الخميس، 16 سبتمبر، 2010

مدخل فى التناحة

المعنى الفوتوغرافى للتناحة



التناحة فى اللغة

تنح...يتنح...فهو تنح والمصدر تناحة والقصد هو تصدير الوجه مع فغر الفم والعينين واستدعاء اقصى حالالت البلاهة والعبط والسماجة لترتسم على الملامح ماحية الحالة الطبعية للانسان.

بنت حرام

كجميع انجازات البشرية واختراعاتها واكتشافاتها المذهلة تنسب التناحة الى المصريين ولكنها تظل عائمة غير منتسبة لفترة زمنية معينة او لجيل من الاجيال.الكل يتبرأ منها برغم مزاولتها يوميا...والخلاصة انها مصرية ولكن بنت حرام


حالة محل دراسة ومتابعة
(الاستاذ عاصم مدرس اللغة الانجليزية)

مشهد المعلم الذى يوجه سؤال لتلميذ داخل الفصل مشهد مالوف فى سائر بلدان الارض وهناك احتمالان ينتهى بهما هذا المشد فاما ان يجيب التلميذ على السؤال او لايجد جوابا وفى هذه الحالة خجل من نفسه وينظر للارض ويحاول ان يبذل مزيدا من المجهود لكى يتجنب هذا الموقف المحرج ولايقع فيه مرة اخرى.فى مصر المشهد ينتهى بشكل مختلف ...فالطالب المصرى لو سال سؤالا فانه قد يجيب اجابة صحيحة او يطنش الاستاذ اصل وفصل بحكم انه ماسكه من ايده اللى بتوجعه اللى هى الدرس الخصوصى او يتنح...والتتنيح هنا المصيبة والمعضلة الازلية التى يقف امامهااى معلم عاجز وحائر لانه لايجد طريقة للتعامل مع طالب تنح فيستعوض ربنا ويلعن حظه الهباب الذى رمى به فى غياهب وزارة التربية والتعليم واضطره الى التعامل مع كائنات تستعصى على الفهم ويستعصى هو عليها(يانحلة لاتقرصينى ولا عايز منك عسل)....وغالبا فى النهاية يسلم امره لله وينظر بارف اللى الفصل ويقول لهم...انقلوا اللى ع السبورة ياولاد.
وقفت التناحة حائلا امام اداء المعلم واجبه ودوره فى العملية التعليمية فكانت سلاحا موجها الى ام عزائمه فزادته الضربة اصرارا على عدم الهزيمة والاستسلام فلن يهزم اكثر من مرة(الاهلى مبيتغلبش اكتر من ماتش فى الدورى كله)
تتقد عبقرية الاستاذ عاصم هنا ويحاول ان يوجه السلاح الذى وجه اليه من قبل طالب مفعوص الى المجتمع حتى ينعم بشىء من التشفى تجاه الاخرين.
كانت الضحية الاولى الذى عزم الاستاذ عاصم على فقع مرارتها موجه المادة.الرجل الطيب ذو الكرش والنظارة والبلوفر القديم المنتمى لموضة السبعينيات جاء فى زيارة مفاجئة للمدرسة وبحث عن الاستاذ عاصم حتى وصل اليه فى فصل 3-1فاستاذن ودخل...
-اتفضل يا استاذنا....قيام ولاد...جلووووس
يطلب الموجه بعض الكراسات ليرى بنفسه ما وصل اليه مستوى التعليم فى البلد...يتناول الكراسة الاولى ويصدم من كم الاستعباط الموجود بها فيرميها وياخذ اخرى تزيد الطين بله فينفعل ويصرخ فى وجه الاستاذ عاصم فلايلاحظ اى تأثر بدا على وجهه فيستمر فى الصراخ الى ان يتعب والاستاذ عاصم مازال على تتنيحه وبسمته المتشفية الصفراااء
تلى الموجه سايس الجراج الذى يركن فيه الاستاذ عاصم,فبعد ان فقع مرارة الموجه خرج منتشيا باحثا عن ضحية اخرى فوجد السايس ينط من شباك العربية طالبا حق الركنة فابتسم الاستاذ عاصم نصف ابتسامه وفتحه بؤه وبرق عيناه وادار المحرك وانطلق فاقعا مرارة السايس .انطلق باقصى سرعة الى البيت ليجرب سلاحه على زوجته العزيزة
-حبيبى روح قلبى شكلك تعبان خالص
*(فى سره/عايزة ايه بنت ام ابراهيم دى كمان؟...)اه والله زهقان وتعبان وارفااااااااااااان انت الوحيدة اللى حاسة بيا ياحبيتى(فى سره /ربنا ياخدك ياشيخة)
-طيب اقعد ريح لحاد ما احضر الغدا...عاملالك الاكلة اللى بتحبها..
*(فى سره/جتك نيلة فى اكلك اللى عامل شبه اكل المدن الجامعية)....طيب بسرعة
تدخل بالاكل وتبدا فى اطعامه بيدها وهذه طبعا هى المقدمة الكلاسيكية لطلب الفلوس...هنا تستغل المراة المصرية عبط الرجل المصرى وضعفه امام معدته ولكن كان زمااااااااااااااااان
-حبيبى كنت عايزة 500جنيه
*..................................
-الله عليك ياحبيبى...السكوت علامة الرضا
*.................................
-هتجيبهم امتى بقى؟
*.................................
-لم تحتمل زوجة الاستاذ عاصم نظرات زوجها وبؤه المفتوح دائما فرقعت بالصوت ولمت الجيران الذين اتوا جميعهم فاغرين افواههم متنحين تتنيحة مايعلم بيها الاربنا...وحينما استفسر البعض عن سر استخدام الاستاذ عاصم لهذا السلاح قال انه يسير على خطى العندليب الاسمر ولكن فى التناحة(يا قلبي قول للحب إبعد عن طريقي أي حب جديد ياويله من حريقي لو ح أصادف قلب مخلص مش ح آمن له وأصونه وإن ضحك في عينيه ح أضحك وأخدعه ويمكن أخونه ...)


