الاثنين، 5 يوليو، 2010

كن كويسا ترى الوجود كويس



المشهد الاول

اتنين موظفين من بتوع المجالس المحليةشعرهم مش مهذب خالص وقمصانهم مكرمشة ومغسلوش وشهم الصبح قاعدين على صندوق انتخابى فى مدرسة مطوحة فى حتة مقطوعة
-سلامو عليكو...رمى السلام وهو بيطلع بطاقته من جيبه
-وعليكم السلام يابنى...واحد منهم مد اديه واخد البطاقة وفضل يقلب فيها يمين وشمال...زميله قطع عليه تاملاته وقال خلاص يا استاذ صوتك اتحط
-........ابتسامة بلهاااااء
-مع السلامة....تخرج من فم الموظف مع مدة اديه بالطاقة
-.....ابتسامة اكثر بلااااااهة
-خير يابنى فيه حاجة؟
-عايز احط صوتى يابيه؟
-يستشيطان من الغيظ ويستعرضان اسنانا صفراء تعض شفاهمها...فى نفس واحد بيقولو...طب هتحطه لمين؟
-انا حر
-يابنى امشى بلاش فضايح
-..............................
-انت فاكر ايه يعنى؟!!...دى صناديق ششنة ياحبيبى والموضوع خلصان من امبارح بالليل
-بصوت جهورى...عايز احط صوووووتى
-يابنى...يقاطعه زميله مادا يديه باستمارة
ياخذ الاستمارة ويذهب وراء الستارة ويغيب شوية ويخرج يستعرض الاستمارة فى ايده وينظر كانه ينظر للكاميرات التى ترقب الحادث الجلل العظيم المتمثل فى الادلاء بصوته داخل الصندوق الشريف العفيف الطاهر ....يخرج من اللجنة مدفوعا بسيل من النظرات الحانقة الحارقة وبيرمى السلام على كلاب الحراسة اللى قدام اللجنة وتعجب من انه اول مرة يشوف فى حياته كلاب لابسة ميرى وبترد السلام.


المشهد الثانى
على الطبلية دكر العدتس مهيمن ومسيطر ولا صوت يعلو فوق صوته
-اقعد يابنى اتغدى
يجلس فى صمت مع انه مكنش بيدوقه ولاا بيحطه فى بؤه قبل كده
يتبادل افراد الاسرة اطراف الحديث ويقرا بين كلماتهم الشفقة واللوم والتانيب فتارة يرى اتهاما بانه نحس ووش فقر ينط من عين اخيه الاكبر وتارة اخرى تطرق الجمل التى لم تخرج من فم احد اذنيه(ماتشوفلك شغلانة يابارد-خلى عندك دم هصرف عليك لامتى-يافاشل ياللى معندكش دم-ماتكمل اكلك يابنى-يااصفر يا سوسة)


المشهد التالت
رغم حرارة الجو الشديدة ورغم تفنن الشمس فى قذف حرائقها فى داخله الا انه يغلق النوافذ وينسحب تحت بطاطينه التلاتة
.شوية ويتخنق فيقوم مش طايق نفسه
يقعد على الكرسى الخشب اللى ماسك نفسه بالعافية
يمد ايده لقلم رصاص وموس ويبدا يبريه
يتقصف
يبريه
يتصف
يبريه
يتقصف
ف الاخر رماه وراح اتغطى ونام تانى



المشهد الرابع
ماسك تليفونه وبيكلم
هو/قلتى لماما ولا لسه؟
هى/قلتلها
هو/بقلق شديد...خير؟قالت ايه؟
هى/مينفعش يامحد
هو/هو ايه اللى مينفعش؟
هى/موضوعنا مينفعش
هو/ليه؟
هى/..............
هو/طب وانت؟
هى/انت مترضاش انى ابقى قليلة الادبواكسر كلام ماما
هو/امك مش ربنا وبكره الحال يتعدل و.....
هى/محمد ياريت نرجع اصحاب زى الاول
هو/...................................................
يتمتم باشياء غير مفهومة وبيقفل التليفون من غير ما يقولها بحبك



المشهد الرابع
خطبة الجمعة شغالة والامام فى قمة الانفعال وهو قاعد فى وسط الجامع مش واخد باله من الخطبة خالص ويقلب فى وشوش الناس اللى حواليه وسط امتعاض شيخ عجوز نهره اكتر من مرة وقاله
-بتبص على ايه..التفت للخطبة يابنى واسمعلك كلمتين ينفعوك
جت نص الخطبة والامام ادى الفرصة للناس يدعو ربنا باللى عايزينه فكل الناس شرعت فى الدعاء ماعدا هو...قام وقف بص لفوق بوش مفزوع وقعد تانى لحاد ما الصلاة اقيمت والصفوف بدات تتكون وفجاة لقى نفسه بره الجامع من تدافع الناس
كان فيه صفين بره على حصاير وقش ...بقى وراهم برضه
وقف فى الشمس لحاد الصلاة ما انتهت
الناس صلت وخرجت وهو واقف زى تمثال من تلج عمال ينز عرق بشكل هيستيرى
المكان خلا تمام من الناس
وهو لسه واقف


