الاثنين، 29 مارس، 2010

نروووووح فين؟!

(الحكوووووووومة)اول مرة ادرك معنى اللفظ ده كان ادراك مختزل فى المخبرين والعساكر اللى ماسكين عصيان وبيجروا ورا الناس عشان ياخدوهم المركز للمأمور عشان يديهم اللى فيه النصيب،طبعا كان المعنى مفزع وزاد الفزع من الكلمة بعد ما كبرت لان الادراك لمعنى الكلمة اتسع عشان يشمل السبب فى كل البلاوى والمصايب اللى قابلتها فى حياتى وطبعا ليا حق التنفيس عن اللى جوايا ونكت الغلب والقرف بترديد الصرخة بتاعة منصور الجزيرة -انا الحكووووووووووووومة-بس طبعا من غير ما اعيب فى الحكومة لان ابن عمى عسكرى امن مركزى ومخبيش على حد ان كان نفسى اطلع عسكرى امن مركزى عشان اضرب الناس اللى اعرفهم فى المظاهرااااااات.

نيجى للادراك اللى اتسع ونحكى عن علاقة جناب سيادة حضرتنا بالحكومة وطبعا هى علاقة شريفة طاهرة عفيفة مابين مواطن مصرى وما بين الحكومة بتاعته اللى مش مخلياه نفسه فى حاجة لا هى ولا اللى جايبها،طبعا بتبدأ العلاقة بين الموطن مننا وبين حكومته من وقت ما يتولد لوقت ما يموت وان تغير الافراد وان تغيرت الحكومات تبقى السياسات قائمة وثابتة ثبات ابو الهول قدام الفرنسيس بس انا هتغاضى عن سبع سنين وهبدأ احكى علاقتى من اول اولى ابتدائىالصورة من مدونة المطر

مش محتاج احكى عن حاجة لان الصورة جابت المفيد كله وتمام اوى كده بس تكفى الاشارة لنتيجة اطلاعى على كراسة التعبير بتاعة اختى اللى فى تانية اعدادى واللى كان فيها موضوعين احدهم كان عن تطوير التعليم واختى غلطت فى الموضوع ده 8 غلطات بشعة مابين حروف ناقصة وحروف زايدة زى مثلا(الفورعونية-اهضار-المايس)ونتيجة ال8 غلطات دول اخدت 8 من 10 واكتبلها تحت (جيدة جدا)والموضوع التانى كان برقية كتبت فيه 6 كلمات منهم كلمة غلط وكانت درجتها فيه درجة كاملة واكتبلها تحت(ممتازة) يبقى السؤال لمدرس العربى بتاعها (انت بتعمل كده ليه يا هااااااااااانى؟!!!) مش كفاية المناهج يعنى ؟!!!ويبقى النداء للمسئولين عن التعليم فى مصر (مصر مش محتاجة حمير تانى طلعولنا منتج تانى ...)المخصخصاتى


بعد الخروج من ملحمة التعليم المصرية وملحمة التامين الصحى وكل الحاجات الجميلة دى لسوق العمل يا مواطنين بتحسوا انكم ضيعتوا عمركوا فى حاجة ملهاش اى لازمة نهائيا ومفيش وظايف حكومية ومفيش ميرى ولا تراب فمن الطبيعى انك بتروح للقطاع الخاص اللى الحكومة مسهلاله كل حاجة فى الدنيا وبياخد الحاجة بسعر ارخص من السعر اللى بتاخده حضرتك بيها اضعاف مضاعفة واستحمل بقى الضرب على دماغك من اى مستثمر وارجع بقى لزمن العبيد واستنى رسالة سماوية جديدة لتحريرك
كميييييييييين كله يطلع البطايق بالذوق لاحسن ايديهم شكلها تقيلة اوى وهنا بقى العقل المصرى بيبدع وخيال المواطن بياخده لبعيد جدا لدرجة انه بيحلم يعدى على كمين ويكون محترم وطبعا ده مستحيل لان الشرطة فى خدمة الشعب والطريق اللى ممكن تاخده العربية فى ساعة ونص بتاخده فى 3 بسبب 4 كماين وجمرك يعنى لو عديت محترم فى الاول مش هتعدى فى التانى ومش هتعدى فى التالت او فى الرابع ويكفى الاشارة لان معاليا نفسه اتفتش تفتيش ذاتى لمجرد انى نسيت احلق دقنى وطبعا طبعا الناس اللى فى الكمين دول ناس قلة ووزارة الداخلية بخييييييييير واللى يا مواطنين مش لاقى شغل ممكن يجيبله برميلين وفتوتين ويقفوا كده عند اى حتة ع الطريق ويفتحوا كمين خصوصى وصدقونى الفكرة مجربة وناجحة جدا.