فقعوك فقالوا

فاض الكيل بالحكومة المصرية وبزرائها وزيرا وزيرا ووزيرة وزيرة من صحف المعارضة فهناك انتقادات دائمة موجعة لعما جميع الوزارات وهناك تغطية واسعة للاستجوابات المطروحة تحت قبة البرلمان ايا كان مقدمها وقد كانت العادة ان مثل هذه الاشياء تكتم وتذرى مع الريح ويبقى فقط مايعرض على التلفزيون ....تلفزيون الدولة قبل مسلسل القناة الاولى
السيد رئيس الوزراء يكاد يجن من هذه الصحف فالبلد والحمدلله حققت نموا قدره 7.5%وجذبت استثمارات اجنبية ووفرت فرص عمل لابنائها وسعت لتحسين دخولهم...ماذا ينقصهم اذن؟!...ثم انهم يتدخلون فى اخص خصوصياته وينظرون له فى زيجته الجديدة ومن قبل ذلك ينظرون له فى طوله...ما هذه الطفاسة؟!....
وزير المالية ايضا مستاء من فرط الهجوم المستمر على سياسته رغم انه زاد حصيلة الدولة من الضرائب واستقطع الفلوس من جيوب الناس ووفر للدولة مالم يكن يوفره غيره....لابد ان الغيرة تاكل قلبهم من صلعته....
وزيرة القوى العاملة يتهموها بالجهل لانها لاتملك غير شهادة الاعدادية...جيل فاشل ميعرفش حاجة الاعدادية دى فيها البركة...
وزير الخارجية شد فى شعره ولطم من كتر ما راح يلم الشباب من على شواطىء ايطاليا....جننتونا


وزارة التناحة


انتهى الامر بجلس الوزراء الى الاتفاق على انشاء وزارة جديدة تحت مسمى (وزارة التناحة واجحراء تعديل وزارى طفيف باعفاء وزيرة القوى العاملة من منصبها وتعيينها وزيرة للتناحة وقد اتى هذا القرار بعد نقاش طويل فقد كانت وزيرةالاسرة والسكان هى المرشحة الاولى لهذا المنصب بس طلع ان وراها مؤتمرات وندوات.
شعبان عبد الرحيم
كره اسرائيل واحب عمرو موسى وبطل السجاير وشال حديد وحذر من انفلونزا الطيور ودافع عن الرئيس وانحاز للشعب فى وقت واحد والان هاهو كمل مسيرته فى طرح الاسئلة على لسان الشعب


