الثلاثاء، 5 أكتوبر، 2010

شهيد



لما سال دمك نشيد على ارضها
اتحبس اسمك فى يافطة
فى قلب شارع
اصبحت ماضى
والمضارع...
ديب بينهش عرضها
وناس تأله كل ظالم
رغم ان الموت جبان وكان يخافك
وكان يجلك كالنبى
الا ان رصاص غبى
ضل واتوجه لقلبك
واتحبس اسمك فى يافطة
فى قلب شارع
كنت مارد
كنت فارد بجناحاتك ع المدافع
كنت طالق صوت غنانا
فوق جنون المعركة
لما قالوا فى الجرايد مصر كسبت
اختلط ضحك الفرح ويا البكا
لما قالوا فى الجرايد
مات شهيد
اتحبس اسمك فى يافطة
فى قلب شارع
كنت فاكرك من جديد
هتقوم تشيلنى فوق كتافك
ايه يعنى ميت فى الجرايد؟
ايه يعنى دانة وطيارات؟
اصلك عنيد
قبل ماتشيل السلاح
شيلت الوطن
كنت هازم يأسنا
كنت حر
قيدوك
فرضوا علينا همسنا
تنشل ايد السجانين
وتقوم لنا
انا كل يوم باجى هنا
بامسح تراب من فوق جبينك
وافتح كتاب الذاكرة
تنشل ايد السجانين
تصرخ جميع الالسنة
لساك بتجرى فى دمنا
لساك صبى
شايل كتاب
عارف جميع الاسئلة
الا الحساب
عمرك بتدى
من غير ماتطلب
عمرك بتسقى كل اشجار البلد
مشلولة ايد السجانين
صارخة جميع الالسنة
انت اللى ماضى
وانت اللى حاضر
حاضناك جميع الامكنة
من شر حاسد ان حسد
راقياك جميع الامهات
بكرة طالل من عيونك
مين يخونك؟
مين يخونك؟
مين يخونك؟
غير كلاب القصر وفيران العسس..

هناك 12 تعليقًا:

قلم رصاص يقول...

جميله يامحمد

ورحم الله الشهداء

وكل سنه وايهاب طيب

الله مش دا عيد ميلاده ياجدع

!

فكرة من الزمن ده يقول...

كلماتها جميلة جدا ومؤثرة اوي تسلم ايدك يا حلم
تحياتي

Heba Faruq يقول...

شعر جميل ومتميز
وليت هذا المارد ينفض عنه غبار السنين ويبعث من جديد ليجدد روح اكتوبر الجميلة
كل عام وانت بخير
مع تحياتي

فتاه من الصعيد يقول...

جميله اويييييييييييييييي

ربنا يرحم شهدائنا يا رب

تحياتي

د. ياسر عمر عبد الفتاح يقول...

رهييييييييييييبة بجد
تسلم الأيادي


فكرتني بالرفاعي
بس تفتكر اسمه اتحبس في يافطة
عمري ما شفت شارع أو مدرسة بإسمه

الفرقة 39
الله يرحمك يا بطل

كانت أخر كلمة قلتها
الله ,, لما ريحة الجنة حلوة أوي يا ولاد

الله يرحمه

حلم بيعافر يقول...

قلم رصاص

كل سنة ومصررررررررر مش زى ماهى دللوقتى

كل سنة ومصر مقدرة دم شهدائها

كل سنة ومصر فايقة مش مسطولة زى دللوقتى

نورت انت وعيدميلاد ايهاب

حلم بيعافر يقول...

فكرة من الزمن ده

شكرا

نورتى

حلم بيعافر يقول...

هبة فاروق

ياريييييت

نورتى

حلم بيعافر يقول...

فتاة من الصعيد

ياااااااارب

نورتى

حلم بيعافر يقول...

دكتور ياسر

الله يرحمه ويرحم جميع شهدائنا

hebahosni يقول...

ماشاء الله مدونتك رائعه جزاك الله كل الخير ومشكور على الكلمات الرائعه

حلم بيعافر يقول...

هبة حسنى

الله يخليكى

نورتى المكان