملاا المرة دى برضه

منورة

حلم بيعافر يقول...

مى

تحبى اشوفلك واسطة عشان تاخدى الجنسية؟

ههههههه ياه ع الحقد

منورة

حلم بيعافر يقول...

فتاة من الصعيد

كسبنننننننننننا

بالعند فيهم

منورانى

حلم بيعافر يقول...

حنين

دعينا وكسبنا اهوه

منورة

حلم بيعافر يقول...

قلم رصاص

ايوه

ليه كده يعنى؟

اشمعنه احنااااااااااااااااا؟

منور

حلم بيعافر يقول...

صفاء

حلوة ولاده الجوز دى ههههههههه

منورة

بس كسبنا

حلم بيعافر يقول...

م- الحسينى لزومى


افيون ..كولا...بانجو

اهو كله سطل

نورتنا يا هندسة

حلم بيعافر يقول...

قلم رصاص


عشاااااااان تعرف انى مكشوف عنى الغطااااااا

نورت

حلم بيعافر يقول...

حاول تفتكرنى

بعيد عن اى حاجة سعيد بعودتك تااااااانى

نورتنا