السبت، 13 نوفمبر، 2010

معندكوش اخوات كبار؟!



من جيل مازنجر وجرينديزر والكابتن ماجد والبور رينجرز وسلاحف النينجا والبدرى بدار كبير كفر هوارة الى جيل هانا مونتانا ونور ومهند

تحية طيبة وبعد...
احنا كنا رجالة ووقفنا وقفة رجالة ويشهد لنا التاريخ بانجازات من الصعب نسيانها .احنا تعبنا وعانيا وشربنا المر لحاد ماوصلنا للى احنا فيه دللوقتى.احنا كافحنا وعملنا حركة 6ابريل ومفيش مظاهرة فيكى يامصر الا وراح مننا فيها ناس المعتقلات-اظنكوا لسه متعرفوش يعنى ايه معتقلات-احنا قولنا لاء ودفعنا التمن ولسه بندفع وهندفع عن طيب خاطر وياريت تراعوا ده كويس وتعرفوا انتو مين واحنا مين.احنا معجزة بكل المقاييس واشد الناس تفاؤلا لم يكن يتوقع خروج حد بيفهم من بين ظهرانينا.احنا اتربينا على ادى ادى ادى اديها كمان حرية بالرغم من انه عمره مادانا غير على قفانا.احنا اتربينا فى بلد والتلفزيون كان بيحكى على بلد تانى خالص وهو كان بيتكلم عن بلد تالت .احنا ماخدناش فى الابتدائى غير بوبى وماجد ,فى السنة الاولى ماجد يشرب اللبن وفى التانية ماجد يلعب الكرة وفى التالتة ماجد بيحب ابوه وامه وفى الرابعة بوبى كلب شاطر وفى الخامسة ماجد وبوبى اصحاب حتى سنة 6اللى اتلغت على ايامنا اخواتى قالولى ان كان فيها بوبى وماجد برضه.وبرغم كده حاربنا وكافحنا وطلع مننا حد بيفهم.

احنا كنا مخشوشنين وكانت ميولنا واضحة ولما كنا بنحب نتفرج على التلفزيون كنا بنتفرجى على هرقل على زينا ويوم ما ننسى نفسنا خالص ونتمايص كنا بنتفرج على السندباد مش زيكوا يامفاعيص يابتوع نور وعاصى ومهند.اخص عليكو اخص واخص بهذه الاخص الجنس الطرى.بقى تسيبوا كل الشنبات اللى مترصصة فى البلد دى وتروحوا تحبوا فى واحد تركى ؟!

طب بالذمة ايه الفرق فى الجيل المنيل بتاعكو ده بين الولد والبنت غير البطاقة؟!...مفيش ورغم كده طالعين فيها وسايقين العوج...منه لله بقى تمورة هو اللى عمل فيكو كده بس مش ذنبه برضه ماهو انتو اللى غاويين مياصة وعك مبتعرفوش تسمعوا ...احنا كنا لما نسمع اغنية بنعرف علطول اللى بيغنيها واحد ولا واحدة عشان كان الراجل راجل والست ست يعنى مثلا عمر ماحد يقدر يخلط بين صوت على الحجار وحنان ماضى انما حاليا كله مختلط ببعضه.

اللى يدوس ع النعمة يعمى...مسمعتوش عن فضيلة اسمها الرضا؟!...طيب بصولنا كده نظرة فاحصة وانتو تعرفوا ينى ايه رضا...منكم لله الهى ينتقم منكم ربنا...بلاش اللى احنا كنا بنعمله فى الناس زمان تعملوه فينا دللوقتى...احنا كنا بنزوغ من المدرسة اه بس مكناش بنمد ايدينا ع المدرسين...اتقوا الله ياظلمة انتو ماعندكوش اخوات كبار؟!..

هناك 11 تعليقًا:

shemo_ joker يقول...

السلام عليكم....

ازيك ياحلم

حلو البوست والمقارنة بس ليا رايى مختلف عن رايك

انا من الجيل دا فممكن اعرف اوضح الصورة الى بتتكلم عنها زى ما انت رسمت صورة حلوة لجيل الى انت منه


جيلنا ممكن تكون معظم الشباب الى منه
من النوعية الى بتتكلم عنها دى

لكن القلة الى فيه بتفهم وعنده مبادىء وافكار دماغها عالية اوى
وعندها عزيمة ممكن تعمل بيها حجات
كتير وتغير فى بلادنا بس هما مظلومين
لانهم مش لقيين فرصة واما بيفكروا يعملوا حاجة بيهجموا وبيخدوا ع قفاهم زيى ما حصكوا كدا بس الفرق بينكم وبينا انا احنا مش عرفين لينا مستقبل عشان نعمل حاجة ليه اساسا
من بداية الظلم فى امتحان وتحطيم احلامنا فى مستقبل ليه ملامح
فخلاص مش بقيت فارقة الى بيعمل مجهود بيتظلم ويبقى زى الى مش بيعمل
والى بيفكر مش لفكارة قيمة فيضر كل يبقى تافه عشان مش يتعب




دومت بخير فى رعاية الله
shemo

shemo_ joker يقول...

هيييييه انا اول تعليق
shemo

زهرة يقول...

دة انت شايل ومعبى زى ما بيقولوا هههههه

كنت بشوف آه كابتن ماجد اللى بيفضل يطير فى الملعب نص ساه علشان يلحق الكورة

وكنت بشوف سينما الاطفال .. واليوم المفتوح بتاع يوم الجمعة .. واعلان اللبان السحرى كمان ..

وبحب على الحجار .. ومن مشجعى البدرى ووردة *_^

ملحوظة مش ملحوظة ..

ممهند مفهوش أى حاجة تتحب ..

تمورة شكلة وصوتة بيستفزنى جداً..

تفتكر أنفع بنت طبيعية ولا اييييه ؟؟

بوست واقعى

تحياتى :)

still-searching يقول...

والله معاك حق في كل كلمة قلتها :D

للأسف الجيل الناشئ دلوقتي جيل غير الأجيال اللي فاتت

حتى الأطفال تلاقي عينيهم مفتحة وهم لسه مطلعوش من البيضة

زمان واحنا عيال مكناش نعرف نرفع عينينا في عين حد اكبر مننا
دلوقتي يحطوا عينيهم في عينيك ويمدوا ايديهم عليك كمان

قلم رصاص يقول...

أحسنت يا فتى

مجرد حلم صغنتوت يقول...

احنا بنقول كده ع الجيل اللي بعدنا
والجيل اللي قبلنا بيقول علينا نفس الكلام
واراهنك الجيل اللي بعدنا هيقول كده ع اللي بعده

بس في الاخر كل جيل وليه مميزاته وعيوبه.. حتى الجيل بتاعنا فيه عيوب كتير زي اللي قبلنا واللي بعدنا
بس العيب الاكبر في اننا مش بنغير ده.. مش هتفرق من جيل ايه المهم نعمل حاجة

حلو التحليل بتاعك.. فكرتني بأيام زمان

حلم بيعافر يقول...

شيمو

منورة برايك

كل سنة وانت طيبة

حلم بيعافر يقول...

زهرة

سيبينى افضفض

كل سنة وانت طيبة

حلم بيعافر يقول...

still searching

اخييييرا حد معايا؟


نورتى

كل سنة وانت طيبة

حلم بيعافر يقول...

قلم رصاص


يعنى ياكده ياكده؟!

حلم بيعافر يقول...

مجرد حلم صغنتوت


ممكن برضه

كل سنة وانت طيبة

نورتى