الخميس، 26 مايو، 2011

حتى النصر



اموت واعرف مين اللى ماسك عجلة الانتاج...عيل واطى ونتن فاكرها لعبة ومش راضى يسيبها...ياض سيب العجلى ...سيب العجلة ياااااااااض....رجعنا تانى للمرض القديم اللى كان جايبنا ورا وبدا مدعو العقل يتكلموا ويحكوا ويحرقوا جاااااااز فى الفاضى...احب اقول لدكتورة الجامعة اللى اتكلمت فى العاشرة مساءا امبارح و كانت زعلانة ومقهورة ان ابنها بيناقشها وصوته علا شوية وهو بيكلمها اننا لما نزلنا حرقة عليهم وحرقة ع الوطن كله...انا واحد من الناس كنت هاتشل لما شفت البلطجية فى جامعة عين شمس رافعين المطاوى فى وش الدكتور عبدالجليل مصطفى وفى وش رضوى عاشور واحب اقول برضه اننا اتحكمنا 30سنة ورجعنا فيها مئات الخطوات لورا بادين وافكار اسات1ة جامعة ....يللا بقى كل حى منه لله وخلاص.

رغم ان الميادين المصرية خلال ال18يوم اللى قبل التنحى كانت تعج بالمعجزات اللى زلزلت كيان الدنيا كلها الا انها مطالبتش بمعجزات قصاد اللى قدمنه...طالبنا بالحرية وقالوا مينفعش السجان يمشى لانه لو مشى البلد هتغرق واهو مشى والبلد مغرقتش...طالبنا باسقاط الدستور وقالوا انه لو سقط هيبقى فيه فراغ دستورى وخرم كبيييييييير صعب يتسد واهو سقط ومشفناش اخرام ولا حاجة ...قلنا يادعان امن الدولة كخ قالو لو اتحل الايادى الخفية ستعبث باماكن حساسة فى جسم الوطن واو اتحل والبلد فضل بشرفه بل زد على ذلك البلد رفع راسه فى وسط الدنيا كلها...

يا ناس ياللى بتديروا البلد ...يا مؤمنين يااهل الله ...هو احنا طالبين حاجات صعبة؟!...طالبين معجزات؟!...هو انتو هتتشلوا لما تبداو حتى فى مناقشة المطالبات المرفوعة؟...هى اعادة هيكلة الاجور ووضع حد ادنى واعلى للاجور دى صعبة؟...هتكلفكوا حاجة؟...مراعاة ضمائركم ومراعاة ربنا فى مصابى الثورة هتوقف الدنيا؟!...فرض الامن فى الشارع صعب؟!...انا عمرى ماشفت ناس بتعمل مظاهرة عشان تطلب برجوع الامن للشارع...دى فضيحة دى كارثة دى بلوة ...مش عارفين تفرضوا الامن؟!...لو مكنتوش عارفين كنا قلنا ماشى انما انتو عارفين ومبتعملوش للاسف .

هناك 3 تعليقات:

شمس النهار يقول...

تحس ان كل شوية يخوفونا ويعملولنا شوية اكشن ورعب
وتصدق لا بنخاف ولا بنترعب

وبقول للمجلس العسكري
شكرا
بس ملعوبة انك ماتنزلش تحرس التحرير
يعني ماانت كنت موجود يوم الجمل
عملت ايه الشباب همه اللي عملوا

MaNoOoSh يقول...

بصراحة انا لو مكان اللى ماسكين البلد اتكسف على دمي شوية

دول حتى لما اقرو حد ادنى وحد أقصى مفيش اى منطق فى الاجور

طب ال800 ملطوش دول ايه مفرداتهم.. طب ليه 8000 ادنى و 28 الف اقصى؟

طب هيتطبقو امتى فى خلال الخمس سنين اللى بتتكلمو عنهم

ناس متجيش الا بالعين الحمرا
وبردو هنفضل وراهم لغاية ما يسيبو العجلة ويمشو حال البلدبما يرضى الله

حلم بيعافر يقول...

الحمدلله

كان يوم حلو