الجمعة، 26 فبراير، 2010

محمد البرادعى دستوريا لا يجوز



ضجة وصخب وزيطة ودوشة على مفيش ,وواحد شايل شنطه وعدته وجاى من فيينا لمصر عشان يرشح نفسه للرئاسة,والبلد اتقسمت احزاب منها اللى معاه ومنها اللى ضده وشتمه وطلع فيه القطط الفطسانة وجابوا اخطائه من يوم ما اتولد واللى كان من ضمنها انه سقط فى كى جى تو فى امتحان للحساب.!


الراجل جاى على حس التأييد الالكترونى من الافتراضيين اللى ساندوه ع الفيسبوك وجاى متفائل ووصل المطار ولقى نااااسى مستنياه وجه ودخل من صالة كبار الزوار بأمر من الرئيس مبارك واعتبر بعض كتبة النظام-على حد تعبير البرادعى-ان عدم تحرش الامن بيه حكمة وحصافة من النظام.!

اللى محدش يعرفه ولا فكر فيه ان فيه عوائق جامدة جدا قدام الراجل ده وهى كده على عجالة /أولا الراجل ده اسمه مش محمد حسنى مبارك ولا عنده جمال وعلاء ولا مراته اسمها سوزان ولا كان طيار فى القوات المسلحة ولا من كفر المصيلحة يبقى ازاى عايز يرشح نفسه لرئاسة جمهورية مصر العربية؟!
ثانيا مش بيصبغ شعره ولا بيشد وشه وده العائق الأوجه والأهم واللى فى اعتقادى انه هيبقى مثار جدل ولغط كبييير جدا فى كل الأوساط السياسية حول العالم ومش عايزين حد يضحك علينا ويقولنا انه ممكن يزرع شعر لأن الحكاية(القرعة) واضحة زى الشمس.
ثالثا خطبته مش بيتبتدى ب(أيها الاخوة المواطنون)ودى فى حد ذاتها خطيئة لا تغتفر لمرشح على كرسى الرئاسة فى مصر وبعدين بقى بصراحة احنا اتعودنا على الصورة دى فى الخطاب(ان الاستثمار هو قاطرة التنمية وان مصر عبرت فترة من الضيق كانت كفيلة ان تؤدى بها الى هوة البرنجان والفلفل الاخضر وان كرامة المصرى فوق كل شىء وحمايته فى الخارج مسئولية الدولة...).
رابعا ماخدش الوشاح الأكبر للميدالية الوطنية من النيجر ولا من توجو.
خامسا لو الراجل ده بقى رئيس مصر -بعد الشر بعد الشر- تراثنا الغنائى هيبوظ ومش هنغنى يا مبارك يا حبيب الشعب تانى.
سادسا مين اللى هيبعت برقية تهنئة للاهلى لما ياخد كاس العالم للاندية؟وبعدين حسن شحاتة يهدى كاس الامم لمين بعد كده؟واحمد حسن يشكر مين بعد كده؟وهنجيب منين راعى للرياضة والرياضيين زى حسنى مبارك؟
سادسا البرادعى مش مصاحب نتن ياهوه ولا تسيبى ليفنى
سابعا معندوش الخبرة ومحكمش بلاد تانية قبل كده...هنجيبه يتعلم فينا يعنى؟
ثامنا البرادعى مش عاجب اسامة سرايا ومينفعش رئيس مصر ميعجبش اسامة سرايا ده حتى يبقى فال وحش .
تاسعا الرئيس مبارك هو وعياله مش مخليين عم مجدى عايز حاجة وبصراحة عم مجدى مستعد يروح وراه لاى حتة حتى لو رشح نفسه لرئاسة التشيك.
عاشرا مى ام العافية مش عارفة تعيش اللحظة فى عهد حسنى مبارك فمنين ممكن تعيشها فى عهد البرادعى


اظن الاسباب كلها وجيهة جدا ومقنعة جدا ومن الاخر اى صحفى حكومى قال كلمة وحشة فى حق البرادعى فهو صادق ويريد مصلحة البلد ويسعى للاستقرار واى حد معارض ابن .......كان متوسم ذرة خير فى البرادعى او فى فكرة التغيير نفسها فهو خاين من وجة نظر رجالة النظام وكافر برأى وشهادة مشايخ النظام ومشايخ الفضائيات اللى اعتزلوا الدنيا ومبقوش يتكلموا فى حاجة غير الموت وعميل لايران بشهادة الشلة اياها واياكم والخيانة والكفر والعمالة والا هتخسروا الدنيا والاخرة وكل واحد من دللوقتى يقول للبرادعى خد الباب فى ايدك ويبقى الوضع على ما هو عليه وعلى المتضرر اللعب فى مناخيره.

هناك 16 تعليقًا:

أحمد الصعيدي يقول...

يا حلم

ان كان كل العراقيل دي هتواجهه يبقي اكيد هيكون صح

واكيد لازم الشعب يكون وراه

عفوا نحن لا نساند أنظمة ديكتاتورية

السلام عليكم ورحمة الله

لسه بدوّر يقول...

مع احترامي لكل الأسباب الواضحة دي :D

احنا نسينا حاجات مهمة

انا مش عارفة ايه سبب كم الناس اللي بتسانده
يمكن عايزين يجربوا
بس الراجل ده مقضي عمره برة مصر هيحس بينا ازاي

انا شايفة انه بكل المقاييس غير لائق للمنصب ده

وعموما احنا ملناش اختيار :D
سيبها للستار

إمرأه من ثلج يقول...

أنا معاك البردعى الشعب المصرى بينظرة زى الغريق الى بيتعلق بقشاية واحنا غارقنين فعلا لا احنا فطسنا خلاص علشان كدة لازم البردعى يقدم خططة ةالسياسة الى ناوى يتبعها فى مصر دا لو بعيد الشر بقى رئيس بس لازم تبقى بأسلوب بسيط يوصل للمصرين الغلابة اتمنى دعمك لى فى مدونتى الجديدة إمرأة من ثلج يشرفنى مرورك

صوت من مصر يقول...

هو انا لو قلت له امشى هيمشى
اظن ياريس يا كبير لكل ظالم نهاية مأسوية الا مبارك نهاية عسل
الراجل شد وصبع وسرق ونصب
عاااااااوز ايه تانى
اظن ده ما يسمى بعريس الليله

فتاه من الصعيد يقول...

اكيد كل العراقيل المتعرقله دي اسباب وجيهه

ومفيش امل ... ولا سحر :)

تحياتي

طالبة مقهورة ..درجة أولى يقول...

هههههههههه

يعيني عليك يا دكتور محمد ..بتسدوها في وشه ليه..

ده واحد زي الفل اهو ومهما كان اللي بيتقال عليه انا بؤيده مليييييار ف الميه المشكلة بس ف التغيير..مش عارفة اذا كان ممكن يحصل بس لو كان البرادعي متمسك بالشعب فاحنا لازم نتمسك بيه اكتر

ربنا معاه ومعانا جميعا

طالبة مقهورة ..درجة أولى يقول...

نسيت اقولك ان اسلوبك عجبني جدا فعلا ربنا يوفقك

ديه اول زيارة وباذن الله مش الاخيرة

ليس فقيرا من يحب يقول...

كلها اسباب منطقيه جدا

ونظره مقربيه مبعديه بتنجانيه للامور

هههههههههههههههههههه

الواحد احتار يا عم محمد

هو فين عمرو موسى مفيش حس ولا خبر كده عنو

مي يقول...

هههههههههههههههههه بقى كده ماشى اه ياخويا مش عارفة اعيش لا لحظة ولا فمتو ثانية حتى
بص اصلا الراجل ده نضيف اوى مينفعش معانا احنا اتعودنا عالشوز خلاص اتبرمجنا على المعاملة دى نضرب ونقول كماااان واولا هو بعيد برضه يعنى مش عارف كمية القرف اتللى هيشوفها ده ممكن يطب ساكت من اولها
عندك حق فى كل اسبابك بصراحة وشكلنا كده ابو زعبل قريب يامعلم
بصراحة انا مش موافقة لاعمروموسى ولا البرادعى ولا زويل احنا نستورد رئيس جديد
من الصين (؛
مى ام العافية

He and She يقول...

I said that too. He can trigger the change but he he is personally qualified to be President of Egypt

Foxology يقول...

ههههههههههههههههههههههههههههههههه

والله ضحكت من قلبى

تصدق فعلا عندك حق ؟؟ ده يبقى عيبة ف حقنا وقلة اصل مننا لما نجيبه بدل الريس

تحياتى

ameen يقول...

انا صوتى ان شاء الله رايح للصح

واللى اغلب الناس شيفاه صح
وانا قبل منهم

تحياتى

م/ الحسيني لزومي يقول...

وحتي لوجاز له
سوف نكتشف انه زور جائزة نوبل التي حصل عليها وسيقدمه النظام المصري للمحاكمه

حامد يقول...

فى حاله نفاذ الأقدار أو تحقيق سنه كونيه محققه كنتيجه لإختيار خاطىء أو حدث غير سليم ، ينزع العقل عن الفرد منا نزعا .. ثم بعد الإفاقه يتعجب الإنسان من حاله وأين كان عقله وكيف سمح لنفسه أن يفعل بنفسه ما فعل .. وبعضنا لو تأملت حاله لوجدت ما صنعه بنفسه أسوأ مما يصنعه العدو به بل أكاد اجزم ان بعضنا لو سلطت عليه عدو فاجر وكافر وبدون قلب لم يكن يفعل اكثر مما فعله هو بنفسه .. حينها عندما نتكلم عن بديل أو نحلم بالتغيير .. فلن يكون حلمنا ترفا بل هو حق لا يمكن نزعه مهما تفلسف المثقفون ومهما حدد مساره ترزيه القانون ومهما تشوه من اجله الدستور ..
...........
محمد البرادعى .. رجل مصرى قد يكون صالحا وقد يكون طالحا .. لكن بربكم هل يمكن ان يفعل بنا اكثر مما فعل مبارك وحزبه .. انا مع البرادعى أو غيره فقط لنزحزح مبارك من مكانه وبعدها يكون ما يكون .
.........
أما عن عدم دستوريه ترشيحه بعد التعديلات التى أجراها مبارك من اجل إبنه ، فلابد من تعديل جديد للدستور حتى نضمن نزاهه الإنتخاب وهذا ما يطالب به البرادعى قبل كلامه عن الترشيح وهذا ما يحاول فعله الإن من خلال توكيلات شعبيه ( تم تعطيلها بفعل موظفى الحكومه ) له من الأفراد للمطالبه بتعديل الدستور ..
........
اسف للإطاله فى التعليق
.......
مدونتك جميله سعدت بتصفحها

حلم بيعافر يقول...

واااااااااااضح ان فيه امل
منوريييييييييييييييييييييييين
ياللى عنكوا امل

فشكووول يقول...

فيه تعتيم على حضارة النوبه
مع ان النوبه بلد ذات حضاره ضاربه فى اعماق التاريخ واعتقد ان لهم قوميه مستقله