الخميس، 24 يونيو 2010

أنا بكره إسرائيل ...بس شغال معاها



تعرف واعرف مدى كرهى وكرهك لإسرائيل واشاركك وتشاركنى الشعور بالغثيان عند رؤية احد قادة الدولة المستفحلة المتوحشة السرطانية يدلى باى كلام من كلامهم البجح التنح وكانه يلوك بين اسنانه طفلا مضعضعا مهروسا.فى الدول المحترمة -بعيد عنك-الشعوب تقرر وتوجه من خلال الرأى العام-بعيد عنك برضه-وتصالح من تصالج وتعادى من تعادى ودى طبيعة عند الناس اللى بتحب وبتكره وخصوصا لو كان هناك اسباب للحب او الكره.عندنا بقى فى الوطن العربى الشعوب تريد شىء والانظمة تفعل عكسه تماما وعندنا فى مصر اللى بناها الحلوانى النظام الحاكم فيها بينال اكبر قدر من المديح من اسرائيل وتحس انه بيتلزق فيها وفى قاداتها.....متعرفش ليه الود والزيارات اللى مبتتقطعش لمصر عمال على بطال وكأنها بقت بلد اللى خلفوهم.


الناس فى مصر بتكره اسرائيل...مما لاشك فيه ان الناس فى مصر بتكره اسرائيل والكره ده اصبح من المسلمات فى حياة الانسان المصرى والعيل فى مصر بيتولد مصرى واهلاوى وبيكره اسرائيل وبيحب ابوتريكة وبيمانع ان عماد متعب يروح يلعب فى فريق فيه لاعب اسرائيلى وعشان كده نبيه الوحش المحامى الوحش رفع قضية وطالب فيها باسقاط الجنسية المصرية عن عماد متعب فى حالة انتقاله بشكل نهائى لستاندرليج البلجيكى اللى بيضم رامى جيرشون اللاعب الاسرائيلى...طيب والله المحاميين فيهم الخير اهوه بيرفعوا قضايا وبيعرفوا يعتصموا ويتظاهروا بس ماعتصموش يعنى لما الانتخابات اتزورت ومااعتصموش وطالبوا مرة باقالة وزير نقل فى عهده كل خمس دقايق قطر يولع ومااعتصموش لما احمد عز اهان وزير العدل فى مجلس الشعب وما اعتصموش وطالبوا باقالة وزيرة القوى العاملة اللى بتبوس ايد ستها ماما سوزان.


احنا بنكره اسرائيل ولا نود التطبيع معها وبنستنكر على لاعب من عندنا يروح يلعب فى فرقة فيبها لاعب من عندهم بس بنديلهم الغاز ببلاش وبنشيل انابيبنا على ضهورنا ونلف فى الشوارع ونقف طوابير وبنساعدهم لما يحبوا يحاصروا غزة وبنقفلهم منافذنا وعاملين معاهم اتفاقيات ومعاهدات وحاجات زى الفل. ليه الازدواجية دى ؟...مصر دولة صديقة وحليفة لاسرائيل ولا عدوة؟ نقدر نقول انها حليفة على المستوى السياسى وعدوة على المستوى الشعبى والتحالف على المستوى السياسى غير مبرر بالمرة واللى بنخسره من التحالف ده قد اللى بنكسبه 100مرة ده لو فيه حاجة بنكسبها اصلا والكره والعداء على المستوى الشعبى مبرر ومنطقى جدا والذاكرة مليئة بالمذابح للمدنيين وللاسرى والحاضر يعج باعمال بلطجة يومية.

