الأحد، 20 يونيو 2010

كأس العالم



زى كل كاس عالم هتفتش فى ال8مجموعات عن مصر ومش هتلاقيها بس هتلاقى اللى يعوض وجودها ومش هتفتقد حاجة وزى ماجنابك متعود تلاقى فى منتخب مصر كريم العنصرين اللى بيهدى الفوز للسيد الرئيس واولاده هتلاقى مدرب منتخب كوريا الشمالية اللى واقع فى جموعة فيها البرازيل والبرتغال وكوت ديفوار بيقولك هنفوز من اجل ان نهدى الفوز لزعيمنا...وهتلاقى برضه المدرب اللى بيدير وكأنه معلم فى قهوة بلدى بيختار صبيانه بالجدعنة زى مايكون داخل عركة وهتلاقى اللى بيشتم فى المعلم فيكون رد الفعل ان الشاتم الفاسق الزنديق اللى مبيركعهاش مستبعد من بين صفوف المنتخب ومن جنة ولاد الريس.

صدقنى لن تفتقد اى شىء على الاطلاق وكان منتخب مصر حاضر بشحمه ولحمه وزى ماشفت قبل كده صلاة الامم الافريقية وصلاة كاس العالم للقارات هتشوفها برضه وان اختلفت السجدة وبقت مثلث على صدر حد زى كريستيانو رونالدو.

ده حتى يامؤمن استلهام روح اكتوبر فى المستطيل الاخضر هتلاقيها حاضرة مع الخضرا اللى لاعبيها بيتفرجوا على وثائقى معركة الجزائر قبل ماتشهم مع الانجليز وكانهم رايحين يحاربوا زى ماكنا بنصور لبعض اننا رايحين نحارب حتى لو كنا هنلاعب مدغشقر,ولو عايز تكمل الجو بتاع ماتشات المنتخب المصرى فمش هتحتاج غير اغنيتين تلاتة من شاكلة(مشربتش من نيلها)و(لو بتحبوا البلد دى)اللى هى برضه بتبقى نفس الشاكلة اللى مرطرطة فى التلفزيون المصرى فى وقت الانتخابات(.........),وطبعا طبعا اهم مكمل للجو ده هو استوديو التحليل اللى فيه حد يدوب بيفك الخط بيرجع اسباب الهزيمة كل مرة عدم الاعداد النفسى للاعبين وبيرجع اسباب الفوز فى كل مرة لمكالمات السيد جمال مبارك.

عزيزى المواطن -حتى لو كنت ممن يؤمنون بحرمانية الافتتان بالكفرة ومتابعتهم-ياللى مش قادر تهرب من الواقع المنيل بستين نيلة حتى فى احلامك ودايما محاصراك صور خالد سعيد ودايما شامم ريحة البارود فى الجو وكانك فى غزة اللى منغصة عيشة اللى جواها واللى براها ودايما حاسس انك قرطاس والبلد بتتقسم وعمرك ما كان لك نصيب فيها وحاسس ومتاكد ان الحكومة بتسرقك وبتدارى ع اللى بيسرق... اتفرج على كاس العالم.


اتفرج عشان تنسى....

هناك 3 تعليقات:

فتاه من الصعيد يقول...

هو بعينه بغباوته :)

انا موش بتابع لاني سامعه انه ممل...وفضلت التسليه بتصريحات وزاره الداخليه الكوميديه .... فهي اقل مللا واكثر حماقه..

تحياتي

ليس فقيرا من يحب يقول...

ههههههههههههههههه

ياعم محمد متشلش كل ده فى قلبك

عاااااااااااااادى

يارب تكون بخير

حلم بيعافر يقول...

فتاة من الصعيد\ليس فقيرا من يحب

نورتونا وشرفتونا