الثلاثاء، 4 مايو، 2010

اللى مش محبطين بيشجعوا مصر واحنا معاهم



قشطة يا علم يا بتاعنا


الاحساااااس بالمشكلة اول خطوة فى حلها ومن غير احساس ومن غير دم مفيش حل لاى مشكلة فى الدنيا ومن غير حد يفضل يصرخ ويقول فيه مشكلة وينبه ويوجه قدر استطاعته هتفضل كل حاجة على حالها وهيفضل العشق الوثنى للعك اللى سايد واللى مسيطر وخانقنا وكابس على نفسنا ونفس اللى خلفونا.

نص الكباية الفاضى ,نضارة نادية لطفى السودة ,الاحباط والاكتئاب..... وباقى العبارات المعلبة النتنة اللى ريحتها طلعت واللى بيقذف بيها فى كل اتجاه اشباه الفلاسفة وانصاف الرجال من قيادات ورجالة النظام المصرى المسيطرين على كل حاجة فى البلد بقت حاجات مخزية فعلا ومش متصور ازاى حد يبقى بيشم ولا عنده دم يقدر يقضى عمره كله زى البغبغان !.

صناعة العجز والياس وتصدسرهم للناس شىء مر جدا وصعب جدا وناجح جدا للاسف ومع اقتراب انتخابات مجلسى الشعب والشورى ومن بعدهم انتخابات الرئاسة بيزداد تجاهل الناس واحساسهم بان مشاركتهم من عدمها مالهاش لازمة وده قمة الخطر حتى لو كانت الفكرة اللى مترسخة فى اذهان الناس صحيحة.

مشكلة عويصة وحلها كله ملقى على عاتق الجزء اللى لسه صاحى من الناس وان كانت الدولة مصرة على تزوير الانتخابات ووضع نتايجها قبل اجرائها وان كان منطق من يقاطع الانتخابات برمتها منطق مقنع جدا ووجيه جدا فزى ما قال زرادشت الانسان محكوم بضرورة تجاوز نفسيه دايما يعنى المرة دى والمرات اللى قبلها الانتخابات اتزورت وضربنا كلنا دماغنا فى اتخن حيطة فالمرة الجاية الانتخابات هتتزور وهنضرب دماغنا فى حيطة اتخن شوية بس هنكسرها والمرة اللى بعدها هنكسر الحيطة ومهنكسر معاها حاجة تانية والمرة اللى بعدها هنكسر نظام فاسد ومتعفن من قمته ولحاد اصغر موظف بيردد العبارة الشهيرة بتاعة فوت علينا بكرة يا محترم بس فى الطراوة.

من غير ما تعب مفيش تغييييير ومن غير مشاركة محدش يطلب حاجة وان كنا هنضفى الشرعية عللى انتخابات مزورة بمشاركتنا فيها مرة واتنين وتلاتة فالمرات اللى بعد كده المزور مش هيبقى مزور وربنا حيهديه ان شاء الله وخصوصا ان فيه شخصيات ذات ثقل بدات تدخل فى الموضوع وبدانا نلاقى حد يساند ويدعم زى البرادعى وحد يثنى ويقدر زى فاروق الباز وحد جرىء ومبيجانلش حد ويقول عايز يطور التعليم فى ظل الوضع القائم.

باختصااااار كده احنا عاملين زى راجل عجوز بيزرع فى شجرة مش هيشوف منها لا ضل ولا ثمر بس اللى بعده هو اللى هيشوف ولو مزرعهاش هيجى اللى بعده ويلعنه زى ما هو بيلعن اللى قبله.

احنا بقى مطلوب مننا بقى نعمل ايه غير المظاهرات والحركات اللى حركت الراكد والميت ؟....احنا مطلوب مننا التوعية ...والله العظيم بس التوعية واذا كان خطباء المساجد وشيوخ الفضائيات شافوا وسكتوا فاحنا جيل مش ممكن يسكت ويشوف حد بيبيع صوته اللى هو المفروضامانة بكيلو سكر وازازة زيت او بيفرط فى الامانة اصل وفصل.

خلاصة الكلام الانتخابات قربت ومطلوب مننا لله وللوطن شوية تعب .


رغبة ملحة


نفسى اشد البتاعة السودة اللى ع القميص دى

هناك 5 تعليقات:

مصري جدا يقول...

شد يا عم ولا يهمك

بس تفتكر هيحصل ايه بعد ما تشد؟

هتلاقيه رابط رزم الفلوس وعاملها كرش مثلا؟

أحمد الصعيدي يقول...

اللي نفسهم يعكملوا حاجة ومش عارفين بيشجعوا


واحنا وراهم

صفــــــاء يقول...

انا أطنش .... أذاً انا مش موجود

قلم رصاص يقول...

أكيد البنطلون هيكون في خطر

شد شد اشمعنى انت

!

^_^

حلم بيعافر يقول...

والله شكلكوا عايزين تشدوها برضه

منورين ياللى هنا