الدولة صديقة والشعب عدو ...طيب ليه الدولة بتحاول انها تخلى الشعب هو كمان حليف؟...يعنى لو واحد شغال فى صناعة الملابس الجاهزة فى مصر وابنه ساله عن الاسرى المصريين اللى اتدبحوا وعن صبرا وشاتيلا وعن بحر البقر وابوه جاوبه بان دى مجازر من كيان همجى اسمه اسرائيل وبعدين نزل الشغل ولقى قدامه مواد خام مكتوب عليها صنع فى اسرائيل...هيعمل ايه؟....هو فى الواقع مبيعملش حاجة وبيفضل شغال وتقريبا ضميره مش واجعه ...اقدر اقولك ان الراجل ده مريض نفسى...الدولة حولتنا لمرضى نفسسين. طب افرض الراجل ده جه عليه يوم وضميره وجعه هيعمل ايه؟....يسيب الشغل ويلف يشحت فى الشوارع؟...ولا يرفع قضية على الحكومة...ولا يطلع على كوبرى قصر النيل ويشنق نفسه؟

جاوبنى يامؤمن عشان انا تعبت

هناك 8 تعليقات:

مي يقول...

اكيد كلنا مش مع لتطبيع مع دول لان القائمة السودا بتاعتهم اكبر دليل
اه الدولة حولتنا لحلييييييييف كاننا زى البقر للى بندور وخلاص
زى حكاية خالد النبوى الراجل طلعوه جاااسوس شويةو هيعدموه
طب الراجل يعرف منين ان الولية اللى معاه دى لمؤاخذة اسرائيلية وطب فيهاا ايه؟
احن ليه مش عارفين نفصل بين لامور دى ليه بنتصرف بعمى واضح
بصرررراحة نبيه الوحش انا خلاص وصلت منه لاخرى الراجل ده فى اى مصيبة يتحشر مش بيتهد مابيصدق يلاقى جنازة ويشبع فيها لطم
للاسف احنا بقينا نبص لبره وبلاوينا اللى جوه مالية الدنيا
يمكن الاسرائليين ناس بلا ضمير ولا اخلاق بس بيعاملوا شعبهم برقى

فتاه من الصعيد يقول...

انه الانفصال بين ما يريده النظام وما يريده الشعب وما يفرضه النظام على الشعب

قهر ثم قهر

تحياتي

قلــ"بـــلال"ــــــب فارس يقول...

السلام عليكم
نحن الان نعيش فى دوامه لانعرف اين الصح واين الخطا
صلى على النبى
لان الحكومة مريضه نفسيا
لا تعرف الصحيح
وايضا تضحك على الشعب المصرى الغلبان
فلما تقول الحكومة المصريه عميله لاسرائيل يجى يقولك دا الريس مش بيروح لاسرائيل وهما زى الكلاب بيجوا اليه
اه والله احنا غلابيه وبينضحك علينا
طيب
المحامين
فقدوا الامل فى الحكومة
وايضا الشرفاء فى مصر فقدوا الامل فى الحكومة
ويعرفون ان مصر لن تقطع صلاتها بااسرائيل الا لما تتغير الحكومة
وبسبب هذا لم يذهبوا لمظاهرة بسبب الغاز
اما الشعب فيوجد كرامه لهم
فيمكن ان يوجد لعماد متعب شويه كرامه من الشعب وان يترك هذا النادى من اجل العروبه

(ست* جنى* الحسن) يقول...

سلامو عليكو..
انت قولت كلام كويس اوى
بس بالله عليك يا مؤمن قول لاب وعنده عيال الكلام ده
هيقولك :واحنا هنعمل ايه هنكون اجدع مالحكومة وبعدين انا عندى عيال عايز اربيها خلينا مشيين جمب الحيط من خاف سلم
ومن هنا اقدر اقولك :يبقى الوضع على ماهو عليه
ودوخينى يا لمونه
لك تحياتى

حلم بيعافر يقول...

مى

اييييييييييه يابنتى؟

ولية مين؟

دى موزة طحن

روحى طسى وشك بشوية ميه

شكلك غيرانة منها

حلم بيعافر يقول...

فتاة من الصعيد


فعلا هو القهر

حلم بيعافر يقول...

قلب فارس

ابقى قابلنى

حلم بيعافر يقول...

ست الحسن

فاكرة اغنية الشيخ امام بتاعة انا الشعب عارف طريقى؟