الاثنين، 6 يونيو، 2011

كل ثورة وانت طيب...



كل ثورة وانت طيب
يابن مصر

ياللى خالد
ياللى شاهد ع الغضب
ياللى والد من انينك
ناااااار فى وش ابو لهب
كل ثورة وانت طيب
ياقريب
ياللى قتلوك العسس
اللصوص
مصوا دمك
سرقوا منك....
حتى النفس
الجاموس
اللى دايس ع العباد
اللى طايح فى البلاد
كل ثورة وانت طيب
كل ثورة ولك ميلاد
مصر بتحاول تقوم
بس على مين تتسند؟
لسه مش صافى الونس
مش نضيفة
لسه مليانة روث
كل ثورة وانت طيب
مصر لازم تتكنس
بس مش لاقيين مقشة
كل يوم بيقولوا عشة
وهى قصر
كل يوم بيقولوا وحشة
وهى مصر
كل يوم بيقولوا سد
وانت راسم ميت طريق
كل ثورة وانت طيب
يابرىء
والمدان ملعون بفجره
والميدان شامخ مضىء
بيشد فجره
كنت موجود مش كده؟
الادان كان عالى جدا
والمؤذن صوته شايل كل شىء
حب
غضب
انتفاضة
شايل ارادة
كل مادا بتقوى اكتر
حاجات كتيرة اتفسرت
العبادة
الله اكبر
م النهاردة مفيش اله غير فى السما
م النهارده بلدنا حرة
مش ذليلة ومرغمة
السيادة
انت سيد فوق واديك
انت حاكم
انت بس مفيش شريك
كل ثورة وانت عايش
فارد ملامحك ع الشجر وع البيوت
رافض تموت
كل ثورة وانت عيش
كل ثورة وانت قوت
كل ثورة وانت مصر
عايرونا غيرهم بالرغيف
وهما عايروا بالحياة
(دبابتنا خارجة عارفة واخدة امر
كان زمانكم مطحونين
كان زمانكم كوم عجين)
قلنا طظ
كان زماننا لبكرة مهر
كان زماننا بجناحات
هو احنا يعنى هنطلع احسن م اللى مات؟!
يا ايها الجنرال تيقن
اللسان اللى عرف معنى الكلام
عمره يوم مايقول سكات
فالحر يكره كل قيدِِ
ويموت كمداََ
لو ابدلتموه بالرق رقاََ
كل ثورة وانت حقاََ
نور وطهر
والسلام ياشهيد امانة
للى كشفولنا عمانا
للى اصحاب الفرح
نصبوا الامل
غصبوا الجراح
فجرح فجرح قام واستجاب
قام واندمل
كنت بضحك لما باسمع
ان اصحاب الفرح دايما غلابة
كنت بضحك لو يقولوا تعبانين
وان الفرح اصله كمين
فصله حساب
خد وهات
وان الحضور يوازيه غياب
واهو انت اهوه
اتاخدت
و فضلنا احنا

زى مايكون ده فرحنا
بس اصلا انت صاحبه
وانت ساحبه فين ماتبقى
وهو تابعك
واطبع طبعه بطبعك
عند ظنك لن يخيب
عشان كده
دايما يبكينا الفرح
لما تحرك دمعنا ذكرى التمن
فكل ثورة وانت طيب


هناك 10 تعليقات:

فتاه من الصعيد يقول...

حلو اوييييي

د/عرفه يقول...

إحساس جميل
يا ابوحميد


نضالنا مستمر


وفجر الصباح لازم يرجع يطل

فتافيت يقول...

مصر بتحاول تقوم
بس على مين تتسند؟
لسه مش صافى الونس
مش نضيفة
لسه مليانة روث
كل ثورة وانت طيب
مصر لازم تتكنس
بس مش لاقيين مقشة
كل يوم بيقولوا عشة
وهى قصر
كل يوم بيقولوا وحشة
وهى مصر


تحفــــــــة
مش واخدة على كده منك :)

محمد يقول...

كلام جميل احساس رائع ..

أحسن تـستاهـل يقول...

ايه ده؟؟؟؟؟؟؟؟؟؟
من امتى؟؟
شعر؟؟
انا هبلغ عنك

ولد!!!!! ده حلو.. تؤ.. شكلي هقولك برافو :)

مها ميهوووو

حلم بيعافر يقول...

فتاة من الصعيد

تحياتى)))...

حلم بيعافر يقول...

د/عرفة

منور ياضكطرة

حلم بيعافر يقول...

فتافيت

طول عمرى يابنتى

حلم بيعافر يقول...

محمد

اوعى تكون الزيات؟)))...

حلم بيعافر يقول...

احسن تستاهل

تابعى انت بس وهتشوفى)))..