السبت، 26 فبراير، 2011

شدة حيل




يا أيها الزمن الساير
سجل ودون فى دفاترك
من دايرة كنا لدواير
تايهين بنسأل على قطرك
عدل خريطتك دللوقتى
وابدأ تاريخك بيناير

مشهد للانفجار

فكى الخيوط
واتمردى ع الشرنقة
خوفك تابوت
لمة جناحك مشنقة
شمى الهوا
دوقى الغنى
طييييرى بقى

مشهد للمواجهة

منتاش اله
واسال ملامحك تعترفلك بالحقيقة
لا قدرت تهزم زمن
ولا توقف الملكوت
ولاجه فى يوم الموت
فاوضك على خلودك
وقدرت تدفع تمن
مسنود على شومة وعصايا
مسنود على جيش م العرايا
من خطبهم بتطل ريحة العفن
قسما برب البرايا
لن اصلى
لمثل هذا الوثن
دانا اللى باديا اعزل واولى
وانا اللى بايديا ابعد واخلى
وانا اللى اقولك
كن
تكون
يسقط يسقط هذا الكائن فى القصر النائى المتهالك
يسقط يسقط اللى نافينا
وقاطع فينا حبل وصالك
تسقط كل ظلال ابليس
الضاربة فى قلب بلادى

مشهد معتاد

سايق عليكى البرد والمولوتوف
سايق عليكى شروقى وشروقك
سايق عليكى الثورة فى عروقك
لتممى المعروف
وتكملى الخطوة
واروى بقى شوقك
دا عطشنا ناااار فى الجوف
من امتى مربوطة فى رحايا؟
من امتى طاحنانا ضحايا؟
من امتى وشيطان البلايا
بيجر ويسوقك؟
سايق عليكى الثورة فى عروقك
كفاية دخنة
ولا ملو نيلك قنابل
يقدر يحوش النور
النور ده منا احنا
عارفك وحافظك
يقدر يعلى الهمس
فيكون كاغنية
شادانا م المحنة
النور ده اصله شمس
ترسم طريق المناضل
وتغيب عن الخاين
فينطفى ويغور

مشهد لدفن اليأس

تعبت بنادقكم
وكلامنا لسه ما كل
تاهت خطاويكم
وكلامنا عمره ماضل
يااغبى خلق الله
ه
مين اللى قال ان السلاح ضد الهتاف يكسب؟
ده حرف صدق فى قصيدة
يقلب موازينكو المريضة
ويصلح اللى اختل
صوت الجموع وسط النيران اية
وجب عليك الغضب
يا زمانا قوم واغضب
وكون لاحلامنا مرايا
يقع شهيد ويعمروا تانى البارود
تشتد اوصال الحكاية
اصلبى طولك يامصر
اجمدى هانت خلاص
الرصاص ضرورى يخلص
وهيقضلوا بعده غرايا

مشهد للبداية

الشمس لابسة هدوم العيد
والنور على الباب بيخبط
قام النهار فرحان وسعيد
من لخمته رقص اتلخبط
قام الوطن م النوم للتو
قام الوطن م النوم واحلو
فى عيوننا رغم الدم الجارى
ماشية الصبايا بتزغرط
ماشيين نغنى ونصرخ
ماشيين بنضحك ونعيط
فرح الجريح بالنصر قريب
فرح الجريح بالثورة طبيب
يشفى الخطايا والخاطى
ويعلمه يبطل يغلط

هناك 4 تعليقات:

Tears يقول...

لسه الموضوع محتاج من الشعب كذا زقة عشان يكمل على خير

حلم بيعافر يقول...

يامصر هانت وبببببببانت كلها كام يوم

still-searching يقول...

جميلة جدا
رغم الألم الأمل دائما موجود

:) :)

حلم بيعافر يقول...

still-searching

لو بطلنا نحلم نموووووووووووووت


نورتينى