السبت، 23 أكتوبر، 2010

ملابس داخلية


قريب البلد هتمشى ملط

الثابت فى ألف باء موضة إن الملابس الداخلية بتكون تحت الملابس اللى بيظهر بيها الانسان للناس .شىء بديهى وطبيعى جدا حتى المجانين نفسهم مقدروش يغيروه ومهما كانت درجة جنون المجنون من دول فمش ممكن تلاقيه لابس شورت فوق البنطلون...ممكن يكون لابس شورت من غير بنطلون فوقه انما شورت فوق البنطلون مستحيل...ولان مصر علمتنا دايما نمحى كلمة مستحيل ولان دور المراة فى المجتمع دور فعااااااااااال وحيوى وخصوصا الشريحة السنية المسماة بالبنات قدروا بعون الله يعملوا الصعب ولبسوا قطع غريبة كده فوق الهدوم شبه الملابس الداخلية بالظبط.

مش غريب ومجتش ع البنات يعنى ماكل حاجة مقلوبة.

العامل الضعيف محدود الدخل اللى من المفترض الدولة تقف جنبه وتساعده وتحل مشاكله مدهوس تحت جزمة المستثمر اللى هى من صنع الدولة.

ارض الدولة اللى ملك الشعب بتتباع ببلاش لرجال الاعمال المصريين وغير المصريين ولما شاب يحب يشترى كام متر يبنى عليهم بيت عشان يكون اسرة يدفع دم قلبه ويستلف من طوب الارض.

مقابل التعب والجهد فى اى مكان فى العالم المفروض يكون تقدير ...تقدير مادى ع الاقل يعنى اللى بيشتغل 16ساعة فى اليوم ده يعتبر بينفق عمره بالكامل فى شغله .اللى بيحصل بقى فى مصر ان اللى بيموت نفسه فى الشغل ده مرتبه لايتجاوز 600جنيه بينما اللى محترف البطجة والانتخة دخله ممكن يعادل دخل بلد زى اللى بيموت نفسه شغل.

رئيس التحرير اللى بيلفق واللى بينافق واللى مينفعش يمسك مجلة حائط فى اى مدرسة بيفضل فى مكانه وبيترقى ومرتبه بيوصل لمليون جنيه فى الشهر بينما رئيس التحرير اللى اثرى الصحافة بتجربة فريدة مميزة بيتشال وبيتشرد.

الوزير اللى ولعت فى عهده المسارح ودار الاوبرا وقصور الثقافة قاعد فى مكانه بينما اللى بيتغيروا هما الغفر واطقم الحراسة.

واخيرا اصبح الحال ده سنة الحياة فى مصر والاستغراب منها بقى دليل على ان المتعجب ده يااما مش مصرى يااما مصرى وكان عايش بره يااما والله اعلم................ .




هناك 4 تعليقات:

غير معرف يقول...

tayeb w ba3deen?
eeh el 7al fe ra2yak?
maho el kol bye7ki fel syasa wel eqtesad wel qanoon wel a5la2 wel thaqafa w bla bla bla...

ana 3an nafsi a3rafak kowayes w ba3raf 2ad eh enta 7ad bete7lam w bet3afer fe 7elmak elli howa ta3'yeer el 7al lal afdal...
bs da kollo kalam...
waqe3yan, e7na mane2darsh ne3mil ay 7aja, 3shan el nezam wel 7akem wese5 jedan..

w howa el qowa el akbar fel dawla, zay tamaman 3alaqet el ahl ma3 el shab elli 3ayez yod5ol ta5asos w ahlo rafdeen, aw 3ayez yetjawez bent min 3'eer ta2efto w ahlo bardo rafdeen 7atta law 3amal eeh...
wel sha3b bardo keda, da tab3an bas fe beladna el 3arabya w 5ososan fe masr, ya3ni law el sha3b 2alab kollo 2orood w wa2af 3la raso w rejleeh, el 7akem 3omro ma haye3mil ella elli howa 3ayzo w fe masla7to, wel nezam mish hayet3'ayar ella fe sawra kbeera aw entefada aw 7arb...

zay manta 2olteli mara... tamn el 7orya 3'ali awy!

fe America masalan, 3shan el nezam kowayes w 3ashan el 7akem bydawar 3la masla7et balado w sha3bo, koll 7aja monazama w nedeefa jedan, bs el sha3b 3'abi w thaqafto ma7dooda, mish ba2ol kollo, bs el a3'lab keda, 3ayesh fel shaware3 3al mo5adarat wel 5amr wel banat,,,,
laken 3ashan fe qowa akbar te2dar to7komo w tnadafo, fa betla2i 7atta el nas dool el day3een lehom e7teramhom!
wel kelab wel 7aywanat leha ta2derha bardo!!!

