الثلاثاء، 6 أبريل 2010

مفيييش عنوان ..حد عنده مانع؟



فى التراث اليونانى وفى طى الاساطير القديمة حدوتة صغيرة بتحكى ازاى هرقل قدر يهزم عملاق كبير ومارد ضخم بحركة خبيثة من حركاته ،ببساطة جدا شغل دماغه ودور على المكان اللى بيعتمد عليه المارد العملاق ده فى حركته والمكان ده كان موجود فى رجليه لو اتفتح يقضى على العملاق فى الحال وفعلا هرقل اتسحب وقام فتح المكان ده وخر المارد العملاق على الارض وسط ذهول واعجاب رفاق هرقل وده كان مشهد هدم لكائن اسطورى مقدرش عليه الانسان غير بعقله اللى بيرتكز عليه أصلا وموضوعا واللى بيمثله حجر الزاوية اللى بيتبنى ويتهدم من خلاله والتاريخ يشهد ان اى امة تقدمت وازدهرت كان التقدم والازدهار عن طريق تغليب العقل واى امة تخلفت وانتهى ذكرها كان عن طريق تغييب العقل .

العقل فى الانسان اصل التكليف فى كل المذاهب والاديان السماوية والغير سماوية كمان... يعنى غياب العقل عن الانسان بيعفيه من اى تكليف ،الغريب بقى هو السلوك اللى بينتهجه معظم رجال الدين ضد العقل وضد التفكير والسلوك ده واضح اوى فى تاريخ المسيحية القديم وواضح كمان دللوقتى وبشدة فى سلوك اغلب الدعاة المسلمين اللى تقريبا حولوا التفكير لكفر بين وزندقة وغيببوا عقول الناس تماما وغلبوا النقل زى نظام التعليم بالظبط .

مش من قبيل السفسطة الفارغة او تضييع الوقت ان شاب مصرى يتكلم عن اشكالية زى دى لانى ببساطة مش فاضى مانا يا اما بدور على شغل 24ساعة فى اليوم يا اما بشتغل شغلانة واخدة منى معظم ساعات اليوم وباقى الساعات دى نوووووووم يغعنى تقريبا عقلى عطلااااان من اول دروس ماجد وبوبى فى الابتدائى لحاااااد الكيميا العضوية فى الثانوية العامة ولحاد الدكتور اللى بيقولنا لو مكتبتوش بالطريقة بتاعة المحاضرة فى الامتحان هتسقطوا.

سندوتش ومحكم بشدة على الانسان المصرى وطرفى السندوتش مبيفوتوش فرصة الا ويزودا فيها الغلق والاحكام على عقل الفرد والمجتمع وكل الاساليب والطرق متاحة بحكم سطوة وسلطة الطرفين دول على رقاب الناس ونفوسهم والمحصلة فى الاخر هى كائن التسمية الصحيحة له المفروض انها متكونش انسان لان الانسان ربنا فضله عن الحيوانات بعقله ولما يتم تغييبه وسط استسلام مخزى منه ميبقاش انسان ومابين شيخ بيعتقد انه بيمتلك مفتاح الجنة فى كلامه وبين قس بيكره اللى قدامه فى بقية المجتمع وبين دولة كل اجهزتها محظور فيها استخدام العقل عايش المواطن المصرى ومبسوط وولا فى دماغه اى حاجة فى الدنيا حتى ولو كان بيشرب من المجارى وبياكل من المسرطن وبيتفرج بالليل على تامر امين وشوبير وعلاق صادق وبيشوف خناقات مرتضى منصور مع خلق ربنا والمنتج الطبيعى للمجتمع ده بيكون حد زهقان من نفسه ومن اللى حواليه ومش طايق حد وموزع وقته بين افلام السكس وماتشات الكورة .
وطبعا الافراز الطبيعى لمجتمع مغيب- دينيا وسياسيا- بالشكل ده كان واضح جدا فى اعضاء المجالس التشريعية واللى اغلبهم اللهم صلى ع النبى ناس زى الفل ومالهمش فى اى حاجة فى الدنيا غير انهم يقولوا موافقة ويقفوا حوالين احمد عز فى المجلس كانهم بودى جاردات ويتوع الموافقة طبعا محدش فيهم بيقدر يفتح بؤه فى اى حاجة ولا قدام اى موقف ضد الحكومة اللى فيها وزيرة بتبوس ايد ماماتها سوزان عينى عينك قدامهم اعضاء واللى فيها وزيرة اتعملها وزارة مخصوص عشان تبقى وزيرة واللى فيها وزير اسمه يوسف بطرس غالى وياريت ياريت يكون الناس عرفوا هما ادوا صوتهم لمين فى الانتخابات اللى فاتت عشان ...........ولا بلاش الطيب احسن برضه.