يامتنحين فى الوزارة
ايه قصدكم يعنى؟!
دانا لسه شايل مرارة
والكبد لوعنى
لو بس اقرا العبارة
ماكنش كون ساعنى
انا اللى بفهمها طايرة
غلب حمارى خلاص
حرن ورفص...كسعنى
نص البلد بعتوها
والنص فى السكة
لو ليا سعر ياناس
كان البعيد باعنى
غلب حمارى خلاص
حرن ورفص...كسعنى
يااهل التناحة
الصدق حلو
ولو ليوم
واهى حتى تبقى استراحة
تشيلوا فيها الهموم
وتجربوا تحسوا
دا الدم نعمة ياناس
ملعونة ام التناحة

اغنياء القوم يسلبون الفقراء سلاحهم

دائما ماتاخذ هذه الطبقة حقها من الدنيا تالت ومتلت فلا تترك سلاحا متاحا امامها الا وتشهره فى وجه البشرية من اجل حفنة من المال او من اجل سلطة اوسع ونفوذ اقوى واشرس ومن المفروغ منه ان هذه الطبقة اثناء سيرها نحو مرادها تدهس ماوقع تحت اقدامها من البسطاءبدون ذنب او جرمواضح اللهم الا انهم جاءوا الى الدنيا خالية افواههم من الذهب.
المدهوسون من شعب مصر يستخدمون سلاح التناحة منذ وعيهم بمحيطهم وما يتهددهم دائما من زوابع واعاصير قاصمة للظهر...المهم انه كان سلاحا كان له اكبر الاثر فى بقائهم على قيد الحياة ول لم يجدوا او يوجد لهم هذا السلاحلكانوا طقوا من جنابهم وطرشقوا...
يبقى هناك فرق واسع شاسع بين استخدام السلاح من قبل المعسكرين فالغلابة يوجهونه لبعضهم البعض خارجين بذلك من مآزق الحياة اليومية ومواقفها المحرجة فياكلون نقوطا او يتكاسلون عن اداء واجب...اما الاغنياء فيوجهون السلاح للقوانين والغريب انهم فى كل مرة يظفرون بنجاح باهر ويزداد لمعانهم لمعانا وان كان زائفا ومن هنا انتشرت امراض الضغط بين عامة الشعب.

لوووو كنت بتقرا واتنقطت او زهقت او جالك شلل...فوحياة عيالك ياشيخ ماتدعى عليا انا مش ناقص مرض واستحمل خلااااااااااص فات الكتير مبقاش الا القليل

الفن فى خدمة الدولة وعلية القوم

تشجيعا للوزارة الجديدة غنت الفنانة السمراء المصرية الكح هذه الاغنية كمساهمة منها فى دفع عجلة التطور للامام

ياسلام ياسلام
لو نتنح كلنا
نبقى غاية الانسجام
والبلد تعلى وتعلى
وتجرى جريا للامام
ياسلام ياسلام
الجمال غطى المينة
م الصعيد ولحاد سينا
كل شىء ماشى تمام
ياسلام ياسلام
الحياة والدنيا بمبى
والزمالك ضاع وانبى
سودت ليلة حسام
ياسلام ياسلام
القرى فيها المجارى
وكل بيت واصلاله ميه
واتفاق مصر التجارى
اتعمل وبحسن نية
ياسلام ياسلام
غازنا كفانا وفاض
وابتدينا نرشه رش
فى سبيل الانسانية
ياسلام ياسلام
جدو خفرع
حيا خوفو
والوزير فكر وفكر
طقت الفكرة فى نافوخه
وادى ريسنا الاشارة
فاتوجد فى الكون وزارة
والوطن هو ظروفه

بعد عرض الاغنية على التلفزيون هبطت شعبية المطربة السمراء بشكل حاد فقد احس العامة انها مش بتاعتهم ومرت بعد ذلك المطربة باحداث عصيبة منها سجن زوجها فى قضية اهانة وزير متنح وحادث شد شعرها من قبل نسوة منتقبات فى مول تجارى كبير بالعاصمة.