المشهد الخامس
على قهوة جنب الرصيف قاعد رجل مسن شعره ابيض ومفيش فى راسه او دقنه شعراية سودة واحدة بيقلب كباية شاى قدامه وبيفتح الجرنان اللى متعود يشتريه من 20سنة واللى متعود يقراه فى نفس المكان
صدر الصفحة الاولى صورة شاب شنق نفسه على كوبرى قصر النيل
-استغفر الله العظيم...مات كافر
-بيقوله ده انتحر عشان مالاقاش شقة يسكن فيها هو ومراته
-ادى اخرة الظلم..تلاقى عمله اسود ومهبب عشان كده نهايته جت سودة
-الناس خلااااااص مش طايقة روحها ربنا يصبرنا ع العيشة الطين دى
-ياضنايا يابنى!!
-الحق ياعم محروس...مراتك بتولد
الراجل العجوز لسه باصص ع الصورة وفى ودنه تعليقات الناس اللى حواليه عن الشاب ..بيمصمص شفايفه شوية وبيرمى الجرنان وبينادى على القهوجى
صااااابر واحد زفت تانى يابنى

هناك 25 تعليقًا:

(ست* جنى* الحسن) يقول...

سلامو عليكو..
انت قدمت نماذج كتير
بس مش واضح ايه الترابط بينهم
البطالة.التمسك بحق التصويت.الاكتئاب
الفراق.....
لك تحياتى

رحــــيـل يقول...

هكذا حال معظم شباب مصر

ان لم يكن كلهم

تحياتى لك

essameldin يقول...

السلام عليكم

بص ياسيدى
هو العيب فى محمد بطل القصه ولا العيب فينا ولا العيب فى مين ؟
واضح ان القصه مبنيه على الشاب اللى انتحر من فتره على كوبرى قصر النيل
لكن بعد القصه دى ايه الحل؟
انت ياعم تعبتنى وخليتنى افكر واهرش تانى فى ادماغى ربنا يسامحك
تقبل تحياتى

المجاهد الصغير يقول...

السلام عليكم
للظلم نهايه ان شاء الله
والكبت والظلم والقهر والفقر الذى اجبرتنا عليه الحكومه ان شاء الله ليه نهايه
حسبنا الله ونعم الوكيل

فتاه من الصعيد يقول...

هههههههههه

يوميات شاب مصري

جميل ربط المشاهد دي ببعض... مختلفه لكن مترابطه

تحياتي

قلم رصاص يقول...

"يقعد على الكرسى الخشب اللى ماسك نفسه بالعافية
يمد ايده لقلم رصاص وموس ويبدا يبريه
يتقصف
يبريه
يتصف
يبريه
يتقصف
ف الاخر رماه وراح اتغطى ونام تانى"

ههههههههههههه

حلوه

دموع القمر يقول...

اول مرة ليا فى المدونة
انت عرضت نماذج موجودة بالفعل بتوصف الظلم والتسلط والاكتئاب والبطالة وغيرها
بس اكتر حاجة عجبتنى
المشهد التالت :):)
تحياتى

راجية الرحمه يقول...

بوست رائــــع
ووصف ممتاز
عشره على عشره

fL0weR-giRL يقول...

اولا هي ايه الصوره اللي حطيطها دي مش غريبه شويه
وهي دي مصر وحال اللي فيها لاتبديل ولا تغير
تقبل مروري
^(^

غير معرف يقول...

لا الصورة مش غريبة...
الصورة مكانها مناسب هنا..
الصورة بتقول كلام كتير كان نفسك تقوله..
و حاجات نفسك تعملها..
الصورة هي "حلمك اللي لسه مستسلمش" واللي "بتعافر بيه و معاه"...

:)

SAYED SAAD يقول...

هو بعد كده يبقي في اية
للأسف كتير كده اليومين دول والشمس اللي تتفنن في انها ترمى حرها جوه بطلك اهو بكتير من قسوة الناس
مشاهده عارف الجميل فيها ايه انها صادقة
كون بخير

SAYED SAAD يقول...

هو بعد كده يبقي في اية
للأسف كتير كده اليومين دول والشمس اللي تتفنن في انها ترمى حرها جوه بطلك اهو بكتير من قسوة الناس
مشاهده عارف الجميل فيها ايه انها صادقة
كون بخير

مجرد حلم صغنتوت يقول...

نماذج لأغلب الشباب
نماذج بتعبر عن حال البلد اللي بقى عجيب ده
معدتش عارفة اخرتها ايه

حلم بيعافر يقول...

(ست* جنى* الحسن)

الترابط بينهم ان انا اللى كاتبهم

منورة

حلم بيعافر يقول...

رحيل

منورة

حلم بيعافر يقول...

عصام الدين

اهرش ياراجل اهو تغيير


نورت

حلم بيعافر يقول...

المجاهد الصغير

ادعى يا حج ادعى


نوورت

حلم بيعافر يقول...

فتاة من الصعيد

اى خدمة

نورتى

حلم بيعافر يقول...

قلم رصاص

عشان تعرف بس


نورت

حلم بيعافر يقول...

دموع القمر

ان شاءالله مش اخر مرة

نورتى انت والمشهد التالت

حلم بيعافر يقول...

راجية الرحمة

كويس انه عجبك

نورتى

حلم بيعافر يقول...

flower girl

اللى فى الصورة ده هو اللى انا قاصده

نورتى

حلم بيعافر يقول...

غير معروف


ايوووون هو ده

نورت ياللى محدش عارفك

حلم بيعافر يقول...

فيه حاجات تانية بعد كده

نورت

حلم بيعافر يقول...

مجرد حلم صغتوت

اخرتها خيييير ان شاءالله

نورتى