الجمعة، 11 يونيو، 2010

بطييييييييييييييييخ...


بطيخة

إذا كنت من هواة التصديق والتصفيق فطوبى لك وللى خلفوك وأحب ازف لسيادتك البشارة واقولك ان دماغك ارتاااااح وايدك ممكن تتعب شوية بس انت ضامن فى الحالة دى ان مفيش ايد تانية ممكن تتمد على قفاك.بيانات وتوضيحات رجال النظام فى مصر شىء اقرب للنكت منه الى التوضيح وكشف الحقائق وااااخر البيانات البيان المتعلق بقضية تعذيب ومقتل شاب اسكندرانى اسمه خالد واللى قالت فيه الداخلية ان خالد مات بسبب اسفكسيا الخنق نتيجة بلعه لفافة فيها بانجو حاول اخفاءها عن رجال المباحث بابتلاعها والمطلوب من الناس انها تصدق وتعدى الموضوع زى ما بيعدى كل مرة.


منظر بغيض وخصوصا ان اللى بيطلع يمثله ناس كبيرة واساتذة فى القانون الواحد بيحتار ومبيعرفش يلاقيلهم سبب لاشتراكهم فى تمثيليات بايخة ومكشوفة زى اللى بيقوموا بيها فى كل مناسبة.يعنى انتخابات مزورة وفى نفس الوقت شلالات من المقالات واللقاءات اللى كلها بتتكلم عن نزاهة الانتخابات وعن نسب المشاركة اللى زادت عن السابق وكان الجماعة مش م البلد دى خالص وكانهم ميعرفوش الصناديق الششنة اللى بتتبدل وشغل التسويد والتقفيل والذى منه ...عاااااااااااالم بطيخ .

الكذب والاستعباط سمة واجب توافرها فى رجل الحكومة والنظام فى مصر فتلاقيه طالع بياكد ان امتحانات الثانوية العامة فى مستوى الطالب المتوسط مع ان العيال طالعين من لجان الامتحانات منهارين وبيعيطوا وتلاقيه ياكد حسن العلاقات مع دول حوض النيل مع انهم بيجتمعوا ويتفقوا من غيرنا ,الناس تنسى اللحمة وشكلها ويطلعوا يقولوا الاسعار معقولة ,امناء الشرطة فى الشوارع يبقوا دايسين ع الناس بالجذم وتلاقى اللى يشكر فى جهاز الشرطة ...صووووووورة بتبقى واضحة جدا وبتتوصف بشكل مالوش دعوة بيها نهائى.

كل حاجة فى البلد تحت السيطرة حتى لو الدنيا بتولع هما هما الكلمتين المحفوظين الخالدين خلود المسئولين المصريين فى اماكنهم وعلى كراسيهم لحااااااااااد ماريحتهم طلعت وعفنوا واكل الدهر عليهم وشرب وشخ(الوضع تحت السيطرة وكله راجع لحكمة السيد الرئيس),وكله الا حكمة السيد الرئيس وعظمته وجلاله ...الراجل متحكم ومسيطر ...اليهود يطحنوا غزة باللى فيها ويساوها بالارض وهو متحكم ومسيطر ...امريكا تدخل العراق تجيب عاليها واطيها وهو متحكم ومسيطر...حسن نصر الله يدخل الشارع المصرى ويكتسب شعبية وارض وهو متحكم ومسيطر...اردوغان يدخل كل بيت مصرى وعلم تركيا يرفرف فى الشوراع وهو متحكم ومسيطر!!!

حد فاكر الحرامى بتاع رشوة مرسيدس؟طب حد فاكر اسلام نبيه بتاع قضية هتك عرض عماد الكبير؟طب حد فاكر احنا خدنا صفر فى ملف تنظيمنا لكاس العالم2010ليه؟طب حد فاكر قضايا هتك العرض فى الشوارع اللى اتعرضلعا بنات من قبل رجال الشرطة والمخبرين؟طب حد فاكر اسطول الحرية؟طب حد فاكر مصر كان موقفها ايه من الحرب على غزة؟طب حد فاكر موقفنا من حرب لبنان الاخيرة؟طب حد فاكر هو اتغدى ايه امبارح؟...هى دى الحياة فى مصر كل بيعدى رغم ان الوضع بيبقى مقلوب والصورة مغلوطة كله بيعدى والموظف بينزل الصبح يعكنن على اى حد يقع تحت ايده والشيخ فى الجامع بيقول نفس الكلام اللى بيقوله من عشرين سنة ومالوشس دعوة باللى بيجرى حواليه والناس نازلة الصبح وراجعة اخر النهار وفى ايدها كيس فيه طماطم والتانى فيه بطاطس بعد معركة فى المواصلات ومحدش بيحط فى دماغه اى حاجة والاكادة بناخد كل خازوق واخوووووه وتلاقى واحد زى جمال عبدالحميد طالع يقولك احنا اتغلبنا عشان المعلق كان وحش.

هناك 15 تعليقًا:

GiGi world يقول...

غلطانين مش يقولوا مات موته ربنا


يااخى ماتصعبش الامور ربنا كتبله يموت كده


واحنا نعيط ونسوط على سكوتنا اللى مالوش اخر


بجد الصوره بشعه بشعه بشعه
ربنا يرحمه وينتقم من الظلمه

GiGi world يقول...

على فكره انا برده مش كدابين ماهو مات باسفكسيا الخنق من الحكومه ومن الظلم والظلمه

مي يقول...

ملعون ابو دى عيشة ايه الذل للى احنا فيه ده
والله حررررررررراااااااام
هنلاقيها من الكوسة ولا البطيخ

Lyssandra يقول...

