الأربعاء، 29 سبتمبر، 2010

فوازير

فوازير زمااااان قبل هز الوسط وتقل الدم


شاب مصرى ربنا فتح عليه ولقى شغلانة فى الحكومة وبيقبض بسم الله ماشاء الله300جنيه حتة واحدة مطلوب منه عشان يتجوز شقة ومهر وفرح وشبكة وفتح بيت ...ازاى تقسم ال300 جنيه على كل الحاجاتت دى مع ملاحظة ان مينفعشس كسور يعنى ش عايز د يقول جنيه وربع او جنيه ونص ....

الكنيسة المصرية دائما وابدا بتقول انها مضطهدة وشاربة المر اللى فى الدنيا...والسلفيين مش عاجباهم احوال الناس وبينددوا دايما بالظلم والغش والضلال اللى وصله المجتمع....الكنيسة والسلفيين بيأيدوا نظام حسنى مبارك وبيفدوه بالروح وبالدم...طيب ميم مضطهد الكنيسة ومين وصل البلد للحال اللى مش عاجب السلفييين؟

من فترة مش بعيدة شباب المراكب والهجرة غير الشرعية -الوحشين الطماعين-اتمسكوا على احد الشواطىء فلما ابو الغيط راحلهم قطعوا البسبورتات المصرية...ليه؟

شاب مصرى غير الشاب الاولانى اللى ربنا كرمه ولقى شغلانة فى الحكومة...الشاب ده بيشتغل فى القطاع الخاص...بياخد مرتب 600جنيه...الشغلانة بتاخد من يومه 17ساعة....هينام امتى؟..وهياكل امتى؟....وهيتفرج على فطين وميشو امتى؟...ولو متجوز وعنده عيال هيشوف مراته وعياله امتى؟

بعد الخنادق حوالين المدارس والاسلاك الشائكة فوق الاسوار والتعذيب واوضة الفيران لم يستطع الوزير منع التزويغ ....ياترى ايه اللى بيخلى العيال يزوغوا من المدارس؟....

الطماطم بقت اغلى من البانجو...والعشرة جنيه حق كيلو الطماطم ممكن تجيب حتة حشيش تعملها خمس ست سجاير...مين اللى بيحدد الاسعار فى مصر؟

خالد سعيد بلع لفافة بانجو ومات زى ماقال المصدر المسئول....نصيحة اخوية/محدش يمشى بلفافات بانجو او ملخصات او كتب خارجية تانى....الدنيا بتتقدم والمحظورات بتزيد يوم ورا يوم....تقدر تتوقع لستة للمحظورات فى العشر سنين الجاية؟

(حرقان فى الزور-سخونة-شياط فى المناخير)...الشر بره وبعيد يعنى لو الحاجات دى كلها اتجمعت فى وزير مصرى...مين هو؟

هو ايه معنى انتخابات؟....واللى فى مصر دى اسمها ايه؟

الرئيس المصرى غالبا ما يستقبل الرؤساء المخلوعين فى شرم الشيخ ....تصرفات السيد الرئيس ياترى جدعنة؟...ولا بيعمل لقددام؟...ولا قلب الام؟



ترسل الاجابات على صفحة التعليقات ومن يتمكن من حل جميع الفوازير السابقة سيفوز بدعوة زملكاوى ساعة الفجرية



هناك 16 تعليقًا:

د. ياسر عمر عبد الفتاح يقول...

لا راحت أيامها خلاص
الإمتحانات والأسئلة والكلام ده
وبعدين أنا عمري ما كنت بحب الفوازير
ولا بحب أتفرج عليها ,, ده هطل ياراجل

وبعدين ده إنت نص أسئلتك إجابتها الصحيحة تودي في تلك المنطقة المظلمة الحارة خلف الشمس مباشرةً

N.B

مين قالك إن السلفيين مع حسني وبيأيدوه (بالروح) و(والدم)

نصيحة أخوية
لما تحب تعرف حاجة عن حد
ولما تحب تصدر أحكام شخصية ورؤى عصرية
متكتفيش بالقراءة (عنهم)
لازم تسمع وتقرأ (منهم)

بس كده

حلم بيعافر يقول...

د/ياسر

يادكتور انا مكنتش بفوت خطبة لمحمد حسان

ولا حلقة لحسين يعقوب على التلفزيون

وواضح جدا رضاهم هما وباقى التييار عن النظام

الانتخابات بتتزور وهما بيتكلموا فى النقاب

البلد بتتقطع زى صينية البسبوسة وبتتوزع على رجال الاعمال وهما بيتكلموا فى نواقض الوضوء

وهنروح بعيد ليه..افتكر ازمة قناة الرحمة ...محمد حسان ناشد مين؟

انا بقولك اشهر النماذج يعنى انما فيه غيرهم بالهبل

مش ادعاء للعلم ولا للفهم بس انا قريت وسمعت واتعاملت

نورت يا دكترة

فتاه من الصعيد يقول...

