الخميس، 21 أكتوبر، 2010

مكنة ملابس بتخيط الملابس ب12.5

الله يرحمك ياجدى...إييييييييييييييييييييييييييييييييه!!!!


فى بداية الشارع معانا مكنة ملابس بتخيط الملابس ب12.5 وفى نص الشارع معانا مكنة ملابس بتخيط الملابس ب12.5 وفى اخر الشارع معانا مكنة ملابس بتخيط الملابس ب12.5....الغريب فى الامر مش مكنة الملابس اللى بتخيط الملابس ب12.5 .الغريب هو طريقة النداء والبيع.زمان كان البياع يفضل يجعر ويبح صوته وينهى قلبه وهو بينادى على السلعة لكن حاليا بقى فيه الميكرفون اللى متسجل عليه الكلمتين اللى بيتكرروا ورا بعض فى حين ان البياع الكاجول قاعد على الكرسى وحاطط رجل على رجل...الانطباع الاول عن منظر البياع اللى بيبع مكنة الملابس اللى بتخيط الملابس ب12.5 هو الابتسام وتذكر المسحراتى اللى احمد بهجت كان بيتحسر عليه فى كتابه(صائون والله اعلم)...الدنيا اتغيرت ياجدعان .

زمان كان الواحد يقوم الصبح ويغسل وشه ويفطر ويروح المدرسة ويقف فى الطابور ويحيى العلم بعلو صوته(الله اكبر الله اكبر الله اكبر تحيا جمهورية مصر العربية)...دللوقتى العيال بتصحى الصبح وملهاش مزاج تروح المدرسة ولما يروحوا يقفوا فى الطابور بمياصة ويحيوا العلم بغلاسة(قشطة ياعلم يابتاعنا..قشطة ياعلم يابتاعنا...قشطة ياعلم يابتاعنا).

طيب بلاش البيع والشرا وتحية العلم خلينا فى الاجرام والسرقة....حد كان يتصور ان الحرامى يجور عليه الزمن ويشتغل من غير زى رسمى؟!...فين التيشيرت المخطط اسود فى ابيض بالعرض؟....فين الشنب اللى كان يقف عليه الصقر؟...فين المطواة القرن غزال اللى كان يطلعها فى ثانية ويغز بيها الزبون؟...دللوقتى الحرامية بقوا فانكى وسبايسى وعيال ملهمش فى الشغلانة...الحرامى من دول بقى لابس سلسلة وبيخبى مطوته فى اماكن غريبة لاتليق بحرامى متمرس عارف شغله وبيأديه بضمير...الله يرحم زمان ويرحم ايام ماكان الحرامية بيجيبوا لوزارة الداخلية احلى شغل.

وهنروح بعيد ليه؟...فاكرين محمود محمود وبشير التابعى ومدحت عبدالهادى؟...ولا نبيل محمود ولا تامر ابوجبل؟...ايييييييييييييه هنقول مين ولا مين بس؟.....لعيبة الكورة كانوا زمان طول بعرض..درافيل الواحد منهم كان بيدوس على لعيبة الفرق المنافسة وهو مش واخد باله....دللوقتى ربنا بلينا بعمرو الصفتى وحسين ياسر وعيال كده ملهاش لازمة فرافيير ميستحملوش بوكسين تلاتة ...والنعمة بخاف لو لاعبنا الاهلى لاحسن وائل جمعة يجوع وياكلهم....حاجة صعبة اوى.

طب بالذمة مش غايظك الفرق بين كمال الشاذلى واحمد عز؟...شوف كده الشاذلى بلغده بكرشه بصوته,حاجة بخيرها متربية ع الغالى مش عز المسلوع اللبى شبه العصاية....بالذمة فيه رجل سياسة من غير كرش؟!..دى مهزلة ومؤامرة على البلد ...البلد بيتم تفريغها من كروشها بشكل تدريجى ...الستارة وراها متآمرين ومغرضين بالهبل...ياريت ياجماعة كله ياخد باله شوية من الحكاية دى ...الدنيا اتقل خيرها ...الرئيس المؤمن انور السادات السيجارة الغالية اللى فى اخرها بتاعة شبة الحلة دى مانتش بتفارق بؤه ..انما دللوقتى حسنى مبارك مش لاقيها...رئيس جمهورية ومش عارف يشترى سجاير؟!...دى مسخرة يعنى رضينا بيه من غير صلعة وكمان معهوش سجاير؟!...


انا من هنا ومن مكانى ده بنادى بعودة المشروع الخالد(_اى حاجة ع العربية ب2.5)واعتقد ان ده الحل الحقيقى للمشاكل والازمات الطاحنة اللى بنمر بيها وياالف حسرة وندامة على ايام زمان ...ايام المصاصة ام شلن اللى كانت عاملة زى المطرحة ومكنتش بتدخل بؤ الواحد....ومعانا مكنة الملابس اللى بتخيط الملابس ب12.5.

هناك 10 تعليقات:

Anas M.Refa't يقول...

بجد ضحكت من قلبي
ومقال هادف ودمه خفيف

جميل جدا
تسلم ايدك

أبـو مــودة يقول...

اخي السلام عليكم اشيد بمدونتك الرائعة وكلماتك شمس مشرقة " أسعدَ اللهُ صباحكِ بفيضِ رِضَاه ، ونورِ هداه ، وباركَ في عمركِ "
واشعر ان قائمة الاصدقاء بمدونتي المتواضعة ينقصها وجودك نتمني مزيد من التواصل وتحياتي لكم

فتاه من الصعيد يقول...

اييييييييييييييييه

زمن النصب الجمييييل :)))))))))

تحياتي

أحسن تـستاهـل يقول...

انت خلتني عمالة اقرا واعمل بشفايفي مصمصة كده .. عارفها؟ هههههههههههه

أول مرة اعرف ان احمد بهجت عنده كتاب اسمه صائمون الله أعلم.. أصل ده اسم مسلسل إذاعي على موقع اسلام اون لاين - الله يرحمه - وانا كنت مشاركة فيه

مها ميهوووو

حلم بيعافر يقول...

انس

اى خدمة ياموعلم

نورتنى

حلم بيعافر يقول...

ابو مودة

ده شرف ليا يا معلم

نورتنى

حلم بيعافر يقول...

فتاة من الصعيد

مش كده؟

نورتينى

حلم بيعافر يقول...

احسن تستاهل

ده كتاب رووووووووعة

نورتينى

وجع البنفسج يقول...

أولا كتاب احمد بهجت اسمه " مذكرات صائم "
ثانيا فضلت تنق ع كمال الشاذلي لعند ما خليته اصغر من احمد عز .. " شفته في اخر ايامه " تصدق معرفتوش "

ثالثا .. فعلا فين ايام زماااااااان عن ايام دلوقتي ,, وفين ايام دلوقتي عن ايام بكرة ..

ده بكرة مخبي لينا بلاوي يا جدع !!

حلم بيعافر يقول...

وجع البنفسج

ايوه عارف مذكرات صائم بس له برضه كتاب اسمه صائمون والله اعلمhttp://www.mediafire.com/?mtoeyhnazml

احذرونى بقى فى الايام الجاية