الثلاثاء، 7 سبتمبر، 2010

(لامساومة على الارض أو العرض)



ياترى انت فين وفين اراضيكى ؟...اتغيرتى اكيد ...الزمن مبيرحمش اى حد .لوشفتك هعرفك؟...انا عجزت شوية وتحت عينيا بقى اسود بس لسه عايش ومتمسك بكرامتى .محمد صبحى كان بيقول لامساومة على الارض او على العرض وانا مصدقه عشان كده رفضت اشوفك الاسبوع اللى فات لانهم كانوا بيساومونى على الارض وعلى العرض عشان بس اشوفك مرة وهيرجعوا ياخدوك تانى.

معندكيش قد ايه اللى بيحصل معايا الايام دى صعب قد ايه...فى بداية شهر رمضان زى كل سنة حاولوا يحسسونى بالدونية وبذلوا اقصى ماعندهم من مجهود فى سبيل انى اشوف الذل عشان كرتونة رمضان...شفتى بقى؟...عايزينى برضه زى كل مرة ابيع نفسى كيلو زيت وكيلو سكر بس انا قرفت اوى من نفسى والمشاهد اللى شفتها وكنت جزء منها فى السنين اللى فاتت منعتنى من انى استجيب ليهم المرة دى...

الكرامة شىء ميتعوضش...عارف انى اكتشفت ده متاخر اوى بس لسه فيه فرصة اصلح اللى فات كله...ولى العهد ماشى فى الشوارع يوزعك على الناس عشان يايدوه...اغبيا ميعرفوش انهم هيشفوكى المرة دى بس ولما ينجح ويوصل للى فى دماغه هيرميهم فى البحر وهيعدى من عليهم هو وعصابته...فاكرة لما المغول عملوا بكل الكتب اللى كانت فى بغداد معدية لخيولهم؟...هو دللوقتى عايز يعمل بينا معديةليه هو وعصابته عشان يوصل للكرسى وشكله كده هينجح بس حتى لو نجح مش هيشوف مننا طيب بعد كده...

انا تعبان اوى والاسبوع اللى فات لما عرفت ان المحافظات ومجالسها بيصرفوا الخرة فى النيل اغمى عليا...طب مخلفات المصانع ماش كنا مستحملين انما الخرة؟!...بس تصورى ان العطش قرصنى ورجعت اشرب نفس الميه تانى...ايوه العطش وحش اوى والجوع كافر ...مش عارف هفضل صابر لحاد امتى....من فضلك ابقى ابعتيلى حاجة من ريحتك عشان تصبرينى ع اللى انا فيه بس من غير مساس بكرامتى لانى مش هاستحمل اهانة تانى...

خليكى فاكرة
انا مش هساوم على ارض او عرض
وخليكى فاكرة برضه
من غير كرامة انت مش لازمانى


رسلة من مواطن مصرى الى (حتة لحمة)

هناك تعليقان (2):

فتاه من الصعيد يقول...

كل سنه وحضرتك طيب .... ومعذره لعدم متابعتي لمدونتك في رمضان :)

عيد سعيد :)

حلم بيعافر يقول...

كل سنة وانت طيب

البيت بيتك تيجى فى وقت


نورتينى