الأربعاء، 2 مارس، 2011

مجرد تغيير كراسى؟!!!



ما يكاد ينفض اى تجمع الان فى مصر حتى ينقسم الناس الى فرق متناحرة تقاتل كل منها الاخرى بعنيف الاتهام والسباب ثم تخبو همة كل فرقة وتنقسم على نفسها الى دويتوهات متناحرة ايضا تمل من التناحر بعد وقت ليس بقليل فيسير كل دويتو فى طريق فى منتصفه يكون قد اخذ احدهم اتجاه الشرق والاخر عاكسه واخذ الغرب عنداااااا فيتفرقا وقد خاصم كل منهما الاخر....ما يحز فى نفسى ان الخلاف لم يصل الى الضرب ولو لمرة واحدة استمتع فيها بخناقة من بتوع زمان....حاجة تشل حتى الخناقات اتقل خيرها يا ولاد.

قصره...بعد (بسم الله الرحمن الرحيم)فى كل تجمع تبدا حفلات التحسر على مليارات البلد التى نهبت وضاعت فيتم حساب المليارت لكل من الوزراء والمسئولين على حدة وبالترتيب يصل الامر الى مكتب رئيس الجمهورية فعائلته فالرئيس نفسه دون ان ينج احد من اللعن طبعا ثم فى النهاية يتم تجميع كل الاموال المنهوبة وقسمتها على عدد سكان المحروسة ليثبت فى مرة ان نصيب كل مواطن فى البلد لو وزعت هذه المليارات بالتساوى 50الف جنيه مرة ومرة 100الف جنيه.

هناك طبعا مايحير ويشتت العقل من امور لصوص المليارات فلو انفق الرئيس مثلا من ثروته صباح كل يوم مليون جنيه سيحتاج الى مئات السنين قبل ان تنفذ حصيلته من سرقة الشعب وهناك مثلا من لا ولد له ولا بنت ورغم ذلك يستحوذ على مساحات شاسعة من اراضى الدولة وهناك منهم من لايقل طرافة عن القذافى حيث استخدم اموال الدولة فى اشياء خرافية لم نكن نصدقها الا حلما او خيالا شاطحا .

المهم...بين كل جملة وجملة تخرج من فم احدهم-احدنا عشان محدش يزعل-تحشر جملة اعتراضية بينهما تحمل دائما ضرورة محاربة الفساد فى كافة صوره واشكاله وضرورة الحض على هذا.

اقوم اغيب والاقى ايه يا اسيادنا؟...من كان يتحسر على مانهب يبلع كلامه ويساند احد اعصاء المحليات-حزب وطنى طبعا- ويقول مظلوم والله ويساند احد اعضاء مجلس الشعب السابقين-حزب وطنى اكيد- ويقول انه لم يستطع فعل شىء وان المنظومة الفاسدة لم تدخر جهدا فى تكبيله من جميع الاتجاهات .

هنلاقيها منين ولا منين يعنى؟...فى قمة الهرم حكومة ولائها بنسبة 80% لحزب فاسد ولرئيس مخلوع. على الساحة مصادر قضائية تصرح ان استدعاء مبارك للتحقيق معه امر وارد...الطم بحجارة؟!...لما ده وارد امال ايه اللى واجب؟!.فى قاعدة الهرم اعضاء مجالس محلية راكبين ادمغتهم ومصممين على البقاء فى اماكنهم لاخر رمق فى كرامتهم واعضاء مجالس نيابية نجحوا بالتزوير واخرين استبعدوا من ترشيحات الحزب الكريه الفاسد يحاولون الالتفاف والدخول من سلم الخدامين الى الساحة مرة اخرى.

طب ليييييييييييييييييه؟!....هل قامت الثورة ليجلس المستبعهدون من ترشيحات الحزب الساتقط الكريه الفاسد على مقاعد من اختيروا على حسابهم؟!.هل مات ما يربو على ثلثمائة بسبعين من خيرة شباب مصر واصيب الالاف بعاهات مستديمة من اجل تغيير اوضاع معينة داخل الحزب الساقط الكريه الفاسد؟!

