الأحد، 24 أكتوبر 2010

كرسى الحكم(بنج الضمير ومنوم الأعصاب)



ياكرسى فرقتنا تحت النجوم أحزاب
ياكرسى صبحتنا عن بعضنا أغراب
ياكرسى خليت عيشتنا فى البلد دى هباب
قزقزتنا لب
ورميتنا قشور فارغة
وشربتنا تبغ
ورميتنا عقاب فى عقاب
كام عرض لاجلك ياكرسى انسبغ أوحال؟
كام مجد لونه انطفى م الفكر فيك او حال؟
كام حال ياكرسى انبدل باسمك بغير الحال؟
ياكيميا.. ياسيميا.. ياحاوى ياسماوى
ياشيطان فى قمقم خشب
ع المصرى افندى انحال
فى عبادة الله صبحنا 100 فريق وفريق
ده شيخ بعمة
وده حاخام
وده بطريق
ولكل واحد شيع
ولكل شيعة طريق
وفى عبادتك ياكرسى الحكم يادلالك
الكل مجذوب وناظرلك بلا تفريق
ياسر مغلق ومستعصى على الألباب
ياسحر محطوطلنا بالعنية تحت الباب
ياساخطنا على القرب منك والندى أذناب
تُجزى من الله
ه الهى تنحرق بالجاز
وتغور يابنج الضمير يامنوم الأعصاب

د/سعيد عبده
اخر ساعة
منذ اكثر من خمسين سنة

هناك 5 تعليقات:

قلم رصاص يقول...

^_^

إسراء عمران ؛؛؛ راجية الرحمه يقول...

بنج الضمير ومنوم الاعصاب
حلو اوى الوصف ده...
كلمات واقعيه ومعبره...

Noha Saleh يقول...

حلوة اوى كلمة بنج الضمير دى
مدونة جميلة
بالتوفيق ان شاء الله

حلم بيعافر يقول...

قلم رصاص

بخ

حلم بيعافر يقول...

اسراء عمران

نهى صالح

نورتوا وانستوا ومش انا اللى كاتب الكلام على فكرة