الاثنين، 24 مايو، 2010

أيها الإخوة المواطنون...


أيها الإخوة المواطنون...الجملة الشهيرة للسيد الرئيس الرئيس المبجل المحترم اللطيف الظريف محمد حسنى مبارك اللى عادة ماتتلوها عواصف التصفيق الهستيرى تباعا وتفصل هذه العواصف جمل أخرى كهذه الجمل( كرامة المصريين من كرامة مصر..ولا تهاون مع من يسيء لأبنائها- مصر لا تقبل اي مساس بأبنائها )وطبعا ينفض المولد بهتافات يظن الرائى ان حناجر الهتيفة وقلوبهم ستنخلع معها ومفيش مانع من البوس والأحضان بس عن بعد طبعا.

النظام المصرى رأسماله الخطب والتصريحات وسنته فى الحكم هى التفريط.ورث النظام المصرى زعامة مصر لأفريقيا من زمن عبدالناصر اللى ساعد ودعم معظم الثورات فى دول القارة ألى ان نالت هذه الدول استقلالها وطبعا ردا للجميل كان ولاء الدول دى قلبا وقالبا ولاءا خالصا لمصر عبدالناصر -على الطلاق بالتلاتة كانت الدول دى ولائها لينا قلبا وقالبا-المهم بدأ النظام المصرى تحت قيادة السادات ومن بعده مبارك فى التفريط فى هذه الزعامة إلى حد إاننا نسينا إفريقيا تماما لكن لم ننسى إننا اتنح وابجح خلق الله على هذه الارض وفى ظل ازمتنا مع دول حوض النيل وفى ظل اتفاقياتهم واجتماعتهم اللى بتحصل من غيرنا بيخرج فتحى سرور فى لقائه مع رئيس وزراء كينيا ويقول أ علاقاتنا مع دول حوض النيل هى علاقات عائلية.

هو بغباوته ...وبوشه العكر...نفس النظام اللى كان رأسه الرئيس المؤمن انور السادات كان وارث زعامة الأمة العربية كلها وحبها كمان...زعامة وحب ...فيه أجمل من كده؟-والكلام ده ظهر فى 73 وغيرها من المواقف والمهم هزت العلاقة دى اتفاقيات كلنا عارفينها وتواصل الاهتزاز والعك فى عهد الرئيس البطل محمد حسنى مبارك لحااااد ماوصل اليوم اللى النظام المصرى حط راسه براس قناة فضائية عربية .

مشكلة المياه ومشكلة اهتزاز العلاقات المصرية العربية من المشاكل المصنفة فى خانة الامن القومى والتفريط فى عمق مصر الاستراتيجى والمشكلتين دول زيهم زى حكاية الحدود مع غزة بالطبط ...بنفضل نتنازل نتنازل لحاد مابيبقى شكلنا زى الزفت وفى الاخر يملى علينا اللى مفروض نعمله من بره...يعنى نفرط فى غزة وشعبها ونفقد سيطرتنا عليها وعلى حدودها ونيجى فى الاخر نبنى جدار فولاذى كاننا اسرائيل تانية بتحاصر وبتجوع شعب اعزل .

وعن كرامة الانسان المصرى حدث ولاحرج سواء جوه او بره والكل عارف ايه اللى بيحصل فى المظاهرات والكل برضه عارف سكان العشوائيات شكلهم عامل ازاى والكل عارف المصريين بره بقوا بيتعاملوا ازاى .....المصيبة ان الكل عارف وساكت او بمعنى ادق عااااااجز قدام نظام بلطجى بيفرد عضلاته فقط على المواطنين ...بس على المواطنين بس...أسد على وفى الحروب نعامة...بالذمة حد فتح بؤه لما العساكر بتوعنا اللى ع الحدود مع اسرائيل بيضربوا بيطخوا زى العصافير؟...حد فتح بؤه؟!!!....احنا بلد مالهاش سيادة الا على مواطنيها فقط.

الحديث عن مصر وعن السيادة المصرية حديث ذو شجون ووقعه مر جدا على نفس المصرى -المنتمى لمصر وليس للنظام-وغالبا مابينتهى الحديث لحالة احباظط شديدة.مؤخرا اتفرجت على وثائقى بيحكى عن التصرفات البشعة اللى مارسها الصهاينة فى 67ضد الاسرى المصريين وتابعت حملة قام بيها بعض المدونين وقالوا مش هنسيب حقنا...مش هنسيب حقنا يعنى هنطلبه...هنطلب حقنا من مين ومين هيتحرك معانا ويجيبلنا حقنا؟...النظام الحاكم بحزبه وحكومته؟...,ولا الرئيس المخلص؟...ولا هنطلب حقنا من المجتمع الدولى ؟...ولا هنطلبه من الصهاينة؟

الحقيقة الموضوع برمته كده بيفكرنى بكلام الدكتور زويل عن اصلاح التعليم فى مصر وغالبا الدكتور زويل لما بيجى يتكلم فى الموضوع ده دايما وابدا بيقفز على اهم معوق لاصلاح التعليم فى مصر وهى النظام الحاكم.

انا اخيرا بشكر رجال الامن والشرطة قاموا بدور كبير جدا فى المهرجان ده ومصر كلها بتحبك ياكابتن.

هناك 11 تعليقًا:

sal يقول...

انظمة الاستبداد هى أس البلاء
وأى كلام وحواديث ثانية تبقى
" ملهـاه " وتضييع وقت

لك تحيتى وتقديرى

ليس فقيرا من يحب يقول...

واييييييييييييييه
عمال تنبح فى صوتك ليه
ولا سامع ولا حد فاهم
واللى يتكلم
اخييييه عليه
واييييييييييييييييييه

ههههههههههههههههههههههههههههه
يارب تكون بخير يا تميمى

فتاه من الصعيد يقول...

في محاميين قاموا برفع دعاوى امام القضاء بخصوص الاسرى

بالنسبه لنفوذ مصر المفقود ... فمع الاسف ادينا بندفع تمن انشغال النظام بقضايا التوريث والخوف ع الكرسي ... هنجوع ونعطش :(

تحياتي

د. ياسر عمر عبد الفتاح يقول...

مبقاش بياكل معانا الكلام ده
قال كرامة المصريين قال

هأو

قلم رصاص يقول...

كرامة مصر بتوجعنا كلنا

بس ربك لما يريد احلامنا هتتحقق اكيد ان شاء الله

حلم بيعافر يقول...

sal

بنقوووووووووول كده

نورت

حلم بيعافر يقول...

ليس فقيرا من يحب

خلااااااااااااااااوة روح


نورتى

حلم بيعافر يقول...

فتاة من الصعيد


ياريت يكون بفايدة

نورتى

حلم بيعافر يقول...

دكتوررررررر ياسر

خطب بقى يا دكتور

منور

حلم بيعافر يقول...

قلم رصاص

ماش ياعم منير


نورت

كلام على بلاطة يقول...

تحياتى
================
27 مايو, 2010
يا اهل السوء المسيئون جبتم منين كل هذا السوء؟؟
ولا هذا ادمان لما تتعاطوه اعصابكم تنشط وتروق!!!
كما يراه اخرون ان هذا حقهم او ما تبقى لهم من حقوق
فانتبهوا(ان البشرية اسرة واحدة والسوء عقوق)
ومن يفعله يتساوى بمن يباع ويشترى فى السوق
اما الانسان فمكرم بعقله وما له من فضل وشروق
فاشرق بالخير وامنحه للاخرين وانشره بالبوق
حتى يشفى المرضى به فالسوء مثله مثل الحروق