الثلاثاء، 24 أغسطس 2010

التكرار بيعلم الحمار...

البط يرقص فى المياه ويستحمى...


لو كان التاريخ بشر كان لطم وشق هدومه نصين.الحاجة الوحيدة اللى بتكرر نفسها من غير ملل او زهق ومع كده محدش راضى او ناوى-الا من رحم ربى-يتعلم.فى كل ماتش للاهلى والزمالك تلاقى الكورة-لله فى لله-تخبط فى قلبى دفاع الزمالك وتروح لمهاجم الاهلى والجون مفتوح قدامه عشان يحط جون فى الزمالك ويجرى يلف الملعب زى الاهبل ميت م الفرحة لان ده بيبقى غالبا اول جون بعد صيام عن التهديف لمدة تزيد على ال3شهور...ودى حكاية بتتكرر تقريبا كل سنة مرتين تلاتة رغم تغير اللاعبين والمدربين.

الاستقواء يالخارج على الداخل الطريقة المعشوقة لدى ملوك الطوائف فى الاندلس زمان فى اثناء خلافاتهم مع بعض بيابى حكام العالم العربى حاليا الا انهم يكرروها بالمللى مع نها زمان انتهت بزوال كل من استقوى بالغريب على القريب بس هنقول ايه بقى الغباء المتاصل فى كراسى ودوائر الحكم العربية حاجة صعبة لدرجة انهم مستحيل يتعلموا حاجة غير انهم يوطوا ويدوروا لكل ماهو امريكى مسير بامر صهيونى ونفس الصدمة والحسرة بتاعة بعض ولايات الاندلس المفككة لما كانوا بيلاقوا ان اللى محاصرهم جنبا الى جنبا وكتف بكتف مع الاسبان هما ملوك مسلمين هى نفس الصدمة بتاعة شعوب الدول العربية اللى بتقع لما بيلاقوا ان اللى بيسهل وبيسرع وقوعهم دول عربية شقيقة بينهم رابط اسلامى ورابط عروبى...

زمااااااااان غرناطة فضلت تستنى المدد من مصر والشام اكتر من 300سنة وفى كل يوم من ال300سنة دول بتصحى غرناطة على تهديد جديد من قشتالة وعسكرها...مرة يهددوا بانهم لو لقوا حد عنده كتب بالعربى ولا بيقرا او بيكتب بالعربى هيولعوا فيه وفى كتبه ومررررة يهددوا بانهم لو لقوا واحد بيمارس اى طقوس دينية غير طقوس المسيحية تبقى ليلته مش معدية ومررررة يهددوا ويتوعدوا اى حد يطبخ لحمة يوم الجمعة ومرررة يقولوا انهم هيلموا كل شباب غرناطة ويخصوهم وغرناطة صابرة وراضية ومستنية الفرج اللى هو عمره كان جاى ونفس الوضع بيتكرر حاليا فى فلسطين اللى مستنية الفرج هى كمان ومستنية الدعم من مصر والشام...مستنيين الدعم من بلد بتعامل العرب زى الجرب بالظبط وبتعتبر العرب غربااااء وفى نفس الوقت بتفرش الارض ورد فى وزارة خارجيتها لمرضعة ابليس ورئيسها كل يوم والتانى مع انت النتن ياهو بيحكى وبيتسامر....

مش معقولة كل حاجة بتتكرر بالمللى فى كل الاتجاهات ومع كده محدش بيحاول يغير مسارها واخر حاجة بتقول كده اننا فى فات علينا 3رؤساء جمهورية كلهم بعدوا عن الكرسى غصب عنهم والرئيس الحالى هو كمان مش عايز يسيب الكرسى بمزاجه وقاعد واعتقد والله اعلم وانا مكشوف عنى الحجاب انه هيودعنا وهيرحمنا من طلعته البهية وهو ع الكرسى عشان يروح ينغص فى الميتين بعد ما ربنا يتوب علينا

لكل شىء مقدمة واللى فات ده كان تمهيد لشىء اخطر واكبر...نفس الوقف اللى وقع فيه خاله من عشريييييييييين سنة وقع فيه الاستاذ محمد(سنتين)فى نفس المكان فوق السطوح جنب السور ورا عشة الفراخ وفى نفس الوقت اللى الشمس فيه بتتعامد على الارض استفرد دكر البط بمحمد وفضل ياكل فى رجليه ومحمد فضل يصرخ مع انى كنت حاكيله ع اللى حصللى من عشرين سنة وكنت حاسس انه هيحصله بس لا احساسى عطل القدر ولا خوفه من البط منعه من الوقوع فى الموقف ده.....

