الجمعة، 24 سبتمبر 2010

اختار عنوان على ذوقك




معادلات

شهادة من معهد متوسط+10سنين لعب كورة=إعلامى كبير +عضو مجلس شعب+نائب رئيس اتحاد الكورة+صحفى
نص ساعة اسفاف+نص ساعة نكت بايخة+نص ساعة رقص=فيلم العيد حاليا بجميع دور العرض
صاحب مستشفى استثمارى+نضارة=وزير مستخسر يعالج مراته على نفقتها الخاصة
ضابط شرطة+حرز بانجو+2مخبرين مساطيل=تجارة مخدرات
لص تائب فى فيلم عربى قديم+منظر للسما وهى رايقة=راجل بجلابية+كشك سجاير
مؤخرة معتبرة+صدر حنين+مخرج مشتاق+منتج بكرش=فيلم سكس +كيس فيشار+اتنين فى اخر صف +اعلان مؤمن فى نص الفيلم
عائشة عبدالهادى+سوزان مبارك+مشيرة خطاب=دوار العمدة اللى قاعد فيه الست الهانم وصاحبتها والخدامة بتشوف طلباتهم
جمال مبارك+احمد عز+مفيد شهاب+يوسف بطرس غالى=ياحضرة العمدة ابنك حميدة حدفنى بالسفندية ايهههييييييى!!!


موضة

خريجى الجمامعات
من 10سنين سواقين تاكسى
من 8سنين تباعين
من 6سنين مندوبين مبيعات
من4سنين يا ع القهوة يا على شواطىء ايطاليا واليونان
من سنتين قاعدين ع الفيس بوك

البنات
بعد برامج قناة الناس لبسوا نقاب
بعد شوية زهقوا فلبسوا حجاب بس
بعد شوية باروا فقلعوا الحجاب
شوية وضميرهم وجعهم عشان قلعوا الحجاب فلبسوه تانى على بنطلون جينز

مصر
2006 اخدت كاس الامم الافريقة وغرقلها 1200فى البحر الاحمر وادانت حزب الله
2008اخدت كاس الامم الافريقية واستعدت للتوريث
2010 اخدت كاس الامم الافريقية وزورت انتخابات مجلس الشورى وهتزور الشعب


اقوال خالدة

وزارة الداخلية/بفضل توجيهات السيد الرئيس ورجال الشرطة البواسل الوضع تحت السيطرة
وزارة الداخلية/كان حادثا فرديا تبين ان صاحبه مختل عقليا
يوسف بطرس غالى /هههههههههههههههههههههه
مصدر مسئول/نرفض تناول صحف المعارضة للقضية بهذا الشكل
حسنى مبارك/لابد من دفع عملية السلام قدما بشكل جدى من الطرفين
نادى الزمالك/الحمدلله على الاداء ...ننتظر النتيجة الايجابية واسعاد الجماهير
حسام حسن/مش هعلق على الحكم النهارده عشان كلكم شفتوه
نادى الاهلى/اهم شىء فى النادى القيم والمبادىء
صفوت الشريف/مفيش حاجة اسمها توريث
عبدالفتاح القصرى/لا حياة مع اليأس ولا حياة لمن تنادى


سؤالين اعتبروهم تقويم

-كل مافتح التلفزيون الاقى خبر عن تفجيرات فى العراق وخبر عن اعتقال عدد من اعضاء جماعة الاخوان المسلمين...هى لا القنابل بتخلص فى العراق ولا الاخوان بيخلصوا فى مصر؟!...
-(رشوة مرسيدس-خالد سعيد-تزوير انتخابات مجلس الشورى)هى القضايا دى والقضايا اللى على شاكلتها مش قضايا امن قومى برض؟...طب نامت ليه؟...حاجة غريبة مع ان بنستورد فياجرا بشىء وشويات...


هناك 5 تعليقات:

د. ياسر عمر عبد الفتاح يقول...

هههههههههه
والله عندك حق

يمسيك بالخير يا متنبي
وكم ذا بمصر من المضحكات ,, ولكنه ضحك كالبكا

قلم رصاص يقول...

العنوان :

من فضلك احترس ، مصر ترجع الى الخلف

!

بيطرية ومش بايدى يقول...

انا المفروض
عندى نفى مؤقت من عمو البلوجر
بس قولت هاعافر واعلق
اقول العنوان
هو عادى وكل يوم بنقولوه بس انا المرة دى بقولها من كل قلبى
من صميم صميم قلبى
انها الكـــــــــــــــوســــــــة
او ممكن تقلب على ملوخية مفيش مشاكل برده كل بيطلع فى الغسيل
هم يضحك والتانى يحسر

فتاه من الصعيد يقول...

العنوان هو

يبقى أنت أكييييييييييد أكييييييييييد في مصر :)))

بس ده بوست ولا ملزمه مختصر فيها المنهج :))

تحياتي

حلم بيعافر يقول...

منورين يامصريين