الجمعة، 3 سبتمبر، 2010

كن كويسا ترى الوجود كويس



المشهد الأول
محمد قاعد يتفرج على برنامج لاحمد شوبير وابوه بيعدى من قدامه
-انت بتتفرج على الراجل ابن ال......ده ليه؟
*محمد وشه احمر وسكت
-ده راجل ابن ......انت مسمعتش ال......اللى كان بيقولها مع البنت الصحفية؟
-يابابا ده ..........
-ده ايه يابن ال..........انت كمان اقفل لاحسن اكسرلك دماغك
محمد قام مشى وخرج بره البيت وابوه لسه مكمل شتايم والفاظ اقبح من اللى اعترض عليها من احمد شوبير


المشهد التانى
محمد على سريره ومش جايله نوم ...قام شغل الراديو ...بالصدفة كان فيه برنامج حرب اكتوبر اللى كانت الاذاعة بتحتفل بمرور 40سنة على مرورها....محمد غرق فى افكاره وبدأ يحتار
-اول مادخلت المدرسة قالولنا حيوا العلم عشان ده رمز للوطن وكانت تحية العلم (الله اكبر...الله اكبر ...الله اكبر...تحيا جمهورية مصر العربية....تحيا جمهورية مصر العربية....تحيا جمهورية مصر العربية)يعنى كنا بنحيى بلدنا بعد كلمة الله اكبر علطول
-اخدت فى المدرسة ان اسرائيل عملت فينا مذابح وبلاوى متتنسيش(بحر البقر-قانا-دير ياسين.....................)
-شفت فى التلفزيون مشاهد من حرب اكتوبر وكان جسمى كله بيترعش وشفتت فى التلفزيون فيلم لمنى زكى كانت عاملة زى ماتكون قؤرصتها عقربة لما شافت كتابة بالعبرى على قزازة الميه اللى بتشرب منها وشفت فى التلفزيون حسنى مبارك وهو بيسلم على نتنياهو ومبسوط اوى وشفت وزير الخارجية المصرى ماسك وزيرة الخارجية الاسرائيلية من ايديها وخايف لاحسن تقع
-نزلت ادور على شغل ولقيت شغل ...هو صحيح بيستنزف 16ساعة من اليوم والمرتب فيه 600جنيه بس يللا اهو شغل....الغريب فى الشغل بقى ان كان فيه كراتين ومواد خام مكتوب عليها بالبونط العريض صنع فى اسرائيل بس محدش من ال30000الف عامل اللى بيروحوا زيى الشغل اتفزع لما شاف انه بيشتغل بمواد خام اسرائيلى...طب ع الاقل كانوا يقولوا اى كلمة اعتراض ولا اى حاجة تعبر عن ضيقهم عشان الست منى زكى متطلعش كذابة او بتبالغ او عشان هما ميبقوش منفصمين....


المشهد التالت
قدام لجنة امتحان طرق التدريس والمناهج محمد بيققابل منى وكان بقالهم كتير اوى مشافوش بعض
-ازيك يامحمد
*(محمد بيمد ايده عشان يسلم عليها)الله يسلمك ازيك يامنى
-لا يامحمد لبلاش سلام بالايد ماحناش ناقصين ذنوب
*محمد وشه جاب الوان وقالها ماشى ولا يهمك
دخلوا اللجنة وكانت اماكنهم قريبة اوى من بعض
منى مركبة سماعة بلوتوث من حت النقاب وبتسمع اجابات الاسئلة بعد ما قالتها لاختها ومحمد خد باله
*منى منى منى
-عايز ايه؟
*هو مش الغش حرام برضه؟!
-........................
المراقب خد باله من محمد وهو عمال ينادى على منى ويكلمها فافتكره بيغش وحظه الاسود ان وكيل الكلية كان بيمر وشافه هو كمان....محمد اتعمله محضر غش واتحرم من الامتحان ....منى قابلته بعدها وقالتله
-ادى اخرة الذنوب الكتير يامحمد...متبقاش تسلم على بنات تان


المشهد الرابع
محمد ساب الشغلانة اللى بتاخد 16ساعة من يومه ودور على شغل فى الحكومة...بعد ماجاب واسطة...عرف يجيب عقد مؤقت من وزارة التربية والتعليم...واشتغل وجه اخر الشهروقبض 250 جنيه وفضل يقسم المرتب
-ادى 100جنيه مواصلات
-وادى 50سندوتشات فول وشاى
--وادى 20وصلة النت
-وادى 20 جنيه عشان احلق
-وادى 120جنيه حق البنطلون اللى جبته جديد
-وادى 100جنيه امى طالباهم منى
-وادى 50جنيه اختى طلبتهم منى
-وادى ..........ايه ده؟ايه ده؟كفاية مصاريف كده عايز احوش حاجة من المرتب عشان اعرف اشترى شقة وشبكة ....عايزين نتجوز بقى


