الاثنين، 13 سبتمبر، 2010

مدد يا أهلى مداااااد



الليل بيخلص وبيجى وراه النهار والنهار بيخلص وبيجى وراه الليل والشتا بيخلص والربيع بيخلص والخريف مبيفضلش علطول والصيف شوية وبيمشى...كله بيتغير وكله بيتبدل...الا حاجة واحدة ....حاجة تحس انها مستحيل تحصل اللى هى ان الاهلى يتغلب.

الاهلى بشهادة جمهوره بقى له 3او 4 سنين وحش وزى الزفت ومع كده بيكسب الدورى كل سنة وبيكسب الزمالك كل سنة وبياخد دورى ابطال افريقيا من وقت للتانى وساعات بياخد الكاس وكاس السوبر....مبيرحمش

فريق بيدربه حسام البدرى ومعظم نجومه بيشطبوا كورة وبقية الفرقة لسه عيال ومع كده بيكسب دايما...وحش وبيكسب...طب ازاى؟!...اشمعنه الاهلى كده؟!....حالة لوحدها بعيد عن سنن الكون يعنى؟!....معروف ان الوحش لايستمر ولو استمر بيبقى لفترة قصيرة وبعد كده بيقع....ده فيه ماتشات الفريق اللى قدام الاهلى بيبقى مهاجم طول الماتش وبيضيع ويجى الاهلى يقوم خاطف جون فى وقت غريييييييييييييب ولو مخطفش جون فى وقت غريب الحكم بيعديله جون اوفسيد ولا بيحسبله بلنتى وان طلع الحكم ندل وغد قاسى القلب والقريحة الفريق المنافس بيلف ويحط جون فى نفسه....حاجة مش معقولة ....دانا بشجع فرقة بتبقى مضيعة سبعين جون وتيجى فى اخر الماتش تتعادل او تتغلب.

مش المفروض ان حسن حمدى بيستغل عمله فى الاهرام لصالح الاهلى هو والخطيب؟!!....مصطفى بكرى لطم وقدم ورق ومستندات بتدين الاتنين ومفيش فايدة برضه....هما هما فى اماكنهم برضه ....مش المفروض ان عماد متعب ماشى على حل شعره من اول ما طلع؟....مش المفروض ان احمد السيد راجل مش تمام وبيقدم رشوة؟....مش المفروض ان جدو كذاب ومنافق وعلى الملأ؟!....مش المفروض ان فرانسيس شبه الكفار بتوع قريش؟!....امال اللعنمة مش راضية تنزل عليهم لييييييييييييييييييييييييه؟!!!....فيه بعد كده ايه؟!!!

مش ممكن ده حتى الواد اللى كان متخانق مع حسام البدرى رجع وباس دماغه ولعب وجاب جون....ده حتى احمد فتحى اللى كانوا بيقولوا مكسور جاب جون...طب لحاد امتى الكلام ده هيحصل؟!....الاهلى هيتغلب امتى؟وازاى؟وهل الحدث هيبقى حدث طبيعى؟....طب الفريق اللى هيكسب الاهلى كله هيبقى من البشر؟ولا هيستعينوا بكائنات فضائية؟ونضمن منين ان وائل جمعة ميجوعش وياكلهم بين الشوطين؟

زمااااان كانوا بيكسبوا عشان ابوتريكة شادد حيله شوية وبركات ربنا مديله شوية صحة وعماد متعب حظه ماشى انما دللوقتى بيكسبوا ليه؟...حجتهم ايه؟....مش لازم يبقى فيه سبب لكل نجاح؟....سبب نجاح الاهلى ايه؟....ادارة مشبوهة ولاعيبه مهنجة واعلام غوغائى اقرب لقعدات المصاطب فى عز الحر والناس عرقانة وريحتها وحشة والدبان ملموم عليهم ...حجتهم ايه؟....وحجة الفرق التانية اللى بتخسر دى ايه هى كمان؟

طب انا محدش فهمنى على الموضوع ده من زمان ليه؟....تسيبونى اطلع زملكاوى ليه؟...اشمعنه انا ابقى زملكاوى والعيلة كلها اهلاوية؟....مؤخرا صعبت على امى وابويا فشجعوا الزمالك معايا فى اول رمضان وفى اخر رمضان تعبوا هما الاتنين وقرروا يبطلوا....منك لله ياللى كنت السبب

هناك 13 تعليقًا:

أحمد الصعيدي يقول...

@السلام عليكم

طيب ايه العمل ؟

بس بيني ما بينك أنا مش هأكون مبسوط لو أخدنا بطولة بإيد حكم مرتشي أو إتحاد كورة باطل


كفاية اننا محترمين رغم حرق الدم اللي احنا فيه

ويا بخت مين بات مظلوم ولا بات أهلاوي

GURU يقول...