الاصول التاريخية للتناحة

تضاربت الاراء واختلفت الرؤى وسادت الضبابية الموقف ولكننا نحاول هنا استعراض اصح الروايات التاريخية التى ترجع التناحة اللى اصولها وجذورها الحقة الاصيلة..
1-رأى الطبقة الارستقراطية
يعتبر (أبنوم)محرك ثورات العامة والرعاع فى العصر الفرعونى ضد الطبقة الحاكمة هو اول من تنح فى الوجود....فقد ساق أبنوم هذا التناحة بشكل مستفز غير مسبوق فى ذلك الوقت البعيد وطالب بحق ليس له وانما لطبقة اخرى فضلها الله الذى خلق الناس طبقات ووزع ارزاقه بحكمته وحده...واستدلوا على ذلك بفضائل الرضا والقناعة التى يروج لها رجال الدين.
2-رأى الاحتلال
(لن نستعبد بعد اليوم)صاحب العبارة هو اتنح من انجبت الارض فقد بلغت به الوقاحة الى حد وقوفه امام الخديوى ندا لند حيث بلغت به الوقاحة مداها وطال بان يتساوى الجميع
3-راى يونانى قديم
اخطأت الاهلة عندما سمحت ان يختلط ماءهم بماء البشر فنشأ من جلب عليهم المتعب.اخيل الذى كان لايخاف الالهة وكان دائما يهزأ بابوللو وزيوس وسائر الالهة وعلم البشر سلوكه هذا وتحول اليونانيون من شعب مسالم الى شعب متنح متبجح على الهته

فلسفة التناحة وعلاقتها بالعقل

برغم كونه سلاحا ويؤدى فى افلب الاحيان الى فقع المرارة الا انه يبقى فنا ويسرى عليه فى التحليل مايسرى على جميع الفنون الاخرى...
1-نظرية الالهام
اعتبرت التناحة شىء لا ارادى خارج سيطرة العقل البشرى
2-النظرية العقلية
اعتبرت التناحة سلوك عقلى يمارسه الانسان وهى فى كامل وعيه
3-النظرية السيكولوجية
-عند فرويد
التناحة هى سلوك ناتج عن كبت جنسى يعانيه المتنح ويظهر فى صورة بله مؤقت ويكون المتحكم فى هذه العملية اللشعور.
-عند يونج
يحمل الانسان اللشعور الجمعى لسابقيه من البشر وهذه القوة انتجت مايسمى بالتناحة





هناك 12 تعليقًا:

قلم رصاص يقول...

تنح تنح ياعم الحاج

!

GURU يقول...
أزال المؤلف هذا التعليق.
GURU يقول...

يا راجل وانت زعلان ليه
التناحة كنز لا يفني
ده لولا التناحة مكوناش عشنا من 7000 سنة
كله بيتنح لكله عشان يملص منه ومن مسؤولياته
ده حتى اسم مدونتك حلم لسة مستسلمش
مستسلمش ليه؟؟ عشان متنح وضاربها صارمة

فتاه من الصعيد يقول...

يا عيني شايل ده كله في قلبك وساكت :)

التناحه افيون الشعب المصري .... وبتجيب احسن النتايج

تحياتي

اسماء واحلام فى وجدانى يقول...

اللى يخليك تكتب كل ده يبقى انت اكيد عمرك ما هتستسلم بجد

قلم رصاص يقول...

فيه روايه انا باكتب فيها حاليا اسمها:

المتنحين في مصر




^_^

حلم بيعافر يقول...

قلم رصاص

حلم بيعافر يقول...

guru


وجهة نظر

نورتنا

حلم بيعافر يقول...

فتاة من الصعيد

شفتى بقى انا باستحمل ازاى

نورتينا

حلم بيعافر يقول...

اسماء واحلام فى وجدانى

انا كاتبها على 6ايام

كل يوم بكتب حتة

وخلصت اهى

مفيش حاجة مبتخلصش

نورتنا

حلم بيعافر يقول...

قلم رصاص تانى

اكيد رواية تاريخية هتحاول فيها سبر اغوار اصول التناحة

وحاجة جميلة ان باكورة اعمالك الروائية تكون تاريخية وبصراحة انا شايف ان الرواية التاريخية غواية عاتية الوقع على نفوس الادباء الكبار...يعنى جدو نجيب محفوظ كان مسمى 40 موضوع هيكتب فيهم روايات تاريخية بس مات ومكتبش غير 3 روايات بس(رادوبيس-كفاح شعب طنطا وعبث الاقدار)

ياترى انت هتعمل ايه يابن خالتى؟

ربنا معاك

ونورت المدونة وصاحبها واللى خلفوه

حلم بيعافر يقول...

قلم رصاص تالت

عايزك متنسانيش يعنى لو الرواية اتاخدت السينما انا اللى هاعمل اغانى الفيلم يااما والله العظيم ما هاخليك ترسملى اى غلاف لاى كتاب من بتوعى تانى