هجاوب ولو إن الزمالكاويه دعواتهم موش مستجابه :D

1 - الشاب الأول حله إنه مايفكرش بالجواز

2 - اللي بيضطهد السلفيين والكنيسه حمبوزو لاوي بوزو

3 - علشان مايرجعوش للبلد اللي فضلت عليهم الاموات وموتتهم بالحيا

4- الشاب التاني المفروض مايتجوزش برضو

5 - العيال بتزوغ علشان بتحب المدرسه ... فبتهرب من الحب ده لإيمانهم بإن من الحب ما قتل

6 - اللي بيحدد الاسعار بتوع البانجو برضو

7 - هيحظروا الهوا والميه والكهربا والكلام والكتابه والفعل ورد الفعل والمفعول به ... وسيظل الفاعل مختل عقليا

8 - الغالي

9 - الانتخابات يعني الشفافيه والشرعيه في أن تكون فاسدا

10 - لا الريس بتاعنا بيعمل لورا :))

فكرة من الزمن ده يقول...

انا مش عارفة احل الاجابات دي اروح اغش وارجع تاني

sweet angel يقول...

كل الاجابات واحده تقريبا

الانتحار سيد الموقف

قلم رصاص يقول...

ملخص الاجابات كلها :

عروووووووووووستي !

معلهش تعليق صغير على ان السلفيين مع النظام وزي ما انت قلت للدكتور ياسر:

"البلد بتتقطع زى صينية البسبوسة وبتتوزع على رجال الاعمال وهما بيتكلموا فى نواقض الوضوء

وهنروح بعيد ليه..افتكر ازمة قناة الرحمة ...محمد حسان ناشد مين؟"

ماهما دول رجال دين ياحاج محمد يعني مفروض دا دورهم في الحياه توعية الناس بأمور دينهم وبس ..عاوز تقحمهم في السياسه ليه ؟

مينفعش.. لكل مقام مقال .. وادي العيش لخبازه

طب عارف معظم رجال الدين وعلى رأسهم الشيخ الجليل محمد حسان ومسعد انور وغيرهم بيقولوا : مش عاوزين الأمه كلها تبقى مشايخ ..لاء.. احنا عاوزين نقول ان نجاح كل واحد في عمله هو دعوه لدين الله في حذ ذاتها..يعني باختصار عاوزين اطباء ومهندسين ومدرسين الخ الخ كل في عمله ويتقي الله فيه دي نصره للاسلام في حد ذاتها

حتة ان الشيخ حسان ناشد الرئيس مبارك ايام ازمة قناة الرحمه دا موضوع مختلف لسبب .. وهو ان وقف القناه كان بمثابة ألم لمصر الدوله وليس لمحمد حسان واو غيره .. الموضوع كان في اللحظه دي سياسي يعني على ولي الأمر في حينه التصدي ليه بصرف النظر عن التوجهات والبطييييييييخ

بس خلاص

قلم رصاص يقول...
أزال المؤلف هذا التعليق.
قلم رصاص يقول...

ملاحظه:

فيه خطأ املائي في ردي .. بدل ما اكتب( قلم) بالقاف كتبتها كدا: (ألم)

!

ملاحظه تانيه:

ابن خالتك عيان وعنده برد
مفيش اتنين كيلو طماطم من ام عشره جنيه وتيجي تزوره هههههههه

سلام

ساسو يقول...

بحجز مكان وراجعه تاني

حلم بيعافر يقول...

هههههههههههههههههههه

حلوة الرئيس بيعمل لورا دى

بس الوزير اللى عنده حرقان وسخونة المفروض تعرفيه من اول مرة....ده حتى ريحة الدخنة عبئت المدونة...فاروق حسنى

حلم بيعافر يقول...

فكرة من الزمن ده


البيت بيتك

حلم بيعافر يقول...

sweet angel

مش للدرجة دى

حلم بيعافر يقول...

قلم رصاص

عروستك عروستك

الساكت عن الحق شيطان اخرس

وبعدين هما مبيكتفوش بالسكوت دول بيميلوا ميل واضح بين للنظام فى مواقف كتير

ثم ان الامام الشافعى كان رجل دين برضه بس كان بيقوم مع الناس ضد الظلم حتى لو اتى من جهة الحاكم

وبعدين لما لكل مقام مقال ارفين الناس ليه يااخى وكل ماحد يكتب حاجة يجروا وراه ويرفعوا قضايا ويكفروا ...مش فالحين غير فى كده؟!

سبحان الله

بذمتك ودينك ياراجل

ايه اثر قناة الناس والرحمة والشيوخ اللى بيظهروا فيهم على الناس؟

مش النقاب والقون والخواء والفراغ من جوه؟

مجربتش تتعامل مع الجيل الجديد من معتنقى كلام وتعاليم الشيوخ دول

كلام وتعاليم الشيوخ دول مش كلام وتعاليم ربنا

كلام وتعاليم ربنا بيعملوا انسان محترم
مش خيمة فاضية جوه
ولا دقن مسخبى تحتها حطب جهنم

ابقى سلملى على اولى الامر ياخويا

حلم بيعافر يقول...

ساسو

متتاخريش

حلم بيعافر يقول...

قلم رصاص

انا اعتزلت الطماطم ياسيد والله

تنازلت عن العجة والفول ابوطماطم

تصور انى مبقيتش اكل الفول بطماطم؟

يللا اهى ازمة وهتعدى

عليك وع البصل بقى

غير معرف يقول...

تخلف عقلي