الأحد، 3 يوليو، 2011

انزل يوم الجمعة عشان تقدر تبص فى المرايا



احترت فى تفسير حالة الندالة التى تسطر على الساحة المصرية الان ولم اجد اسباب كافية الا السعار والهاث وراء السلطة من جانب والجبن والاستعداد للانتقال من استعباد الى استعباد اخر .

مرشحو الرئاسة اللى مكنش معظمهم يجرؤ انه يحلم بترشيحه لرئاسة الجمهورية نسيوا او تناسوا اللى ركبوا فوق كتافهم وطلعوا للكرسى اللى قاعدين عليه دللوقتى وحاطين رجل على رجل.

الناس اللى لو اتضربوا بالجزم زمان من اوسخ امين شرطة فى الداخلية كانوا بيمشوا ساكتين راضيين نسيوا مين حررهم من الهم اللى كانوا فيه وخلاهم ماشيين بكرامتهم رافعين راسهم دابين صوابعهم فى عين التخين.

الاحزاب الكرتونية واللى بتقول على نفسها حقيقية ومش كرتونية نسيت التمن اللى اتدفع عشان الحياة ترجعلها وتدب فيها الروح من تانى وتخلى رؤسائها يتنفخوا ويتفشخروا ويقولوا احنا روؤساء احزاب.

كله تاجر وكله لسه بيتاجر فى الفضائيات اللى مليانة مرة بام شهيبد ومرة بمصابين ومفيش حاجة بتحصل ومفيش حاجة هتحصل الا بمظاهرات ومليونيات زى الاول لكن للاسف المليونيات اللى بتتطالب بالحق فى الدم بقت محتاجة حشد.

من اسبوعين واكتر وعمليات الحشد ليوم للجمعة الجاية على ودنها والناس ولا فى دماغها وكل اللى على لسانهم ان كده خلاص وكفاية...طب لما كده خلاص وكفاية بتقعدوا تمصمصوا فى شفايفكو لما صورهم تيجى.

المفروض لما يتقال فيه جمعة اسمها جمعة القصاص الناس تسيب بيوتها ويخرجوا للميادين زى النمل وميرجعوش الا وفيه قرار اتاخد ع الاقل عشان نعرف نمشى لقدام خطوتين على بعض ونفط الحجارة اللى مربوطة فى رجلينا دى.

مش هنطلع لقدام غير لما الملف ده بالذات يخلص وطول ماهو مفتوح مفيش حد ابن ستين كلب يجى ويعيب ع النشطاء اللى معندهمش دم ومش خايفين ع البلد لان اللى صحيح مش خايف ع البلد هو اللى يسيب ملف زى ده مفتوح.

وبلاش ندالة ونفتكر فضل الناس اللى ماتت واتصابت عشان كانوا بيطالبوا بمطالبنا والجدع جدع والجبان جبان واللى بيدور على الحق ينزل ويتظاهر ويصرخ ميقعدش قدام التلفزيون يمصمص فى شفايفه قدام التلفزيون وخلاص.

الموضوع اخلاقى بالدرجة الاولى ومش هيخرج غير اللى عنده دم وبيحس وبيشم .ولسه فيه فرصة عند الناس اللى قعدت انهم ينزلوا ويشاركو ويخلصوا ضميرهم.

وضميرك هو الحكم ولو انت شايف نفسك راجل لابد تنزل ولو انت شايفة نفسك ست حرة لازم تنزلى لان اللى مش هينزل لا هو راجل ولا هى ست حرة.

انزل يايارجل تعبنا من المتاجرة وتعبنا من الطرمخة وتعبنا من نفسنا ومبقيناش قادرين نعيش...مبقيناش قادرين نبص فى المرايات ...هو احنا ايه؟...كل ده ولسه لا عارفين ناخد حق ولا باطل؟

الموضوع مش سياسة خالص.مش خلاف ولا صراع على كرسى ولا صراع ايدلوجيات.الموضوع ببساطة دم.دمى ودمك .كان ممكن سيادتك تكون مش موجود دللوقتى.ببساطة كان زمانك ميت.حتى ولو ملكش فى السياسة.حتى لو مكنتش نزلت التحير.فيه ناس ماتت فى الهيصة ولا كان ليها فى الطور ولا فى الطحين واظنك بما انك متابع تلفزيون وبتحب تسمع المآسى عارف كده.

بلاش انت.اعتبر نفسك نازل تطالب بدم اخوك.دم ابوك.دم امك.دمك ياخى.وبلاش ندالة بقى خلاص مش وقتها .انزل ومعاك مطلب واحد.محاكمة السفاحين .بذمتك ودينك ياشيخ ما بتتقهر لما بتسمع انهم لسه فى شغلهم ولسه مااتحاكموش؟!...

وكفاية بقى زهقنا...عايزين قصاص يشفى غلينا.يبرد صدورنا وصدور اهالى الناس اللى استشهدت دى ده دم مش ميه ياجدعان دم مش ميه ياحزب الكنبة..ياكل كنباوى سامعنى ...بالله عليك ياشيخ تنزل....بحق الاسلام عليك تمنزل وتطالب بحق الناس دى...بحق الانسانية عليك تنزل وتطالب بحق الناس دى...بحق الوطن عليك تنزل وتطالب بحق الناس دى ومترجعش من غيره.

ليست هناك تعليقات: