الثلاثاء، 16 مارس، 2010

ياجنوبى...


يا جنوبى يا نوبى
يا أمير على قلب الغجرية
يا مخبى ف نن عيونك شمس
يا مربى ف حجرك حرية
لو تسقى الأرض ف طيبة بدمك
الزرعة هتطرح فيا
لو يجرى الضى بسرعة ليمك
السكة تنور ليا
يا مصحى الليل بربابة وناى
وموحى حروف الأغنية
تتغلل جوه الزمن الجاى
وتشد لجارنا الفجرية
لونى بلونك وبطيبتك
ألاقيك ببياض النية
وبضحكة تهز الغيم الكشرى
فيرخ حياة
ويداعب وردى بحنية
شريان وموصل قلبى بقلبك
معجونة فى طمية حكاوى الخلق
مماليك وملوك وممالك
ووجود وزوال
وصبح بيضوى فى لحظة طلق
مولود بيخبط على بابك
يا جنوبى يا نوبى
يا أمير على قلب الغجرية

هناك 14 تعليقًا:

لسه بدوّر يقول...

كلها جميلة جدا

بس عجبتني اوي الحتة دي

وصبح بيضوى فى لحظة طلق
مولود بيخبط على بابك

عبقرية بجد

دام إبداعك :)

SAYED SAAD يقول...

بقالي كتير مقرتش شعر يحسسنى بمصر قوي كده بجد جميله جدا

يساري نوبي يقول...

اولا اختيارك للصوره رائع جدا فالاهرامات النوبيه هي حاجه خاصه بنا نحن كنوبين او كما تسمي الاهرامات السودا
ثانيا بالنسبه للقصيده انا مش عارف اقولك ايه ...فعلا رائعه جدا و جميله جدا و انا بحيي احساسك الجميل دا

لو تسقى الأرض ف طيبة بدمك
الزرعة هتطرح فيا

احنا فعلا سقينا الارض بدمنا و بتاريخنا كله و باجساد اجدادان المدفونه تحت بحيرة ناصر وراء السد...ارضنا قدمناها بطيب خاطر لمصر و لو مصر ناديت تاني و طلبت ارواحنا مستعدين نقدمها رغم حزننا من تجاهل النظام و الشعب بمختلف طبقاته و فئاته للي قدمناه لها
شكرا علي احساسك الجميل دا و اسمحلي اني انشرها ف جروب اتحاد الشباب ع الفيس بوك
تحياتي

قلم رصاص يقول...

حلوه اوي يامحمد
بجد حلوة جدااااااااااا

مزيد من التميز

تقبل مروري

غير معرف يقول...

يا جنوبى يا نوبى
يا أمير على قلب الغجرية
يا مخبى ف نن عيونك شمس
يا مربى ف حجرك حرية
لو تسقى الأرض ف طيبة بدمك
الزرعة هتطرح فيا
لو يجرى الضى بسرعة ليمك
السكة تنور ليا...

SO NICE Bejad.. :)
Enta leek Mosta2bal Baher

:D

أحمد الصعيدي يقول...

السلام عليكم

تعرف أنا نفسي في ايه


نفسي أعمل توأمة مع مدونتك انت واسامة وأعشق في الليل ضوء القمر واللؤلؤة

أكيد هنكون قوة فكر كويس

مجرد فكرة

السلام عليكم

мαησηα يقول...

لونى بلونك وبطيبتك
ألاقيك ببياض النية
وبضحكة تهز الغيم الكشرى
فيرخ حياة
ويداعب وردى بحنية
شريان وموصل قلبى بقلبك
معجونة فى طمية حكاوى الخلق


بجد انت رائع تسلم الايادى

اول مرة ولن تكون الاخيرة باذن الله

حلم بيعافر يقول...

لسه بدور

ربنا يخليكى ومنورانا دايما

حلم بيعافر يقول...

سيد سعد

شكرا يا سيد بيه

منور

حلم بيعافر يقول...

يسارى نوبى

شكرا يا موعلم

ماهى برضه منكم واليكم

انا كتبتها لما سمعت اغنية بحار بتاعة بلاك تيما

منور

حلم بيعافر يقول...

قلم رصاص

اشهد ان لا اله الا الله

اخيييييييييرا عجبتك حاجة عندى؟

هههههههه مننور يابن خالتى

حلم بيعافر يقول...

غير معروف

ال غير معروف ال

رنا

منورة

حلم بيعافر يقول...

احمد الصعيدى

شىء يشرفنى يا صعيدى

شوف انت عايز تعمل ايه وقولى

مستنى

حلم بيعافر يقول...

manona

منورة

هههه كلهم بيقولوا كده ومحدش بيستحمل اللى بيجى بعد الشعر

منورة