طيب كانوا يكذبوا كذبة تتصدّق
خنق إيه ؟؟؟؟

يابني ده شكله داخل في مترو

وبعدين هو في الحاله دي واحد من 2
إما انه مجرم وهرب فعربية خبطته والمخبر حاول ينقذه فمالحقش بطيبة قلبه

أو إنه مجرم خطير أخطر من الاحتمال الأول ولما حاولوا يقبضوا عليه شرّح نفسه وقال هاوديكم في داهيه واتبلّي عليكم بس مالحقش عشان اتخنق

شوفت ازاي ؟؟
كده بقي يبقي مات مخنوق

وحسبنا الله ونعم الوكيل

yasmina يقول...

هاااااااااى
ازى حضرتك سعيدة انى رجعت ازرو المدونة من تانى

وبجد اكتر حاجة عاجبانى فى البوست طريقته اى نعم هو كلام يودى فى دهية بس عادى احنا مش بنخاف ما احنا ال يعنى بلد ديموقراطى
هههههه

تحياتى دايما بجد رائع

أم الخــلـود يقول...

بصراحة حتى البطيخ ما سلمشي منهم .. الله المستعان .. تحياتي لك

أم الخــلـود يقول...

(حملة تضامنوا مع إسرائيل !!!)

أرجوا من المدونين الموقرين أن يضعوا شعار الحملة في الشريط الجانبي لمدوناتهم تضامنا مع إسرائيل !!

صورة الشعار .. في مدونتي كركر .. ويكتبون فوقها ..

(حملة تضامنوا مع إسرائيل !!!)

رابط المدونة

http://krkr111.blogspot.com

جعله الله في ميزان حسانتكم .. آمين

sun of free dom يقول...

ربنا ينتقم من الحكومة الكدابة دى
ربنا يرجم الشهيد ويصبر اهله

ميرا ( وومن ) يقول...

وبعد حرقة الدم والغيظ والحسبنة والتف علي كل الناس المقرفة دي

حالة من الغثيان والقرف والغيظ

................ وبعد

لا شئ ... لا شئ ... لا شئ

فالتعذيب سيصلك أينما كنت في المنزل ، في السيبر ، في الشارع ، في المظاهره

و كل ضحاياه موتي بإسفكسيا الخنق أو هبوط حاد في القلب

طب أنت فاكر الراجل اللي قتلوه في المستشفي الحكومي علشان شد مع الموظفة

أم الخــلـود يقول...

(حملة الجسد الواحد)

أرجوا من المدونين الموقرين أن يضعوا شعار الحملة في الشريط الجانبي لمدوناتهم تضامنا مع أمة محمد !!

صورة الشعار .. في مدونتي كركر .. ويكتبون فوقها ..

(حملة الجـسد الواحـد)

رابط المدونة

http://krkr111.blogspot.com

جعله الله في ميزان حسانتكم .. آمين

(ست* جنى* الحسن) يقول...

سلامو عليكو..
ربنا يرحمه ويرحمنا ويصبر امه ويأجرها خير فى مصيبتها ومصيبتنا.
اقول ايه فى الحكومة المصرية انت قولت بطيخ وانا بقول طبيييخ.
اللهم اضرب الظلم بالظلم
لك تحياتى

غير معرف يقول...

ثقافة الهزيمة .. حلوة يا بلدى

فى كتاب داخل مصر"Inside Egypt": أرض الفراعنة على شفا الثورة الذى صدر عام 2008 يقول كاتبه الصحفي الأنجليزي جون برادلي عن مستقبل مصر أنه على رغم من بعض النجاحات الاقتصادية ألا أن توزيعها تم على من أرتبطوا بالنظام فقط دون أن يصل ذلك لباقي الشعب مما أدى"زيادة الحنق" بين المصريين. ويشير الكاتب إلى رؤيته في زياراته المتكررة لمصر كيف مثلا أن عدة ملايين من الثروة المصرية تنفق لأنشاء المصارف وتقديم المياه للقرى السياحية والفنادق الفاخرة التي يستخدمها السياح الأجانب والأغنياء المصريون فقط "في حين يموت الألاف المصريين كل عام نتيجة تلوث المياه التي تصل لهم"...

باقى المقال ضمن مقالات ثقافة الهزيمة بالرابط التالى www.ouregypt.us

و لايفوتك زيارة صفحة من الشرق و الغرب فى نفس الرابط و به الكثير من المقالات الجيدة.

أحسن تـستاهـل يقول...

لاااااااااااا
ماينفعش نفكر في حاجة عملتها الحكومة،،
ما ينفعش الحكومة تعمل حاجة ونشغل مخنا،،
الحكومة تعمل واحنا نتفرج،، انما نفضل نقول طب ازاي؟؟ طب مين؟؟ وامتى؟؟ طب ليه؟؟ هو ينفع؟؟ طب شفتوا؟؟ كده برضه؟؟

هتلاقي ألف حل وألف مخرج وألف كلمة وألف تبرير

الحكومة موتت أمخاخنا ونفسياتنا وطاقاتنا

انا مش محبطة.. أنا بس أرفانة.. وآسفة اني بقول كده

ربنا يعينا ويعنك

مها ميهوووو

فتاه من الصعيد يقول...

اجدع ناس تتكلم..... واجدع ناس تنسى ..

المصريين ذاكرتهم ضعيفه ... والمسئولين عارفين كده فبيكدبوا ويعملوا اللي عايزينه وبيراهنوا على ضعف ذاكرتنا

تحياتي

حلم بيعافر يقول...

شرفتوا ونورتوا وارائكم وكلامكم يحترم ويقدر