هناك 12 تعليقًا:

مي يقول...

عايز ايه انت بقالك بوستين والنية خالصة اووووووى (؛
كل حاجة بقت ممنوع طب تعالى هنا نفكر ليه وعشان ايه ما احنا لو فكرنا ممنوع اى حاجة تتنفذ يبقى نفكر ليه؟
الحكاية مش سلبية اد ماهى قهر وكبت
زى التور اللى بيدور فى ساقية مغمى عينيه بس عمال يدور

على فكرة انا بكره تامر امين ده جداااااا اكيد حاطينه عشان اللى بالى بالك
بس مين الوزيرة اللى باست ايد سوزى دى؟؟؟؟؟؟؟؟؟؟؟؟


وراك ياريس (:

حلم بيعافر يقول...

معقوووووووول؟
دتامر ده عسل عسل
هههههههه مله تامر؟
عيشة عبدالهادى معقوووول مسمعتيش انها لطعت ايد ستها الكريمة؟

مي يقول...

هههههههههههه
تامر ده روحى روحى ده ابو الغلاسة والتناحة وبلاش تخلينى اطلع عن شعورى واكسر الجهاز
كان قلبى حاسس انها عائشة
هو الواحد لو عايز يبقى وزير لازم يبوس ولا ايييييييييييييييه

((:

صفــــــاء يقول...

عقلنا ؟
وانت عايز عقلنا يشتغل ليه
وزى مانت قولت ... نجيب منين الوقت اللى نشغل عقلنا فيه
ولو شغلناة بيوجعنا ويفكر فى حاجات والعياذ بالله تودى الليمان
أستهدى بالله وخليه نايم

غير معرف يقول...

"افرد جناحك وطير مع الاحلام..."


:)

قلم رصاص يقول...

دا الموضوع دا ينفع يتحط له مليون عنوان

ال مفيش عنوان ااااااااال

عاوز اقولك انك صح في كلامك
ولكن اسمح لي اقول حاجة بسيطه اوي

الدين يامحمد مش هقولك مش من حقك متتكلمش فيه أو متعملش عقلك فيه .. لأ.. بس عاوز اقولك دي مش لعبتنا لانها علم وليه ناسه ومتخصصينه
فلو فيه اجتهاد او حق الاجتهاد فهو بالطبع مش من حقك ولا من حقي.. وانما من حق المتخصصين فيه من رجالات العلم والدين الثقات .

أما بقىىىى السياسه ، فمن حقك طبعا ياعزيزي ان تمارسها بكل أشكالها وتبدري رأيك فيها.فالانسان بطبعه حيوان سياسي كما نعلم جميعا!

_______

ملحوظه هااااامة:

شيل اللفظ اللي في اخر البوست ..معلهش مش حابب انك تستخدم لفظ زي كدا .. انت حر طبعا .. بس اعتبرها مجرد لفت نظر!

تقبل مروري وتقديري

د/عرفه يقول...

دايما يا محمد مواضيعك بتثير فى دماغى كلام كتير اوى

المهم انا عايز اعلق على نقطة واحدة بس

وهو علماء الدين اللى بيلغوا العقل
انا شايف ان ده من الغباء
لان الدين عمره ما كان مناقض للعقل بل على العكس متفق معاه تماما

لانه لكل امة ولكل وقت معطياته الخاصة

بالفعل فيه اوامنر مباشرة مفيهاش نقاش
وانا بتكلم ما خلا ذلك




ويارب نكسب يوم الجمعة

حلم بيعافر يقول...

مى

قلبك دليلك يا مؤمنة ههههههههه

نورتى

حلم بيعافر يقول...

صفاء

لا اله الا الله

منورة يا استاذة

حلم بيعافر يقول...

غير معروف

ما تكتبى رنا وخلاااااااااااص

اصل خطك معروف
ههههههههه
منورة

حلم بيعافر يقول...

قلم رصاص

احنا مبنتهددش

وعضمنا مر ميتاكلش

ولو اتكل يقرقش فى الزور

هع


منور يابن خالتى

حلم بيعافر يقول...

د\عرفة

عندك شك فى ايييييييه احنا هنكسب بكره

منور يا دكتووووووووور