الثلاثاء، 5 أبريل، 2011

رسالة الى رئيس الوزراء1



السيد رئيس وزراء مصر

صباح الفل وبعد...

طبعا سيادتك عرفت اننا عقدنا النية على المجىء اليك.انبسط ياسيدى واترك اللجام لاسارير وجهك واعطها حريتها فى التهلل.ابسط يا دكتور ستدخل التاريخ ومن كان يحلم يارجل بان يتجمع المعلمون على هدف واحد ومن كان يصدق يا طيب ان صوتهم سوف يخرج اصلا وهم دون خلق الله فى خضم الاحتجاجات الفئوية التى سبقت الثورة كانوا اسكت هس لا حس ولا خبر وتراهم الان على قلب جدع واحد فليس امامك الا توحد الله وتثنى على فضله وتحمده مقبلا يدك شعر وذقن متذكرا شهداء الثورة متذكرا مصر فى ثوب الغضب واعتبر هذا تهديدا فنحن قوم عدنا لا بنخاف ولا نكش .

بعد هذه الدخلة المرعبة وهذا التهديد السافر احب ان اقول لك يادكتور اننا اهل وانك حبيبنا ولن نرضى لك الا الطيب ولن نتمنى لك الا كل خير فلا تقلق احنا كنا بنهزر معاك شيخ.

ستسمع زبدة القول الان وتعرف مطالبنا الشرعية التى هى حق اصيل على البد لنا.لن افلق دماغك بما تنص عليه وثائق حقوق الانسان ولن احدثك عن حال المعلمين فى بلاد الافرنجة .انا فقط سارتضى بما يخرج من ذمتك .

بص يا مؤمن على بلاطة وبدون مقدمات وكعاكيل ,خريج كلية التربية دون سائر الخريجين من الكليات الاخرى لا يسطيع العمل الا كمعلم وان لم يجد الفرصة للعمل كمعلم يتجه من فوره الى القهاوى وقلة الادب ومعالى جناب سيادة حضرتك لا يرضيك هذا وبما انك رئيس الوزراء فانت بابا وانت ماما وانت عمرو دياب-انور وجدى بقت قديمة غيروا بقى-ويجب عليك ايجاد الحلول لذلك فاماما ان تضيف مزايا لخريجى هذه الكلية تجعلهم صالحين للعمل فى مهن محترمة ان تعثر التحاقهم بسلك التدريس او ان تلغى هذه الكلية من الاساس وانا عن نفسى افضل الحل الاول فهو ذو قيمة يعنى مثلا الواحد يتخرج من تربية ويكون صالحا لان يعمل معلما وطبيبا ومهندسا وصاحب شركة عز الدخيلة بعد التاميم .

التكليف يا كابتن ,التكليف وحياة ابوك,يعنى رضينا بالهم والهم مش راضى بينا؟!!...انت لا تعرف ماذا يلاقيه طلبة التربية فى مصر من اجل الشهادة اللعينة ولا تعرف طبيعة هيئة التدريس داخل هذه الكليات ولا تعرف انهم جعلوا العملية التعليمية فيها حفظا على حفظ وصما من بعد صم ولولا كرم الله يا مؤمن لفسدت العقول وتساوينا بالعجول .رغم كل هذا ننجح وننتظر العمل فلا ياتى .قامت مصر وانقلب الحال فيها وصار ماكان باعلى فى اسفل سافلين وصار المهدر المنفى فى مكانه الطبيعى فلا يصح ان يستثنى التعليم من الاصلاح ونحن حجر الزاوية فى العملية التعليمية باكملها وان بدا طلبنا فئوى فهو فى الاصل لمصلحة البلد فنحن من سيحملها على اكتافنا التى من واجبك ان تعدلها وتدعمها كى تستطيع ان تحمل الوطن باعبائه ومشاكله.

لك منا كل التقدير والاحترام ومش هقولك بيس زى العيال السيس لاء انا هاسترجل واقولك يللا باى

هناك 5 تعليقات:

Amwaj يقول...

خوووش رسالة لووول :p
بس بلاش التهديد يا عم

فلها وربك يحلها :)

ENG./ELSAYED,PMP يقول...

مساء الخير ... انا اول مرة عند حضرتك ف المدونة ... وإن شاء الله كلها 20 سنة وتفرج ... مصر حطت رجلها على الطريق الصح ... وعلى فكرة انا مع اقتراحك الاول بتأهيل خريج تربية إنه ممكن يبقى سبع صنايع ... بس ارجو تعميم الفكرة ... لأن زى ما انت عارف ان
The empty hand , is the dirty hand
المثل ده من اختراعى الوقت على فكرة واعتقد انه له مقابل ف اللغة العربية - اكيد طبعاً امال انا جايبه منين - المهم علشام مطولش عليك - ولا على ايه هو احنا كلنا بقى ورانا ايه - الفكرة من حيث المبدأ كويسة يعنى ممكن بردوا المهندسين والاطباء والمحاميين يبقوا بتوع كله والله ما عيب ... طيب صلى ع الحبيب ... الباشمهندس عصام شرف اساساً مهندس طرق يعنى بتاع اسفلت ... وسيبك من موضوع الدكتوراه - عارف ليه - لان اى دكتوراه ف الدنيا بتبقى فى فسفوسة ف العلم ، يعنى الراجل اخر حاجة محترمة اتعلمها كانت الطرق الأسفلتية وليس لها اى علاقة بالطرق الصوفية طبعاً ، واصبح رئيس وزراء مصر ، يبقى فين المشكلة لما تبقى ساعدتك وكيل وزارة الزراعة مثلاً والعبد لله المسئول عن الملف المائى ... وبكده ممكن مصر تصحى الصبح تلاقى الهرم ف الغردقة ... ونهر النيل تحت السرير ...!

مساء الجمال والجودة

حلم بيعافر يقول...

امواج

الناس مبتجيش غير بالتهديييييييييد

خلينا نشوف مصالحنا بقى

حلم بيعافر يقول...

البشمهندس

امثالك واقتراحاتك قيد النقاش

SaSo يقول...

ادى ياعم المطالب الفئويه اللى جايبانا ورا