el moshkela mish en el sha3b saket, wla eno byor2os w byhayas 3shan el Ahli byksab, wana fahmak kowayes, w 3arfa enak mish mota3aseb bel ra3'm min enak Zamalkawy.. bs kaman 7ata enta mish 3aref te3mil 7aja, w law qarart w 3amalt w 7awelt torfod 3alanan, mish hay5alook fe 7alak ..

wel moshkela mish fe lebs el banat, ma3 eni deddo tamamn w dedd ay bent teb2a labsa _Zay ma bet2olo fe masr_ min foo2 Amr Khalid w min ta7t Amr Diab!!!!!!



el moshkela kollaha fel 7akem wel nezam elli nasi sha3bo w dayer wara fotat el 5obz min Israel w America...


hena lel asaf, fe kol ma7al yahoodi aw leh 3alaqa fel yahood, benla2i montajat maktoob 3aliha: MADE IN EGYPT!
fakar ma3aya showaya da ma3nah eh!
taqadom?
7adara?
weselna lal 3alamya???
da esmo jahl w 3'aba2 w 3ar leena kollena.... Ma3 eni mish masrya, bs enta 3aref en roo7i fe masr, 3shan keda batkallim be koll 7orya..


ana asfa, etkallimt keteer, bs lazem ne7ot 7ad la koll el kalam da w nase7ti ba2a bema eni ba3raf a3teek nasa2eh raheeeeeeeeba:

e2leb el saf7a w etkallim fel Amal ya Tamemy ... Mahma kan wazn el saf7a t2eeel! :)


Mashi?
2ool mashi w 5alas .... :)))))


THIS IS ME :)

Heba Faruq يقول...

معك حق ..حاجة تلخبط اللي ما يتخلبطش ولا اجد تعليق اصدق من كلمات الشاعر
وكم ذا بمصر من المضحكات
لكنه ضحك كالبكاء!!!!

مع تحياتي

حلم بيعافر يقول...

اول حاجة انا حد حاسس بالمشكلة فبتكلم ومعنى انى بتكلم يبقى لسه فيا نفس ومعنى ان لسه فيا نفس يبقى انا لسه عايش ومعنى انى لسه عايش انه لسه فيه امل

ممكن تعتبرى كلامى نوع من التحريض والتحريض مش وحش والنار بتبدأ من مستصغر الشرر وعلى راى درويش(حسبى بانى غاضب والنار اولها الغضب).

وعلى فكرة الناس بدات تفهم وابسط دليل على ده المظاهرات اللى موجودة ونوع الهتافات(كيلو الاوطة بعشرة جنيه...وارض مدينتى بنص جنيه)....هااااااااه ايه رايك؟...هتاف بسيط من ناس بسيطة لخص الحالة اللى موجودة فى البلد وطالما فهمنا يبقى بدانا وحطينا رجلينا على الطريق الصحيح وهااااااانت كلها شوية ونوصل

بالنسبة للشعب الساكت هو مبقاش كله ساكت...حصلت طفرة رهيييييييييبة فى مصر مؤخرا بسبب الانترنت والدليل الحراك السياسى اللى حصل فى اخر خمس سنين وبرغم التضييق من الحكومة والنظام الا انه بيحص حراك برضه وطالما فيه حراك فيه امل...

انت بتقولى النظام اللى جايبنا ورا وانا موافقك على كده واحنا فى مصر بدانا نفهم كلنا كده وبنحاول نغير نفسنا اهوه وهنغير البلد كلها ف الاخر

صحيح الغالبية العظمى ساكتة بس القليلين اللى بيتكلمواااااااا قادرين يعملوا حاجات كتير فى ظل حكم نظام غبى كل ما يخطى خطوة فاكرها فى صالحه بيتكون نتيجتها ضده زى مثلا خطوة تشريد ابراهيم عيسى...شوفى لما حصل معاه كده الناس التفت حواليه قد ايه..


على فكرة انا كنت عامل البوست مخصوص عشان حكاية لبس البنات دى بس انت عارفة انى بسيب القلم على حريته...ولما بسيبه كده بيكتب فى السياسة اعمله ايه بقى؟!!!...قلم غلباوى

وانا عندى كلااااام تانى غير كلام السياسة...عندى قصة قصيرة كتيييير بس بكسل اكتب والله ولما بحس ان الناس ملت من السياسة بنزل شعر...

المهم انت جوزتى مصر بحسنى مبارك يعنى؟!!

بكرة عزرائيل يطلقهم هااااااااانت

حلم بيعافر يقول...

هبة فاروق

الله يرحمه الشاعر ده

جه مصر يومين واتطرد بس كان فهم الوضع

نورتى