هيييييييييييييه روحت البيت واستحميت بقى واكلت وكده يعنى وفتحت التلفزيون وطبعا طفشااااااااااااااان من تلفزيون الدولة بس برضه هى ورايا ورايا وكله دللوقتى عارف مين اللى بيمول معظم الفضائيات طب نروح فيييييييييييييييييين؟...مفيش غير النووووووووووم وحتى ده كمان بيينطولك فيه يا مواطن!!!

هناك 11 تعليقًا:

مجرد حلم صغنتوت يقول...

هتكلم على نقطة التعليم دي
انا مقتنعة ان ناس كتير اوي لو كانو اتعلمو بطريقة مختلفة عن التعليم اللطيف بتاع بلدنا كان زمان حصل ثورة والبلد طلعت لقدام كتييير اوي
الحل الوحيد المتاح دلوقتي ان كل واحد يحاول يظبط دماغ ابنه قبل ما تبوظ من التعليم ده لأن ده اساس كل حاجة
بالنسبة للكمين.. انت اللي غلطان بصراحة
ازاي تنسى تحلق دقنك يعني؟ ينفع كده؟؟ :D

كلامك يضحك ويبكي في نفس الوقت والله... ربنا معانا

أحمد الصعيدي يقول...

حلم بيعافر

تعرف ليه مش بحب اتكلم في السياسة ولا اي حاجة تخص الحكومة


علشان احنا متنا خالص

واتمني ايد الناس مع بعض نصلح بلدن

تفتكر ممكن

قلم رصاص يقول...

كلامك زين والله زين

انت تعرف ان الولاد اليومين دول اللي في الحضانه مثلا .. بيروحوا اثبات حضور بس
وماشاء الله عارفين كل حاجة ..انجليش وحساب وعربي وكله كله .. بسسسسسسسسس
اهاليهم اللي بيعلموهم مش المدرسين

وخد بالك .. بعد الحضانه ، الولاد يستلمهم المدرسين بتوع الدروس الخصوصيه بقى لحاااااااااااااااااد مايخلصوا ثانويه عامه

وسلم علي التروماي

أخبار الفورعونيين ايه ههههههههههههه

ابقى احلق دقنك .. عيب عليك
هي الحكومه هتعمل ايه ولا ايه .. حتى عاوزها تحلق لك دقنك ؟

مش كفايه حالقه ل 80 مليون واكتر..
ابدأ بنفسك كدا واعتمد على نفسك واحلق
هههههههههههههه

كل عيش .. كل عيش ياحبيبي

تقبل مروري

كيكى عوووووو يقول...

هى محتاجة سؤال؟؟
الغفير وعلى القبله واعدل
!!!!
عوووو

star in the sky يقول...

يبقى انت اكييييييد فى مصر هع هع هع هع

يابنى متروحش فى حته البلد دى احسن من غيرها واللى نعرفه احسن من اللى منعرفوش

هو اكيد فى حاجة كويسة فى البلد دى بس ايه هى انا معرفش صراحة

ادى اخرة التعليم المجانى

صمت المشاعر يقول...

عجبتني الحقيقه الصوره المعبره عن التعليم لان دا الحال دلوقت

اما بالنسبه للحكومه فمش محتاجه كلام هي معبره عن نفسها لوحدها

شكرا علي البوست دمت بخير

Foxology يقول...

lعارف ليه افتكرت مشهد فيلم العلامة محمد سعد لما كان مأمور سجن وقال للمساجين : هنطلك فى بنطلونك فى كل حتة ! عااادى يعنى

تحياتى

ضكـــــتور جدا يقول...

السلام عليكم
نرجو مشاركتنا في نشر الفن الهادف
بنشر (شبكة صوتنا للفن الهادف)
http://www.sawtona.blogspot.com/
ووضع البانر الخاص بالشبكة في مدونتكم
http://img23.imageshack.us/img23/6886/91117988.jpg
جزاكم الله خيرا

مي يقول...

ههههههههههههههههههه ناوى على ايه يا تميمى ها
شكلك هتودينا روا الشمس بدرى بدرى
وهنبقى فرعونين هههههههههههه

مالهم مدرسين العربى بقى على فكرة انا مدرسة عربى بس منكرش هههههههههههههه

النوع القادم مش حمير هيبقى جحش صغنن

انت بتحسرنا على نفسنا الواحد مابيصدق ينام عشان ينسى
ااااااااااااه منك يا تميمى
دماغ انت كالعادة

E73 يقول...

بسم الله الرحمن الرحيم
السلام عليكم ورحمة الله وبركاته

يا راجل مش قوي كدة

بص لربع الكباية المليان

حلم بيعافر يقول...

منوررررررررين كل واحد برايه

بس محدش حكى معاناته يعنى

الظاهر انى انا بس اللى مقهووووووووور



هههههه منورين