الأربعاء، 3 فبراير، 2010

اوديك فين ياصحة؟

حتى هيو جكمان بيتفزنى عشان اضربه

اوديك فين ياصحة؟اوديك فيييييييييييييييين ياصحة؟...الظاهر كده والله أعلم ان اليوم ده مش هيعدى على خير ومحدش يحاول يهدينى لانى صاحى النهاردة عندى مخزون رهييييييييييب من الطاقة ومش عارف اوديه فين ولازم اى حد اعوره النهارده يراعى ويقدر ظروفى كويس اوى يعنى مثلا لو علمت لحد على وشه علامة عبارة عن حرف اكس او 111 ميزعلش ومياخدش على خاطره منى ويعرف انى كويس ومحترم بس الحكاية انى عندى طاقة كامنة عايزة تطلع...ولازم تطلع بصرف النظر بقى هتطلع فين او فى وش مين دى مسألة مزاج بقى.
محاذاة إلى الوسط
نصيحة لكل الناس اللى ممكن تجيلها افرازات الطاقة الكامنة دى زيى انها تنام لوحدها فى الليلة دى لان مش معقول اول ما هنضرب حد هنضرب اخونا او حد من العيلة ده حتى كده نبقى قلالاة الاصل جدا واعمل زيى وانزل ومارس يومك عادى وطظ بقى فى اللى هيتعور و هيتضرب عشان محدش قاله يجى قدامى فى اليوم ده وانا اصلا بحمل المسئولية لوزارة الزراعة ووزارة الرى ووزارة التموين واى وزارة بتتدخل فى الاكل اللى انا باكله عشان الاكل والميه هما سبب الطاقة الزايدة اللى عندى دى.

وانا من موقعى هنا بحذر وبكرر تحذيرى اكتر من مرة لاى حد بيضايقنى يعنى النهارده مش عايز انزل واركب توكتوك والاقى البنى ادم اللى سايق التوكتوك مشغللى مصطفى كامل او طارق الشيخ ومش عايز اركب اتوبيس والاقى السواق مشغللى العبد قال للشيطان ولا السيدة الفاضلة شفيقة -ياااااى بيئة-وكماااااان مش عايز اروح الشغل الاقى المدير الرخم بيقوللى متتاخرش تانى وعايز الاقى بنات حلوين فى الشغل ماهو مش معقول يعنى كل البنات اللى فى الشغل غفر ومش عايز اروح الاقى محمد عوض مستنينى عشان نفضل نتكلم فى الكورة ونفضل نعيط احنا الاتنين ونقول هو الزمالك هيكسب امتى؟ ومش عايز حد يسلم عليا ويبوسنى أنا مش ناقص تلزيق يا جدعاااان وبعدين انا مل بتجيلى لنفلونزا مناخيرى بتكبر وشكلى بيبقى وحش فمش ناقصة بقى ومش عايز وانا راجع والجو شبورة الاسطى يشغل شريط لحازم شومان وهو بيحكى قصة الواد اللى مات وهو بيمارس العادة -بيوعظنا يعنى-ومش عايز اروح الاقيهم فى البيت طابخين سمك مشوى ومش عايز افتح التلفزيون الاقى احمد شوبير ومش عايز لما ازهق واقلب فى التلفزيون واجيب قناة الناس الاقى محمد حسين يعقوب لسه بيعدل فى دقنه .

اللهم انى بلغت اللهم فاشهد انا مش مسئول عن اللى هيحصل.

هناك 32 تعليقًا:

ضكـــــتور جدا يقول...

ربنا يستر علينا

وعلى رأي واحد

صحة هبلة !

7annen يقول...

احم احم

طيب الحق اعلق واجرى انا من هنا
اقعد بالعافيه

ليس فقيرا من يحب يقول...

يادى النيله

مالك بتقول يا شر اشتر

كده ليه

خير يا جدع

اما انفد بجلدى هههههههههههههههه

مي يقول...

هههههههههه فيه ايه؟ ايه بقى انت هتتحول
الحقى يا اوشه اخويا بياكل صحابه
ههههههههههه رررووق ياعم انت اصلا مخنوق من نفسك نام احسن لكن انك تغير كل ده صعب اوووووووووى
الحق امشى بدل مالشبشب يتحدف عليا

قلم رصاص يقول...

هههههههههههههههههههه

يارررررررراجل قول كلام غير دا

كأن انت عندك طاقه زايدة ومش عارف توديها فييييييين؟!

طيب انا هقولك توديها فين .. تعالى عندي هشغلك في الجنينه بتاعتنا ..تعزق شوية .. وتسقي الشجر وترش الميه .. تنكر انك أكلت ياما من جوافتها ؟ تنكرررررررررر؟

هههههههههههههههه

وبعدين انت عرفت يعني ان الصحة تاج على رؤوس الأصحاء ؟ طب اعمل بها بقى ياخويا واحمد ربك وبلاش تتنطط .

اوعى تكون فاكر اني عشان اهلاوي ابقى بحب شوبير بتاعك دا ..لالالالالالالالا بالعكس دا انا مش بطييييقه ولابطيق شكله
اه والله هههههههههه

ب معجبنيش هبلك لما دخلت على اتنين انا باحترمهم اوي زي يعقوب وشومان ..