اتغاظ ياعم الحج معايا لو سمحت....السائد حاليا ان كل من عطس احمد عز فى وجهه وادار وجهه بعيدا فى امتعاض صار يتاج بذلك وبدا مناصروه بالثرثرة التى تفضى بتنصيبه اماما للمعارضين وكاشفا لفضائح الفساد الذى كان هو جزء منه.عااااااااااااااااار على المرء ان يكون فى وقت من الاوقات قيادى فى الحزب الساقط الكريه الفاسد وعااااااااااااار عليه ان ينتمى اليه حتى ولو بمجرد كارنيه لتسهيل المرور فى كمين او للاستفادة من رحلات المصايف التى ينظمها الحزب.

العاقلين بيقولوا يبعدوا ويخزوا ويخلوا عندهم دم وانا بقول معاهم...مقترحات العزل السياسى التى تقضى بابعاد كل من انتمى للحزب الساقط الكريه الفاسد مقترحات عاقلة وعادلة ولااااااااااااااااااااااابد من تنفيذها وان لم تنفذ على المستوى السياسى ارجو تنفيذها على المستوى الشعبى ويكفى يكفى يكفى جدا جدا جدا جدا ما فعلوه بنا طوال الفترة الماضية.

هناك 7 تعليقات:

هبة فاروق يقول...

حلو قوى يعنى نصيب كل واحد فينا 50الف طيب فين هما ولا حيركبو اجنجة زى اللى قبلهم
انا اؤيد كلامك فى ضرورة ابعاد كل من انتمى للحزب الساقط الكريه الفاسد وميدان التحرير واسع ويساع من المتظاهرين مليون
تحياتى لموضوعك الجاد الذى صيغتة بطريقة خفيفة وطريفة
تحياتى

Wish I were a Butterfly ... يقول...
أزال المؤلف هذا التعليق.
Wish I were a Butterfly ... يقول...

ربنا يستر فعلا. و معاك جدا في موضوع محاكمة الرئيس و إنها حاجة تغيظ جدا. زي ما غاظني جدا لمـا كانوا بيسألوا أحمد شفيق و يستنكروا..هو ليه محاكمة العادلي على قضايا أموال بس لحد دلوقتي؟؟ الرد كـان ببساطة إن فيه أولويات!! و بعدها قال إنه دة الملف اللي وصل للنائب العام الأول فبدؤه. هو بجد ببساطة كدة يقولوا إن كــــل اللي حصل في التحرير دة مش هو أهم الأولويات؟ و إن محاولة تهدئة الناس شوية و رد إحساس إن لينا قيمة دة مش أهم الأولويات فعلا؟؟
مع حضرتك جدا في إنه مش يبقى فيه أي وجود لا للحزب الوطني ولا لأي وجوه منه. بس ربنـا يستر على الفترة الجاية و الثورة تكمل أكتر

تحياتي لحضرتك و لحلمك

مرايتى يقول...

بصرف النظر عن نصيب كل فرد كام لأنى أشك إنه يحصل فى يوم من الأيام إن الفلوس دى حتى لو رجعت تتوزع كده زى ما بنحلم

بيتهيألى بعد إلى حصل ما ظنيش إن لسه فى حد من أعضاء الحزب ده يملك الجرأه إنه يتكلم حتى عن إنتمائه للحزب ده إلى أخد من الكراهيه عند المصريه ما يكفيه حتى لو فيهم ناس زى ما حضرتك بتقول بيداروا ورا كلمات الظلم
وإن شاء الله يتلغى اسم الحزب ده أصلا

تحياتى لموضوعك

حلم بيعافر يقول...

هبة فاروق

ده لو الفلوس اتقسمت ولو اتجمعت صح هيطلع اكتر من كده بكتييييييييييير

ايدى كلامى بقى على ارض الواقع واوعى تخلى حد من عندكو يحط صوته لاى حد كان له علاقة بالحزب الوطنى باى شكل من الاشكال


نورتينى

حلم بيعافر يقول...

Wish I were a Butterfly


متفقييييييييييييييين


نورتينى

حلم بيعافر يقول...

مرايتى

احنا بنفررررض مثلا مثلا يعنى

واعضاء الحزب الوطنى معندهومش دم واعرف ناس نزلت الشارع وبدات تلتف على الثورة دول ناس مبيحسووووووووووووووش


نورتينى