السبت، 29 مايو، 2010

عرب73



برغم ان دكتور الوحدة الطبية عندنا فى القرية كان مسيحى الا ان ده ماثرش على الاعتقاد اللى رسخته عندى كل مؤسسات التربية اللى مريت بيها فى طفولتى .المسيحى كان فى مخيلتى كائن نتن ريحته وحشة ومبيتحماش ويمكن الاعتقاد ده مش عندى بس وفيه ناس كتيرة اوى بتشاركنى فيه.المهم الاعتقاد ترسخ وترعرع جوايا وبلغ مداه ويشاء السميع العليم انى اترعرع واكبر وابقى واحد محترم وادخل الجامعة واول محاضرة احضرها الاقينى قاعد بجوار موريس صموئيل عبدالملاك...طبعا سيبت المحاضرة وطنشت الدكتور وكل الطلبة وقضيت المحاضرة اشم فى موريس وبعد المحاضرة بقينا اصحاب لانى اكتشفت انه مالوش ريحة.

الناس هنا وفى هذه البقعة المباركة المحوطة برعاية الرئيس الاب عاملين زى انااااااااء بيتملى ب....... وبيتقفل عليه فيوصل لحالة الكبت ويوم مايجى يتفتح بيطلع ال...... اللى هو متعبى بيه اصلا ويعنى مش معقول هتعبيه ب........ وبعدين تيجى تفتحه تلاقى فيه حاجة غير ال........ ده حتى يبقى مش كويس فى اطار ال....... اللى احنا .......كل 5دقايق.

طبعا من الحاجات القليلة فى مصر اللى فيها حرية فى الكلام من غير مخبرين وامناء شرطة واهانة لاعز مايملك المواطن المصرى -القفا طبعا-هى الكورة اللى بيتفح فيها الغطا للمواطن المصرى وبيسمحله يقول كل اللى عنده ويطلع كل اللى جواه ويزيح عن قلبه اللى تاعبه ومنكد عليه عيشة اهله ومسود الدنيا فى وشه على الرغم من ان الدنيا جميلة وبمبى .مدررجات الكورة اللى بتشهد كل يوم شىء بشع جديد بيحطنا قدام تناقض فج مع كل اللى بنقوله قبل الغطا ما يتشال زى اننا شعب مسالم وزى العسل وطيب وعن ان فيه بيننا تاخى وتالف ووحدة ومصر لايوووومكن ابدا تعبث بها اصابع مروجى الفتنة مع ان فى الكوووووورة احتارنا نشتم بعض ازاى ...بقترح للزملكاوية بعد ماخلصت فيهم الشتايم اننا نتسمى عرب73.

ويبدو كده ان الغضب من التصرفات الهمجية اللى بتصدر عن الجمهور اللى بيتشال عنه غطاء الكبت -لفترات محسوبة-مبقاش شىء مرحب بيه لا من الناس اللى لسه متغطيين ولا من الناس اللى مغطينهم فياعزيزى المواطن ياللى مش بليد وعندك دم لو انت ماشى فى الشارع ولقيت حماااااااااااار بيتحرش بواحدة وجيت تتدخل احب ابشر سيادتك انك هتدووووووب ضرب او ع الاقل هتتشتم بالفاظ متقلش بذاءة عن اللى انت معترض عليه وياعزيزى المحروق والمحبط ياللى بتشوف مجموعة من الناس بتصب جاز على حد وبتولع فيه متتحرقش اوى لانك لو اتكلمت هتبقى متعصب ويااعزائى ياللى شفتوا المنظر الوقح اللى عمله جمهور الاهلى متنزعجووووش وسيبيهم يطلعوا المخزون الوسخ اللى كلنا متعبيين بيه لان الغطا رااجع تانى وفيه انتخابات داخلة والوضضع هيرجع لطبيعته تانى.


هناك تعليقان (2):

قلم رصاص يقول...

بردو مزعل نفسك اوي ومتعصب عشان الكوره

ياعم كبر دماغك بقى بلا كوره بلا وجع قلب

تعالى نبدأ بنفسنا ونقنع نفوسنا ان الكوره ومايصاحبها من تشجيع وتداعيات وبلاوي سوووووده ، مش هتفيدنا على اد ماهتضرنا خصوصا في ظل الاوضاع المتدهوره الحاليه في كل اتجاه.

بس انا حاسس انك زعلت مني لما قلت لك انك متعصب البوست اللي فات..بس خد بالك انا نيتي كويسه لاني حصرت كلامي في الكوره لكن انا عارف انك مش متعصب خارج الكوره

اكيد هترد علي وتقول لي :
ياعم انا مش متعصب حتى في الكوره

ههههههههههههههههههه

ولو .. ان كنت زعلت ، حقك علي

سلام

حلم بيعافر يقول...

مضطررررر اصفح واعفو عنك


انت كنت هتروح ورا الشمس