اللهي تلاقيهم طابخين سمك مشوي
هههههههههههههههههههههه

عديني عشان ورايا مشوار
ومتبوصليش كده عييييييييب
همد ايدي عليك هههههههههه

سلام

فتاه من الصعيد يقول...

ربنا يستر ومدش يزعلك

تحياتي

Sonnet يقول...

عزيزي..من المدونات العربية الثقافية اختارت مجلة التدوين العربي هذا الأسبوع مدونة شيء بقلبي. و هذا شرف كبير و يزدادا سرورنا بزيارتكم. المدونة الآن تحت الاستجواب الممتع من قبل المدونين العرب. هلا شاركتهم التقييم و الحوار الرائع.
http://arabicos.blogspot.com/2010/02/sonnet.html

حاول تفتكرنى يقول...

واضح انك بحثت عن كل الاحتمالات وقلت مش عايزها ، يعني هتضرب هتضرب

اشمعني عند شفيقة وقلت بيئة اوي ، انا من مستمعيها

عموما

ربنا يستر

تحياتي

لولا وزهراء يقول...

اول زياره هنا
الاقى الكلام كده ناشف شويه
واضح انك مخنوق من شوية حاجات مش حاجه واحده وبس
تقبل اطيب الامنيات بالسعاده

Foxology يقول...

معلش بكرة هتبقى كويس متقلقش والزمالك جاب جدو وهيبقى عال العال :)))

تحياتى

البيروني يقول...

ماشاء الله ما شاء الله , أخيرا لقيت حد عنده صحة , أعملك مركز توزيع و وزع عالشعب ده الناس مش لاقيه
و انا معاك في حكاية الاتوبيسات و التكاتك دي , و لازم يحطو الحاجات دي ضمن اسباب التلوث السمعي
تقبل مروري

حلم بيعافر يقول...

ضكتور جدا

ياااااااارب

انتو وديتونى فى داهية

نورت

حلم بيعافر يقول...

حنين

ايوه هو ده الصح
اجرى بسرعة

حلم بيعافر يقول...

ليس فقيرا من يحب

الجرى نص الجدعنة

حلم بيعافر يقول...

مى

اجرى من هنا يا مييييييييييى احسن لك

حلم بيعافر يقول...

قلم رصاص

دان قلبك اسود اوى

لسه فاكر الجوافة وعايز تدفعنى تمنها شغل؟


اعوووووووذ بالله

هههههههه طب مش دافع

حلم بيعافر يقول...

فتاة من الصعيد

محدش يقدر

نورتى

حلم بيعافر يقول...

دكتورة سونيت

روحنا وشاركنا ومتابعين ومستمتعين بيكى بجد

حلم بيعافر يقول...

حاول تفتكرنى

لاء انت معاك حصانة ومش فى الليلة دى

انا عايز حد مالوش لازمة افترى عليه

نورتنا

حلم بيعافر يقول...

لولا وزهراء


ثانيكييييييو

حلم بيعافر يقول...

فوكسولجى

يعنى هو لسه جه؟

متقاطعش بقى

حلم بيعافر يقول...

البيرونى

حظك كده بقى التوبيك كله ضرب

فتاه من الصعيد يقول...

طيب :)

حـــلـــم كــــان يقول...

ايه عام انت داخل فينا شمال كده ليه

براحه ياعم شويه

وان شاء الله اول توكتوك هتشوفه هتلاقى السواق بتاعه مصطفى كامل مش شغال فيه وبس

اللى موش عارف يتغير يقول...

عندك بتوع الطوابرة
روح اقف عالكوبرى هناك ونادى باعلى صوتك
وقول حد له شوق فى حاجة ؟
هتلاقى مكان تودى فيه صحتك
هههههههههههه

MaNoOoSh يقول...

بتجيلى الحالة دي أحيانا


بس ساعتها انا اللى بشغل أغاني هابطة
وأغني بصوت عالى واستمتع جدا بتعذيب اللى فى البيت بصوتي
هع هع هع

حلم بيعافر يقول...

فتاة من الصعيد

طيب الله عليكى

ههههههههه شكلك زعلتى

متزعليش لان مفيش حد يقدر بجد

حلم بيعافر يقول...

حلم كان

انااااا مفتررررررررررى

ادعوا عليا

المدونة نورت

حلم بيعافر يقول...

اللى موش عارف يتغير

بتوع الطوابرة؟

لاء ياعم الطيب احسن والعمر مش بعزقة برضه

وبعدين يابنى ابعد عنى انا افحل منك


انت حر

كل سنة وانت طيب ياحج بمناسبة عيد الحب هههههههههه

حلم بيعافر يقول...

منوووووش

جميل جدا تعذيب الناس والاستمتاع بالتعذيب ده

شكلكم هتنضمى معانا لجمعية المفتريين الجدد

نورتنى

بقايا انسانه يقول...

هههههههههههههههههههههههه

انا بجري من ادامك اهوة

انا ماشيه

ماشيه

مستخلص افندى. يقول...

وديشها النادى شويه :D