المشهد الخامس
قدام فرشة جرايد على ناصية الشارع بيكتفى محمد كعادته بقراءة العناوين من غير مايشترى عشان المرتب خلص
الاهرام
المؤتمر السنوى للحزب الوطنى
مصر حققت نموا اقتصاديا بمقدار 7.5%فى العام المنقضى
رفعنا مستوى الخدمات للمواطنين
أسسنا بنية تحتية لمجتمع اصبح قادر على اخذ الخطوات السريعة نحو التقدم
الاخبار
فى مؤتمر الحزب الوطنى السنوى
احمد عز يؤكد نجاح الحزب فى تأكيد زعامته وقيادته
مبارك يعد بمزيد من الاصلاحات
الجمهورية
حكمة الرئيس مبارك وراء جميل فى البلاد
الدستور
48منطقة عشوائية حول القاهرة وحدها و80%من المصريين تحت خط الفقر
ازمة فى مياه الشرب
اكثر من 50%من المصريين يشربون مياه مختلطة بالصرف الصحى(ميه+خرة)
الوفد
النظام المصرى ترهل وبدا غير قادر على تقديم اى شىء للبلاد

هااااااااااااااااااااا ياتشترى يا استاذ يا تفارقنا(وبرغم انه متعود على كده الا انه بيتحرج وبيمشى)


المشهد السادس
بعد ما محمد فشل فى توزيع المرتب على احتياجاته وبعد ما اتضح ان احتياجاته عايزة عشر مرتبات من عينة مرتبه فى بعض فقرر انه يساهم فى حل مشكلة العنوسة فى مصر وعلى طريقة مسلسلات التلفزيون قرر محمد انه يتجوز اربعة وقرر انه يشغلهم كلهم فى الشغلانة الاولانية بتاعة المناطق الصناعية الحرة اللى بتستفيد من اتفاقيات الدولة المشبوهة زى الكويز ....محمد بقى قرر انه مش هيشتغل ماهو خلاص مش محتاج وعنده 4 حريم شغالين وكل واحدة بتاخد 600جنيه و600مضربين فى 2 ب2400كل شهر واضف الى ذلك ان الاربع حريمات كانوا بيرجعوا من الشغل مهدودين ومتوجهين على السرير مباشرة لكن كان عند محمد مشكلة....ازاى هيقضى معاهم شهر العسل؟

-نفيسة/ارتاح ياخويا شوية دانت هلكان طول النهار منهم لله دودودودوو مبيبطلوش كلام واحدة تحكيلك عن اخوها الصغير والتانية عن امها والتالتة عن صاحبتها ...........
-محمد/بسسسسسسسسسسسسسسسسسسسسسس ايييييييييييييه؟ هلاقيها منك ولامن ال3بلاوى اللى جوه
جملات/ايوه ياحبيبى حد بينده عليا؟(سهوكة بقى ومياصة)
-رشا/وميكونش بينده عليا ليه؟(مع زغدة فى جنب جملات)
-مها/لاء لاء انتم فاهمين غلط ....هو هينده عليكو ليييييييييييه؟...ماتبصوا لنفسكوا فى المراية...جوزى حبيبى بينده عليا انا


طبعا محمد بيسيبهم الاربعة ياكلوا فى بعض وبيخرج يقعد ع القهوة

هناك 4 تعليقات:

حَـبآيـۃْ.بـטּـدۉڷ يقول...

هو محمد ده مفكرش ينتحر ؟!!

ده إيه المستقبل ده ؟

مواطن مطحون اكتر من كده مشوفتش !!

بس قولي هو اتجوز الأربعه بلووشي كده ولا ايه ؟ :(:(..

ربنا يعينا :)

حلم بيعافر يقول...

بصراحة


هو فكر


نورتينى

قلم رصاص يقول...

كلنا نطالبه بالانتحار رغم انه حرام

اه بلا وجع دماغ

هي دي عيشه ياشيخ

ههههههههههههههههه

حلم بيعافر يقول...

كلكم؟


مش معقول ياسيد مصر هتخسره مرتين

كل سنة وانت طيب