الأحد، 10 يوليو، 2011

(كم ذا بمصر من المضحكات)



ربنا كبير والله العظيم ربنا كبير .فى وسط القلق المتزايد الذى يحوطنا من جميع النواحى غامرا كل على حسب حبه لمصر واخلاصه لها يظهر طوق النجاة الذى ينتشلنا من الحالة النفسية السيئة الملبدة بالهموم ,من بحر الظلمات على راى الاوبريت الغنائى الخالد(السطانية) ويلقينا الى حيث ننقلب على ظهورنا ونرفص من الضحك .

الاخبار المتواترة عن حالة الاكتئاب والضيق النفسى لدى المخلوع -كنت هقول المرحوم-حسنى مبارك شىء يثير العجب.اول ما تعجب له هو الدم الذى اندفع فجاة يجرى فى عروقه فلو كان هذا الرجل رجلا يحس ويخجل لكان رحل فور زحف الناس الى الشوارع والميادين مطالبين برحيله ...اشمعنه حس دللوقتى يعنى؟...ثانى ما يثير العجب الكلمة ذات البنط العريض التى تتصدر صدر الصحيفة الناشرة للخبر -انفرااااااااااد-كانها جابت الديب من ديله ...يعنى واحد كان رئيس جمهورية من شهور وكان ابنه هيقعد مكانه وكان عياله واكلين البلد فى قلوبهم وفجاة كله راح راح راح عايزينه يبقى ايه ؟....مجعوص مثلا؟

الكلام فى السياسة حق لكل الناس .وفوق ذلك فهو واجب.لو مااتكلمناش احنا فى سياسة البلد نجيب فليبينيين يتكلمولنا مثلا؟...لكن فيه اشخاص معينة لما بتتكلم فى السياسة تضطرك الى التقيؤ ان كنت بتقرف وتخليك تموت م الضحك اذا كانت نفسك حلوة زيى .يعنى مثلا يا مؤمن ياللى بتصلى ع النبى فى قلبك الكلام فى السياسة يليق على مدحت شلبى ولا على مجدى عبدالغنى ازاى؟....هما ليهم مقولاتهم الخالدة صحيح زى احنا بنشكر رجال الامن وبيبو وبشير وانا اللى جايب الجون فى ماتش هولندا صحيح بس الكلام فى السياسى عايز حد عاقل اووووو حد مجنون بس مش عايز حد ......... متفهمنيش غلط انا عامل نقط لزوم الحرية .

المطبلاتية او اللى عايزين ياخدوا الحقنة وبيدوروا على حد يديهالهم بعد ما للى بالى بالك راحوا طرة وشرم على حد تعبير الكاتب الصحفى محمد صلاح.نفس الطريقة ونفس الغباوة هوووو بغباوته هو هو اللى كان بيطبل لمبارك بيطبل للمجلس العسكرى بنفس الغة وبنفس اللهجة .دول ماشى جيناتهم الوراثية كده ومش قادرين يتغيروا انما اللى يغيظ بقى الناس اللى خايفة يتقال عليها انها مشيت ورا الموجة فتهاجم الثورة عشان يبقوا اسمهم ممشوش ورا الرايجة .

اتفرج على اخبار صحة المخلوع واكتئابه واخبار مقدمى البرامج الرياضية واخبار المطبلاتية واضحك من قلبك.



هناك تعليق واحد:

جريده مصر اليوم يقول...

مدونة رائعة وجميل جدا شكرا لك واتمنى لك النجاح والتوفيق ...