ههههههههههههههههههههههه منك لله قلبت عليا المواجع
انا زملكاوي بالوراثة واقسملك بالله والدي جاله الضعط بسبب الزمالك ومش بهزر ولا ببالغ لو قلت لك الدكتور قاله متتفرجش عالماتشات السهلة

مشكلة الزمالك في االلي جواه
اعضاء مجلس ادارة واخدينها جدعنة وجماهير غلابة مستنية اي انتصار ده غير ان الجهاز الفني عايز ينتقم من الاهلي بعد مشكلة صالح سليم الله يرحمه
تعرف انا لما بتفرج علي جون تامر عبد الحميد في الرجاء ولا مدحت عبد الهادي في الترجي بتصعب عليا نفسي لما اسمع المذيع يقول خامس او سادس بطولة للزمالك في الموسم ده
كان الواحد صغير بقي

تقبل تحياتي واسف لو وجعت دماغك

قلم رصاص يقول...

"ادارة مشبوهة ولاعيبه مهنجة واعلام غوغائى اقرب لقعدات المصاطب"

مفيش فايده فيك يابني والله مهما حاول حد يقرب منك ويفهمك ان الكوره مش كل حاجة في الحياه

عموما اللي زيك احب اقول له :

خليك في حالك

وفي النهايه : أسف على الازعاج

حلم بيعافر يقول...

احمد الصعيدى

لاحل ولاغيره

احنا نفضل كده

وتحلى بالقناعة

وفعلا زى مانت قولت كده بالظبط

نورت يابيه

حلم بيعافر يقول...

guru

اييييييييييييييييه الله يرحمك يازمالك

نورت يارفيق

حلم بيعافر يقول...

قلم رصاص

مستكتر علينا الكلام ليه ياعم؟!

فيه حد قالك ان الكورة هى كل حاجة فى الحياة؟!!!

بس الوسط الرياضى فى مصر اللى الكورة احتلت 99%منه ومن اعلامه فيه كل البلاوى اللى تخلى ميت بلد زى مصر يرجعوا للعصر الحجرى تانى

الناس اللى قبلك اخدوها بهزار وانا كنت بهزر بس سيادتك متعود لما تيجى عندى البلوج تحرقلى دمى وتمشى

ماله اللى زيى يا استاذ سيد؟

قلم رصاص يقول...

والله يابني ماباقصد كدا ابدا
ياتصدق يا انت حر

كل اللي عاوز اوصلهولك انك مهتم بالكوره فوق اللازم ومأزم الامور جدا فيها

وجود الاهلي كمنافس وند للزمالك عامل عندك دايما حالة ربكه وقلق بينتج عنها كل شويه زوبعه في فنجان

انا مش مستنكر عليك حاجة والله
عيب عليك تقول لي كدا عشان دا مش تفكيري ولانيتي وعمره هيكون

وان كنت فهمتني غلط فانا وضحت لك

وان كنت مصر تفهمني غلط فانا باعتذر لك رسمي

!

حلم بيعافر يقول...

قلم رصاص

ياسيد انت لسه شايفنى محمد بتاع عشر سنين فاتوا

دى مشكلتك بقى ماليش دعوة

والله العظيم انا مانا الشخص اللى انت فاكره
وعموما يعم انا غلطان وحق عليا

وقطع لسان اللى يزعلك من لغلوغه

غير معرف يقول...

yygrlieutsguicslmsie, justin bieber baby, cwuzpjg.

أبو حميد يقول...

وأخيييييييييييييرا عرفنا السبب
حيث صرح إبراهيم حسن أن أسباب نتائج الزمالك السيئة ....السحر
حيث وجدوا (عمل معمول لهم) فى غرفة اللاعبين
نياهاهاهاهاهاهاهاهاهاهاه

د. ياسر عمر عبد الفتاح يقول...

مهو طول ما إنت بتفكر بالمنطق ده مش هتعرف الأهلي بيكسب ليه

طب أقولك على حاجة توصلك للإجابة
اسأل ليه إنتوا بتخسروا
وليه كل فرق الدوري بتخسر

بس سيبك من البق بتاع الحكام واتحاد الكورة والكلام الفاضي ده
علشان محدش بقى مصدقه
مفيش فرقة هتفضل قرن بتاخد الدوري والكأس وبطولات أفريقيا بالحكام
مش معقولة يعني

"ادارة مشبوهة ولاعيبه مهنجة واعلام غوغائى اقرب لقعدات المصاطب"

الكلام ده قدم أوي

أقولك الجديد؟
معملوكم عمل :)
واسأل ابراهيم حسن

لو الزمالك يسيبه من الأهلي خالص
ويبطل يتكلم عليه
ويبص لفرقته
هيكسب وهياخد الدوري كمان
علشان الأهلي فرقته وحشة أوي
والزمالك أفضل بكثير

بعد الماتش يسألوا حسام عن التعادل
يقولك أصل الأهلي مش عارف عمل إيه

طب يا إبراهيم إيه رأيك
يقولك الأهلي فرقته وحشة ومحظوظ

يا عم هوه إنت بتدرب الأهلي ولا الزمالك؟

حلم بيعافر يقول...

ابوحميد

طب حد يعمل للاهلى عمل طيب

نورت يابوحميد

حلم بيعافر يقول...

د/ياسر عبدالفتاح


بالراحة عليا يادكتور شوية


انا بهزر ياجدع


انت قلبت جد كده ليييييييييييييييييه؟

نورت يادكترة