بس محمد مسكتش زى خاله وراح لاخته روان (5سنين)وحكالها ع اللى حصل وبما ان روان شرانية زيها زى بقية البنات اللى فى سنها فقررت تتعامل مع الموضوع بحزم واصدرت فرمان بان التار لابد منه وقالت ان دكر البط الاثم عمره خلص وفضلت تجمع المعلومات عن الدكر المغير المعتدى وفضلت تدرس رحلته من اول ماكان بيضة لحاد مابقى دكر بط ولفت انتباهها حاجة اعتبرتها غريبة لما جت تقارن صوته وهو كتكوت بصوته وهو دكر بط وباغتها سؤال ارقها وعكنن عليها عيشتها لانها ملقتلوش اجابة عند اى حد سالته من العيلة....هو الكتكوت الاصغر الصغير الجميل اللى بيقول سوسو سوسو لما بيكبر بيجيب الصوت ابن ال......ده منين ؟!!!

انا اقولك ياروان رغم انك مسالتنيش وده طبقا لمخططك الدنىء اللى بتحاولى فيه تهميش دورى كمفكر العيلة الاول...الكتكوت الاصفر الجميل ده الصوت ابن ال....اللى انت متضايقة اوى منه موجود جواه بس هو بيحاول يتجمل ويعمل سوسو سوسو عشان يبان برىء ويعصب علينا ونجيبله ميه كل شوية ونحميه زى بالظبط البنات فى مرحلة ماقبل الزواج ...عمرك شوفتى بنت بتعطس بره البيت ياروان؟...انا شفت فى النمدرج قبل المحاضرة اثناء الهرج والمرج واحدة بتعطس حسستنى انها ملاك وفضلت طاير احلم لولا وجود ابن خالتها اللى قاللى انها لما بتعطس فى البيت بتوقع اللصور والبروايز اللى متعلقة ع الحيطة ولما شفتها بعد كده بتاكل شيبسياية على اربع قضمات تخيلتها وهى فارشة فى البيت بالحلل فى وسط الصالة ومشمرة ايديها الاتنين وكانه اخر اكلها....

بعدنا عن الموضوع بس كان لازم من تفسير صوت الكتكوت الاصفر الجميل لما بيكبر بيجى منين وازاى...المهم نفذت ارادة الانتقام فى دكر البط المغير واتسطح على السفرة متحمر بعد ما اتعذب بالغلى وبنتف الريش واتبادل مجحمد وروان النظرات الخبيثة المفعمة بروح الشماتة فى المتسطح الذى لاحول له ولا قوة ودى مش اخلاق فرسان على فكرة....وقليل من التامل والمقارنة بين مصير دكر البط اللى عضنى ودكر البط اللى عض محمد هنلاقى ان الحكاية متشابهة ومتكررة بس انا كان عندى اخلاق وروح رياضية ولما دكر البطط عضنى متامرتش عليه -برغم انه اتبح برضه-زى ماعمل محمد.


هناك 6 تعليقات:

мαησηα يقول...

ههههههههههههههههههه

انت بجد مشكلة يا تميمى والله العظيم

بالف هنا وشفا دكر البط

عقبال ياااارب ما ربنا يفرحنا

بالزمالك ف يوم من زوات الايام :(

قلم رصاص يقول...

وتمضي الأيام والسنوات.......
ويطفو على سطح الأحداث دكر بط مفتول العضلات ترجع أصوله لبيضه تايهه من الدكر المغتال عند سفح الطبليه منذ سنوات.. عاد هذا الفارس المغوار حالفان برا أبوه ل ياخد بتاره
ويا اما يعيش دكر بط بحق وحقيق وياإما نفس المصير بالاستشهاد على سطح الطبليه لكي يثبت للعالم ،،،،،،،،،،،،،،،

إن التاريخ بيعيد نفسه

----------------------

والله يابني انت تعرف تحكي لنا حواديت قبل النوم.. ابقي سجل الحاجات دي بصوتك وابعتهالي عشان لما يكون عندي أرق أبقى اسمعها وانام ههههههههههههه


كل سنه وانت طيب

حلم بيعافر يقول...

منونة

اتفضلى معانا

وانسى الزمالك

نورتينى

حلم بيعافر يقول...

قلم رصاص

مفيش حاجة تغلى عليك يازعيم

هاجى احكيلك لايف

نورتنى

غير معرف يقول...

howa enta 2olteli el 7ekaya de 2abl ma tnazel el post walla nazelto wana qara2to w ba3deen 2oltahali?!!!

ana etla5batt !

bs mawdoo3 el bent elli bte3tas de 7a2ee2i 3la fekra, Mo3zam el banat heek, byastane3na al re2a!

bs ana mish ba3tas 5aaaaales, shayef el re2a?
D: (;

حلم بيعافر يقول...

ana etla5batt !

وهذا هو المطلوب