الأربعاء، 29 يونيو، 2011

شغلتك ع المدفع ايه؟



محدش يطالب الشارع بالهدوء ومحدش يتفلسف علينا دللوقتى ويقولنا البلد وما البلد .البلد اللى متحافظش على اولادها تولع بجاااااااااااااز وسخ ويغور من يقومون على ادارتها فى ستين الف داهية لاننا زهقنا وطهقنا واتشلينا ومش ناقصين مرض تانى.انا اول مرة فى حياتى اشوف قيادة كده.مش فالحين غير فر فى صناعة الخوازيق للشعب.واهم حاجة انهم سايبين المحاسيب والشمشرجية يبرطعوا فيها وقال ايه قانون...يلعن ابو القانون لابو الناس اللى دماغها تخينة ومش راضية تفهم ان مصر حصل فيها ثورة لابو الناس اللى اللى ملهاش شغلانة غير المط والتطويل والتبويخ وهياخدوا ايه انا مش عارف...قابضين مثلا؟

هو احنا كل خمس دقايق تحصل كارثة ومصيبة؟...ومتجيش غير فوق دماغنا احنا ؟...متقعش الكارثة دى مرة على دماغ حد من الاغاوات؟...ودايما احنا اللى غلطانين؟...يعنى لو ام المحاكمات بقت محاكمات بجد والاوساخ اللى ضربوا على الثوار النار اخدوا جزائهم بالعدل هيحصل حاجة؟...مش ممكن نهدى شوية بعدها؟...ولا هو حلو اللى بيحصل وعاجبهم كده كل شوية تاجيل تاجيل ولاء وترقية كمان تاجيل وترقية ...عمر حد شاف كده؟...القاتل بدل مايتحاكم يترقى؟!...

وبعدين مرشحى الرئاسة شغلتهم ايه ع المدفع دللوقتى؟...مبيعملوش حاجة فى دنيتهم غير انهم يحبطونا مثلا؟...كل شوية تصريح غبى وزيارة ملهاش اى لازمة؟...مش فاكرين الناس اللى فضلهم عليهم ليه؟...مش فاكرين الشهداء اللى مش عارفين ياخدوا حقهم بالقانون ليه؟...مش فاكرين اهالى الشهداء اللى بقوا دللوقتى بيتضربوا فى الميادين ليه؟...هما لو اتحدوا مع بعض واصدروا بيان بتلاتة تعريفة مش ممكن ياثر؟...مش ناويين يعنى يعملوا حاجة تشفعلهم؟

ليست هناك تعليقات: