الخميس، 4 نوفمبر، 2010

الحياة بقى لونها صلصة



بعون الله عندنا هنا فى مصر من يستطيع ان يطلى اى حقيقة بالطلاء الذى يعجبه.يعنى ممكن تصحى فى يوم وتفتح كتاب العربى بتاع سنة تانية ابتدائى وتقرا درس بعنوان (اشرقت البطاطساية على ارض مصر)وتفتح كتاب من كتب التراث تلاقى بيت شعر بيقولك(فانت بطاطساية والملوك خيار اذا ظهرت لم تبد منهم خيارة)وتفتح الراديو على محطة مصر تلاقى اغنية بتقول(البطاطساية هالة تطل يجعل نهارنا فل)....فيه حاجة كده فى الدنيا كلها غير فى مصر؟...مااظنش والامر كمان ممكن يتعدى حدود البطاطس الى الطماطم وغيرها من الخضروات والادهى والامر انهم ممكن يقنعوك انهم بدلوا الشمس بقرعة الاستاذ فريد بتاع الدراسات الاجتماعية.

الكذاب بيروح النار..مبيروحش المؤتمرات الصحفية وبيملا الدنيا تصاريح يعنى....

ريحة التزوير اللى حصل فى كل الانتخابات البرلمانية اللى عدت لسه كاتمة نفسنا واخرها انتخابات التجديد النصفى لمجلس الشورى ومع كده بيقولوا الانتخابات الجاية نزيهة....
مسرحية الفلاح اللى استضاف الرئيس فى كوخه وقدمله الشاى وقعد واتساير معاه مازالت عالقة فى الاذهان ورغم كده بيعدوا لمسرحية نسخة طبق الاصل منها....
اولويات الحزب وحكومته معروفة ومعروف مين المستفيدين منها وعلى حساب مين ومع كده بيقولوا ان المواطن البسيط فى مقدمة اولوياتهم وهما قلبا وقالبا دايسين عليه بالجزمة...

المحير فى الموضوع بقى هو ليه الناس دى بتكذب ليييييييه؟!...البلد بلدهم وكل حاجة مابين ايديهم يعنى مش محتاجين يكذبوا ويودوا نفسهم النار ع الفاضى ...هما حرامية صحيح بس ممكن يبقوا لصوص شرفاء بيسرقوا بس مبيكذبوش زى المومس المحترمة اللى مبتخرجش من بيت الدعارة...هى صحيح مومس بس مبتتاخرش بره البيت ولا بتكلم حد بره ولابتمشى مع حد ولابتكذب هى بتعمل شغلها بذمة وبضمير ودى حاجة تحسبلها والمفروض مسئولينا يتعلموا منها...

طيب فيه اكتر من احتمال بيفسر كذب هؤلاء الناس وهؤلاء الناس الكذابين معظمهم استاذة فى الجامعة وناس مرموقة فى عملها ودى فى حد ذاتها حاجة تغيظ....
الاحتمال الال انهم اتعودوا على الكذب من صغرهم ومن شب على شىء شاب عليه
الاحتمال الثانى انهم بيحبوا المناخيير الطويلة وواضح جدا تاثرهم بالاخ بينوكيو وبقناة سبيس تون
الاحتمال الثالث نابع من ان معظمهم منتمى للجيل اللى اتربى على اغانى عبدالحليم اللى كان بيقول حلو وكداب

اخيرا...بعد قبوله دعوة فلاح سوهاج على كوباية شاى تقيل من بتاع زمان الرئيس يقبل دعوة العبدلله على ماتش فيفا بشرط انه يلعب بريال مدريد وانا العب بمركز شباب سرس الليان....هتشجعوا مين؟

اسئلة مغرضة
هو ليه الريس مبيشربش الشاى غير ايام الانتخابات بس؟
الشاب اللى دعا الرئيس ده امين شرطة ولا ممثل زى المرة اللى فاتت؟
مسؤول كذاب ومواطن شكاك...مين المريض فيهم؟
لو الشمس اتبدلت بطمطماية بجد ايه اللى ممكن يحصل غير ان الحياة يبقى لونها صلصلة بدل البمبى؟
يعنى ايه بنية تحتية؟...نيتى حلوة والنعمة الشريفة انت اللى دماغك بيودى لبعيد.

هناك 12 تعليقًا:

قلم رصاص يقول...

يااااااااادي الرئيس
غير بقى انت مبتزهقش

طب عندك انا مثلا ممكن اكتب عنه حاجة كل 10 بوستات مره واحده

انما انت حاطه في دماغك والراجل عضمه كبيره مش ادك يابني

واضم صوتي لصوتك واقول الحياه بقى لونها صلصه

ال بنيه تحتيه ال
ههههههههههههههههه

ربنا معاك

حلم بيعافر يقول...

قلم رصاص

بص يا استاذنا

النظام المصرى يعنى حسنى مبارك
من الاخر كل اللى حواليه ملهمش لازمة
هى عيلة مبارك اللى متحكمة فى كل حاجة فى مصر
ماما سوزان ممكن تصحى الصبح تخترع وزارة لصاحبتها ...وزارة من العدم زى الوزارة اللى مشيرة خطاب بتراسها كده
وجمال ورجالته دورهم ميخفاش عليك
يعنى سيادتك انا لما بتكلم عنه او عن حد من عيلته فانا بتكلم عن نظام مصرى كامل واظن انه من حقى انى اتكلم زى مانا عايز طالما لابشتم ولابقل ادبى على حد
وبعدين مافيه غيرى مطلعه ملاك من السما وفيه غيرى بيقول انه ملوش يد فى اى حاجة وحشة فى البلد وفيه غيرى بيدعيله بدعى لربنا ....انا مجرد راى حتى لو مليت الدنيا كلام
واستسمحك جناب سيادة حضرتك فى انك تفررررر اخر 20 بوست عندى هنا وتقولى فيهم كام بوست عن حسنى مبارك بما فيهم البوست اللى انا شيلته
واستسمح سيادتك برضه تقولى كام مرة انا اتعرضت فيها لحسنى مبارك بعيدا عن كرسيه

حلم بيعافر يقول...
أزال المؤلف هذا التعليق.
حلم بيعافر يقول...

طيب بذمتك انا كنت بتكلم عنه ولا عن الناس اللى بتكذب؟

قول ياااارب يقول...

ههههههههههه اولا انت غلطان اللى بيكذب بيروح مارينا واحيانا العين السخنه فالكذب هو اصلح شىء ليهم
ثانيا لو الشمس مكانها طماطم هيبقى ناقصنا بس المكرونه اللى هو الشعب وهتبقى احلى مكرونه بصلصه ممكن تتاكل وهو ماتفعله حكومة نظيف
مع تحياتى بالكاتشب والماينويز

ع فكره انا كنت كتبت التعليق ده على البوست اللى فات ومعلش بقى العتب على الكيبورد
تحياتى

غير معرف يقول...

ta5ayl law el shams e5tafet w ba2et Tamatem.....


ana haroo7 feeen?
:(

ana el Shams ;)

زهرة يقول...

كح كح .. كنت جاية اتكلم وبعدين لاقيت الكلام هيقلب بضرب ع القفا وهسمع كلمة إعترفى من معاكى ؟

وانا طبعاً وقتها هستندل جداً .. وبعد مرور كل الصور دى فى دماغى ..

قررت متكلمش :)

بوست دمة خفيف .. وصح جداً

سجود يقول...

السلام عليكم
لو نيلك بقي صلصه يامصر مش هيكفي الكوسه اللي فيكي
مصر بقي متحكم فيها تلات او اربع افراد عملوا مصر شقة تمليك لنفسهم وعايزين يورثوها لعيالهم ما هي شقتهم ياجماعه

حلم بيعافر يقول...

قول ياااارب

اكتبى فى المكان اللى تحبيه

البيت بيتك

نورتى

حلم بيعافر يقول...

غير معروف

ياشمس ياشموسة تعالى عندنا

حلم بيعافر يقول...

زهرة

الجرى نص الجدعنة

حلم بيعافر يقول...

سجود

شقة مفروشة لشخص يدعى عنترة على راى نزار

نورتى