السبت، 13 فبراير 2010

الضرب فى الميت...



فيه حاجات العقل البشرى بيتوقف عندها وبيقفل عليها جواه بالضبة والمفتاح ومبيكونش فيه استعداد لتغييرها ومش شرط الحاجات اللى اتقفل عليها دى تبقى صح زى مثلا ضرر الشاى بعد الاكل عندنا فى مصر كله عارف ان الشاى مضر ومتاكد من كده مهما حصل من دراسات وبحوث بتثبت العكس حاجة كده زى هذا ما وجدنا عليه اباءنا واجدادنا ايام ابو لهب وابو جهل والشلة الجميلة دى يعنى مثلا خد عندك... جمال حمزة هو اللاعب الزنديق الكافر اللى بيمثل وياخد ضربات جزاء زور مع ان ابو تريكة استاذ ورئيس قسم فى دروس الغطس...وغيير كده حاجات تانية كتيرة اوى يااما اتولدنا بيها بالوراثة من بيئتنا يااما احنا اللى كوناها وقفلنا عليها.

انا مش حريف فى الكورة بس اهوه بلعب على قدى وزمااااان اللى كان بيختارنى فى فريقه كان بيختارنى كحجة يتحجج بيها لو اتغلب... ومين فينا مش بيدور على كبش فدا او شماعه يعلق عليها خيبته ؟!

الضرب فى الميت محرم فى المثل الشعبى عندنا لكنه قانون عالمى ولابد من وجود ضحية لان الرغبة فى السلطة والطمع تستوجب كده ومينفعش يكون فيه سى السيد من غير امينة والا مين بقى اللى هيقول رقيتك واسترقيتك من كل شافك ولا صلاش ع النبى؟!

الزمالك قبل كده اتحسبله ماتش 2-0 فى تقرير الحكم مع المصرى بعد ما سيد متولى ضرب الحكم بس الزمالك بس النتيجة ماعتمدتش من اتحاد الكورة ونفس الفريق اللى هو الزمالك اللوايح والقوانين وقفت جنبه فى ماتش مع حرس الحدود وقضت اللوايح بان الزمالك يكسب 2-0بس النتيجة اعتمدت لصالح الحدود ونفس الفريق معاه توقيع للاعب اسمه جدو محدش كان يعرفه قبل ما حسن شحاته يديله الفرصة بس الزمالك مش عارف ياخد لاعب مضى له وقبض فلوس!!!

ميت بقى...هياخد حقه ازاى؟!!!...مع ان حقه عبارة عن مسالة بسيطة جدا اشبه بمسالة حسابية بسيطة زى 1+1 مسالة مفيهاش مجال لحكم تقديرى بس سبحان الله عشان الضرب فى الميت قانون وعرف فحيفضل ميت .

طب انا ذنبى ايه فى كل ده؟!...انا حاسس انى لو غيرت الفريق اللى بشجعه ممكن هو كمان يتغير وفى محاولة يائسة من هنا باعلن ان بدات اتخلى عن انتمائى لنادى الزمالك وبقيت دللوقتى بشجع سرس الليان اللى الجون بتاعها كان حطط باتش الاهلى على التيشيرت بتاعه فى دورى الدرجة التانية.

حد حاسس انى معقد؟

هناك 14 تعليقًا:

ليس فقيرا من يحب يقول...

هههههههههههههههههههههههههههه

حاشا وكلا قال معقد قال

اللى يقول عليك كده هو اللى معقد وستين معقد فى بعض

تصدق انى مش عارفه احدد هويتى الكرويه لدلوقتى

انا من زمان باحب الزمالك قوى وتقريبا باسمع الماتش ويبقى قلبى مع الزمالك وافرح قوى لو فازت وازعل قوى لو اتهزمت وفى نفس الوقت اسمع ماتش
الاهلى وقال ايه انا المفروض باكره الاهلى بس اول مايجيب جون اهلل وبرده افرح من قلبى ههههههههههههههههههه
هل انا كده معقده

اقعد بالعافيه

ليس فقيرا من يحب يقول...

والاول كمان كويس قوى

كده تسيب الزمالك وانت مطمن

الشعب لابد له من حكومه تشكمه يقول...

تصدق انت وايهاب اللى مش عارف يتغير,بتصعبوا عليا انتو نموذج للزملكاويه المبهدلين فى الارض:)

مجرد حلم صغنتوت يقول...

ههههههههه
لا حول ولا قوة الا بالله
كل ده وفي الاخر تطلع زعلان من الزمالك؟؟
ده انا من اول الكلام وانا عمالة اتخيل انك هتتكلم على حاجات في السياسة وكلام كبير كده وفي الاخر ألاقيك بتتكلم عن الزمالك

يلا معلش كلنا لها :D

star in the sky يقول...

حصل خير ولا يهمك

اللى يعجبك شجعه ان شاء الله حتى تسيب الكورة وتشجع فى حتة تانية خالص

قلم رصاص يقول...

واقترح عليك جرجير بني سويف
لأن كهرباء طلخا مش هتقبل حد زملكاوي
حتى لو حلف لهم ستين يمين انه سااااااابقا

ال معقد ال
دا انت العقد تهرب منك
لسه جي دلوقتي تعلن الخيبه التقيله
بعد خراب مالطه

انت وايهاب ابن خالي اللي عمره ماهيتغير ، بقيتوا حالة ميئوس منها ..

كل ماتتنيلوا تكتبوا حاجة لاااااااازم
ولابد تربطوها بالزمالك

والله الزمالك مظلومه بيكوا ياعم

متزعلش من كلامي ولو زعلت حقك ع الحكومه هي ملهاش بركه الا انت ههههههههههههه

جميييييييبل يامحمد
استمر ياخويا

اللى موش عارف يتغير يقول...

انا بفتخر كونى زملكاوى
عجبا لدنيا وناس عارفين الحق وبيزيفوه عينى عينك
والله حاجة تضحك
لو اهلاوى ركز شوية هيلاقى بلاوى انما للاسف بقعدوا قدام الاعلاميين الجهلاويين ويهزو دماغهم لتحت وهم بيمسعوا الكلام وبيصدقوه بشكل غريب
هههههههههههه
ياسلام لو الاهلى يختفى
رغم حبى الشديد للاهلاوية
عشان محدش يزعل

7annen يقول...

معقد ؟؟؟ لالا مين اللى قال كدا

بس تصدق ربنا يكون فى عونك

قول امين متقاطعش

بيطرية ومش بايدى يقول...

ايه يابنى ده كله عشان حتة فريق
كلهم اندية خربانة اشاسا
مابتعملش حاجة غير انها طبعا طبعا بتهدى النفوس بين الناس ويعضيشها
وياسلام كده لو فى اتنين اخوات زى عندنا كده واحد اهلاوى وواحد زملكاوى تبقى خربت
فكك يابونى من الماتشات دى وخلينا فى التقيل زى ماتشات المنتخب كده

ومسير الزمالك هيجى فى يوم ويبقى احسن من الاهلى مليون مرة

لالالالالا ولا معقد ولا حاجة

بس هو سؤال هو فعلا الشاى بعد الاكل مش مضر

بيطرية ومش بايدى يقول...

وبعدين
حتى لو حسينا مجرد الاحشاش
انك لا سمح الله معقد
ماانت برده مااستسلمتش صح ولا ايه


الله معاك ويرعاك ويحفظك
اللهم آآآآآآآآآآآآآمين

فتاه من الصعيد يقول...

هههههههههه

طيب ليه عقده الانطهاد دي :)

عموما الزمالك المفروض انه نادي كبير ... وكون انه موش قادر ياخد حقه فده قصور في الاداره

الزمالك بيفكرني بمصر على فكره :)

تحياتي

حلم بيعافر يقول...

منورين ياجماعة

د/عرفه يقول...

أنا بدات احس

ان الزمالك فريق فى تل ابيب

لما يجيب لعيب تلاقى الدنيا تقوم علشان يفسدوا دماغ الولا ويبعدوه عن االنادى
ولو لعيب استبعد يقولوه كلام عجيب

ولو له حق
يعموا الراى العام انه ملهوش اى حق


لك الله
يا زمالك

اخبار الرياضة يقول...

الضرب فى الميت حراااااااااام